Paggamit sa Dali, Sunod Kanako—Alang sa Panimalay ug sa Simbahan

Ang Dali, Sunod Kanako alang ni bisan kinsa nga gustong makakat-on gikan sa mga kasulatan—sa indibidwal nga paagi, isip usa ka pamilya, ug diha sa mga klase sa Simbahan. Kon ikaw wala makatuon sa mga kasulatan sa regular nga paagi kaniadto, kini nga kapanguhaan makatabang kanimo sa pagsugod. Kon ikaw aduna nay maayo nga nabatasan nga pagtuon sa ebanghelyo, kini nga kapanguhaan makatabang kanimo nga makabaton og mas makahuloganong mga kasinatian.

Ang labing nindot nga dapit sa pagkat-on sa ebanghelyo mao ang panimalay. Ang imong mga magtutudlo sa simbahan makasuporta kanimo, ug ikaw makakuha og pagdasig gikan sa ubang mga miyembro sa ward. Apan aron makasugakod sa espirituhanong paagi, ikaw ug ang imong pamilya nagkinahanglan og inadlaw-adlaw nga pagpabaskog gikan sa “maayo nga pulong sa Dios” (Moroni 6:4; tan-awa usab sa Russell M. Nelson, “Pasiuna nga Pakigpulong,” Liahona, Nob. 2018, 6–8).

Gamita kini nga kapanguhaan sa bisan unsang paagi nga makatabang kanimo. Ang mga latid naghatag og gibug-aton sa pipila ka mahangturon nga mga kamatuoran nga makaplagan diha sa Daang Tugon. Nagsugyot usab kini og mga ideya ug mga kalihokan aron ikaw matabangan sa pagtuon sa mga kasulatan sa indibidwal nga paagi, uban sa mga sakop sa pamilya, o uban sa mga higala. Samtang ikaw magtuon, sunda ang giya sa Espiritu aron makakaplag og mahangtoron nga mga kamatuoran nga makahuloganon nganha kanimo. Pangitaa ang mga mensahe sa Dios alang kanimo, ug sunda ang mga pag-aghat nga imong madawat.

Ang Dali, Sunod Kanako—Alang sa Panimalay ug sa Simbahan mao ang kurikulom sa Sunday School alang sa mga klase sa Primary, kabatan-onan ug hamtong, mga klase sa Young Women, ug mga miting sa korum sa Aaronic nga Pagkapari. Kon ikaw magtudlo sa bisan hain niini nga sitwasyon, ikaw giawhag sa paggamit sa mga latid dinhi niini nga tinubdan alang sa imong personal nga pagtuon ug samtang ikaw nag-andam sa pagtudlo. Pagsugod pinaagi sa pagbaton sa imong kaugalingong mga kasinatian diha sa mga kasulatan. Ang imong labing importante nga pagpangandam mahitabo samtang ikaw magsiksik sa mga kasulatan ug magtinguha sa inspirasyon sa Espiritu Santo. Pangitaa ang mahangturon nga mga kamatuoran nga magtabang kanimo nga mahimong mas mahisama sa Langitnong Amahan ug ni Jesukristo. Ang Dali, Sunod Kanako makatabang kanimo sa pag-ila sa pipila niini nga mga kamatuoran ug makasabot sa tibuok nga kahulogan sa mga kasulatan.

Hinumdomi nga ang pagkat-on sa ebanghelyo, sa labing maayo niini, nakasentro sa panimalay ug gisuportahan sa Simbahan. Sa laing pagkasulti, ang imong nag-unang responsibilidad mao ang pagsuporta sa mga tawo nga imong gitudloan diha sa ilang mga paningkamot sa pagkat-on ug sa pagpuyo sa ebanghelyo diha sa panimalay. Ayaw kabalaka mahitungod sa pagbaton og talagsaong hisgotanan nga ihatag alang kanila diha sa klase. Hinoon, hatagi sila og mga oportunidad sa pagpakigbahin sa ilang mga kasinatian, mga hunahuna, ug mga pangutana mahitungod sa mga tudling sa kasulatan nga ilang nabasa sa panimalay. Dapita sila sa pagpakigbahin sa mahangturon nga mga kamatuoran nga ilang nakaplagan. Mas importante kini kay sa paghisgot og piho nga gidaghanon sa materyal.

Usa sa nag-unang rason nga kita magpundok diha sa mga klase sa Sunday School mao ang pagsuporta ug pag-awhag sa usag usa samtang kita maningkamot sa pagsunod ni Jesukristo. Usa ka yanong paagi sa pagbuhat niini mao ang pagpangutana sama sa “Unsay gitudlo sa Espiritu Santo kanimo niini nga semana samtang kamo nagtuon sa mga kasulatan?” Ang mga tubag ngadto niini nga pangutana mahimong modangat ngadto sa makahuloganon nga mga panaghisgotan nga mopalambo og hugot nga pagtuo diha ni Jesukristo ug sa Iyang ebanghelyo.

Niana ikaw mahimo nga modapit og panaghisgotan base sa mga sugyot sa pagtuon sa Dali, Sunod Kanako. Sama pananglit, usa ka ideya sa pagtuon mahimong magsugyot sa pagsiksik sa Isaias 53, mangita alang sa mga pulong nga naghulagway sa misyon sa Manluluwas. Mahimo kang mohangyo sa mga sakop sa klase sa pagpakigbahin og bisan unsa nga mga panghunahuna o mga pagbati nga kini nga mga pulong midasig kanila. O mahimo ka nga makagahin og pipila ka panahon sa pagpangita alang niini nga mga pulong isip usa ka klase.

Kon ang mga klase sa mga korum sa Aaronic nga Pagkapari ug sa Young Women mag-abot ma-Dominggo, ang ilang katuyoan maingon og lahi gikan sa usa ka klase sa Sunday School. Agi og dugang nga pagtabang sa usag usa sa pagkat-on sa ebanghelyo ni Jesukristo, kini nga mga grupo mag-abot usab aron sa pagtinambagay mahitungod sa pagtuman sa buhat sa kaluwasan ug kahimayaan (tan-awa sa Kinatibuk-ang Tamdanan nga Basahon, 1.2). Buhaton nila kini ubos sa direksiyon sa mga kapangulohan sa klase ug korum.

Tungod niini nga rason, ang matag miting sa korum o klase kinahanglang magsugod sa usa ka sakop sa kapangulohan sa korum o klase nga mangulo sa panaghisgotan mahitungod sa mga paningkamot, sama pananglit, sa pagsunod sa ebanghelyo, pagpangalagad ngadto sa mga tawo nga nanginahanglan, pagpakigbahin sa ebanghelyo, o pag-apil sa buhat sa templo ug sa family history.

Human niini nga panahon sa pagtinambagay sa usag usa, usa ka magtutudlo ang mangulo sa klase o korum nga mag-uban sa pagkat-on sa ebanghelyo. Ang hamtong nga mga lider o mga sakop sa klase o korum mahimong sangonan sa pagtudlo. Ang kapangulohan sa klase o korum, nga nagkonsulta sa hamtong nga mga lider, mohimo niini nga mga buluhaton.

Ang mga tawo nga gisangonan sa pagtudlo kinahanglang mangandam pinaagi sa paggamit sa mga sugyot sa pagkat-on diha sa sinemana nga latid sa Dali, Sunod Kanako. Sa matag latid, kini nga icon nagpasabot og kalihokan nga espesyal nga may kalabotan ngadto sa kabatan-onan. Hinoon, bisan asa sa mga sugyot diha sa latid mahimong gamiton isip usa ka kalihokan sa pagkat-on alang sa kabatan-onan.

Alang sa usa ka ehemplo sa butang nga hisgotan [agenda] alang sa mga miting sa korum ug klase, tan-awa sa apendiks D.

Ang imong pagpangandam sa pagtudlo sa Primary magsugod samtang ikaw magtuon sa mga kasulatan sa personal nga paagi ug uban sa imong pamilya. Samtang ikaw nagbuhat, himoa nga ikaw bukas alang sa espirituhanon nga mga pagbati ug mga panabot gikan sa Espiritu Santo mahitungod sa mga bata diha sa imong klase sa Primary. Pagmainampoon, ug ang Espiritu makadasig kanimo og mga ideya sa pagtabang kanila nga makakat-on sa ebanghelyo ni Jesukristo.

Samtang ikaw mangandam sa pagtudlo, mahimong makaangkon ka og dugang nga inspirasyon pinaagi sa pagsuhid sa mga ideya sa pagtudlo diha sa Dali, Sunod Kanako—Alang sa Panimalay ug sa Simbahan. Ang matag latid dinhi niini nga kapanguhaan adunay seksiyon nga giulohan “Mga Ideya sa Pagtudlo sa mga Bata.” Hunahunaa kini nga mga ideya isip mga sugyot nga makamugna sa imong inspirasyon. Nakaila ka sa mga bata diha sa imong klase sa Primary—ug mailhan pa nimo sila og mas maayo samtang ikaw makig-inter-aksiyon kanila diha sa klase. Ang Dios nakaila usab kanila, ug Siya modasig kanimo sa labing maayo nga mga paagi sa pagtudlo ug pagpanalangin kanila.

Posible nga ang mga bata diha sa imong klase nakahimo na sa pipila ka kalihokan diha sa Dali, Sunod Kanako uban sa ilang mga pamilya. OK ra kana. Ang pagbalik-balik og sulti maayo. Hunahunaa ang pagdapit sa mga bata sa pagpakigbahin sa usag usa sa unsay ilang nakat-onan sa panimalay—hinuon ikaw kinahanglan usab nga magplano og mga paagi alang sa mga bata nga moapil bisan kon sila wala magkat-on sa panimalay. Ang mga bata mas epektibong makakat-on sa mga kamatuoran sa ebanghelyo kon kini nga mga kamatuoran ibalik-balik sa pagtudlo pinaagi sa lainlaing kalihokan. Kon imong makita nga ang usa ka kalihokan sa pagkat-on epektibo alang sa mga bata, hunahunaa ang pagbalik-balik niini, ilabi na kon nagtudlo ka sa mas gagmay nga mga bata. Mahimo usab nga ikaw morebyo og usa ka kalihokan gikan sa miaging leksiyon.

Sa mga bulan nga adunay lima ka Dominggo, ang mga magtutudlo sa Primary giawhag sa pagpuli sa gi-eskedyul nga latid sa Dali, Sunod Kanako sa ikalima nga Dominggo sa usa o dugang pa nga mga kalihokan sa pagkat-on diha sa “Apendiks B: Alang sa Primary—Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”