“22–28 septiembre: “Xkʼanjelil li Ralal li Dios”: Tzolʼlebʼ ut Sumwank 106–108,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)
“Tzol’leb’ ut Sumwank 106–108,” Kim, Taaqehin—Choq’ re li ochoch ut li iglees: 2025
22–28 septiembre: “Xkʼanjelil li Ralal li Dios”
Tzolʼlebʼ ut Sumwank 106–108
Maare taak’oxla naq Tzol’leb’ ut Sumwank 107 ka’ajwi’ na’aatinak chirix xk’uub’ankileb’ li opiis re li tijonelil re xjolominkil lix Iglees li Qaawa’. Naq kipuktesiman li k’utb’esinb’il na’leb’ a’in, ak yookeb’ chi k’ihank li komon re li Iglees, jo’kan naq ke’ajman ru xkomoneb’ chik laj jolominel re xb’eresinkileb’. Aajel ru xch’olob’ankil lix k’anjel ut lix teneb’ankil li Xb’eenil Awa’b’ejil, lix Molameb’ li Kab’laju chi Apostol, eb’ li Setanta, eb’ li obiisp, ut eb’ li awa’b’ejil reheb’ li molam. Li tasal 107 ink’a’ yal naxch’olob’ chan ru xk’uub’ankil li jolomink sa’ li Iglees; naxk’utb’esi aj b’an wi’ naab’al li choxahil na’leb’. Arin, li Qaawa’ nokoraatina chirix lix wankilal, “li Santil Tijonelil jo’ chanru Xk’anjelil li Ralal li Dios” (raqal 3). Li rajom li tijonelil a’an xteeb’al “chixjunil li musiq’ejil osob’tesink re li iglees” re naq “taateeliiq li choxa chiruheb’” chixjunileb’ li ralal xk’ajol li Dios ut “te’xk’ul xsahil li sum-ochb’eeniik xb’aan, ut li wank chiru rilob’aal li Dios Yuwa’b’ej, ut li Jesus, aj b’aanunel uuchil re li ak’ sumwank” (raqal 18–19). Naq nokoxtzol chirix lix tijonelil, li Kolonel nokoxtzol chirix a’an ut chan ru tooruuq chi chalk rik’in a’an.
Chi’ilmanq “La restauración del antiguo orden,” sa’ Revelaciones en contexto, 223–228.
Li na’leb’ re tzolok sa’ li ochoch ut sa’ li iglees
Li Qaawa’ nikinixtenq’a naq nikinixb’oq chi k’anjelak.
Sa’ Tzol’leb’ ut Sumwank 106 ut 108, li Qaawa’ kixk’e li na’leb’ ut li yeechi’ihom reheb’ wiib’ li komon li ke’b’oqe’ chi k’anjelak sa’ li Iglees. Naq taatzol li na’leb’ a’an, naru nakajultikaheb’ laa hoonal re k’anjelak chiru li Qaawa’—maare junaq k’anjel re ula’anink, junaq k’anjel sa’ li Iglees, sa’ laa junkab’al, malaj yal musiq’anb’ilat chixb’aanunkil li k’a’ru us.
K’a’ru nakaweek’a naq yoo chixyeeb’al li Qaawa’ aawe sa’eb’ li k’utb’esinb’il na’leb’ a’in? K’a’ru li ch’ol aatin wan xyaalal choq’ aawe? Arin wankeb’ junjunq li patz’om re xk’oxlankil:
-
Ma xk’ehom aawe li Qaawa’ “usilal [malaj choxahil tenq’] ut xk’ojob’ankil aach’ool” re k’anjelak chiru a’an? (Tzol’leb’ ut Sumwank 106:8).
-
K’a’ru nakak’oxla naq naraj naxye xkawob’resinkileb’ li qas qiitz’in “sa’ chixjunil laa b’aanuhom”? (Tzol’leb’ ut Sumwank 108:7).
Naq li Elder Carl B. Cook kixk’ul jun xk’anjel ch’a’aj sa’ li Iglees, kixk’ul xkawob’resinkil rik’in xnumsihom jun lix xe’ xtoon. Il a’an sa’ li raatin, “K’anjelak chiru qas qiitz’in” (Jolomil ch’utub’aj-ib’ re octubre 2016). Wi nakawaj, tz’iib’a jun li hu re xwaklesinkil xch’ooleb’ laa walal aak’ajol—malaj choq’ aawe re taawil moqon—re xk’ulub’ankil li k’anjelak chiru li Qaawa’. Sa’ laa hu tz’iib’aheb’ li yaal nakatzoleb’ sa’ li raatin li Elder Cook, Tzol’leb’ ut Sumwank 106 ut 108, ut laa numsihom ajwi’ laa’at.
Chi’ilmanq ajwi’ Henry B. Henry, “Chatb’eeq wik’in,” Jolomil ch’utub’aj-ib’ re abril 2017; Temas y preguntas, “Servir en llamamientos de la Iglesia”, Biblioteca del Evangelio; “Warren Cowdery” ut “Se obró sobre él para buscar revelación,” sa’ Revelaciones en contexto, 235–239, 240–244.
Tzolʼlebʼ ut Sumwank 107:1–4, 18–20
Li tijonelil aʼan “joʼ chanru lix kʼanjelil li Ralal li Dios.”
Li Qaawa’ naxtikib’ lix “k’utb’esinb’il na’leb’ chirix li tijonelil” (Tzol’leb’ ut Sumwank 107, xjolomil li tasal) b’ar wi’ naxk’ut chiqu lix tz’aqal k’ab’a’ li Tijonelil re Melkisedek (che’ilmanq li raqal 1–4). K’a’ut naq aajel ru xnawb’al a’an naq nakak’oxla? Chan ru naq li k’ab’a’ej a’an naxjal li k’a’ru nakaweek’a chirix li tijonelil?
Che’wanq li na’leb’ a’in sa’ laa k’a’uxl naq nakattzolok chirix li tijonelil, sa’eb’ li tasal 18–20. K’a’ru naraj naxye naq “taateeliiq li choxa”? K’a’ru naraj naxye “te’xk’ul xsahil li sum-ochb’eeniik xb’aan, ut li wank chiru rilob’aal li Dios Yuwa’b’ej, ut li Jesus”? Chan ru naq lix wankilal lix tijonelil li Kolonel naxk’e chi uxmank naq chixjunil naru nakataw?
Chi’ilmanq ajwi’ Alma 13:2, 16; Tzol’leb’ ut Sumwank 84:19–27.
Xjayalinkil aak’a’uxl rik’in li Jesukristo. “Wan naab’al li k’a’aq re ru li naru chi k’ute’k chirix lix k’ojob’anb’il evangelio li Jesukristo—eb’ li raqal chi na’leb’, eb’ li taqlahom, eb’ li profeetil aatin, ut eb’ li seraq’ sa’ li loq’laj hu. Chixjunileb’ ruq’eb’ jun ajwi’ li che’, xb’aan naq chixjunileb’ juneb’ ajwi’ li rajom: xtenq’ankil chixjunileb’ li kristiaan chi chalk rik’in li Kristo ut chi tz’aqlok re ru rik’in a’an (chi’ilmanq Jarom 1:11; Moroni 10:32). Jo’ kan naq maak’a’ naxye k’a’ru yookat chixk’utb’al, chijultiko’q aawe naq yookat chi k’utuk chirix li Jesukristo ut chan ru wulak jo’ a’an” (Li K’utuk jo’ li Kolonel, 6). Qayehaq, naq nakatk’utuk—ut nakattzolok—chirix li tijonelil sa’ Tzol’leb’ ut Sumwank 107, patz’ chi kok’ aj xsa’, “K’a’ru yooko chixtzolb’al chirix li Kolonel?”
Eb’ lix moos li Qaawa’ “xaqab’anb’ileb’ xwankil xb’aan lix kawileb’ xch’ool, lix paab’aaleb’, ut lix tijeb’ li iglees.”
K’a’ru naraj naxye xxaqab’ankileb’ lix moos li Qaawa’ rik’in xkawil aach’ool? rik’in laa paab’aal? rik’in laa tij?
Chi’ilmanq ajwi’ “At Dios, rajlal chawil li qaprofeet,” Eb’ li B’ich, 9.
Tzolʼlebʼ ut Sumwank 107:23–24, 33–35, 38, 91–92
Eb’ li profeet ut li apostol neke’xch’olob’ xyaalal li Jesukristo.
Laj Jose Smith kixwotz li tasal 107 rik’in lix Molameb’ li Kab’laju chi Apostol sa’ 1835 (chi’ilmanq li xjolomil li tasal). K’a’ru kixk’ut li Qaawa’ chirix lix b’oqb’aleb’ sa’eb’ li raqal 23–24, 33–35, 38? Chan ru naq nakawu lix nawom aach’ool chirix li Jesukristo sa’ xk’ab’a’ li xk’utumeb’ ut xb’eresihomeb’ li yo’yookil apostol?
Sa’eb’ li raqal 91–92, li Qaawa’ nak’utuk chirix lix apostol li nim xk’ihal xhoonal, li Awa’b’ej re li Iglees. Chan ru naq “juntaq’eet rik’in laj Moises”? (chi’ilmanq li K’utul Raqal reheb’ li Loq’laj Hu, “Moises,” Biblioteca del Evangelio).
Chi’ilmanq ajwi’ David A. Bednar, “Sik’b’il ru chixch’olob’ankil xyaalal ink’ab’a’,” Jolomil ch’utub’aj-ib’ re octubre 2015.
Tzolʼlebʼ ut Sumwank 107:27–31, 85–89
Li Qaawa’ naxk’e chi uxmank lix k’anjel rik’ineb’ li jolomil ch’utam.
K’e reetal naq li Qaawa’ kik’utuk chirixeb’ li jolomil ch’utam sa’ Tzol’leb’ ut Sumwank 107:27–31, 85–89. K’a’ru nachaab’ilob’resink re jun jolomil ch’utam? Chan ru taawoksi li na’leb’ a’an sa’ laa k’anjel sa’ li Iglees, sa’ laa wochoch, malaj sa’ xkomoneb’ chik laa k’anjel?
Chi’ilmanq ajwi’ M. Russell Ballard, “Ch’utameb’ re junkab’al,” Jolomil ch’utub’aj-ib’ re abril 2016; Jolomil K’anjenel Hu, 4.3–4.4, Biblioteca del Evangelio.
Li Qaawa’ naxb’oqeb’ li junkab’al chi k’uub’ank sa’ junajil.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Tzol’leb’ ut Sumwank 107:18–20
Li Jesukristo nikinrosob’tesi rik’in lix wankilal lix tijonelil.
-
Naq taawil Tzol’leb’ ut Sumwank 107:18–19 aawochb’eeneb’ laa kok’al, ka’suti li ch’ol aatin “chixjunil li musiq’ejil osob’tesink.” Maare laa’at ut eb’ laa kok’al naru teetz’iib’aheb’ li osob’tesihom neke’chal rik’in li tijonelil. Naru nakab’aanu jun b’atz’unk rik’ineb’—rilb’al ani mas naab’al li naxtz’iib’a. Eb’ laa kok’al naru ajwi’ neke’xyiib’ malaj te’xsik’ jalam-uuch li te’reetali li osob’tesihom a’an (chi’ilmanq li perel re kok’ k’anjel re li xamaan a’in). Chirix a’an naru nakawotz chan ru naq eb’ li k’ojob’anb’il k’anjel re li tijonelil (jo’ li kub’iha’ malaj li loq’laj wa’ak) nokohe’xtenq’a chixk’ulb’aleb’ li rosob’tesihom li Dios.
Tzolʼlebʼ ut Sumwank 107:21–26, 33–35, 91–92
Li moos sik’b’ileb’ ru xb’aan li Qaawa’ neke’xb’eresi lix Iglees.
-
Li junjunq chi hu re li Liahona naxk’am chaq jun perel b’ar wi’ wankeb’ xjalam-uuch li Jolomil aj B’eresinel. Naru taawileb’ li jalam-uuch a’an rik’ineb’ laa kok’al naq yooqat chixyaab’asinkil lix k’anjeleb’ sa’ Tzol’leb’ ut Sumwank 107:21–26, 33–35, 91–92. Laa’at ut laa kok’al naru nekeye k’a’ut naq nekeb’antioxi naq li Qaawa’ kixk’eheb’ li k’anjel a’an reheb’.
-
Laa kok’al naru neke’xtaw xkomon lix na’leb’eb’ chirixeb’ lix moos li Qaawa’ sa’ “Liderazgo General de la Iglesia” sa’ ChurchofJesusChrist.org. Laa kok’al maare naru neke’xsik’ xna’leb’ chirix jun reheb’ laj jolominel ut te’xwotz a’an chirib’ileb’ rib’. Wotzomaq cherib’il eerib’ chan ru nekenaw naq eb’ a’an tz’aqal xmooseb’ li Jesukristo.
-
Chirix rilb’al Tzol’leb’ ut Sumwank 107:22 sa’ komonil, laa’at ut laa kok’al naru nekek’e eehoonal re xchapb’al chi kutankil jun xjalam-uuch li Xb’eenil Awa’b’ejil ut teewotz chan ru naq nekexaqab’eb’ xwankil jo’ xmooseb’ li Qaawa’.
Li Xbʼeenil Awaʼbʼejil
Naru ninwan chi ch’anch’o naq ninyu’amiheb’ lin sumwank.
-
Re xtikib’ankil aatinak chirix li raqal a’in, naru nakapatz’ reheb’ laa kok’al naq te’xb’aanu junaq k’anjel li tento te’xk’e wi’ xch’ool, jo’ xnujob’resinkil jun sek’ chi ink’a’ te’xhoy li ha’. K’a’ru nak’ulman wi ink’a’ naqab’aau chi k’eek’o qach’ool? Chirix a’an naru nekeril Tzol’leb’ ut Sumwank 108:3 re xsik’b’al k’a’ru naraj li Qaawa’ naq taqab’aanu chi k’eek’o qach’ool. K’a’ru “yeechi’ihom” (malaj sumwank) naqab’aanu rik’in li Dios? Chan ru naru naqak’e qach’ool chixpaab’ankileb’? Naru nakawotz xcha’al li raatin li Hermana Becky Craven, “Li k’eeb’il reetal chi us ut li ink’a’ k’eeb’il reetal” (Jolomil ch’utub’aj-ib’ re abril 2019), li maare tixtenq’aheb’ laa kok’al chixpaab’ankileb’ lix sumwank. Naru nekeb’icha junaq li b’ich na’aatinak chirix li kawil xch’oolej, maare “Kawaq inchʼool” (B’ichleb’aal choq’ reheb’ li Kok’al, 85).
Naru najuntaq’eetaman xhoyb’al li ha’ chi k’eek’o reetal rik’in xpaab’ankileb’ li sumwank chi k’eek’o ch’oolej.
Re xtawb’al xkomon chik li na’leb’, chi’ilmanq li hu Amigos re li po a’in.