Ko ngā Tikanga Whakapono me ngā Whakapuakitanga Ōkawa 1 me te 2

Me pēnei te whakaaro i a koe e rangahau ana i ngā Tikanga Whakapono: Meatia tētahi “akoranga–poto” mō ia tikanga whakapono hei whakamārama atu he aha tāu e whakapono nei. Kei roto i tō “akoranga–poto” tētahi karaipiture, pikitia, hīmene, waiata tamariki rānei, tētahi kōrero mōu ake rānei e hāngai ana ki te pupuri ki tētahi o ngā mea pono e whakaakona mai ana i taua tikanga whakapono.

He aha ngā hua o ēnei mea pono ki roto i tō hononga ki te Matua i te Rangi rāua ko Ihu Karaiti? He aha ngā hua pai mōu kua puta mai i ngā Tikanga Whakapono nā konā kua pai ake tō rangahau rongopai, nā konā rānei kua pai ake tō tohatoha atu i te rongopai ki ētahi atu?

Tirohia anōtia te Pukapuka Aratohu ki ngā Karaiptiure, “Ko ngā Tikanga Whakapono,” Wharepukapuka Rongopai; L. Tom Perry, “The Doctrines and Principles Contained in the Articles of Faith,” Liahona, Noema 2013, 46–48; “Chapter 38: The Wentworth Letter,” in Teachings of Presidents of the Church: Joseph Smith (2011), 435–47.

“E whakapono ana mātou ka huraina [e te Atua] ngā mea nui maha me ngā mea whakahirahira maha e pā ana ki te Kīngitanga o te Atua” (Ko ngā Tikanga Whakapono 1:9). I runga i taua whakaaro, arotakengia ngā Whakapuakitanga Ōkawa 1 me te 2 me te aro atu ki ngā kupu me ngā rerenga e whakakaha ai i tō whakapono ki te whakakitenga e haere tonu ana. He aha ngā hua o ēnei whakakitenga i tō oranga? He aha ngā hua hei āwhina i te koke whakamuatanga o ngā mahi o te kīngitanga o te Matua i te Rangi?

He aha ngā mea e kite nei koe nā konā mōhio ai e ārahina ana te Hāhi “e te whakaawenga o te Atua Kaha Rawa” i ēnei rā? (Whakapuakitanga Ōkawa 1). Tērā pea māu tētahi, ētahi rānei o ngā kōrero o tētahi huinga whānui o te hāhi kātahi anō ka hori e arotake, e rapu ana i tā te Ariki hei ārahi i Tana Hāhi—me tō oranga. Ko te karere inātata nei a te Tumuaki o te Hāhi tētahi tīmatanga pai.

Me aha koe mehemea ka raru koe, tētahi atu rānei kia mārama, kia whakaae rānei ki tā te Ariki e whakaako nei mā roto i Ana poropiti? He aha e whakawhetai ai tō ngākau mō tētahi poropiti?

Tirohia anōtia Amoho 3:7; 2 Nīwhai 28:30; Allen D. Haynie, “A Living Prophet for the Latter Days,” Liahona, Mei 2023, 25–28; ngā Kaupapa me ngā Pātai, “Prophets,” Wharepukapuka Rongopai; “We Thank Thee, O God, for a Prophet,” Hymns, no. 19.

I roto i ngā “Excerpts from Three Addresses by President Wilford Woodruff regarding the Manifesto” (kei te pito whakamutunga o te Whakapuakitanga Ōkawa 1), he aha ngā take i homai ai e te poropiti e pā ana ki tā te Ariki whakamutu atu i te mahi mārena ki ngā wāhine tokomaha? He aha ngā akoranga māu i konei e pā ana ki te mahi a te Atua?

Mō ētahi atu kōrero e pā ana ki ngā kōrero hītori tōmua o te Whakapuakitanga Ōkawa 1, tirohia Saints, 2:602–15; “The Messenger and the Manifesto,” i Revelations in Context, 323–31; ngā Kaupapa me ngā Pātai, “Plural Marriage and Families in Early Utah,” Wharepukapuka Rongopai.

Kāore tātou e mōhio ana he aha te take kāore i wātea te whakamanatanga tohungatanga me ngā tikanga tapu o te temepara ki ngā mema Awherikana o te Hāhi mō tētahi wā. Hei ngā wā anō e aro ana ki ngā pātai uaua kāore anō kia whakautua e pā ana ki te kaupapa here, he tokomaha te Hunga Tapu Mangumangu i ngā Rā o Muri Nei i whakawhirinaki ai ki te Ariki (tirohia Whakataukī 3:5) ā, i ū pono tonu atu ki a Ia puta noa i ō rātou oranga. Tērā pea he mea hihiko i te ngākau te ako e pā ana ki tō rātou whakapono me ngā āhuatanga i pai ai ki a rātou. Anei ētahi o ā rātou kōrero, ka kitea i history.ChurchofJesusChrist.org:

• “Jane Elizabeth Manning James”

• “In My Father’s House Are Many Mansions” (he kōrero mō Green Flake)

• “You Have Come at Last” (he kōrero mō Anthony Obinna)

• “Break the Soil of Bitterness” (he kōrero mō Julia Mavimbela)

• “I Will Take It in Faith” (he kōrero mō George Rickford)

• “Long–Promised Day” (he kōrero mō Joseph W. B. Johnson)

I a koe e pānui ana i te Whakapuakitanga Ōkawa 2, he aha tāu e ako ai e pā ana ki te tukanga a te Ariki mō te ārahi i ngā kaupapa here o Tana Hāhi? Māku e whakawhirinaki ki te Ariki ahakoa kāore au i te tino mārama rawa.

Tirohia anōtia2 Nīwhai 26:33; “Witnessing the Faithfulness,” i Revelations in Context, 332–41; ngā Kaupapa me ngā Pātai, “Race and the Priesthood,” Wharepukapuka Rongopai; Ahmad Corbitt, “A Personal Essay on Race and the Priesthood,” parts 1–4,history.ChurchofJesusChrist.org; BeOne.ChurchofJesusChrist.org.

• Me rapu, ā, me waiata i ngā hīmene, i ngā waiata tamariki rānei e āwhina ai i ō tamariki kia mārama ki tētahi, ki ētahi rānei o ngā Tikanga Whakapono. Tērā pea mā rātou koe e āwhina ki te whiriwhiri i ngā hīmene me ngā waiata. Āwhinatia ō tamariki kia kite atu i te hāngaitanga o ngā waiata ki ngā Tikanga Whakapono.

• Mā koutou ko ō tamariki e tuhituhi i ngā pātai e pātaitia ana e ngā tāngata e pā ana ki te rongopai a Ihu Karaiti, ki Tana Hāhi rānei. Kātahi ka taea te mahitahi ki te whakautu i aua pātai mā te whakamahi i ngā Tikanga Whakapono. Me tahuri tātou ki hea hei ngā wā he pātai ō tātou e pā ana ki te rongopai?

• Hei āwhina i ō tamariki kia mārama ki te tikanga whakapono tuaiwa, tērā pea me hoatu e koe ētahi karaipiture me tētahi pikitia o tētahi poropiti e ora ana ki a rātou (tētahi putanga rānei o tētahi huinga hāhi whānui inātata o te Liahona). Tonoa rātou kia hikina ake ngā karaipiture i a koe e pānui ana i ngā kupu “ngā mea katoa kua huraina mai e te Atua” me te pikitia, te makahīni rānei i a koe e pānui ana i te “ngā mea katoa e huraina ana e Ia ināianei”(Ko ngā Tikanga Whakapono 1:9). He aha e whakahirahira ai ngā poropiti onamata me ngā poropiti o nāianei?

• Me ako ō tamariki me pēhea ngā kupu a ngā poropiti e ārahi nei i a tātou, ka pēneitia mā te whai i ngā tohutohu ki te hanga i tētahi mea, pērā i te kai, i tētahi taputapu tākaro rānei. Māu pea e whakataurite i tēnei ki ngā tohutohu e homai nei e Ihu Karaiti ki a tātou mā roto i te poropiti. He aha ētahi akoranga kua whakaakona mai nei tātou e te Ariki mā roto i Tana poropiti ora i ēnei rā?

• Mā te mārama ki te hāngaitanga o ngā karaipiture onamata ki te whakakitenga o nāianei e āwhina ai i ō tamariki kia mārama ki ngā Whakapuakitanga Ōkawa. Māu rātou e tono kia pānuitia Ngā Mahi 10:34–35 me te Hākopa 2:27–30 kātahi ka tonoa rātou ki te whakatau iho he aha te karaipiture e hāngai ana ki te Whakapuakitanga Ōkawa 1 (nā konā whakamutua atu te mārena ki ngā wāhine tokomaha) he aha hoki te mea e hāngai ana ki te Whakapuakitanga Ōkawa 2 (i konā whakapuaki ake ka wātea te whakamanatanga o te tohungatanga me ngā tikanga tapu o te temepara ki ngā tāngata nō ngā iwi katoa). Me tuku whakaaturanga e pā ana ki tā te Ariki whakakite mai i Tāna e pai ai ki ngā poropiti onamata me ngā poropiti o ēnei rā.