Kabonganaakin Nakomai, Iriirai—Ibukin te Mweenga ao te Taromauri

Nakomai, Iriirai bon ibukiia ake a tangiria n reirei man koroboki aika tabu—n tatabemaniia, n te utu, ao i nanon kiraati n te Taromauri. Ngkana ko tuai ni kamatebwaia koroboki aika tabu n taai aika a nako, e kona ni buokiko te boki n ibuobuoki aei ni waakina am kamatebwai. Ngkana ko a kaman karekea te anua ae tamaroa ni kamatebwaian koroboki aika tabu, e kona te boki n ibuobuoki aei ni buokiko ni karekei am atatai aika a na rangi ni uaana riki.

Te mweenga bon te tabo ae nakoraoi ibukin reiakinan te euangkerio. A kona am tia reirei n te taromauri ni boutokaiko, ao ko kona ni karekea te kaunganano mairouia kaain te uoote ake tabeman. Ma te kamaiuaki man te maiu n tamnei, ko riai ngkoe ma kaain am utu ni kamwarakeaki n ana “taeka te Atua ae raoiroi” (Moronaai 6:4; taraa naba Russell M. Nelson, “Taeka ni Kaukuki,” Riaona, Nob. 2018, 6–8).

Kabongana te boki n ibuobuoki aei n aanga aika a na ibuobuoki nakoim. Kanoana a kaota tabeua koaua aika akea tokiia ake a kuneaki n te O Tetemanti. A kaotii naba iango ma waaki ni kakukurei are a na buokiko ni kamatebwaia koroboki aika tabu iroumi n tatabemani ngkami, ma ami utu, ke ma raoraomii. Ngkana ko kamatebwai, ira ana kairi te Tamnei ni kunei koaua mai karawa aika a uaana nakoim. Ukora ana rongorongo te Atua ibukim, ao iriira taian kairi mairoun te tamnei aika ko karekei.

Nakomai, Iriirai—Ibukin te Mweenga ao te Taromauri bon te karikiram ibukin reirei n te Tabati n te Moanrinan, kairake ao ikawai n te Reirei n Tabati, reirei n te Bootaki n Ataeinnaine ao bootaki n te kooram n te Nakoanibonga ae te Aaron. Ngkana ko angareirei n teuana man aikai, ko a kaungaaki ni kabongana te kanoa n reirei ake a kaotaki n te boki aei ibukin am kamatebwai ngkai ko katauraoi n angareirei. Moanna man oin am taneiei i nanon koroboki aika tabu. Te kabanea ni kakaawaki ni katauraoakim e na riki ngkana ko ukeuke i nanon koroboki aika tabu ao ni karekea ana kairi te Tamnei ae Raoiroi. Taratarai koaua aika akea tokiia aika a na kona ni buokiko bwa ko na kona n riki n aron Tamara are i Karawa ao Iesu Kristo. E konaa n buokikoNakomai, Iriirai n atai tabeua koaua aikai ao ni mataata n nanon kiibu aikai.

Katikua n am iango bwa reiakinan te euangkerio, nakon te kabanea n tamaroa, e bon boboto iaon te mweenga ao ni boutokaaki n te Taromauri. N taekana teuana, tabem ni koaua bon boutokakiia aomata aika ko reirieniia n aia tai ni kekeiaki ao ni maiuakina te euangkerio ni mweengaia. Tai raraomaeakina aron kaokoron kanoana ake ko na katauraoi ibukiia kaain am kiraati. Ma, anganiia aia tai n tibwauai aia taneiai, aia iango, ao aia titiraki ibukin reirei man booki aika tabu ake a wareki ni mweengaia. Kaoiia bwa a na tibwauai koaua aika akea tokiia aika a tia ni kunei. E rangi ni kakaawaki riki aei nakon karaoan bwaai n reirei riki tabeua.

Teuana raoi oin bukina ngkai ti ikotaki n te kiraati n te Reirei n Tabati bwa ti na boutokaia ao ni kaungaira n te tatabemaniira nako ngkai ti kekeiaki n iriira Iesu Kristo. Te kawai ae beebete ni karaoan aei bon tabekan te titiraki n aron “Tera ae e a tia n reireiniko te Tamnei ae Raoiroi n te wiiki aei ngkai ko kamatebwai ni koroboki aika tabu?” Taian kaeka nakon te titiraki aei a kona ni kairiko nakon marooro aika a uaana ae a na karekea te onimaki iroun Iesu Kristo ao Ana euangkerio.

Imwiina ko kona ni karaoa te marooro ae boboto i aon te kamatebwai ake a kaotaki i nanon Nakomai, Iriiria. Te katooto, te iango n te kamatebwai e kona ni kataua ukoran Itaia 53, n noori taeka ake a kabwarabwaraa ana mwakuri te Tia Kamaiu. Ko kona ni kaoiia kain te kiraati bwa a na tibwai iango ke aia namakin ake a kaungaaki iai nanoia man taeka aikai. Ke ko kona n anaa teutana te tai n tarai taeka aikai n te kiraati.

Ngkana a bootaki kaain te kooram n te Nakoanibonga ae te Aaron ao aia kiraati Ataeinnaine ni katoa Tabati, n tabetai ao e kaokoro bukin karaoakiia ma te kiraati n te Reirei n Tabati. Irarikin ara ibuobuoki i marenara n reiakina ana euangkerio Iesu Kristo, a bootaki naba kurubu aikai n reirei i aon taekan kakoroan nanon te mwakuri ni kamaiu ao te karietataaki (taraa Aeniboki ni Kabuta, 1.2). A karaoa aei i aan ana kaetieti te beretitentii n te kiraati ao te kooram.

Ibukin aei, ao a riai bootakin te kooram ke te kiraati ni moanaki iroun temanna kaain te kooram ke te beretitentii n te kiraati ni kaira te marooro iaon aia kekeiaki n, aron te katooto, maiuakinan te euangkerio, karaoan te mwakuri n ibuobuoki nakoia kainnano, tibwauaan te euangkerio, ke n irii mwakuri n te tembora ao n rongorongon te utu.

Imwiin te bootaki n reirei aei, te tia reirei e na kaira te kiraati ke te kooram ni bootaki n reiakina te euangkerio. Taan kairiiri aika ikawai ke kaain te kiraati ke te kooram a kona n anganaki aia tai n anga reirei. A karaoi mwioko aikai te beretitentii n te kiraati ke te kooram, n reitaki ma taan kairiiri aika ikawai.

Aomata ake a mwiokoaki bwa a na anga reirei a riai ni katauraoia man kabonganakin bwaai n anga reirei inanon te kamataata n te wiiki n Nakomai, Iriirai. Inanon taian kamataata, te kanikina aei e na kaotii waaki ni kakukurei aika tau nakoia kairake. Ma, iango riki tabeua iaon te kamataata ni kanoana a kona ni kabonganaki bwa bwaai ni kamatebwai ibukiia kairake.

Ibukin te katooto n te akenta ibukin bootaki n te kooram ao te kiraati, taraa abentekiti D.

Am katauraoi n reireiniia kaain te Moanrinan e moanaki ngkai ko kamatebwai booki aika tabu i bon iroum ao ma am utu. Ngkai ko karaoia, tauraoi nakon taian namakin n tamnei ao nonori mairoun te Tamnei ae Raoiroi i aoia ataei n am kiraati n te Moanrinan. Bwabwaina te tataro; ao e na kona te Tamnei ni kaungako ma iango aika a na kona ni buokiia n reiakina ana euangkerio Iesu Kristo.

Ngkai ko katauraoi n angareirei, ko kona n karekei riki kairi mai karawa man rinanoan iango n reirei i nanon Nakomai Iriirai—Ibukin te Mweenga ao te Taromauri. Kanoan te boki n reirei aei n tatabeua nako iai i nanona te mwakoro ae atuunaki n “Iango ibukin Reiakinaia Ataei.” Iangoi iango aikai bwa iango aika a na kona ni buokiko ni moana namakinan te kairi mai ieta. Ko kinaia ataein am kiraati n am Moanrinan—ao ko na kinaia riki ngkana ko reitaki ma ngaiia n te kiraati. E kinaiia naba te Atua, ao E na anganiko kawai aika tamaroa ibukin reiakinaia ao ni kakabwaiaia.

E kona n ae a na bae n tia ataein am kiraati ni karaoi tabeua waaki ni kakukurei inanon Nakomai, Iriirai ma aia utu. E Tamaroa Anne. E tamaroa kaokiokan bwaai. Iangoia ni kaoiia ataei bwa a na tibwaia ma ngaiia n tatabemaniia nako te bwai ae a reiakinna ni mweengaia—ngkoe naba ko riai ni bairei kawai ibukiia ataei bwa a na tibwatibwa e ngae ngke aki reiakinna ni mweengaia. Ataei a reiakini riki koaua n te euangkerio ngkana a kaokiokaki koaua aikai rinanon waaki ni kakukurei aika a kakaokoro. Ngkana ko nooria bwa te mwakuri ni kauring e raoiroi ibukiia ataei, iangoia bwa ko na kaokiokia, riki ngkana ko reireiniia ataei aika a uarereke riki. Ko kona naba n rinanon te mwakuri ni kauring man te reirei are mai mwaaina.

N namwakaina ake nimaua Tabati i nanona, a kaungaaki taan reirei bwa a na onea te reirei n Nakomai, Iriirai are e kaotaki n te kanimaua n Tabati ma teuana ke e mwaiti riki man waaki n angareirei i nanon “Abentekiti B: Ibukin te Moanrinan—Katauraoaia Ataei nakon Maiuakinan ana Kawai ni Berita te Atua.”