“ວັນທີ 22–28 ເດືອນທັນວາ: ‘ຂອງປະທານທີ່ຫາອັນປຽບບໍ່ໄດ້ຂອງພຣະບຸດແຫ່ງສະຫວັນຂອງພຣະເຈົ້າ,’” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຣິດສະມາດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ Nativity in Copper and Umber [ຮູບການກຳເນີດ ໃນສີທອງ ແລະ ສີນ້ຳຕານແກ່], ໂດຍ ເຈ ເຄີກ ຣິເຈີດສ໌

ວັນທີ 22–28 ເດືອນທັນວາ: ຂອງປະທານທີ່ຫາອັນປຽບບໍ່ໄດ້ຂອງພຣະບຸດແຫ່ງສະຫວັນຂອງພຣະເຈົ້າ

ຄຣິດສະມາດ

ສາດສະດາໂຈເຊັບ ສະມິດ ໄດ້ປະກາດວ່າ, “ຫລັກທຳຂັ້ນພື້ນຖານຂອງສາດສະໜາຂອງເຮົາແມ່ນປະຈັກພະຍານຂອງອັກຄະສາວົກ ແລະ ສາດສະດາ, ກ່ຽວກັບພຣະເຢຊູຄຣິດ, ວ່າພຣະອົງໄດ້ສິ້ນພຣະຊົນ, ໄດ້ຖືກຝັງ, ແລະ ໄດ້ຟື້ນຄືນພຣະຊົນໃນມື້ທີສາມ, ແລະ ໄດ້ສະເດັດຂຶ້ນໄປສະຫວັນ; ແລະ ທຸກສິ່ງທັງໝົດທີ່ກ່ຽວພັນກັບສາດສະໜາຂອງເຮົາເປັນພຽງສ່ວນປະກອບໃສ່ກັບສິ່ງເຫລົ່ານີ້ເທົ່ານັ້ນ” (Teachings of Presidents of the Church: Joseph Smith [2011], 49). ເປັນເວລາຫລາຍກວ່າ 160 ປີຕໍ່ມາ, ຂໍ້ຄວາມນີ້ຈຶ່ງໄດ້ດົນໃຈຝ່າຍປະທານສູງສຸດ ແລະ ກຸ່ມອັກຄະສາວົກສິບສອງໃຫ້ຈັດພິມ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ” ເພື່ອເປັນກຽດໃຫ້ແກ່ວັນຄົບຮອບ 2,000 ປີແຫ່ງການກຳເນີດຂອງພຣະຜູ້ຊ່ວຍໃຫ້ລອດ (ເບິ່ງ Russell M. Nelson, “Drawing the Power of Jesus Christ into Our Lives,” Liahona, May 2017, 40).

ໃນຖານະໄພ່ພົນຍຸກສຸດທ້າຍ, ພວກເຮົາປິຕິຍິນດີໃນພອນຂອງການເປີດເຜີຍອັນຕໍ່ເນື່ອງ ຜ່ານທາງສາດສະດາ ແລະ ອັກຄະສາວົກຂອງສະໄໝໃໝ່. ພວກເຮົາຂອບພຣະໄທສຳລັບຄຳແນະນຳທີ່ດົນໃຈ, ຄຳເຕືອນ, ແລະ ການສະໜັບສະໜູນ. ແຕ່ເໜືອກວ່າສິ່ງອື່ນໃດ, ພວກເຮົາໄດ້ຮັບພອນໂດຍປະຈັກພະຍານທີ່ມີພະລັງເຖິງພຣະເຢຊູຄຣິດ—ລະຫວ່າງບຸນຄຣິດສະມາດ ແລະ ຕະຫລອດປີ. ມັນບໍ່ໄດ້ເປັນພຽງຖ້ອຍຄຳທີ່ດົນໃຈຂອງນັກປະພັນທີ່ຊຳນານ ຫລື ເປັນຄວາມຮູ້ຈາກຜູ້ຊຳນານດ້ານພຣະຄຳພີເທົ່ານັ້ນ. ມັນເປັນຖ້ອຍຄຳຂອງ “ພະຍານພິເສດເຖິງພຣະນາມຂອງພຣະຄຣິດ ຢູ່ທຸກບ່ອນທົ່ວໂລກ” ຊຶ່ງຖືກເລືອກໄວ້, ຖືກເອີ້ນ, ແລະ ມີສິດອຳນາດຂອງພຣະເຈົ້າ” (ຄຳສອນ ແລະ ພັນທະສັນຍາ 107:23).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

“ບໍ່ມີມະນຸດຄົນໃດຢູ່ໃນໂລກນີ້ ທີ່ຈະມີອິດທິພົນເໜືອກວ່າ.”

ທ່ານຈະວ່າແນວໃດໃນການສະໜັບສະໜູນຂໍ້ຄວາມທີ່ວ່າ “ບໍ່ມີມະນຸດຄົນໃດຢູ່ໃນໂລກນີ້ ທີ່ຈະມີອິດທິພົນເໜືອຜູ້ຄົນ ຫລາຍໄປກວ່າ [ພຣະເຢຊູຄຣິດ] ໄດ້”? ໃຫ້ຊອກຫາຂໍ້ຄວາມຢູ່ໃນ “ພຣະຄຣິດທີ່ຊົງພຣະຊົນ” ທີ່ເປັນພະຍານເຖິງອິດທິພົນທີ່ເລິກເຊິ່ງຂອງພຣະຜູ້ຊ່ວຍໃຫ້ລອດ. ພຣະອົງມີອິດທິພົນຕໍ່ທ່ານແນວໃດ?

ສົມມຸດວ່າມີຄົນໃດຄົນໜຶ່ງທີ່ບໍ່ຄຸ້ນເຄີຍກັບສາດສະໜາຄຣິດສະຕຽນຖາມທ່ານວ່າເປັນຫຍັງທ່ານຈຶ່ງສະເຫລີມສະຫລອງຄຣິດສະມາດ. ທ່ານຈະຕອບວ່າແນວໃດ? ທົບທວນ “ພຣະຄຣິດທີ່ຊົງພຣະຊົນ” ໂດຍຄຳນຶງເຖິງຄຳຖາມນີ້ໃນໃຈ, ແລະ ພິຈາລະນາຂຽນຄວາມຄິດ ຫລື ຄວາມປະທັບໃຈທີ່ເກີດຂຶ້ນກັບທ່ານ.

ເບິ່ງ “Why We Need a Savior” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

“ພຣະອົງໄດ້ຟື້ນຄືນພຣະຊົນ.”

ໃນ “ພຣະຄຣິດທີ່ຊົງພຣະຊົນ,” ອັກຄະສາວົກເປັນພະຍານເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ, ໂດຍການກ່າວເຖິງການມາປະກົດສາມເທື່ອຂອງພຣະຜູ້ເປັນເຈົ້າທີ່ຟື້ນຄືນພຣະຊົນແລ້ວ (ເບິ່ງ ວັກທີ 5). ໃຫ້ຄິດທີ່ຈະອ່ານບັນທຶກຈຳນວນໜຶ່ງຂອງການສະເດັດມາຢ້ຽມຢາມເຫລົ່ານີ້ ຢູ່ໃນ ໂຢຮັນ 20; 3 ນີໄຟ 11; ແລະ ໂຈເຊັບ ສະມິດ—ປະຫວັດ 1:14–20. ທ່ານຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ ຈາກພຣະຄຳ ແລະ ການກະທຳຂອງພຣະອົງລະຫວ່າງການມາປະກົດເຫລົ່ານີ້?

ເອົາໃຈໃສ່ຕໍ່ພຣະຜູ້ຊ່ວຍໃຫ້ລອດ. “ການອ່ານ ‘ພຣະຄຣິດທີ່ຊົງພຣະຊົນ’ ດ້ວຍການອະທິຖານ ກໍເໝືອນກັບການອ່ານປະຈັກພະຍານຂອງ ມັດທາຍ, ມາຣະໂກ, ລູກາ, ໂຢຮັນ, ແລະ ສາດສະດາທັງຫລາຍ ຈາກພຣະຄຳພີມໍມອນ. ມັນຈະເຮັດໃຫ້ສັດທາຂອງທ່ານທີ່ມີໃນພຣະຜູ້ຊ່ວຍໃຫ້ລອດເພີ່ມທະວີຂຶ້ນ ແລະ ຊ່ວຍທ່ານໃຫ້ເອົາໃຈໃສ່ຕໍ່ພຣະອົງ” (M. Russell Ballard, “Return and Receive,” Liahona, May 2017, 65).

“ຖານະປະໂລຫິດ ແລະ ສາດສະໜາຈັກຂອງພຣະອົງໄດ້ຖືກຟື້ນຟູ.”

ລະຫວ່າງການສຶກສາຂອງທ່ານກ່ຽວກັບຄຳສອນ ແລະ ພັນທະສັນຍາ ໃນປີນີ້, ທ່ານໄດ້ມີໂອກາດທີ່ຈະຮຽນຮູ້ຕື່ມອີກກ່ຽວກັບວິທີທີ່ “ຖານະປະໂລຫິດຂອງພຣະຜູ້ຊ່ວຍໃຫ້ລອດ ແລະ ສາດສະໜາຈັກຂອງພຣະອົງໄດ້ຖືກຟື້ນຟູ.” ຄວາມຈິງ ຫລື ຫລັກທຳທີ່ໄດ້ຖືກຟື້ນຟູຂໍ້ໃດແດ່ທີ່ມີຄວາມໝາຍຕໍ່ທ່ານໂດຍສະເພາະ? ໃຫ້ຄິດທີ່ຈະທົບທວນພຣະຄຳພີບາງຂໍ້ດັ່ງຕໍ່ໄປນີ້ ທີ່ສິດສອນກ່ຽວກັບການຟື້ນຟູ: ຄຳສອນ ແລະ ພັນທະສັນຍາ 1:17–23; 13; 20:1–12; 65; 110; 112:30–32; 124:39–42; 128:19–21. ໃຫ້ໄຕ່ຕອງວິທີທີ່ຄວາມຈິງຂອງພຣະກິດຕິຄຸນທີ່ຖືກຟື້ນຟູ ຊ່ວຍທ່ານໃຫ້ຮູ້ຈັກ ແລະ ຮັກພຣະເຢຊູຄຣິດແນວໃດ.

“ພຣະອົງຈະກັບມາສູ່ໂລກອີກໃນມື້ໜຶ່ງ.”

ຄຣິດສະມາດເປັນຊ່ວງເວລາທີ່ໃຫ້ຄິດເຖິງອະດີດຕອນທີ່ພຣະເຢຊູຄຣິດໄດ້ກຳເນີດ ແລະ ໃຫ້ຄິດເຖິງອະນາຄົດ ເວລາທີ່ພຣະອົງຈະສະເດັດມາອີກ. ທ່ານຮຽນຮູ້ຫຍັງແດ່ກ່ຽວກັບການສະເດັດກັບມາຂອງພຣະອົງ ຈາກ ວັກທີສອງ ເຖິງວັກສຸດທ້າຍ ຂອງ “ພຣະຄຣິດທີ່ຊົງພຣະຊົນ”? ທ່ານອາດພິຈາລະນາທີ່ຈະອ່ານ, ຮ້ອງເພງ, ຫລື ຟັງເພງຄຣິດສະມາດທີ່ສິດສອນກ່ຽວກັບການສະເດັດມາຄັ້ງທີສອງ, ເຊັ່ນ “Joy to the World” ຫລື “It Came upon the Midnight Clear” (Hymns, nos. 201, 207).

“ພຣະອົງເປັນຄວາມສະຫວ່າງ, ເປັນຊີວິດ, ແລະ ເປັນຄວາມຫວັງຂອງໂລກ.”

ໃນ ວັກສຸດທ້າຍ ຂອງ “ພຣະຄຣິດທີ່ຊົງພຣະຊົນ,” ມີການກ່າວຄຳສັນລະເສີນ ແລະ ຕຳແໜ່ງສຳລັບພຣະຜູ້ຊ່ວຍໃຫ້ລອດ. ໃຫ້ພິຈາລະນາທີ່ຈະໃຊ້ເວລາໃນການຮຽນຮູ້ບາງສ່ວນ. ຍົກຕົວຢ່າງ:

ຄວາມສະຫວ່າງ: ພຣະເຢຊູຄຣິດເປັນເໝືອນດັ່ງຄວາມສະຫວ່າງໃຫ້ກັບທ່ານແນວໃດ? ທ່ານອາດຈະພິຈາລະນາການແຕ້ມຮູບ ຫລື ຖ່າຍຮູບໃດໜຶ່ງທີ່, ສຳລັບທ່ານແລ້ວ, ເປັນຕົວແທນຄວາມສະຫວ່າງທີ່ພຣະອົງໄດ້ມອບໃຫ້ກັບທ່ານ. ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ໃນການແບ່ງປັນຄວາມສະຫວ່າງຂອງພຣະອົງ? (ເບິ່ງ ໂຢຮັນ 8:12; 3 ນີໄຟ 18:24; ຄຳສອນ ແລະ ພັນທະສັນຍາ 50:24 ນຳອີກ.)

ຊີວິດ: ເປັນຫຍັງທ່ານຈຶ່ງຄິດວ່າຄຳວ່າ ຊີວິດ ເປັນຄຳທີ່ດີໃນການບັນຍາຍກ່ຽວກັບພຣະເຢຊູຄຣິດ? ໃນທາງໃດແດ່ທີ່ພຣະອົງໄດ້ມອບຊີວິດໃຫ້ກັບທ່ານ? ຊີວິດຂອງທ່ານຈະແຕກຕ່າງແນວໃດຖ້າບໍ່ມີພຣະອົງ ແລະ ພຣະກິດຕິຄຸນຂອງພຣະອົງ? (ເບິ່ງ ໂຢຮັນ 10:10; 1 ໂກຣິນໂທ 15:19–23; ຄຳສອນ ແລະ ພັນທະສັນຍາ 66:2 ນຳອີກ.)

ຄວາມຫວັງ: ທ່ານຫວັງຫຍັງເພາະພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ? ທ່ານຮູ້ຈັກຄົນໃດຄົນໜຶ່ງທີ່ຮູ້ສຶກໝົດຫວັງກັບອະນາຄົດຫລືບໍ່? ໃຫ້ໄຕ່ຕອງວິທີທີ່ທ່ານອາດຈະແບ່ງປັນຄວາມຫວັງທີ່ທ່ານຮູ້ສຶກໄດ້ໃນພຣະເຢຊູຄຣິດກັບຄົນໆນັ້ນ. (ເບິ່ງ ໂຣມ 8:24–25; ອີເທີ 12:4; ໂມໂຣໄນ 7:41 ນຳອີກ.)

ເບິ່ງ Topics and Questions, “Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

“ຂໍຂອບພຣະໄທພຣະເຈົ້າສຳລັບຂອງປະທານທີ່ຫາອັນປຽບບໍ່ໄດ້ [ຂອງພຣະອົງ].”

ໃນ “ພຣະຄຣິດທີ່ຊົງພຣະຊົນ,” ອັກຄະສາວົກກ່າວເຖິງພຣະຜູ້ຊ່ວຍໃຫ້ລອດວ່າເປັນ “ຂອງປະທານ” ຈາກພຣະບິດາເທິງສະຫວັນ. ອີງຕາມສິ່ງທີ່ທ່ານພົບເຫັນຢູ່ໃນ “ພຣະຄຣິດທີ່ຊົງພຣະຊົນ,” ທ່ານຈະປະກອບປະໂຫຍກນີ້ໃຫ້ສົມບູນໄດ້ແນວໃດ: “ຜ່ານທາງພຣະເຢຊູຄຣິດ, ພຣະເຈົ້າໄດ້ປະທານຂອງປະທານແຫ່ງ … ໃຫ້ກັບຂ້ອຍ.” ໃຫ້ໄຕ່ຕອງວ່າທ່ານສາມາດເຮັດຫຍັງແດ່ເພື່ອຈະໄດ້ຮັບຂອງປະທານເຫລົ່ານີ້ຢ່າງເຕັມທີ່ຫລາຍຂຶ້ນ.

ການສຶກສາ “ພຣະຄຣິດທີ່ຊົງພຣະຊົນ” ມີຜົນກະທົບຕໍ່ສັດທາຂອງທ່ານ ໃນພຣະຜູ້ຊ່ວຍໃຫ້ລອດ ແລະ ມີຄວາມຮັກສຳລັບພຣະອົງແນວໃດ?

ເບິ່ງ ຣະໂຊ ເອັມ ແນວສັນ, “ຂອງປະທານສີ່ຢ່າງທີ່ພຣະເຢຊູຄຣິດສະເໜີມອບໃຫ້ທ່ານ” (ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນເທດສະການຄຣິດສະມາດ, ວັນທີ 2 ເດືອນທັນວາ, 2018), ຫ້ອງສະໝຸດພຣະກິດຕິຄຸນ; “ຂໍ້ຄວາມທີ່ຕັດຕອນມາຈາກ ‘ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ’” (ວິດີໂອ), ChurchofJesusChrist.org ນຳອີກ.

Excerpts from "The Living Christ: The Testimony of the Apostles"

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເຮົາສາມາດ “ກ່າວປະຈັກພະຍານ [ຂອງເຮົາ]” ເພື່ອສະຫລອງການກຳເນີດຂອງພຣະເຢຊູ.

ໃຫ້ພິຈາລະນາວິທີທີ່ທ່ານອາດແນະນຳລູກໆຂອງທ່ານໃຫ້ຮູ້ຈັກ “ພຣະຄຣິດທີ່ຊົງພຣະຊົນ.” ບາງທີທ່ານອາດຈະຊ່ວຍພວກເຂົາໃຫ້ຊີ້ໃສ່ຊື່ຂອງ ພຣະຄຣິດ ໃນຕຳແໜ່ງ ແລະ ລາຍເຊັນຂອງຝ່າຍປະທານສູງສູດ ແລະ ອັກຄະສາວົກສິບສອງ. ທ່ານອາດຈະອະທິບາຍວ່ານີ້ແມ່ນປະຈັກພະຍານຂອງພວກເພິ່ນກ່ຽວກັບພຣະເຢຊູຄຣິດ ທີ່ພວກເພິ່ນຕ້ອງການແບ່ງປັນໃຫ້ໂລກຮັບຮູ້.
ທ່ານສາມາດນຳເອົາວະລີໃດໜຶ່ງຈາກ “ພຣະຄຣິດທີ່ຊົງພຣະຊົນ” ໃຫ້ລູກແຕ່ລະຄົນ ແລະ ບອກໃຫ້ພວກເຂົາຊອກຫາ ຫລື ແຕ້ມຮູ້ກ່ຽວກັບວະລີນັ້ນ. ແລ້ວທ່ານອາດຊ່ວຍເຫລືອພວກເຂົາຊອກຫາວະລີໃນ “ພຣະຄຣິດທີ່ຊົງພຣະຊົນ.” ທ່ານກໍອາດຈະຮວບຮວມຮູບພາບ ແລະ ວະລີເຫລົ່ານັ້ນ ເຮັດເປັນປຶ້ມ.
ແບ່ງປັນນຳກັນເຖິງວິທີທີ່ທ່ານໄດ້ຮັບປະຈັກພະຍານຂອງທ່ານເຖິງພຣະເຢຊູຄຣິດ. ບາງທີທ່ານອາດຈະສົ່ງຕໍ່ຮູບພາບຂອງພຣະຜູ້ຊ່ວຍໃຫ້ລອດຕໍ່ກັນໄປ ແລະ ປ່ຽນຜຽນກັນແບ່ງປັນກ່ຽວກັບບາງສິ່ງບາງຢ່າງທີ່ທ່ານຮູ້ຈັກກ່ຽວກັບພຣະອົງ (ລວມທັງຄວາມຈິງຕ່າງໆທີ່ຖືກສິດສອນໃນ “ພຣະຄຣິດທີ່ຊົງພຣະຊົນ”).

“ພຣະອົງໄດ້ໄປທຸກຫົນທຸກແຫ່ງເຮັດຄຸນງາມຄວາມດີ.”

ຂະນະທີ່ທ່ານ ແລະ ລູກໆຂອງທ່ານອ່ານວັກທີສອງຂອງ “ພຣະຄຣິດທີ່ຊົງພຣະຊົນ” ນຳກັນ, ໃຫ້ສົນທະນາກັບພວກເຂົາກ່ຽວກັບບາງສິ່ງທີ່ພຣະເຢຊູໄດ້ກະທຳ. ທ່ານຍັງສາມາດເບິ່ງຮູບພາບພຣະຊົນຊີບຂອງພຣະອົງ (ເບິ່ງໃນ ໜ້າກິດຈະກຳ ຂອງອາທິດນີ້ ແລະ ປື້ມຮູບພຣະກິດຕິຄຸນ) ນຳອີກ. ເຊື້ອເຊີນໃຫ້ເດັກນ້ອຍເວົ້າກ່ຽວກັບສິ່ງທີ່ພຣະຜູ້ຊ່ວຍໃຫ້ລອດກຳລັງເຮັດຢູ່ໃນຮູບ. ເຮົາຈະສາມາດຊ່ວຍຄົນອື່ນດັ່ງທີ່ພຣະອົງໄດ້ເຮັດແນວໃດ? ວິດີໂອ “Light the World” ໃນຫ້ອງສະໝຸດພຣະກິດຕິຄຸນ ສາມາດຊ່ວຍໃຫ້ແນວຄິດກັບທ່ານໄດ້.

“ພຣະອົງເປັນຄວາມສະຫວ່າງ, ເປັນຊີວິດ, ແລະ ເປັນຄວາມຫວັງຂອງໂລກ.”

ຊ່ວຍລູກໆຂອງທ່ານໃຫ້ຊອກຫາເພງສວດກ່ຽວກັບຄຣິດສະມາດທີ່ບົ່ງບອກເຖິງຄວາມສະຫວ່າງ, ຊີວິດ, ແລະ ຄວາມຫວັງ ທີ່ການກຳເນີດຂອງພຣະຜູ້ຊ່ວຍໃຫ້ລອດໄດ້ນຳມາສູ່ໂລກນີ້, ເຊັ່ນ “ໄກແສນໄກຢູ່ທີ່ຮາບຢູດີຢາ” (ເພງສວດ ແລະ ເພງຂອງເດັກນ້ອຍ, 56). ຮ້ອງເພງສວດນັ້ນນຳກັນ, ແລະ ປ່ອຍໃຫ້ລູກໆຂອງທ່ານແບ່ງປັນກ່ຽວກັບພຣະເຢຊູທີ່ໄດ້ນຳຄວາມສະຫວ່າງ, ຊີວິດ, ແລະ ຄວາມຫວັງ ມາສູ່ຊີວິດຂອງພວກເຂົາແນວໃດແດ່.

“ຂໍຂອບພຣະໄທພຣະເຈົ້າສຳລັບຂອງປະທານທີ່ຫາອັນປຽບບໍ່ໄດ້ຂອງພຣະບຸດແຫ່ງສະຫວັນຂອງພຣະອົງ.”

ຂອງປະທານໃດແດ່ທີ່ເຮົາໄດ້ຮັບເພາະພຣະເຢຊູຄຣິດ? ບາງທີທ່ານ ແລະ ລູກໆຂອງທ່ານສາມາດຊອກຫາຂອງປະທານເຫລົ່ານີ້ໄດ້ໃນ “ພຣະຄຣິດທີ່ຊົງພຣະຊົນ” ຫລື ໃນເພງເຊັ່ນ “He Sent His Son” (Children’s Songbook, 34–35). ຫລັງຈາກນັ້ນ ພວກເຂົາສາມາດຫໍ່ຂອງຂວັນບາງຢ່າງເພື່ອເປັນຕົວແທນເຖິງສິ່ງຂອງປະທານເຫລົ່ານັ້ນ. ທ່ານສາມາດແນະນຳໃຫ້ລູກໆຂອງທ່ານເປີດຂອງຂວັນໃນວັນຄຣິດສະມາດ ເພື່ອຊ່ວຍພວກເຂົາໃຫ້ຈື່ຈຳພຣະຜູ້ຊ່ວຍໃຫ້ລອດ ແລະ ຂອງປະທານຂອງພຣະອົງທີ່ມີໃຫ້ກັບເຮົາ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.