Ko e Ngaahi Tefito ʻo e Tuí mo e Fanongonongo Fakamafaiʻi 1 mo e 2

Fakakaukau ki he founga ko ʻení ki hono ako ʻo e Ngaahi Tefito ʻo e Tuí: Faʻu ha “kiʻi lēsoni nounou” ki he tefito ʻo e tui takitaha, ke fakamatalaʻi ʻaki ʻa e meʻa ʻokú ke tui ki aí. ʻE lava ke kau ʻi hoʻo lēsoni nounoú ha potufolofola fekauʻaki, laʻitā, himi pe hiva ʻa e fānaú, pe aʻusia fakataautaha fekauʻaki mo hono moʻui ʻaki ha foʻi moʻoni ʻoku akoʻi mai ʻe he tefito ʻo e tuí.

Ko e hā ha liliu ʻoku fakahoko ʻe he ngaahi moʻoni ko ʻení ʻi hoʻo vā fetuʻutaki mo e Tamai Hēvaní mo Sīsū Kalaisí? Kuo fakatupulaki fēfē ʻe he Ngaahi Tefito ʻo e Tuí hoʻo ako e ongoongoleleí pe tokoniʻi koe ke ke vahevahe ʻa e ongoongoleleí mo e niʻihi kehé?

Vakai foki, Fakahinohino ki he Ngaahi Folofolá, “Ngaahi Tefito ʻo e Tuí,” Gospel Library; L. Tom Perry, “Ko e Ngaahi Tokāteline mo e Ngaahi Tefitoʻi Moʻoni ʻoku Maʻu ʻi he Ngaahi Tefito ʻo e Tuí,” Liahona, Nōvema 2013, 46–48; “Vahe 38: Ko e Tohi Ueniuefí,” ʻi he Ngaahi Akonaki ʻa e Kau Palesiteni ʻo e Siasí: Siosefa Sāmita (2011), 505–517.

“ʻOku mau tui [ʻe] kei fakahā mai [ʻe he ʻOtuá] ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuá” (Ngaahi Tefito ʻo e Tui 1:9). ʻI he fakakaukau ki he tefitoʻi moʻoni ko ʻení, toe vakaiʻi e Fanongonongo Fakamafaiʻi 1 mo e 2, pea kumi ha ngaahi lea mo e kupuʻi lea ʻokú ne fakamālohia hoʻo tuí ki he hokohoko atu e maʻu fakahaá. Kuo kaunga fēfē ʻa e ngaahi fakahā ko ʻení ki hoʻo moʻuí? Kuo nau tokoni fēfē ke fakatupulaki ʻa e ngāue ʻa e puleʻanga ʻo e Tamai Hēvaní?

Ko e hā ha fakamoʻoni ʻokú ke vakai ki ai ʻoku tataki ʻa e Siasí “ʻo fakatatau ki he fakahinohino ʻa e ʻOtua Māfimafí” he ʻahó ni? (Fanongonongo Fakamafaiʻi 1). Mahalo te ke lava ʻo toe vakaiʻi ha pōpoaki ʻe taha pe lahi ange ʻo e konifelenisi lahi fakamuimui tahá, ke kumi e founga ʻoku tataki ai ʻe he ʻEikí ʻa Hono Siasí—mo hoʻo moʻuí. Mahalo ko ha feituʻu lelei ke kamata aí ko e pōpoaki fakamuimui taha mei he Palesiteni ʻo e Siasí.

Ko e hā ha meʻa te ke lava ʻo fai kapau ʻokú ke fāinga, pe ko ha taha ʻokú ke ʻofa ai, ke mahino pe tali ʻa e meʻa ʻoku akoʻi ʻe he ʻEikí ʻo fakafou ʻi Heʻene kau palōfitá? Ko e hā e ʻuhinga ʻokú ke houngaʻia ai ʻi ha palōfitá?

Vakai foki, ʻĀmosi 3:7; 2 Nīfai 28:30; Allen D. Haynie, “Ko ha Palōfita Moʻui maʻá e Ngaahi ʻAho Kimui Ní,” Liahona, Mē 2023, 25–28; Ngaahi Tefitó mo e Ngaahi Fehuʻí, “Kau Palōfitá,” Gospel Library; “Fakamālō ki he ʻOtuá,” Ngaahi Himí, fika 10.

ʻI he “Ngaahi Meʻa Naʻe Toʻo Mei he Malanga ʻe Tolu ʻa Palesiteni Uilifooti Utalafi fekauʻaki mo e Fanongonongó” (ʻi he fakaʻosinga ʻo e Fanongonongo Fakamafaiʻi 1), ko e hā ha ngaahi ʻuhinga naʻe ʻomi ʻe he palōfitá ki hono fakangata ʻe he ʻEikí ʻa e mali tokolahí? Ko e hā ʻoku akoʻi mai ʻe he meʻá ni fekauʻaki mo e ngāue ʻa e ʻOtuá?

Ki ha fakamatala lahi ange fekauʻaki mo e puipuituʻa fakahisitōlia ʻo e Fanongonongo Fakamafaiʻi 1, vakai ki he Kau Māʻoniʻoní, 2:704–19; “The Messenger and the Manifesto,” ʻi he Revelations in Context, 323–31; Topics and Questions, “Plural Marriage and Families in Early Utah,” Gospel Library.

ʻOku ʻikai ke tau ʻilo e ʻuhinga naʻe ʻikai ʻatā ai ʻi ha vahaʻataimi e fakanofo ki he lakanga fakataulaʻeikí mo e ngaahi ouau fakatemipalé ki he kāingalotu ‘o e Siasí ne hakoʻi ʻAfiliká. Naʻa mo e taimi naʻe fehangahangai ai ʻa e Kāingalotu ʻUliʻuli ʻo e Siasí mo e ngaahi fehuʻi faingataʻa fekauʻaki mo e tuʻutuʻuni ko iá, naʻa nau falala pē ki he ʻEikí (vakai, Lea Fakatātā 3:5) pea tauhi faivelenga kiate Ia ʻi he kotoa ʻo ʻenau moʻuí. ʻE lava ke fakalotoa fakalaumālie kiate koe ʻa e ako fekauʻaki mo ʻenau tuí mo e ngaahi aʻusiá. ʻOku maʻu ha niʻihi ʻo ʻenau ngaahi fakamatalá ʻi he history.ChurchofJesusChrist.org:

• “Seini ʻElisapeti Mēningi Sēmisi”

• “ʻI he Fale ʻo ʻEku Tamaí ʻOku ʻi ai ʻa e Ngaahi Nofoʻanga ʻOku Lahi” (talanoa ʻo Kulini Feleikí)

• “Kuo Faifai Peá Mo Haʻu” (talanoa ʻo ʻAnitoni ʻOpiná)

• “Break the Soil of Bitterness” (talanoa ʻo Julia Mavimbela)

• “I Will Take It in Faith” (talanoa ʻo George Rickford)

• “Long-Promised Day” (talanoa ʻo Joseph W. B. Johnson)

ʻI hoʻo lau ʻa e Fanongonongo Fakamafaiʻi 2, ko e hā ha meʻa ʻokú ke ako fekauʻaki mo e founga ʻa e ʻEikí ki hono tataki ʻa e ngaahi tuʻutuʻuni ʻo Hono Siasí? Fakalaulauloto ki he founga kuó ke ako ai ke falala ki he ʻEikí ʻo aʻu ki he taimi ʻoku ʻikai ke ke maʻu ai ha mahino haohaoá.

Vakai foki, 2 Nīfai 26:33; “Witnessing the Faithfulness,” ʻi he Revelations in Context, 332–41; Topics and Questions, “Race and the Priesthood,” Gospel Library; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org.

• Fakakaukau ke kumi mo hivaʻi ha ngaahi himi pe ngaahi hiva ʻa e fānaú ʻe ala tokoni ke mahino ki hoʻo fānaú ha Tefito ʻo e Tuí ʻe taha pe lahi ange. Mahalo te nau lava ʻo tokoni atu ke ke fili ʻa e himí mo e ngaahi hivá. Tokoni ke ʻilo ʻe he fānaú ʻa e founga ʻoku fekauʻaki ai ʻa e ngaahi hivá mo e Ngaahi Tefito ʻo e Tuí.

• Te ke lava ʻo ngāue fakataha mo hoʻo fānaú ke hiki ha ngaahi fehuʻi ʻe ala maʻu ʻe he kakaí fekauʻaki mo e ongoongolelei ʻo Sīsū Kalaisí pe ko Hono Siasí. Te mou lava leva ʻo ngāue fakataha ke tali e ngaahi fehuʻi ko iá ʻo fakaʻaongaʻi ʻa e Ngaahi Tefito ʻo e Tuí. Ko e fē ha toe feituʻu te tau lava ʻo ʻalu ki ai ʻi he taimi ʻoku ʻi ai haʻatau ngaahi fehuʻi fekauʻaki mo e ongoongoleleí?

• Ke tokoni ke mahino ki hoʻo fānaú ʻa e tefito ʻo e tui hono hivá, mahalo te ke lava ʻo ʻoange kiate kinautolu ha seti folofola mo ha tā ʻo e palōfita moʻuí (pe ko ha Liahona ʻo e konifelenisi fakamuimuitahá). Kole ange ke nau puke hake ʻa e folofolá ʻi hoʻo lau ʻa e ngaahi lea “ngaahi meʻa kotoa pē kuo fakahā mai ʻe he ʻOtuá” pea mo e taá pe makasiní ʻi hoʻo lau ʻa e “ngaahi meʻa kotoa pē ʻokú Ne fakahā mai ʻi he taimi ní” (Ngaahi Tefito ʻo e Tuí 1:9). Ko e hā e ʻuhinga ʻoku tau fakatou fiemaʻu ai ʻa e kau palōfita ʻo e kuonga muʻá mo onopōní?

• ʻE lava ke ako ʻe hoʻo fānaú ʻa e founga ʻoku tataki ai kitautolu ʻe he ngaahi lea ʻa e kau palōfitá ʻaki ʻenau muimui ki he ngaahi fakahinohino ke ngaohi ha meʻa, hangē ko e meʻakai pe ko ha meʻa vaʻinga. Te ke lava ʻo fakafehoanaki ʻeni ki he ngaahi fakahinohino ʻoku ʻomi ʻe Sīsū Kalaisi ʻo fakafou ʻi he palōfitá. Ko e hā ha ngaahi meʻa kuo akoʻi mai ʻe he ʻEikí kiate kitautolu ʻo fakafou ʻi Heʻene palōfita moʻuí he ʻahó ni?

• Mahalo ʻe ala tokoni ʻa e vakai ki he founga ʻoku felāveʻi ai ʻa e ngaahi folofola ʻo e kuonga muʻá mo e fakahā fakaonopōní ke mahino ki hoʻo fānaú ʻa e ongo Fanongonongo Fakamafaiʻí. Te ke lava ʻo kole ange ke nau lau ʻa e Ngāue 10:34–35 mo e Sēkope 2:27–30 pea fakaafeʻi ke nau fakapapauʻi pe ko e potufolofola fē ʻoku fekauʻaki mo e Fanongonongo Fakamafaiʻi 1 (ʻa ia naʻe iku ki he fakangata ʻo e mali tokolahí) pea ko e potufolofola fē ʻoku fekauʻaki mo e Fanongonongo Fakamafaiʻi 2 (ʻa ia naʻe fanongonongo ai ʻoku ʻatā ʻa e fakanofo ki he lakanga fakataulaʻeikí mo e ngaahi ouau fakatemipalé ki he kakai ʻo e matakali kotoa pē). Fakahoko hoʻo fakamoʻoní ʻoku fakahā ʻe he ʻEikí Hono finangaló ki he kau palōfita ʻi he kuongamuʻá mo onopōní.