Vakasama Eso me Vakavinakataka na Vuli e Vale kei na Lotu

Na ivolanikalou era sa vosa ni Kalou, o koya mo kerea Vua na veivuke mera kilai vakamatata kina.

Na veika kecega e vakadinadinataki Karisito (raica na 2 Nifai 11:4; Mosese 6:63), qai navuca mo vola se makataka na veitikina e vakadinadinataka na iVakabula, vakatitobutaka na nomu lomani Koya, ka vakavulica na sala mo muri Koya kina. Ena so na gauna na dina me baleta na iVakabula kei na Nona kosipeli era tukuni vakadodonu, ka so na gauna era vakaibalebaletaki ena dua na ivakaraitaki se italanoa. Tarogi iko mada, “Na dina tawamudu cava so era vakatavulici ena veitikina oqo? Na cava era vakavulica vei au na veidina oqo me baleta na iVakabula?”

Yadrava matua na nomu vakasama kei na veika o vakila, kevaka mada ga e sega ni sema ki na veika o wilika tiko. Na veivakauqeti oqo e rawa beka ni ka sara ga e vinakata vei iko na Tamada Vakalomalagi mo vulica.

E vuqa tu na sala o rawa ni vola kina na veivakauqeti e yaco mai nio vuli tiko. Me ivakaraitaki, o na raica beka ni veivakauqeti vei iko eso na vosa kei na malanivosa ena ivolanikalou; e rawa ni o makataki ira ka vola na nomu nanuma me vaka e dua na idusidusi ena nomu ivolanikalou. Sa rawa talega ni o maroroya e dua na ivolaniveisiga ni veivakararamataki, veika o vakila, kei na veivakauqeti o ciqoma.

Na veitalanoataki ni veivakararamataki mai na nomu vuli yadua e sala vinaka mo vakatavulici ira kina na tani, ka vukea talega me vaqaqacotaka na nomu kila vakamatata na veika o sa wilika. Wasea na veika o vulica tiko vei ira na lewe ni matavuvale kei na itokani (e matanavotu se vakalivaliva), ka sureti ira mera cakava vakakina.

Vakasamataka na sala e vakaibalebale kina ki na nomu bula na italanoa kei na ivakavuvuli o wilika tiko. Me ivakaraitaki, e rawa ni o tarogi iko, “Na cava au sa sotava oti e tautauvata kei na veika au wilika tiko?”

Ni o vulica tiko na ivolanikalou, ena votu mai na taro eso ki na nomu vakasama. Na veitaro oqo e rawa ni semati ki na ka o wilika tiko se ki na nomu bula raraba. Vakasamataka vakatitobu na veitaro oqo ka vaqara na isaunitaro ni o tomana tiko na vuli ivolanikalou.

Me vakuri na veivakararamataki ena veitikina o wilika tiko, vakayagataka na idusidusi e ra,na iDusidusi Vakaiulutaga, na Bible Dictionary, na iDusidusi ki na iVolanikalou, kei na ivukevuke ni vuli tale eso.

Sa rawa ni o kunea na veivakararamataki vakaibalebale eso me baleta e dua na iwase ni ivolanikalou ni o raica na veitikina voleka, oka kina na ituvaki se ituvatuva a vakavurei mai kina. Me ivakaraitaki, na kilai ni nodra ituvaki kei na nodra vakabauta na tamata ka vosa vei ira na Kalou, ena rawa ni vukei iko mo kila vakavinaka na inaki ni Nona vosa.

Wilika na cava era vakatavuvulitaka na parofita kei na iapositolo edaidai me baleta na ivakavuvuli eso o kunea ena ivolanikalou.

Na vulici ni ivolanikalou e sega ni dodonu me vakauqeti keda ga ia e dodonu talega me muataki keda me veisautaki na ivakarau ni noda bula. Vakarogoca na veika e vakauqeti iko kina na Yalotabu mo cakava ni o wiliwili tiko, ka qai cakacakataka na veivakauqeti oqori.

Na serenilotu kei na nodra sere na gonelalai era kune ena Lako Mai, Mo Muri Au. Vakayagataka na sereivakatagi tabu mo sureta na Yalotabu ka vakatitobutaka na nomu vakabauta kei na ivakadinadina ni dina ni kosipeli.

Digia e dua na tiki ni ivolanikalou e vakaibalebale vei iko, ki na nomu vuvale, se nomu kalasi, ka vulica mo cavuqaqataka ena kena cavuti wasoma e veisiga se qitora e dua na qito ni cavuqaqa.

Vaqara na iyaya eso ka veisemati ki na iwase kei na veitikina o wilika tiko. Vakasamataka na sala e sema kina na iyaya yadua oqo ki na ivakavuvuli ena ivolanikalou.

Wilika e vica na tikina, ka qai droinitaka e dua na ka e semati ki na veika o sa wilika. Se o rawa ni vakaraica e dua na iyaloyalo ena iVola ni iYaloyalo Vakosipeli se dua tale na vanua ena Valenivola ni Kosipeli. E rawa talega ni o tabaka e dua na iyaloyalo ka vakaraitaka tu na veika o sa vulica.

Ni o wilika oti e dua na italanoa, sureti ira na lewe ni vuvale se kalasi me ra matanataka. Ni oti oya, veitalanoataka na sala e sema kina na italanoa kina veika o ni dui sotava tiko.

Kevaka e tiko eso na lewe ni matavuvale ka ra sega ni via vakaitavi ena vulici ni ivolanikalou vakamatavuvale, vakaraica eso tale na sala mo sema kina vei ira. Me ivakaraitaki, e rawa ni o wasea na dina tawamudu ena nomu veivosaki ni veisiga se wasea edua na ivolanikalou vakaibalebale ena dua na sala ka o sega ni vunau se suguraki iko yani kina? Na vulici ni ivolanikalou e sega ni dodonu me ra tautauvata ena veimatavuvale kece. Eso beka na gone era na vinaka cake ni ra vulica na ivolanikalou vakayadudua. Mo dau masu ka vakamuria na veivakauqeti ni Yalotabu.