“ວັນທີ 15–21 ເດືອນທັນວາ: ‘ຄອບຄົວເປັນຈຸດໃຫຍ່ໃຈກາງຕໍ່ແຜນຂອງພຣະຜູ້ສ້າງ’: ຄອບຄົວ: ການປະກາດຕໍ່ໂລກ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄອບຄົວ: ການປະກາດຕໍ່ໂລກ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 15–21 ເດືອນທັນວາ: “ຄອບຄົວເປັນຈຸດໃຫຍ່ໃຈກາງຕໍ່ແຜນຂອງພຣະຜູ້ສ້າງ”

ຄອບຄົວ: ການປະກາດຕໍ່ໂລກ

ແມ່ນແຕ່ກ່ອນທີ່ເຮົາຈະມາເກີດ, ເຮົາໄດ້ເປັນສ່ວນໜຶ່ງຂອງຄອບຄົວ—ຄອບຄົວຂອງບິດາມານດາແຫ່ງສະຫວັນຂອງເຮົາ. ແບບແຜນນັ້ນໄດ້ສືບຕໍ່ຢູ່ເທິງແຜ່ນດິນໂລກ. ຄອບຄົວຢູ່ທີ່ນີ້, ໃນຕອນທີ່ດີທີ່ສຸດ, ມີຈຸດມຸ້ງໝາຍທີ່ຈະສະທ້ອນເຖິງແບບແຜນທີ່ສົມບູນແບບຢູ່ໃນສະຫວັນ.

ແນ່ນອນ, ບໍ່ມີການຮັບປະກັນວ່າ ຄອບຄົວຝ່າຍໂລກຈະເປັນແບບໃນອຸດົມຄະຕິ ຫລື ໝັ້ນຄົງຫລືບໍ່. ແຕ່ດັ່ງທີ່ປະທານເຮັນຣີ ບີ ໄອຣິງ ໄດ້ສິດສອນວ່າ, ຄອບຄົວ “ມອບໂອກາດທີ່ດີທີ່ສຸດໃຫ້ກັບລູກໆຂອງພຣະເຈົ້າ ເພື່ອຈະໄດ້ຖືກຕ້ອນຮັບເຂົ້າສູ່ແຜ່ນດິນໂລກ ດ້ວຍຄວາມຮັກທີ່ໃກ້ຄຽງທີ່ສຸດ ກັບຄວາມຮັກທີ່ພວກເຂົາເຄີຍຮູ້ສຶກໃນສະຫວັນ—ນັ້ນກໍຄື ຄວາມຮັກຂອງພໍ່ແມ່” (“Gathering the Family of God,” Liahona, May 2017, 20). ການທີ່ຮູ້ວ່າຄອບຄົວນັ້ນ ບໍ່ດີພ້ອມທຸກຢ່າງ ແລະ ບໍ່ໄດ້ຖືກຍົກເວັ້ນຈາກການໂຈມຕີຂອງຜູ້ປໍລະປັກ, ພຣະເຈົ້າຈຶ່ງໄດ້ສົ່ງພຣະບຸດທີ່ຮັກຂອງພຣະອົງມາ ເພື່ອໄຖ່ເຮົາ ແລະ ປິ່ນປົວຄອບຄົວຂອງເຮົາ. ແລະ ພຣະອົງໄດ້ສົ່ງສາດສະດາຍຸກສຸດທ້າຍມາ ດ້ວຍການປະກາດເພື່ອປົກປ້ອງ ແລະ ສ້າງຄວາມເຂັ້ມແຂງໃຫ້ກັບຄອບຄົວ. ຖ້າຫາກເຮົາຕິດຕາມສາດສະດາ ແລະ ມີສັດທາໃນພຣະຜູ້ຊ່ວຍໃຫ້ລອດ, ເຖິງແມ່ນວ່າຄອບຄົວໃນຊ່ວງມະຕະຈະຂາດເຂີນໃນອຸດົມຄະຕິແຫ່ງສະຫວັນ, ແຕ່ກໍຍັງມີຫວັງສຳລັບຄອບຄົວ—ຢູ່ເທິງໂລກ ແລະ ຢູ່ໃນສະຫວັນ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

“ຄອບຄົວເປັນຈຸດໃຫຍ່ໃຈກາງຕໍ່ແຜນຂອງພຣະຜູ້ສ້າງ.”

“ຄອບຄົວ: ການປະກາດຕໍ່ໂລກ” ແມ່ນກ່ຽວກັບຄອບຄົວຢ່າງຊັດເຈນ. ແຕ່ມັນກໍກ່ຽວກັບແຜນແຫ່ງຄວາມລອດຂອງພຣະເຈົ້າພໍໆກັນ. ວິທີໜຶ່ງທີ່ຈະສຶກສາການປະກາດ ແມ່ນການຂຽນວະລີທີ່ວ່າ ຊີວິດກ່ອນມະຕະ, ຊີວິດມະຕະ, ແລະ ຊີວິດຫລັງມະຕະ ໃສ່ເຈ້ຍແຜ່ນໜຶ່ງ ແລະ ຂຽນລາຍການກ່ຽວກັບສິ່ງທີ່ການປະກາດສິດສອນກ່ຽວກັບຫົວຂໍ້ເຫລົ່ານີ້. ທ່ານຮຽນຮູ້ຫຍັງແດ່ເມື່ອທ່ານສຶກສາການປະກາດໃນວິທີນີ້? ສິ່ງນີ້ຊ່ວຍໃຫ້ທ່ານເຂົ້າໃຈເຫດຜົນທີ່ການແຕ່ງງານ ແລະ ຄອບຄົວມີຄວາມສຳຄັນຕໍ່ແຜນຂອງພຣະເຈົ້າແນວໃດ? ຄວາມຈິງຕ່າງໆຢູ່ໃນການປະກາດ ມີອິດທິພົນຕໍ່ການເລືອກຂອງທ່ານແນວໃດ?

ມີຫລາຍຄົນທີ່, ດ້ວຍເຫດຜົນທີ່ຫລາກຫລາຍ, ອາດຢ້ານກ່ຽວກັບການແຕ່ງງານ ຫລື ການລ້ຽງລູກ. ຖ້າຫາກໝູ່ເພື່ອນຄົນໜຶ່ງເວົ້າຕໍ່ທ່ານວ່າ, “ຂ້ອຍບໍ່ມີວັນຢາກແຕ່ງງານ ຫລື ມີຄອບຄົວ,” ທ່ານຈະເວົ້າວ່າແນວໃດ? ບາງທີທ່ານກໍສາມາດຄົ້ນຫາບາງຢ່າງຢູ່ໃນການປະກາດທີ່ຈະຊ່ວຍໝູ່ເພື່ອນຂອງທ່ານໃຫ້ມີຄວາມຫວັງໃນແຜນການຂອງພຣະເຈົ້າ.

ອີກຄຳຖາມໜຶ່ງທີ່ທ່ານອາດຖືກຖາມ—ຫລື ທີ່ທ່ານອາດຖາມຕົວເອງ—ແມ່ນເປັນແບບນີ້: “ຖ້າຫາກສະຖານະການຄອບຄົວຂອງຂ້ອຍບໍ່ກົງກັບສິ່ງທີ່ມີພັນລະນາໄວ້ໃນການປະກາດກ່ຽວກັບຄອບຄົວເດ?” ມີສອງບ່ອນທີ່ທ່ານສາມາດຊອກຫາຄຳແນະນຳຂອງສາດສະດາໄດ້: ພາກ “A Mighty Change” ໃນຂ່າວສານຂອງແອວເດີ ດີເດີ ແອັຟ ອຸກດອບ “Jesus Christ Is the Strength of Parents” (Liahona, May 2023, 55–59) ແລະ ສີ່ວັກສຸດທ້າຍຂອງຂ່າວສານຂອງແອວເດີ ດີ ທອດ ຄຣິສໂຕເຟີສັນ “Why Marriage, Why Family” (Liahona, May 2015, 52).

ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ຍ້ອນສິ່ງທີ່ທ່ານໄດ້ສຶກສາແລ້ວ?

ເບິ່ງ Dallin H. Oaks, “The Plan and the Proclamation,” Liahona, Nov. 2017, 28–31; Topics and Questions, “Family,” ຫ້ອງສະໝຸດພຣະກິດຕິຄຸນ ນຳອີກ.

“ແຕ່ລະ [ຄົນ] ແມ່ນບຸດ ຫລື ທິດາທີ່ຮັກຂອງບິດາມານດາແຫ່ງສະຫວັນ.”

ເຮົາມັກຈະຄິດເຖິງການປະກາດກ່ຽວກັບຄອບຄົວວ່າເປັນຄູ່ມືສຳລັບຊີວິດຄອບຄົວ. ແຕ່ມັນຍັງສິດສອນຄວາມຈິງທີ່ສຳຄັນກ່ຽວກັບຄອບຄົວແຫ່ງສະຫວັນ ແລະ ຕົວຕົນນິລັນດອນນຳອີກ. ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້ວ່າ ເຮົາທຸກຄົນເປັນສ່ວນໜຶ່ງຂອງຄອບຄົວນີ້? ຄວາມຈິງນີ້ ມີອິດທິພົນຕໍ່ການເລືອກຂອງທ່ານແນວໃດ?

ເບິ່ງ “ເຮົາເປັນລູກຂອງພຣະເຈົ້າ,” ເພງສວດ ແລະ ເພງຂອງເດັກນ້ອຍ, 64 ນຳອີກ.

“ຄອບຄົວຈະມີຄວາມສຸກກໍຕໍ່ເມື່ອເຂົາເຈົ້າດຳເນີນຊີວິດຕາມຄຳສອນຂອງອົງພຣະເຢຊູຄຣິດເຈົ້າ.”

ໃຫ້ຄິດເຖິງ ວັກທີ 6 ແລະ 7 ຂອງ ການປະກາດກ່ຽວກັບຄອບຄົວ ວ່າເປັນແບບແຜນສຳລັບ “ຄອບຄົວຈະມີຄວາມສຸກ.” ຂະນະທີ່ທ່ານອ່ານວັກເຫລົ່ານີ້, ໃຫ້ລະບຸຫລັກທຳຂອງ “ການແຕ່ງງານ ແລະ ຄອບຄົວທີ່ປະສົບຜົນສຳເລັດ.” ທ່ານອາດຄິດກ່ຽວກັບຕົວຢ່າງຂອງຫລັກທຳເຫລົ່ານີ້ທີ່ທ່ານເຄີຍເຫັນໃນຄອບຄົວຂອງທ່ານເອງ ຫລື ຄອບຄົວອື່ນ. ຫລັກທຳເຫລົ່ານີ້ຊ່ວຍເຮັດໃຫ້ພຣະເຢຊູຄຣິດເປັນຮາກຖານຂອງຊີວິດຄອບຄົວແນວໃດ?

ແລ້ວທ່ານອາດຄິດກ່ຽວກັບຄວາມສຳພັນຄອບຄົວ ທີ່ທ່ານຢາກເຮັດໃຫ້ເຂັ້ມແຂງຂຶ້ນ. ວາງແຜນ, ດ້ວຍຄວາມຊ່ວຍເຫລືອຈາກພຣະຜູ້ຊ່ວຍໃຫ້ລອດ, ເພື່ອລົງມືປະຕິບັດຕາມການກະຕຸ້ນທີ່ທ່ານໄດ້ຮັບ.

ເບິ່ງ L. Whitney Clayton, “The Finest Homes,” Liahona, May 2020, 107–9 ນຳອີກ.

ພໍ່ກຳລັງອ່ານໜັງສືໃຫ້ລູກໆຂອງລາວຟັງ — ພໍ່ແມ່ຄວນລ້ຽງດູລູກເຕົ້າຂອງພວກເຂົາດ້ວຍຄວາມຮັກ ແລະ ຄວາມຊອບທຳ.

“ພວກເຮົາຂໍຮຽກຮ້ອງໃຫ້ພົນລະເມືອງ … ເພື່ອຈະໄດ້ຮັກສາ ແລະ ເສີມຄວາມເຂັ້ມແຂງໃຫ້ແກ່ຄອບຄົວ.”

ວັກສຸດທ້າຍ ຂອງ ການປະກາດກ່ຽວກັບຄອບຄົວ ແມ່ນລວມທັງການເອີ້ນໃຫ້ລົງມືປະຕິບັດ. ຂະນະທີ່ທ່ານພິຈາລະນາວິທີທີ່ທ່ານຈະຕອບຮັບການເອີ້ນນັ້ນ, ການສຶກສາຫົວເລື່ອງຂອງການປະກາດ. ຍົກຕົວຢ່າງ, ການປະກາດແມ່ນຫຍັງ? ຄຳນັ້ນມີຄວາມໝາຍຕໍ່ທ່ານແນວໃດກ່ຽວກັບຂ່າວສານຂອງເອກະສານນີ້? ແມ່ນຫຍັງທີ່ເຮັດໃຫ້ຝ່າຍປະທານສູງສຸດ ແລະ ສະພາອັກຄະສາວົກສິບສອງມີຄຸນສົມບັດເໝາະສົມທີ່ຈະອອກການປະກາດຕໍ່ໂລກກ່ຽວກັບຄອບຄົວ? ທ່ານອາດຂຽນລາຍການສິ່ງທີ່ທ່ານຖືວ່າເປັນຂ່າວສານຫລັກຂອງການປະກາດ. ທ່ານຈະສາມາດສົ່ງເສີມຂ່າວສານເຫລົ່ານີ້ໃນຊີວິດຂອງທ່ານ, ໃນບ້ານຂອງທ່ານ, ແລະ ໃນຊຸມຊົນຂອງທ່ານໄດ້ແນວໃດ?

ເບິ່ງ Bonnie L. Oscarson, “Defenders of the Family Proclamation,” Liahona, May 2015, 14–17; “Defenders of the Faith” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄອບຄົວແມ່ນສຳຄັນສຳລັບແຜນຂອງພຣະບິດາເທິງສະຫວັນ.

ຊ່ວຍໃຫ້ລູກໆຂອງທ່ານຄິດເຖິງສິ່ງທີ່ສຳຄັນຫລາຍ ຈົນວ່າພວກເຂົາຢາກບອກທຸກຄົນກ່ຽວກັບມັນ. ເອົາໃບ “ຄອບຄົວ: ການປະກາດຕໍ່ໂລກ” ໃຫ້ລູກໆເບິ່ງ, ແລະ ອະທິບາຍວ່າ ບັນດາສາດສະດາ ແລະ ອັກຄະສາວົກໄດ້ຂຽນມັນເພື່ອບອກເຮົາທຸກຄົນວ່າ ຄອບຄົວນັ້ນ ສຳຄັນຕໍ່ພຣະບິດາເທິງສະຫວັນຫລາຍສໍ່າໃດ. ເປັນຫຍັງຄອບຄົວຈຶ່ງສຳຄັນຕໍ່ພຣະອົງ? (ເບິ່ງວິດີໂອ “What Is the Purpose of Family?” [ChurchofJesusChrist.org]) ນຳອີກ.

1:19
What Is the Purpose of Family?
ແບ່ງປັນກັບລູກໆຂອງທ່ານ ບາງຢ່າງຈາກການປະກາດທີ່ທ່ານຮູ້ສຶກວ່າ ພວກເຮົາທຸກຄົນຕ້ອງຮູ້. ເຊື້ອເຊີນເດັກນ້ອຍໃຫ້ແບ່ງປັນຄວາມຮູ້ສຶກຂອງພວກເຂົາກ່ຽວກັບຄວາມຈິງເຫລົ່ານັ້ນ. ຊີວິດຂອງເຮົາຈະແຕກຕ່າງໄປຈາກນີ້ແນວໃດ ຖ້າຫາກເຮົາບໍ່ຮູ້ຈັກສິ່ງເຫລົ່ານີ້? ທ່ານອາດຮ້ອງເພງທີ່ກ່ຽວຂ້ອງກັບຄວາມຈິງຕ່າງໆທີ່ພົບເຫັນໃນການປະກາດນຳກັນ, ດັ່ງເຊັ່ນ “I Will Follow God’s Plan” (Children’s Songbook, 164–65).
ໃນ ພາກທີ IV ຂອງຂ່າວສານຂອງເພິ່ນ “The Plan and the Proclamation” (Liahona, Nov. 2017, 30), ປະທານດາລິນ ເອັຈ ໂອກສ໌ ໄດ້ອະທິບາຍເຖິງວິທີທີ່ ການປະກາດກ່ຽວກັບຄອບຄົວ ໄດ້ຖືກຂຽນຂຶ້ນ. ບາງທີທ່ານ ແລະ ລູກໆຂອງທ່ານສາມາດທົບທວນຄຳອະທິບາຍຂອງເພິ່ນນຳກັນ ແລະ ເວົ້າລົມກ່ຽວກັບເຫດຜົນທີ່ທ່ານກະຕັນຍູທີ່ພຣະຜູ້ເປັນເຈົ້າໄດ້ດົນໃຈຜູ້ຮັບໃຊ້ຂອງພຣະອົງໃຫ້ສິດສອນເຮົາເຖິງຄວາມຈິງເຫລົ່ານີ້ກ່ຽວກັບຄອບຄົວ.
ທ່ານຍັງສາມາດເອົາຮູບໃຫ້ລູກໆຂອງທ່ານເບິ່ງ (ຫລື ເຊື້ອເຊີນພວກເຂົາໃຫ້ແຕ້ມຮູບ) ທີ່ສະແດງເຖິງຄວາມຈິງທີ່ພົບເຫັນໃນ ການປະກາດກ່ຽວກັບຄອບຄົວ. ນີ້ສາມາດເປັນຮູບຂອງພຣະວິຫານ, ຄອບຄົວກຳລັງອະທິຖານ ຫລື ກຳລັງຫລິ້ນນຳກັນ, ຫລື ຄູ່ຮັກຄູ່ໜຶ່ງກຳລັງແຕ່ງງານ. ແລ້ວລູກໆຂອງທ່ານກໍສາມາດຊອກຫາປະໂຫຍກຕ່າງໆຢູ່ໃນ ການປະກາດກ່ຽວກັບຄອບຄົວ ທີ່ກ່ຽວຂ້ອງກັບຮູບນັ້ນ. ພຣະຜູ້ເປັນເຈົ້າສິດສອນເຮົາຫຍັງແດ່ກ່ຽວກັບສິ່ງເຫລົ່ານີ້ໃນການປະກາດ?

ແມ່ຍິງກັບເດັກນ້ອຍ — ພຣະບິດາເທິງສະຫວັນຢາກໃຫ້ຄອບຄົວມີຄວາມສຸກ.

ເປັນຄົນອ່ອນໄຫວ. ຂະນະທີ່ທ່ານສິດສອນຄວາມຈິງທີ່ມີສອນໄວ້ຢູ່ໃນ ການປະກາດກ່ຽວກັບຄອບຄົວ, ກະລຸນາຮັບຮູ້ວ່່າ ມີເດັກນ້ອຍຫລາຍຄົນທີ່ອາໄສຢູ່ໃນຄອບຄົວທີ່ບໍ່ກົງກັບອຸດົມການທີ່ມີອະທິບາຍໄວ້ໃນການປະກາດ. ໃຫ້ພິຈາລະນາວິທີທີ່ທ່ານຈະສາມາດຊຸກຍູ້ ແລະ ດົນໃຈພວກເຂົາ.

ເຮົາເປັນ “ບຸດ ຫລື ທິດາທາງວິນຍານທີ່ຮັກຫອມຂອງບິດາມານດາແຫ່ງສະຫວັນ.”

ຂະນະທີ່ພວກທ່ານຮ້ອງເພງ “ເຮົາເປັນລູກຂອງພຣະເຈົ້າ” (ເພງສວດ ແລະ ເພງຂອງເດັກນ້ອຍ, 64) ນຳກັນ, ທ່ານສາມາດໂຍນໝາກບານໃຫ້ລູກຄົນໜຶ່ງ ຂະນະທີ່ທ່ານເວົ້າວ່າ, “ຂ້ອຍຮູ້ຈັກລູກຂອງພຣະເຈົ້າຊື່ວ່າ [ຊື່ຂອງລູກຄົນນັ້ນ].” ແລ້ວລູກຄົນນັ້ນກໍສາມາດໂຍນໝາກບານໜ່ວຍນັ້ນໃຫ້ຄົນອື່ນອີກ, ໂດຍເວົ້າຄຳດຽວກັນ ແລະ ເວົ້າຊື່ຂອງຄົນນັ້ນ. ຊ່ວຍລູກໆຂອງທ່ານຊອກຫາວະລີທີ່ວ່າ “ບຸດ ຫລື ທິດາທາງວິນຍານທີ່ຮັກຫອມຂອງບິດາມານດາແຫ່ງສະຫວັນ” ຢູ່ໃນ ການປະກາດກ່ຽວກັບຄອບຄົວ, ແລະ ສະແດງປະຈັກພະຍານຂອງທ່ານເຖິງຄວາມຈິງນີ້.

ຄອບຄົວຈະມີຄວາມສຸກທີ່ສຸດເມື່ອພວກເຂົາຕິດຕາມພຣະເຢຊູຄຣິດ.

ເພື່ອເລີ່ມການສົນທະນາກ່ຽວກັບການເພີ່ມຄວາມເຂັ້ມແຂງໃຫ້ແກ່ຄອບຄົວຂອງທ່ານ, ທ່ານ ແລະ ລູກໆຂອງທ່ານສາມາດເວົ້າກ່ຽວກັບສິ່ງທີ່ເຮົາເຮັດ ເພື່ອເຮັດໃຫ້ສິ່ງອື່ນໆແຂງແຮງຂຶ້ນ—ເຊັ່ນ ແຂ້ວຂອງເຮົາ, ຮ່າງກາຍຂອງເຮົາ, ຫລື ຕຶກອາຄານ. ແລ້ວທ່ານກໍສາມາດປຽບທຽບສິ່ງນັ້ນກັບການສ້າງຄອບຄົວທີ່ເຂັ້ມແຂງ. ຊ່ວຍລູກໆຂອງທ່ານຊອກຫາຫລັກທຳທີ່ເປັນເໝືອນດັ່ງພຣະຄຣິດ ທີ່ນຳໄປສູ່ຄວາມສຸກໃນຊີວິດຄອບຄົວ, ພົບໃນ ວັກທີ 7 ຂອງ ການປະກາດກ່ຽວກັບຄອບຄົວ (ເບິ່ງ ໜ້າກິດຈະກຳ ຂອງອາທິດນີ້ ນຳອີກ).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.