Vakayagataki ni Lako Mai, Mo Muri Au—Me Baleta na Vuvale kei na Lotu

Lako Mai, Mo Muri Au e sa baleta e dua ga ka vinakata me vuli mai na ivolanikalou—vakaikoya, vakamatavuvale, kei na kalasi eso ena Lotu. Kevaka o a sega ni dau vulica vakawasoma na ivolanikalou ena veigauna sa oti, na ivurevure oqo e rawa ni vukei iko mo tekivu. Kevaka o sa matau tu ena vulici ni volanikalou, na ivurevure oqo e rawa ni vukei iko me vakaibalebale vakalevu sara na veika o sotava.

Na vanua vinaka duadua me vulici kina na kosipeli oya e vale. Era rawa ni tokoni iko na nomu qasenivuli ena lotu, ka rawa ni o vakayaloqaqataki mai vei ira na lewe ni tabanalevu tale eso. Ia mo dei vakayalo tu, sa gadrevi mo na vakabulabulataki kei na nomu matavuvale ena veisiga mai na “vosa vinaka ni Kalou” (Moronai 6:4; raica talega na Russell M. Nelson, “iDola ni Vosa,” Liaona, Nove. 2018, 6–8).

Vakayagataka na ivurevure oqo ena sala cava ga e veivuke kina vei iko. Na ituvatuva oqo e vakatakilakilataki kina eso na dina tawamudu e kunei ena Veiyalayalati Makawa. Era vakatututaki talega kina na vakasama kei na itaviqaravi me vukei iko mo vulica kina na ivolanikalou vakai iko, vakamatavuvale, se vakaveitokani. Ni ko vuli, muria na veituberi ni Yalotabu mo kunea kina na dina tawamudu eso e vakaibalebale vakalevu vei iko. Vakaraica na itukutuku mai vua na Kalou vei iko, ka muria na veivakauqeti o ciqoma.

Lako Mai, Mo Muri Au—Me Baleta na Vuvale kei na Lotu sa lewenivuli ni kalasi ni Sigatabu ena Lalai, itabagone kei na uabula ni Matawilivola ni Sigatabu, kalasi ni Goneyalewa, kei na soqoni ni kuoramu ni Matabete i Eroni. Kevaka o vakavulica tiko e dua vei ira na ituvatuva oqo, o sa vakauqeti mo vakayagataka na ituvatuva ena ivurevure oqo me baleta na nomu vuli yadua kei na nomu vakavakarau mo veivakavulici. Tekivu ena nomu sotava ga na veika o sa sotava ena ivolanikalou. Na nomu vakavakarau bibi duadua ena yaco ni ko wilika na ivolanikalou ka qara na veivakauqeti ni Yalo Tabu. Vakaraica na dina tawamudu eso e vukei iko mo vakataka cake na Tamada Vakalomalagi kei Jisu Karisito. Lako Mai, Mo Muri Au e rawa ni vukei iko ni kila eso na dina oqo ka kila vakamatata na tiki ni ivolanikalou eso.

Mo nanuma tiko ni vulici ni kosipeli, ena kena vinaka duadua, e yavutaki e vale ka tokoni mai na Lotu. Se, na nomu itavi bibi oya mo tokoni ira na tamata o vakatavulica ena nodra sasaga mera vulica ka bulataka na kosipeli e vale. Kakua ni leqataka me duatani na lewe ni veika o vakarautaka vei ira ena kalasi. Ia, solia vei ira na madigi mera wasea na veika era sotava, nodra nanuma, kei na taro me baleta na veitikina mai na ivolanikalou era wilika e vale. Sureti ira me ra wasea na dina tawamudu eso era sa kunea. Oqo e bibi cake mai na kena vakacavari edua na iwasewase ni lesoni.

Dua na vuna levu eda soqoni vata kina ena kalasi ni Matawilivola ni Sigatabu oya meda veitokoni ka veivakayaloqaqataki vakai keda ni segata me da muri Jisu Karisito. Dua na sala rawarawa me caka kina oqo oya mo taroga na taro vakaoqo “Na cava esa vakatavulica vei iko na Yalo Tabu ena macawa oqo ni o vulica na ivolanikalou?” Na isau ni taro oqo e rawa ni vakavurea eso na veivosaki vakaibalebale cake e taracake na vakabauti Jisu Karisito kei na Nona kosipeli.

O rawa ni qai sureta na veivosaki e yavutaki mai na vakatutu ni vuli ena Lako Mai, Mo Muri Au. Me kena ivakaraitaki, e dua na vakasama ni vuli ena rawa ni vakatura na vakasaqaqara ena Aisea 53, ka vaqara na vosa e vakamacalataka na ilesilesi ni iVakabula. Sa rawa mo kerei ira na lewe ni kalasi me ra wasea na vakasama se nanuma e vakauqeti ira kina na veivosa oqo. Se rawa ni o taura edua na gauna moni vaqara vata vakalasi na veitikina oqo.

Ni ra sota na kuoramu ni Matabete i Eroni kei na kalasi ni Goneyalewa ena Sigatabu, na nodra inaki ena duidui vakalailai mai na dua na kalasi ni Matawilivola ni Sigatabu. Me ikuri ni nodra veivukei vakai ira ni vulica na kosipeli i Jisu Karisito, e sota talega na ilawalawa oqo me ra veivakasalataki ena kena rawati na cakacaka ni veivakabulai kei na bula vakacerecerei (raica na iVoladusidusi Raraba, 1.2). Era vakayacora oqo ena veidusimaki ni mataveiliutaki ni kalasi kei na kuoramu.

Ena vuku ni ka oqo, sa dodonu me tekivutaka e dua na lewe ni mataveiliutaki ni kuoramu se kalasi ni kuoramu se kalasi yadua na liutaki ni veivosaki ena sasaga eso ni, me ivakaraitaki, bulataka na kosipeli, qaravi ira na vakaleqai, wasea na kosipeli, se vakaitavi ena cakacaka ni valetabu kei na tuva kawa.

Ni oti na gauna ni veivakasalataki vata oqo, na qasenivuli ena liutaka na kalasi se kuoramu ena vulici vata ni kosipeli. Sa rawa ni lesi mera veivakatavulici na iliuliu uabula se lewe ni kalasi se kuoramu. Era na cakava na veilesi oqo na mataveiliutaki ni kalasi se kuoramu nira veivosaki kei ira na iliuliu uabula.

O ira na lesi me veivakatavulici sa dodonu me vakarau tu ni vakayagataka na vakatutu ni vuli ena ituvatuva vakamacawa ni Lako Mai, Mo Muri Au. Ena ituvatuva yadua, na ivakatakilakila oqo e vakatakila na itaviqaravi e veiganiti vakalevu vei ira na itabagone. Ia, sa rawa ni vakayagataki na vakatutu cava ga ena ituvatuva me itaviqaravi ni vuli vei ira na itabagone.

Me sabolo ni tuvatuva ni soqoni ni kuoramu kei na kalasi, raica na ikuri ni vakamacala D

Na nomu vakavakarau ni vakavulica na Lalai e tekivu ena nomu vulica na ivolanikalou vakai iko kei na nomu matavuvale. Ni ko vakayacora, dolavi iko ki na veivakauqeti vakayalo kei na veivakararamataki ni Yalo Tabu me baleti ira na gone ena nomu kalasi ni Lalai. Dau masumasu, ka na rawa ni vakauqeti iko na Yalotabu ena vakasama eso mera vukei kina ni vulica na kosipeli i Jisu Karisito.

Ni ko vakavakarau mo veivakavulici, o rawa ni rawata na ikuri ni veivakauqeti ena dikevi ni vakasama ni veivakatavulici ena Lako Mai, Mo Muri Au—Me Baleta na Vuvale kei na Lotu. Na ituvatuva yadua ena ivurevure oqo e tiko kina e dua na iwasewase ka kena ulutaga “Vakasama Eso ni Nodra Vakavulici na Gone.” Vakasamataka na nanuma eso oqo me vakatutu me vakacaudreva na nomu veivakauqeti. Iko kilai ira na gone ena nomu kalasi ni Lalai—ka ona kilai ira vakavinaka cake sara ni o veitaratara vata kei ira ena kalasi. Sa kilai ira talega na Kalou, ka na vakauqeti iko ena sala momona eso mo vakavulici ka vakalougatataki ira kina.

E rawa ni ra sa cakava oti na gone ena nomu kalasi eso na itaviqaravi ena Lako Mai, Mo Muri Au kei na nodra matavuvale. Sa daumaka oya. Sa vinaka ni caka wasoma. Navuca mo sureti ira na gone mera veiwaseitaka vakai ira na ka era sa vulica mai vale—ni sa dodonu talega mo tuvanaka na sala eso mera vakaitavi kina na gone kevaka mada ga era sega ni vuli tiko e vale. E dau mana cake nodra vulica na dina eso vakosipeli na gone ni vakavulici vakaveitaravi tu na dina oqo ena veimataqali taviqaravi eso. Kevaka o raica ni sa mana vei ira na gone e dua na itaviqaravi vakavuli, navuca mo tokaruataka, vakabibi ke o vakavulici ira tiko na gone sobu. Sa rawa talega ni o railesuva na itaviqaravi mai na dua na lesoni sa oti.

Ena vula e lima kina na Sigatabu, era vakauqeti na qasenivuli ni Lalai me ra sosomitaka na ituvatuva vakarautaki ni Lako Mai, Mo Muri Au enai kalima ni Sigatabu ki na dua se sivia na itaviqaravi ni vuli ena “iKuri ni iVakamacala B: Me Baleti Ira na Lalai—Nodra Vakarautaki na Gone ki na Bula Taucoko ena Salatu ni Veiyalayalati ni Kalou.”