Stap Yusum Kam Folem Mi—Blong Hom mo Jos

Kam Folem Mi i blong eniwan we i wantem blong lanem samting insaed long ol skripja—olsem wanwan man, woman, o olsem wan famli mo insaed long ol klas long Jos. Sapos yu no bin stap stadi long ol skripja oltaem long bifo, buk ia i save helpem yu blong statem. Sapos yu gat finis wan gudfala evri dei fasin blong stadi long skripja, buk ia i save helpem yu blong gat ol eksperiens we oli gat moa mining.

Nambawan ples blong lanem gospel hem i hom. Ol tija blong yu long Jos oli save sapotem yu, mo yu save kasem toktok blong leftemap tingting long ol narafala memba blong wod. Be blong stap laef yet long saed blong spirit, yu mo famli blong yu i nidim evri dei kaekae we i kam tru long “gud toktok blong God,” (Moronae 6:4; luk tu long Russell M. Nelson, “Fas Toktok,” Liahona, Novemba 2018, 6–8).

Yusum buk ia long eni wei we i save helpem yu. Ol aotlaen ia oli haelaetem sam long ol trutok we i no save finis we i stap insaed long OlTesteman. Oli givim tu ol aedia mo ol aktiviti blong helpem yu blong stadi long ol skripja, yuwan, wetem famli o wetem ol fren. Taem yu stap stadi, folem Spirit blong i lidim yu blong faenem ol trutok we i no save finis we oli gat bigfala mining long yu. Lukaotem ol mesej blong God we i blong yu, mo folem ol kwaet toktok blong Spirit we yu kasem.

Kam Folem Mi—Blong Hom mo Jos i wan Kurikulom blong ol klas long Sandei, long Praemeri, yut mo Sandei Skul blong ol adalt, ol klas blong Yang Woman mo ol miting blong kworom blong Aronik Prishud. Sapos yu tij long wan long ol ples ia, oli leftemap tingting blong yu blong yusum ol aotlaen ia long lesenbuk ia long stadi blong yuwan mo taem yu stap rere blong tij. Stat blong stap gat ol eksperiens blong yuwan insaed long ol skripja. Fasin blong yu, blong rere we i impoten moa, bae i hapen taem yu luklukgud insaed long ol skripja mo taem yu stap lukaotem insperesen blong Tabu Spirit. Lukaotem ol trutok we i no save finis we i save helpem yu blong kam moa olsem Papa long Heven mo Jisas Kraes. Kam Folem Mi i save helpem yu blong poenemaot sam long ol trutok ia mo andastanem wanem we i hapen insaed long ol skripja.

Kipim long maen blong yu se blong stap lanem gospel, long bes wei, i long hom senta mo Jos i sapotem. Long ol narafala toktok, stamba responsabiliti blong yu i blong sapotem ol pipol we yu stap tijim long ol efot blong olgeta blong lanem samting mo laef folem gospel long hom. No wari blong yusum ol semmak samting blong givim long olgeta long klas. Be, givim ol janis long olgeta blong serem ol eksperiens blong olgeta, ol tingting mo ol kwestin blong olgeta abaot ol paragraf blong ol skripja we oli bin ridim long hom. Invaetem olgeta blong serem ol trutok we i no save finis we oli bin faenem. Hemia i moa impoten bitim blong stap ridim wan bigfala pat blong lesen buk ia.

Wan stamba tingting blong from wanem yumi kam tugeta long Sandei Skul klas i blong sapotem mo leftemap tingting blong wanwan long yumi taem yumi traehad blong folem Jisas Kraes. Wan simpol wei blong mekem hemia i blong askem wan kwestin olsem “?Wanem nao Tabu Spirit i bin tijim long yu long wik ia taem yu bin stadi long ol skripja?” Ol ansa long kwestin ia i save lidim evriwan blong toktok raon long ol samting we oli gat mining we oli bildimap fet long Jisas Kraes mo gospel blong Hem.

Afta, yu save invaetem evriwan blong toktok raon long sam tingting we oli putum i stap long Kam Folem Mi. Eksampol, maet wan stadi aedia i askem yu blong stap lukluk long Aesea 53, blong lukaotem ol toktok we i tokbaot misin blong Sevya. Yu save askem ol memba blong klas blong serem eni tingting o filing we ol toktok ia i givim insperesen long olgeta. O, olsem wan klas, yufala i save yusum smoltaem blong stap lukaotem ol toktok ia.

Taem kworom blong ol Aronik Prishud mo Ol Yang Woman Klas oli mit long ol Sandei, i tru, stamba tingting blong olgeta bae i defren long wan Sandei Skul klas. Sam moa tingting blong stap helpem yumi wanwan blong lanem abaot gospel blong Jisas Kraes, hem i we ol grup ia oli mit blong kaonsel tugeta tu abaot ol wei blong mekem i hapen wok blong sevem man mo fasin blong kam olsem God (luk long Jeneral Hanbuk, 1.2). Oli mekem hemia wetem daereksen blong ol presidensi blong klas mo kworom.

From risen ia, wan memba blong presidensi blong kworom o klas i mas stap lidim ol toktok raon long wanwan miting blong kworom o klas abaot ol efot blong, eksampol, laef folem gospel, givhan long ol pipol we oli stap long nid, serem gospel, o tekpat long tempol mo famli histri wok.

Afta long taem ia blong kaonsel tugeta, wan tija bae i lidim klas o kworom blong stap lanem gospel tugeta. Oli save asaenem ol lida blong adalt o ol memba blong klas o kworom blong oli save tij. Ol presidensi blong klas o kworom oli wok tugeta wetem ol lida blong adalt blong mekem ol asaenmen ia.

Ol pipol we oli asaenem olgeta blong tij, oli mas yusum sam tingting blong stap lanem samting insaed long aotlaen blong evri wik long Kam Folem Mi. Long wanwan aotlaen, pikja aekon ia i soem wan aktiviti we i stret blong ol yut. Be, eni tingting we oli putum long aotlaen ia, oli save yusum olsem wan aktiviti blong stap lanem samting we i blong ol yut.

Blong kasem wan eksampol blong ajenda blong ol miting blong kworom mo klas, luk long apendiks D.

Fasin blong yu blong stap rere blong tijim Praemeri i stat taem yu stadi long ol skripja yuwan mo wetem famli blong yu. Taem yu mekem olsem, letem tingting blong yu i open long ol tingting mo filing long saed blong spirit mo ol niu tingting we oli kam tru long Tabu Spirit abaot ol pikinini insaed long Praemeri klas blong yu. Stap prea oltaem, mo Spirit i save givim insperesen long yu wetem ol aedia blong helpem olgeta blong lanem gospel blong Jisas Kraes.

Taem yu stap rere blong tij, yu save kasem moa insperesen taem yu stap lukluk tru long ol aedia blong stap tij insaed long Kam Folem Mi—Blong Hom mo Jos. Wanwan aotlaen blong lesenbuk ia i gat wan seksen we taetol i “Sam Aedia blong Tijim Ol Pikinini.” Tingting long ol aedia ia olsem sam tingting nomo blong mekem yu luksave insperesen blong yu. Yu save ol pikinini insaed long Praemeri klas blong yu—mo bae yu kam blong save olgeta, iven moa gud taem yu stap mit mo toktok wetem olgeta long klas. God i save olgeta tu; mo bae Hem i givim insperesen long yu blong yu save ol bes wei blong tijim mo blesem olgeta.

Hem i posibol se ol pikinini long klas blong yu oli bin mekem sam long ol aktiviti long Kam Folem Mi wetem ol famli blong olgeta. Hemia i ORAET. Blong ripripitim samting, hem i gud. Tingting blong stap invaetem ol pikinini blong serem wetem wanwan long olgeta wanem oli lanem long hom—be yu mas mekem ol plan tu blong wei blong ol pikinini oli tekpat iven sapos oli no stap lanem samting long hom. Ol pikinini oli lanem ol trutok blong gospel moa gud taem oli ripripitim tijing blong ol trutok ia tru long ol defdefren aktiviti. Sapos yu faenem se wan aktiviti blong lanem samting i wok gud long ol pikinini, tingting blong ripitim aktiviti ia, speseli sapos ol pikinini we yu stap tijim oli ol smol pikinini. Yu save luklukbak tu long wan aktiviti we yu bin mekem long wan lesen bifo.

Long ol manis we oli gat faef Sandei, ol tija blong Praemeri oli save jusum blong putum wan o moa long ol aktiviti ia blong stap lanem samting, blong i tekem ples blong Kam Folem Mi aotlaen blong namba faef Sandei wetem wan o moa long ol aktiviti blong stap lanem samting insaed long “Apendiks B: Blong Praemeri—Stap Rere Ol Pikinini blong Yu blong Stap long Kavenan Rod blong God blong wan Laef Taem.”