Mga Ideya sa Pagpalambo sa Pagkat-on diha sa Panimalay ug sa Simbahan

Ang mga kasulatan mao ang mga pulong sa Dios, busa pangayo Kaniya og tabang nga makasabot niini.

Ang tanang butang nagpamatuod ni Kristo (tan-awa sa 2 Nephi 11:4; Moises 6:63), busa hunahunaa ang pagsulat o ang pagmarka sa mga bersikulo nga nagpamatuod sa Manluluwas, pagpalig-on sa imong gugma alang Kaniya, ug sa pagtudlo unsaon sa pagsunod Kaniya. Usahay ang mga kamatuoran mahitungod sa Manluluwas ug sa Iyang ebanghelyo direkta nga gipahayag, ug usahay kini gipasumbingay pinaagi sa ehemplo o istorya. Pangutan-a ang imong kaugalingon, “Unsa nga mahangturong mga kamatuoran ang gitudlo niini nga mga bersikulo? Unsa ang gitudlo niini nga mga kamatuoran kanako mahitungod sa Manluluwas?”

Hatagi og pagtagad ang imong mga hunahuna ug mga pagbati, bisan og kini walay kalabotan sa unsay imong gibasa. Kini nga mga panumdoman mahimo nga mao ang unsay gusto sa imong Langitnong Amahan nga imong makat-onan.

Adunay daghang mga paagi sa pagrekord sa mga panumdoman nga moabot samtang ikaw nagtuon. Pananglitan, imong mahibaloan nga ang piho nga mga pulong ug hugpong sa mga pulong diha sa mga kasulatan nakapadani kanimo; mahimo nimong markahan kini ug irekord ang imong mga hunahuna isip usa ka pahinumdom diha sa imong mga kasulatan. Ikaw makahimo usab og journal sa mga panabot, mga pagbati, ug mga panumdoman nga imong madawat.

Ang paghisgot sa mga panabot gikan sa imong personal nga pagtuon usa ka maayong paagi sa pagtudlo sa uban, ug magtabang usab kini nga malig-on ang imong pagsabot sa unsay imong nabasa. Ipakigbahin unsay imong nakat-onan sa mga sakop sa pamilya ug mga higala (sa personal o sa digital nga paagi), ug dapita sila sa pagbuhat og sama.

Hunahunaa kon sa unsa nga paagi ang mga istorya ug mga pagtulun-an nga imong gibasa magamit sa imong kinabuhi. Pananglitan, ikaw makahimo sa pagpangutana sa imong kaugalingon, “Unsa nga mga kasinatian ako diha nga mga susama sa unsay akong gibasa?”

Samtang ikaw nagtuon sa mga kasulatan, mga pangutana mahimong mosulod sa hunahuna. Tingali kini nga mga pangutana may kalabotan sa unsay imong gibasa o sa imong kinabuhi sa kinatibuk-an. Palandonga kini nga mga pangutana ug pangita og mga tubag samtang ikaw nagpadayon sa pagtuon sa mga kasulatan.

Aron makaangkon og dugang nga mga panabot sa mga bersikulo nga imong gibasa, gamita ang mga footnote, ang Topical Guide, ang Bible Dictionary, ang Giya sa mga Kasulatan, ug ubang mga tabang sa pagtuon.

Ikaw makakaplag og makahuloganong mga panabot mahitungod sa usa ka tudling sa kasulatan samtang hunahunaon nimo ang konteksto niini, lakip ang mga kahimtang o ang dapit nga gigikanan niini. Pananglitan, ang pagkahibalo sa kaagi ug mga tinuohan sa katawhan nga gipakigsultihan sa Dios makatabang kanimo sa pagsabot og mas maayo sa tuyo sa Iyang mga pulong.

Basaha unsay gitudlo sa mga propeta ug apostoles sa ulahing adlaw mahitungod sa mga baroganan nga imong nakaplagan diha sa mga kasulatan.

Ang pagtuon sa kasulatan kinahanglan dili lamang magdasig kanato apan maggiya usab kanato sa pag-usab sa paagi sa atong pagpuyo. Paminaw unsay giaghat sa Espiritu kanimo nga buhaton samtang ikaw magbasa, ug dayon lihoka kini nga mga pag-aghat.

Gisugyot nga mga himno ug mga kanta sa mga bata makita sa tibuok nga Dali, Sunod Kanako. Gamit og sagrado nga musika sa pagdapit sa Espiritu ug sa pagpalig-on sa imong hugot nga pagtuo ug pagpamatuod sa mga kamatuoran sa ebanghelyo.

Pagpili og usa ka tudling sa kasulatan nga makahuloganon nganha kanimo, sa imong pamilya, o sa imong klase, ug memoryaha kini pinaagi sa pagbalik-balik niini kada adlaw o sa pagdula og pagmemorya nga dula.

Pangita og mga butang nga may kalabotan sa mga kapitulo ug mga bersikulo nga imong gibasa. Hunahunaa kon sa unsa nga paagi ang matag butang may kalabotan sa mga pagtulun-an diha sa mga kasulatan.

Pagbasa og pipila ka bersikulo, ug dayon pagdrowing og butang nga may kalabotan sa unsay imong gibasa. O ikaw makapangita og litrato diha sa Pakete sa mga Hulagway sa Ebanghelyo o bisan asa sa Librarya sa Ebanghelyo. Mahimo usab nga imong litratohan nga naghulagway sa unsay imong nakat-onan.

Human mabasa ang usa ka istorya, pagdapit og pamilya o mga sakop sa klase sa pagdrama niini. Pagkahuman, hisgoti kon sa unsa nga paagi nga ang istorya adunay kalabotan sa mga butang nga imong nasinati.

Kon ikaw adunay mga sakop sa pamilya nga dili gusto nga moapil sa pamilya nga pagtuon sa kasulatan, pangita og ubang mga paagi nga makakonektar kanila. Pananglitan, makahimo ka nga mopakigbahin og mahangtorong kamatuoran sa natural nga paagi diha sa inyong mga panagsultihanay o makigbahin og makahuloganong kasulatan sa paagi nga wala magwali o mapasigarbohon? Ang pagtuon sa kasulatan dili kinahanglan nga parehas ang paghimo sa matag pamilya. Ang ubang mga anak mahimong mas gustong magtuon sa mga kasulatan sa tinagsa. Pagmainampoon ug sunda ang mga pag-aghat sa Espiritu.