Ol Aedia blong Stap Lanem Samting blong kam Moa Gud long Hom mo long Jos

Ol skripja oli ol toktok blong God, so askem Hem blong kasem help blong andastanem olgeta skripja ia.

Evri samting i stap testifae abaot Kraes (luk long 2 Nifae 11:4; Moses 6:63), tingting blong tekem not o makem ol ves we oli testifae abaot Sevya, oli mekem yu gat moa lav long Hem, mo tijim yu olsem wanem blong folem Hem. Samtaem ol trutok abaot Sevya mo gospel blong Hem, oli talemaot klia, mo samtaem oli kamkamaot tru long wan eksampol o wan stori. Askem yuwan: “?Wanem ol trutok we i no save finis we oli stap tijim insaed long ol ves ia? ?Wanem nao ol trutok ia oli stap tijim mi abaot Sevya?

Luklukgud long ol tingting mo filing blong yu, iven sapos yu luk se oli no go wetem wanem we yu stap ridim. Olgeta tingting mo filing ia, maet oli ol samting ia we Papa blong yu long Heven i wantem yu blong lanem.

I gat plante wei blong raetemdaon ol tingting mo filing we oli kam taem yu stap stadi. Eksampol, yu save faenemaot se samfala toktok mo ol sentens insaed long ol skripja oli tajem hat blong yu; yu save makem olgeta mo raetemdaon ol tingting blong yu olsem wan not insaed long ol skripja blong yu. Mo tu, yu save kipim wan jenol we yu raetem ol niu tingting mo ol filing we i kam long maen blong yu.

Blong stap toktok raon long ol niufala tingting we yu bin kasem long stadi blong yuwan, i wan gudfala wei blong tijim ol narawan, mo tu, blong helpem yu andastanem bigwan wanem we yu bin ridim. Serem wanem we yu stap lanem wetem ol memba blong famli mo ol fren (fes tu fes o tru long dijitol), mo invaetem olgeta blong mekem semmak.

Tingting long olsem wanem nao ol stori mo ol tijing blong ol skripja, we yu stap ridim i go wetem laef blong yu. Eksampol, yu save askem yuwan, “?Wanem ol eksperiens we mi bin gat we oli semmak long wanem we mi stap ridim?”

Taem yu stap stadi long ol skripja, bae i gat sam kwestin i kam long maen blong yu. Olgeta kwestin ia, maet oli go wetem wanem yu stap ridim, o i go wetem laef blong yu. Tingting hevi long ol kwestin ia mo lukaotem ol ansa taem yu stap gohed blong ridim ol skripja.

Blong kasem moa tingting long ol ves we yu stap ridim, yusum ol futnot Topical Guide, Bible Dictionary, Gaed long Ol Skripja, mo ol narafala stadi help.

Yu save faenem sam niu tingting we i gat mining abaot wan sentens blong skripja taem yu tingting long stori blong hem, we i tekem ol situesen blong wan taem o ples we stori ia i bin hapen long hem. Eksampol. Blong save bakgraon mo ol bilif blong ol pipol we God i toktok long olgeta, i save mekem yu andastanem moa tingting biaen long ol toktok blong Hem.

Ridim wanem we ol lata-dei profet mo aposol oli bin tijim abaot ol prinsipol we yu faenem insaed long ol skripja.

Skripja stadi bae i no givim insperesen nomo long yumi, be tu, bae i lidim yumi blong jenisim wei we yumi stap laef long hem. Lisin long wanem Spirit i talem long yu blong mekem taem yu stap rid, mo afta, tekem aksen folem ol kwaet toktok ia.

Ol hym mo ol singsing blong ol pikinini we oli givim, oli stap truaot long Kam Folem Mi. Yusum tabu singsing blong invaetem Spirit mo blong mekem fet mo testemoni blong yu abaot ol trutok blong gospel i kam moa strong.

Jusum wan skripja ves we i gat mining long yu, famli blong yu, o klas blong yu, mo lanem baehat taem oli stap ripriptim evri dei o taem yufala i stap plei wan memori gem.

Faenem sam samting we i go wetem ol japta mo ol ves we yufala i stap ridim. Tingting long olsem wanem wanwan samting we yu karem, i go wetem ol tijing insaed long ol skripja.

Ridim sam ves, mo afta, droem wan samting we i go wetem wanem we yu ridim. O yu save lukaotem wan pikja insaed long Gospel Art Buk o eni ples long Gospel Laebri. Yu save tekem wan pikja tu we i soem wanem yu bin lanem.

Afta we yu ridim wan stori, invaetem ol memba blong famli o klas blong aktem long wan drama. Afta long hemia, tokbaot olsem wanem stori ia i go wetem ol samting we yu stap fesem.

Sapos yu gat ol memba blong famli we oli no wantem blong tekempat long famli skripja stadi, lukaotem ol narafala wei blong konek wetem olgeta. Eksampol, ?yu save serem ol trutok we i no save finis long taem blong ol nomol storian blong yufala, o serem wan skripja we i gat mining long wan wei we i soem se yu no stap prij o mekem wetem fos? Skripja stadi i no nid blong luk semmak insaed long evri famli. Sam pikinini bae oli stadi gud moa sapos oli stadi ol skripja olgetawan wetem papa o mama. Prea oltaem mo folem smol voes blong Spirit.