“ວັນທີ 24–30 ເດືອນພະຈິກ: ‘ເພິ່ນ “ໄດ້ຜະນຶກພາລະກິດຂອງເພິ່ນ ແລະ ວຽກງານຂອງເພິ່ນດ້ວຍເລືອດຂອງເພິ່ນເອງ”’: ຄຳສອນ ແລະ ພັນທະສັນຍາ 135–136,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 135–136,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ຄຸກຄາດເທດ

ຄຳສອນ ແລະ ພັນທະສັນຍາ 24–30: “ເພິ່ນ ‘ໄດ້ຜະນຶກພາລະກິດຂອງເພິ່ນ ແລະ ວຽກງານຂອງເພິ່ນດ້ວຍເລືອດຂອງເພິ່ນເອງ’”

ຄຳສອນ ແລະ ພັນທະສັນຍາ 135–136

ຕອນບ່າຍຂອງວັນທີ 27 ເດືອນມິຖຸນາ, 1844, ໄດ້ພົບເຫັນໂຈເຊັບ ແລະ ໄຮຣຳ ສະມິດ ຢູ່ໃນຄຸກອີກເທື່ອໜຶ່ງ, ພ້ອມດ້ວຍຈອນ ເທເລີ ແລະ ວິວເລີດ ຣິເຈີສ໌. ພວກເພິ່ນເຊື່ອວ່າພວກເພິ່ນບໍ່ມີຄວາມຜິດໃນອາຊະຍາກຳໃດໆ, ແຕ່ພວກເພິ່ນໄດ້ຍອມຕົວໃຫ້ຖືກຈັບ, ຫວັງວ່າຈະຮັກສາໄພ່ພົນໃນເມືອງນາວູໃຫ້ປອດໄພ. ມັນບໍ່ແມ່ນເທື່ອທຳອິດທີ່ສັດຕູຂອງສາດສະໜາຈັກໄດ້ເອົາສາດສະດາໂຈເຊັບເຂົ້າຄຸກ, ແຕ່ເທື່ອນີ້ ເບິ່ງຄືວ່າເພິ່ນຮູ້ວ່າເພິ່ນຈະບໍ່ໄດ້ກັບຄືນໄປແບບຍັງມີຊີວິດ. ເພິ່ນ ແລະ ໝູ່ເພື່ອນຂອງເພິ່ນໄດ້ພະຍາຍາມປອບໃຈກັນແລະກັນ ໂດຍການອ່ານພຣະຄຳພີມໍມອນ ແລະ ການຮ້ອງເພງສວດ. ແລ້ວພວກເພິ່ນໄດ້ຍິນສຽງປືນ, ແລະ ພາຍໃນສອງສາມນາທີ ຊີວິດທີ່ເປັນມະຕະຂອງໂຈເຊັບ ສະມິດ ແລະ ໄຮຣຳ ອ້າຍຂອງເພິ່ນກໍໄດ້ສິ້ນສຸດລົງ.

ແລະ ມັນຍັງບໍ່ແມ່ນຈຸດຈົບຂອງອຸດົມການແຫ່ງສະຫວັນທີ່ພວກເພິ່ນໄດ້ນ້ອມຮັບເອົາ. ແລະ ມັນກໍບໍ່ແມ່ນຈຸດຈົບຂອງການຟື້ນຟູພຣະກິດຕິຄຸນຂອງພຣະເຢຊູຄຣິດ. ມັນມີວຽກງານຕື່ມອີກທີ່ຕ້ອງເຮັດ ແລະ ມີການເປີດເຜີຍຕື່ມອີກທີ່ຈະນຳພາສາດສະໜາຈັກໄປຂ້າງໜ້າ. ຈຸດຈົບຂອງຊີວິດຂອງສາດສະດາ ບໍ່ແມ່ນຈຸດຈົບຂອງວຽກງານຂອງພຣະເຈົ້າ.

ເບິ່ງ Saints, 1:521–52.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 135; 136:37–39

ໂຈເຊັບ ແລະ ໄຮຣຳ ສະມິດ ໄດ້ຜະນຶກປະຈັກພະຍານຂອງພວກເພິ່ນດ້ວຍເລືອດຂອງພວກເພິ່ນ.

ໃຫ້ຈິນຕະນາການເບິ່ງວ່າ ທ່ານອາດຮູ້ສຶກແນວໃດຖ້າຫາກວ່າທ່ານໄດ້ໃຊ້ຊີວິດຢູ່ໃນເມືອງນາວູ ຕອນທີ່ໂຈເຊັບ ແລະ ໄຮຣຳ ສະມິດ ໄດ້ຖືກຂ້າ ວ່າຊິເປັນແນວໃດ (ເບິ່ງ Saints, 1:554–55). ທ່ານຈະເຂົ້າໃຈເຫດການທີ່ໜ້າເສົ້າສະຫລົດໃຈນີ້ແນວໃດ? ຄຳສອນ ແລະ ພັນທະສັນຍາ 135, ທີ່ໄດ້ຖືກຈັດພິມສາມເດືອນຕໍ່ມາ, ອາດຊ່ວຍໄດ້. ຂະນະທີ່ທ່ານຄົ້ນຫາໃນພາກນີ້, ໃຫ້ພິຈາລະນາສິ່ງທີ່ຈະນຳຄວາມເຂົ້າໃຈ ແລະ ຄວາມໝັ້ນໃຈມາສູ່ທ່ານ. ທ່ານຈະເວົ້າແນວໃດກັບບາງຄົນທີ່ຖາມວ່າ, “ເປັນຫຍັງພຣະເຈົ້າຈຶ່ງປ່ອຍໃຫ້ສາດສະດາຂອງພຣະອົງຖືກຂ້າ?” (ເບິ່ງ ຄຳສອນ ແລະ ພັນທະສັນຍາ 136:37–39).

ທ່ານຍັງສາມາດຄົ້ນຫາຄຳ ຫລື ວະລີໃນ ພາກທີ 135 ນຳອີກ ທີ່ດົນໃຈທ່ານໃຫ້ຊື່ສັດຕໍ່ພຣະຄຣິດຈົນເຖິງທີ່ສຸດ, ດັ່ງທີ່ໂຈເຊັບ ແລະ ໄຮຣຳໄດ້ເປັນ.

ເບິ່ງ ຄຳສອນ ແລະ ພັນທະສັນຍາ 5:21–22; “Remembering the Martyrdom,” ໃນ Revelations in Context, 299–306; Teachings of Presidents of the Church: Joseph Smith (2011), 522–23, 529–40; “Testimony of the Book of Mormon” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 135:3

ໂຈເຊັບ ສະມິດ ເປັນສາດສະດາ ແລະ ພະຍານຂອງພຣະເຢຊູຄຣິດ

ຄຳສອນ ແລະ ພັນທະສັນຍາ 135:3 ລະບຸບາງສິ່ງທີ່ໂຈເຊັບ ສະມິດ ໄດ້ເຮັດສຳເລັດ “ໃນໄລຍະເວລາສັ້ນໆຊາວປີ.” ສິ່ງເຫລົ່ານີ້ມີຜົນກະທົບຕໍ່ທ່ານ ແລະ ຕໍ່ຄວາມສຳພັນຂອງທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດແນວໃດ? ໃຫ້ພິຈາລະນາວິທີທີ່ທ່ານຈະປະກອບປະໂຫຍກໃຫ້ສົມບູນ ເຊັ່ນປະໂຫຍກນີ້: ເພາະສິ່ງທີ່ພຣະຜູ້ເປັນເຈົ້າໄດ້ກະທຳຜ່ານທາງໂຈເຊັບ ສະມິດ, ເຮົາ … ທ່ານອາດບັນທຶກ ແລະ ແບ່ງປັນປະຈັກພະຍານຂອງທ່ານກ່ຽວກັບສາດສະດາ ໂຈເຊັບ ສະມິດ ກັບຄົນອື່ນນຳອີກ.

ອີກວິທີໜຶ່ງໃນການຮຽນຮູ້ກ່ຽວກັບພາລະກິດຂອງໂຈເຊັບ ສະມິດ ແມ່ນການພະຍາຍາມທີ່ຈະຂຽນຂ່າວມໍລະນະກຳ ຫລື ຄຳໄວ້ອາໄລໃຫ້ເພິ່ນ. ທ່ານຈະເວົ້າຫຍັງເພື່ອສ້າງສັດທາໃນພຣະຄຣິດ ແລະ ພຣະກິດຕິຄຸນທີ່ຖືກຟື້ນຟູຂອງພຣະອົງ? ທ່ານອາດຢາກລວມເຫດການສຳຄັນ ຫລື ຄວາມສຳເລັດຕ່າງໆທີ່ພົບເຫັນໃນ ຄຳສອນ ແລະ ພັນທະສັນຍາ 135 ຫລື ສິ່ງທີ່ມີກ່າວໄວ້ໃນແຫລ່ງຊ່ວຍເຫລືອຢູ່ຂ້າງລຸ່ມ.

ພຣະເຢຊູຄຣິດໄດ້ເປີດເຜີຍຄວາມຈິງຫລາຍຢ່າງກ່ຽວກັບພຣະອົງເອງ ແລະ ການຊົດໃຊ້ຂອງພຣະອົງຜ່ານທາງໂຈເຊັບ ສະມິດ. ໃຫ້ພິຈາລະນາທີ່ຈະໄຕ່ຕອງປະສົບການທີ່ທ່ານໄດ້ມີ ໃນການສຶກສາ ຄຳສອນ ແລະ ພັນທະສັນຍາຂອງທ່ານໃນປີນີ້. ຄວາມຈິງໃດທີ່ໂດດເດັ່ນສຳລັບທ່ານ? ທ່ານອາດຢາກແບ່ງປັນຄວາມຈິງເຫລົ່ານີ້ກັບຄອບຄົວຂອງທ່ານ, ສະມາຊິກໃນຫ້ອງຮຽນ ຫລື ກຸ່ມ, ຫລື ຄົນອື່ນ ຂະນະທີ່ທ່ານສຶກສາອາທິດນີ້. ຄວາມຈິງເຫລົ່ານີ້ຊ່ວຍໃຫ້ທ່ານເຂົ້າໃຈ ແລະ ເຂົ້າໃກ້ພຣະຜູ້ເປັນເຈົ້າຫລາຍຂຶ້ນແນວໃດ?

ເບິ່ງ “Joseph Smith: The Prophet of the Restoration” (ວິດີໂອ), ຫ້ອງສະໝຸດພຣະກິດຕິຄຸນ; Tad R. Callister, “Joseph Smith—Prophet of the Restoration,” Liahona, Nov. 2009, 35–37; “ສັນເສີນບຸລຸດ,” ເພງສວດ ແລະ ເພງຂອງເດັກນ້ອຍ, 54; Topics and Questions, “Joseph Smith,” ຫ້ອງສະໝຸດພຣະກິດຕິຄຸນ ນຳອີກ.

ເພງທີ່ກ່ຽວຂ້ອງ

ການຮ້ອງເພງສວດຕໍ່ໄປນີ້ ຫລື ການເບິ່ງວິດີໂອເຫລົ່ານີ້ ສາມາດເຊື້ອເຊີນພຣະວິນຍານບໍລິສຸດ ຫລື ດົນໃຈການສົນທະນາກ່ຽວກັບວຽກງານຂອງສາດສະດາ ໂຈເຊັບ ສະມິດ ແລະ ການເສຍສະລະຂອງໄພ່ພົນຜູ້ທີ່ສືບຕໍ່ຫລັງຈາກເພິ່ນ.

“A Poor Wayfaring Man of Grief” (Hymns, no. 29). ຂະນະທີ່ຢູ່ໃນຄຸກຄາດເທດ, ຈອນ ເທເລີ ໄດ້ຮ້ອງເພງສວດເພງນີ້.

“ສັນເສີນບຸລຸດ” (ເພງສວດ ແລະ ເພງຂອງເດັກນ້ອຍ, 54; ເບິ່ງ ວິດີໂອ ນຳອີກ). ຂໍ້ຄວາມຂອງເພງສວດນີ້ ໄດ້ຖືກຂຽນໄວ້ເພື່ອຍົກຍ້ອງໂຈເຊັບ ສະມິດ

Praise to the Man – The Tabernacle Choir at Temple Square

“ສິດທິຊົນມາ” (ເພງສວດ ແລະ ເພງຂອງເດັກນ້ອຍ, 2; ເບິ່ງ ວິດີໂອ ນຳອີກ).

Come, Come, Ye Saints - Mormon Tabernacle Choir

“Faith in Every Footstep” (ເບິ່ງວິດີໂອ).

Faith in Every Footstep - Mormon Tabernacle Choir

ຄຳສອນ ແລະ ພັນທະສັນຍາ 136

ເຮົາສາມາດຊ່ວຍບັນລຸພຣະປະສົງຂອງພຣະຜູ້ເປັນເຈົ້າໄດ້ ເມື່ອເຮົາຕິດຕາມຄຳແນະນຳຂອງພຣະອົງ.

ຫລັງຈາກທີ່ໂຈເຊັບ ສະມິດ ໄດ້ເສຍຊີວິດ, ໄພ່ພົນໄດ້ຖືກຂັບໄລ່ອອກຈາກເມືອງນາວູ. ບັດນີ້ ພວກເພິ່ນໄດ້ປະເຊີນກັບການເດີນທາງເປັນໄລຍະ 1,300 ໄມ (2,100 ກມ) ຜ່ານຖິ່ນແຫ້ງແລ້ງກັນດານທີ່ໂຫດຮ້າຍ. ບຣິກຳ ຢັງ, ປະທານກຸ່ມອັກຄະສາວົກສິບສອງ, ໄດ້ກັງວົນກ່ຽວກັບວ່າ ໄພ່ພົນຈະເອົາຕົວລອດຈາກການເດີນທາງໄດ້ແນວໃດ. ໃນທີ່ພັກເຊົາຊົ່ວຄາວ ເອີ້ນວ່າ ວິນເຕີຄວດເຕີສ໌, ເພິ່ນໄດ້ທູນຂໍການຊີ້ນຳ. ຄຳຕອບຂອງພຣະຜູ້ເປັນເຈົ້າໄດ້ມີບັນທຶກໄວ້ໃນ ພາກທີ 136. “ໂດຍການຊ່ວຍໃຫ້ໄພ່ພົນຈົດຈຳວ່າ ການກະທຳຂອງພວກເຂົາໃນລະຫວ່າງການເດີນທາງກໍສຳຄັນເທົ່າໆກັບຈຸດໝາຍປາຍທາງຂອງພວກເຂົາ, ການເປີດເຜີຍໄດ້ຊ່ວຍປ່ຽນແປງການອົບພະຍົບໄປພາກຕາເວັນຕົກ ຈາກຄວາມຈຳເປັນທີ່ໂຊກຮ້າຍ ໃຫ້ເປັນການແບ່ງປັນປະສົບການທາງວິນຍານທີ່ສຳຄັນ” (“This Shall Be Our Covenant,” Revelations in Context, 308).

ໃຫ້ເກັບສິ່ງນີ້ໄວ້ໃນໃຈຂະນະທີ່ທ່ານສຶກສາ ພາກທີ 136. ຄຳແນະນຳໃດແດ່ທີ່ທ່ານພົບເຫັນ ທີ່ສາມາດຊ່ວຍປ່ຽນການທົດລອງອັນຍາກລຳບາກໃນຊີວິດຂອງທ່ານເປັນການໃຫ້ “ປະສົບການ … ທາງວິນຍານທີ່ສຳຄັນ”? ທ່ານອາດໄຕ່ຕອງເຖິງວິທີທີ່ຄຳແນະນຳນີ້ສາມາດຊ່ວຍໃຫ້ທ່ານບັນລຸພຣະປະສົງຂອງພຣະຜູ້ເປັນເຈົ້າໃນຊີວິດຂອງທ່ານເອງແນວໃດ, ດັ່ງທີ່ມັນໄດ້ຊ່ວຍເຫລືອໄພ່ພົນລຸ້ນທຳອິດໃຫ້ຕັດສິນໃຈເດີນທາງຂອງພວກເຂົາ.

ເບິ່ງ “This Shall Be Our Covenant,” ໃນ Revelations in Context, 307–14; “ສິດທິຊົນມາ,” ເພງສວດ ແລະ ເພງຂອງເດັກນ້ອຍ, 2; Church History Topics, “Succession of Church Leadership,” ຫ້ອງສະໝຸດພຣະກິດຕິຄຸນ ນຳອີກ.

ຮູບແຕ້ມຂອງ ວິນເຕີຄວດເຕີສ໌ — ລາຍລະອຽດຈາກ WinterQuarters [ວິນເຕີຄວດເຕີສ໌], ໂດຍ ກະເຣກ ອໍເຊັນ

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 135:1–2, 4–5

ໂຈເຊັບ ແລະ ໄຮຣຳ ສະມິດ ໄດ້ຍອມມອບຊີວິດຂອງພວກເພິ່ນເພື່ອພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ.

ສະຫລຸບ ຄຳສອນ ແລະ ພັນທະສັນຍາ 135:1 ໃຫ້ລູກໆຂອງທ່ານຟັງ ຫລື ແບ່ງປັນ “ບົດທີ 57: ສາດສະດາຖືກຂ້າ” (ໃນ ເລື່ອງຄຳສອນ ແລະ ພັນທະສັນຍາ, 201–5, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ). ນີ້ສາມາດເປັນໂອກາດທີ່ດີສຳລັບທ່ານ ແລະ ລູກໆຂອງທ່ານທີ່ຈະແບ່ງປັນຄວາມຮູ້ສຶກຂອງທ່ານກ່ຽວກັບການເສຍສະລະທີ່ໂຈເຊັບ ແລະ ໄຮຣຳ ສະມິດ ໄດ້ກະທຳເພື່ອພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ.

3:21
Chapter 57: The Prophet Is Killed: June 1844
ຄຳສອນ ແລະ ພັນທະສັນຍາ 135:4–5 ກ່າວວ່າ ໄຮຣຳ ສະມິດ ໄດ້ອ່ານຂໍ້ຄວາມຈາກພຣະຄຳພີມໍມອນ ກ່ອນທີ່ເພິ່ນຈະໄປຄຸກຄາດເທດ. ທ່ານ ແລະ ລູກໆຂອງທ່ານສາມາດອ່ານຂໍ້ຄວາມນີ້ນຳກັນໄດ້ (ເບິ່ງ ອີເທີ 12:36–38). ຂໍ້ເຫລົ່ານີ້ສາມາດຊ່ວຍປອບໂຍນໄຮຣຳແນວໃດ? ທ່ານຍັງສາມາດແບ່ງປັນຂໍ້ພຣະຄຳພີທີ່ນຳຄວາມປອບໂຍນມາສູ່ທ່ານ ເມື່ອທ່ານກັງວົນ ຫລື ໂສກເສົ້າ.
ທ່ານ ແລະ ລູກໆຂອງທ່ານສາມາດເບິ່ງຮູບຂອງບັນດາສາດສະດາ (ເບິ່ງ ປຶ້ມຮູບພຣະກິດຕິຄຸນ, ເລກທີ 7, 14, 67) ແລະ ເວົ້າລົມກ່ຽວກັບບາງສິ່ງທີ່ພຣະເຈົ້າຂໍໃຫ້ບັນດາສາດສະດາເຮັດ. ສາດສະດາເຫລົ່ານີ້ໄດ້ເສຍສະລະຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?

ຢູ່ໃນບ້ານ, ການຮຽນຮູ້ ແລະ ການດຳລົງຊີວິດແມ່ນແຍກອອກຈາກກັນບໍ່ໄດ້. “ພຣະກິດຕິຄຸນມີຄວາມກ່ຽວຂ້ອງໂດຍກົງໃນບ້ານ. ຄົນໃນນັ້ນທີ່ທ່ານກຳລັງຮຽນຮູ້ພຣະກິດຕິຄຸນນຳ ຄືຄົນທີ່ທ່ານຈະໃຊ້ຊີວິດຢູ່ນຳກັນ—ທຸກມື້. ແທ້ຈິງແລ້ວ, ສ່ວນຫລາຍ, ການດຳລົງຊີວິດຕາມພຣະກິດຕິຄຸນ ຄືວິທີທີ່ເຮົາຮຽນຮູ້ພຣະກິດຕິຄຸນ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 31).

ຄຳສອນ ແລະ ພັນທະສັນຍາ 135:3

ໂຈເຊັບ ສະມິດ ເປັນສາດສະດາ ແລະ ພະຍານຂອງພຣະເຢຊູຄຣິດ.

ເພື່ອຊ່ວຍໃຫ້ລູກໆຂອງທ່ານຈື່ ແລະ ຊາບຊຶ້ງຕໍ່ວິທີທີ່ພຣະຜູ້ເປັນເຈົ້າໄດ້ອວຍພອນເຮົາຜ່ານທາງພາລະກິດຂອງໂຈເຊັບ ສະມິດ, ທ່ານສາມາດສະແດງສິ່ງທີ່ເປັນຕົວແທນໃຫ້ກັບສິ່ງທີ່ໂຈເຊັບໄດ້ເຮັດ, ເຊັ່ນ ພຣະຄຳພີມໍມອນ, ຄຳສອນ ແລະ ພັນທະສັນຍາ, ຫລື ຮູບຂອງພຣະວິຫານ (ເບິ່ງ ໜ້າກິດຈະກຳ ຂອງອາທິດນີ້ນຳອີກ). ແລ້ວລູກໆຂອງທ່ານສາມາດເບິ່ງໃນ ຄຳສອນ ແລະ ພັນທະສັນຍາ 135:3 ເພື່ອຊອກຫາບາງສິ່ງທີ່ໂຈເຊັບ ສະມິດ ໄດ້ເຮັດເພື່ອຊ່ວຍໃຫ້ເຮົາເຂົ້າໃກ້ພຣະບິດາເທິງສະຫວັນ ແລະ ພຣະເຢຊູຄຣິດຫລາຍຍິ່ງຂຶ້ນ. ເຊື້ອເຊີນໃຫ້ລູກໆຂອງທ່ານແບ່ງປັນວ່າ ເປັນຫຍັງພວກເຂົາຈຶ່ງກະຕັນຍູຕໍ່ສິ່ງເຫລົ່ານີ້.

ສາດສະດາໂຈເຊັບ ສະມິດ — American Prophet [ສາດສະດາຊາວອາເມຣິກາ], ໂດຍ ແດວ ພາສັນ

ຄຳສອນ ແລະ ພັນທະສັນຍາ 136

ພຣະຜູ້ເປັນເຈົ້າອວຍພອນເຮົາ ເມື່ອເຮົາກຳລັງດີ້ນຮົນ.

ໃຫ້ພິຈາລະນາທີ່ຈະວາງຮູບຂອງພຣະວິຫານນາວູຢູ່ຟາກໜຶ່ງຂອງຫ້ອງ ແລະ ສ້າງທີ່ພັກອາໄສທີ່ລຽບງ່າຍຢູ່ອີກຟາກໜຶ່ງ. ເຊື້ອເຊີນລູກໆຂອງທ່ານໃຫ້ເຕົ້າໂຮມກັນຢູ່ໃກ້ໆຮູບນັ້ນ, ແລະ ບອກພວກເຂົາກ່ຽວກັບໄພ່ພົນທີ່ຕ້ອງໄດ້ອອກຈາກເມືອງນາວູ ຫລັງຈາກທີ່ໂຈເຊັບ ສະມິດ ໄດ້ເສຍຊີວິດ (ເບິ່ງ ບົດທີ 58, 60, ແລະ 62 ໃນ ເລື່ອງຄຳສອນ ແລະ ພັນທະສັນຍາ, 206–8, 211–16, 222–24, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ). ເນັ້ນໜັກເຖິງສັດທາທີ່ໄພ່ພົນເຫລົ່ານີ້ມີໃນພຣະເຢຊູຄຣິດ, ແລະ ເຊື້ອເຊີນລູກໆຂອງທ່ານໃຫ້ຍ່າງໄປຫາທີ່ພັກອາໄສ ເພື່ອເປັນຕົວແທນເຖິງການເດີນທາງໄປຫາວິນເຕີຄວດເຕີສ໌. ພວກເຂົາສາມາດຮ້ອງເພງເຊັ່ນ “ສິດທິຊົນມາ” (ເພງສວດ ແລະ ເພງຂອງເດັກນ້ອຍ, 2) ຂະນະທີ່ພວກເຂົາຍ່າງໄປ.

1:31
Chapter 58: A New Leader for the Church: July–August 1844

3:51
Chapter 60: The Saints Leave Nauvoo: September 1845–September 1846

2:29
Chapter 62: The Saints Establish Winter Quarters: 1846–1847
ອະທິບາຍວ່າໃນ ຄຳສອນ ແລະ ພັນທະສັນຍາ 136, ພຣະຜູ້ເປັນເຈົ້າໄດ້ປະທານຄຳແນະນຳເພື່ອຊ່ວຍໄພ່ພົນໃນການເດີນທາງຂອງພວກເຂົາສູ່ຫ່ອມພູເຊົາເລັກ. ຊ່ວຍລູກໆຂອງທ່ານຊອກຫາບາງຢ່າງໃນການເປີດເຜີຍນີ້ທີ່ສາມາດໃຫ້ຄວາມກ້າຫານແກ່ພວກເຂົາສຳລັບການເດີນທາງນີ້ (ເບິ່ງ ຂໍ້ທີ 4, 10–11, 18–30). ຄຳແນະນຳນີ້ສາມາດຊ່ວຍເຮົາໃນການທົດລອງທີ່ເຮົາປະເຊີນໃນສະໄໝນີ້ໄດ້ແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ກຸ່ມອັນຕະພານໂຈມຕີໂຈເຊັບ ສະມິດ ແລະ ຄົນອື໋ນໆໃນຄຸກຄາດເທດ — Greater Love Hath No Man [ບໍ່ມີຜູ້ໃດມີຄວາມຮັກຍິ່ງໃຫຍ່ກວ່ານີ້], ໂດຍ ເຄຊີ ຈາຍສ໌