“4–10 agosto: “Xaqlinqex sa’eb’ li na’ajej sant”: Tzolʼlebʼ ut Sumwank 85–87,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)
“Tzol’leb’ ut Sumwank 85–87,” Kim, Taaqehin—Choq’ re li ochoch ut li iglees: 2025
4–10 agosto: “Xaqlinqex sa’eb’ li na’ajej sant”
Tzolʼlebʼ ut Sumwank 85–87
Sa’ li Ralankil k’aynaqo chixjultikankileb’ li na’leb’ jo’ “tuqtuukil usilal sa’ ruchich’och’” (chi’ilmanq Lukas 2:14). A’b’an sa’ li 25 re diciembre, 1832, yoo chaq xk’a’uxl laj Jose Smith chirix xchalik li pleetik. Li estado Carolina del Sur, Estados Unidos toje’ kixtik li jolomil tenamit ut yoo li kawresink-ib’ aran re li pleetik. Ut li Qaawa’ kixk’utb’esi naq a’in ka’ajwi’ lix tiklajik: “Taahoymanq li pleet sa’ xb’eeneb’ chixjunil li tenamit,” chan (Tzol’leb’ ut Sumwank 87:2). Chanchan naq sa’ junpaat taatz’aqob’resimanq ru li profeetil aatin a’in.
A’b’an moko jo’kan ta kik’ulman. Chirix xnumik wiib’ oxib’ xamaan, Carolina del Sur ut Estados Unidos ke’xk’am wi’chik rib’ chirib’ileb’ rib’ sa’ usilal, ut ink’a’ ki’ux li pleetink-ib’. A’ut li k’utb’esinb’il na’leb’ ink’a’ junelik natz’aqob’resiman ru jo’q’e malaj chan ru naqak’oxla laa’o. Haye’ lajeeb’ xkak’aal chihab’ chik chirix, chirix lix kamik laj Jose Smith, Carolina del Sur kixpo’ xch’ool ut kixyu’ ru li pleetik. Toj sa’ li kutankil a’in, xb’aan li pleetik chiru chixjunil li ruchich’och’ “xe’yaab’ak li wankeb’ chi sa’” (Tzol’leb’ ut Sumwank 87:6). Lix loq’al li k’utb’esinb’il na’leb’ a’in maawa’ xq’ehinkil jo’q’e taak’ulmanq li rahilal, a’an b’an xk’utb’al k’a’ru tento taab’aanumanq naq taak’ulmanq. Li na’leb’ nak’eeman sa’ 1831, sa’ 1861, ut sa’ 2025 juntaq’eet: “Xaqlinqex sa’eb’ li na’ajej sant, ut mex’eek’asiik” (raqal 8).
Li na’leb’ re tzolok sa’ li ochoch ut sa’ li iglees
Li Qaawa’ naraj naq “tintz’iib’a jun esilal.”
K’e reetal k’a’ru kiraj li Qaawa’ naq taatz’iib’amanq sa’ li “esilal” nayeeman sa’ Tzol’leb’ ut Sumwank 85:1–2. K’a’ut naq a’an naraj naq eb’ laj santil paab’anel te’xtz’iib’a jun esilal? K’a’ raj ru taaruuq taatz’iib’a chirix “chan ru laa yu’am, laa paab’aal, ut laa b’aanuhom” li taaruuq taarosob’tesi laa yu’am ut li tasal tenamit toj te’chalq? Chan ru naq xtz’iib’ankil resilal laa yu’am naru nakatxtenq’a chi chalk rik’in li Kristo?
Chi’ilmanq ajwi’ “El diario: “De mucho más valor que el oro,”” Enseñanzas de los Presidentes de la Iglesia: Wilford Woodruff (2011), 131–138.
Turning Hearts
Li Musiq’ej na’aatinak rik’in jun “ch’ina xyaab’ kuxej li q’un na’aatinak.”
K’oxlan chirix li aatin kiroksi laj Jose Smith re xch’olob’ankil xyaalal li Musiq’ej sa’ Tzol’leb’ ut Sumwank 85:6. Chan ru naq lix yaab’ xkux li Musiq’ej a’an jun “ch’ina xyaab’ kuxej li q’un na’aatinak”? K’eheb’ reetal li na’leb’ a’in k’eeb’ileb’ xb’aan laj Jose Smith: Tzol’leb’ ut Sumwank 6:22–24; 8:2–3; 9:7–9; 11:12–13; 128:1. Chan ru nakatraatina li Musiq’ej?
Chi’ilmanq ajwi’ Lukas 24:32; Mosiah 5:2; Alma 32:28; Helaman 5:30; Tzol’leb’ ut Sumwank 6:22–23; 11:12–13.
Roksinkileb’ li k’anjeleb’aal sa’ li k’utuk. Eb’ li kristiaan neke’xjultika chi us junaq na’leb’ re li evangelio naq neke’ril malaj neke’tz’aqon sa’ junaq ch’ina k’anjel li wan rilom rik’in li yookeb’ chixtzolb’al. Qayehaq, naq nakat-aatinak chirix li ch’ina xyaab’ kuxej li q’un na’aatinak re li Musiq’ej, maare naru nakak’e chi eek’ank jun li b’ich q’un xyaab’ ut loq’, ut eb’ li komon naru neke’xye k’a’ru neke’reek’a xb’aan li b’ich ut chan ru naq ch’a’ajaq raj rab’inkil wi ta wan raj li choqink. A’an naru naxtikib’ junaq aatinak chirix li choqink sa’ li qayu’am li naxram chiqu rab’inkil li ch’ina xyaab’ kuxej li q’un na’aatinak.
Eb’ li loq’laj hu neke’aatinak chirix lix yaab’ xkux li Musiq’ej jo’ jun xyaab’ kuxej li q’un na’aatinak.
Neke’ch’utub’aman li tiikeb’ rik’in li Kristo sa’ roso’jikeb’ li kutan.
Sa’ Tzol’leb’ ut Sumwank 86 natawman xch’olob’ankil li jaljookil ru aatin chirix li trigo ut li yib’ aj pim, li natawman sa’ Mateo 13:24–30, 37–43. Naq yooqat chixtzolb’al k’a’ru naraj naxye li jaljookil ru aatin a’an, naru taatz’aqob’resi ru jun li kaaxukuut rik’in a’in:
|
Eetalil |
Li maare naraj naxye |
Eb’ li patz’om re k’oxlank |
|---|---|---|
Eetalil Eb’ laj awinel re li iyaj | Li maare naraj naxye Eb’ li profeet ut li apostol | Eb’ li patz’om re k’oxlank K’a’ chi “iyajil” neke’raw li profeet ut li apostol? |
Eetalil Li xik’ na’ilok | Li maare naraj naxye Satanas | Eb’ li patz’om re k’oxlank Chan ru naq li xik’ na’ilok naxyal xramb’al lix k’anjel li Qaawa’? |
Eetalil | Li maare naraj naxye | Eb’ li patz’om re k’oxlank |
Eetalil | Li maare naraj naxye | Eb’ li patz’om re k’oxlank |
Arin wankeb’ junjunq li patz’om re xk’oxlankil a’an:
-
Chirix xch’olob’ankil li jaljookil ru aatin, li Qaawa’ ki’aatinak chirix li tijonelil, li k’ojob’ank wi’chik, ut lix kolb’al lix tenamit (chi’ilmanq li raqal 8–11). Chan ru neke’xk’am rib’ li raqal a’in ut li jaljookil ru aatin chirix li trigo ut li yib’ aj pim naq nakawil?
-
Chan ru lix k’anjel re wank choq’ “jun saqen chiruheb’ laj Gentil” ut “jun aj kolonel choq’ re lix tenamit [li Qaawa’]”? (raqal 11).
Li tuqtuukilal natawman sa’eb’ “li na’ajej sant.”
Li profeetil aatin wan sa’ li tasal 87 naq’usuk chirix li xiwxiw li wan rilom rik’in li pleetik sa’ roso’jikeb’ li kutan. A’b’an li na’leb’ sa’ li k’utb’esinb’il na’leb’ a’in na’oksiman ajwi’ choq’ re li xiwxiw sa’ musiq’ej. K’oxlan chirixeb’ li patz’om jo’ a’in:
-
Jun profeetil aatin a’an jun k’utb’esinb’il na’leb’ naxk’e li Dios re jun profeet, wan naq wan rilom rik’in li chalel kutan. B’ar wan junjunq reheb’ li profeetil aatin xk’ehomeb’ chi nawmank li najteril profeet ut profeet re li kutankil a’in? (chi’ilmanq Jwan 3:14; Mosiah 3:5; Helaman 14:2–6). Chan ru naq xe’tz’aqob’resiman ru a’an? (chi’ilmanq Lukas 23:33; Mateo 15:30–31; 3 Nefi 1:15–21).
-
K’a’ru li osob’tesihom neke’chal naq neke’k’ulub’aman lix profeetil aatin lix profeet li Dios?
Rik’ineb’ li na’leb’ a’an sa’ laa k’a’uxl, il li tasal 87. (Re xnawb’al b’ayaq chik chirix li tasal, naru nakawil lix tiklajik li tusleb’ aatin a’in.) K’a’ru nakatzol chirix li profeetil aatin sa’ li k’utb’esinb’il na’leb’ a’an ut chan ru naq kitz’aqob’resiman ru? K’a’ raj ru taaye re junaq kristiaan li ink’a’ naxpaab’eb’ li profeetil aatin xb’aan naq ink’a’ natz’aqob’resiman ru sa’ junpaat?
K’a’ru li na’leb’ naxk’e li Qaawa’ sa’ li raqal 8? B’ar wankeb’ li “na’ajej sant” b’ar wi’ nakataw li tuqtuukilal ut xkolb’al aawix laa’at? K’a’ru naxk’e xsantilal junaq na’ajej? Rochb’eeneb’ ruchich’och’il na’ajej, maare wankeb’ santil hoonal, santil b’aanuhom, malaj santil k’oxlahom li naru te’xk’e li tuqtuukilal. Qayehaq, chan ru naru nawan li raatineb’ lix profeet li Dios jo’ jun na’ajej sant choq’ aawe? K’a’ru naraj naxye “xaqlinqex” ut “mex’eek’asiik” sa’eb’ li na’ajej a’in?
Chi’ilmanq ajwi’ “B’ar wi’ rahok nawan,” B’ichleb’aal choq’ reheb’ li kok’al, 76–77; Santos, 1:166–167; “Paz y guerra,” sa’ Revelaciones en contexto, 169–175.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Li Musiq’ej na’aatinak rik’in jun “ch’ina xyaab’ kuxej li q’un na’aatinak.”
-
K’a’ raj ru te’xye laa kok’al re junaq kristiaan li tixpatz’ chan ru neke’xnaw naq neke’aatinaak xb’aan li Santil Musiq’ej. Patz’ reheb’ naq te’ril sa’ Tzol’leb’ ut Sumwank 85:6 chan ru naq laj Jose Smith kixch’olob’ chan ru lix yaab’ xkux li Musiq’ej. Chirix a’an naru nekeyal rab’inkil ut aatinak rik’in jun xyaab’ kuxej q’un. Naru nakaseraq’i resileb’ hoonal b’ar wi’ naq li Musiq’ej xatraatina rik’in jun li ch’ina xyaab’ kuxej li q’un na’aatinak.
-
Re xtenq’ankileb’ laa kok’al chixtawb’al ru li ch’ol aatin “ch’ina xyaab’ kuxej li q’un na’aatinak,” naru nakak’e chi eek’ank jun li b’ich chi ka’ch’in xyaab’, jo’ “Li Santil Musiq’ej” (B’ichleb’aal choq’ reheb’ li kok’al, 56). Patz’ re jun reheb’ li kok’al naq tixq’ehi k’a’ru li b’ich a’an ut lix komoneb’ te’choqinq. Chirix a’an naru taak’e wi’chik chi eek’ank li b’ich chi maak’a’ li choqink. K’a’ru li choqink naru neke’qisi sa’ li qayu’am re reek’ankil li Musiq’ej chi kok’ aj xsa’?
Naru nintenq’an chixch’utub’ankil lix tenamit li Dios.
-
Re xtenq’ankileb’ laa kok’al chixtawb’al ru li jaljookil ru aatin li natawman resil sa’ li tasal 86, naru nakayiib’eb kok’ xjalam-uuch li trigo ut taamuqeb’ sa’ li tzoleb’aal. Ch’olob’ chiruheb’ laa kok’al li jaljookil ru aatin chirix li trigo ut li yib’ aj pim (chi’ilmanq Mateo 13:24–30), ut ilomaq sa’ komonil li raatin li Qaawa’ sa’ Tzol’leb’ ut Sumwank 86:1–7. Chirix a’an, laa kok’al naru neke’xch’utub’eb’ xjalam-uuch li trigo muqb’ileb’ ut te’xtz’iib’a chiru a’an xk’ab’a’ junaq kristiaan li naru “neke’xch’utub’” rik’in li Jesukristo. K’a’ru naraj naxye xch’utub’ankileb’ li kristiaan re te’chalq rik’in li Jesukristo? Chan ru naru naqab’aanu?
Naru ninwan jo’ jun saqen choq’ reheb’ li was wiitz’in.
-
A’ineb’ junjunq patz’om naru nakawoksi rik’ineb’ laa kok’al naq tex’aatinaq chirix Tzol’leb’ ut Sumwank 86:11: Chan ru nokorosob’tesi li saqen? K’a’ru nak’ulman naq maak’a’ qasaqen? Chan ru naru toowanq choq’ saqen chiruheb’ li qas qiitz’in? Tenq’aheb’ laa kok’al chixk’oxlankil chan ru naru “nokokana sa’ lix chaab’ilal [li Jesus]” ut te’xwotz rik’ineb’ li komon.
Naru “ninxaqli sa’eb’ li na’ajej sant.”
-
Ilomaq Tzol’leb’ ut Sumwank 87:6 re xsik’b’al k’a’ru kixye li Qaawa’ naq taak’ulmanq sa’ roso’jikeb’ li kutan. Chirix a’an naru nakat-aatinak chirix junjunq li ch’a’ajkilal nekenumsi laa’ex ut eb’ lee kok’al. Sa’ li raqal 8, k’a’ru kixye li Qaawa’ naq naru naqab’aanu sa’eb’ li hoonal ch’a’aj?
-
Tenq’aheb’ laa kok’al chixtz’iib’ankileb’ li na’ajej sant, k’a’uxlej sant, ut b’aanuhom sant li naru natenq’an reheb’ chixnumsinkileb’ li xiwxiw sa’ musiq’ej. Re xtawb’al xkomon li na’leb’, ilomaqeb’ li video “Permanecer en lugares santos” ut “Permaneced en lugares santos—Florece donde te encuentres” (Biblioteca del Evangelio).
5:36Standing in Holy Places
4:36Stand Ye in Holy Places - Bloom Where You’re Planted
Li santil ochoch a’an jun santil na’ajej.
Re xtawb’al xkomon chik li na’leb’, chi’ilmanq li hu Amigos re li po a’in.