Tzolʼlebʼ ut Sumwank 84

Naq nakak’oxla li aatin tijonelil, k’a’ru nachal sa’ aak’a’uxl? Chan ru naq lix wankilal lix tijonelil li Dios nakatxtenq’a sa’ laa yu’am?

Chirix xtz’ilb’al rixeb’ li patz’om a’in, naru nakatzol Tzol’leb’ ut Sumwank 84:17–32, re xnawb’al k’a’ru naraj li Qaawa’ naq taanaw chirix lix wankilal lix tijonelil. K’oxla chan ru naru nakawoksiheb’ li raqal a’an re aatinak chirix li tijonelil ut li rajom a’an re junaq kristiaan.

Jun na’leb’ taataw a’an naq sa’ li k’ojob’anb’il k’anjel nab’aanuman rik’in li tijonelil “nak’utman li wankilal re choxahilal” (che’ilmanq li raqal 19–21). Naru nakatz’iib’aheb’ li k’ojob’anb’il k’anjel nab’aanuman rik’in li tijonelil li ak xattz’aqon wi’ (li wankeb’ sa’ Jolomil K’anjenel Hu, 18.1, 18.2, naru neke’tenq’an). Chan ru naq eb’ li k’ojob’anb’il k’anjel a’an—ut eb’ li sumwank—neke’xk’am chaq lix wankil li Dios sa’ laa yu’am? Chan raj ru laa yu’am wi ta maak’a’eb’ raj a’an?

Li Awa’b’ej Russell M. Nelson kixye, “Chixjunqaleb’ li ixq ut winq li neke’ok sa’ sumwank rik’in li Dios ut neke’xpaab’eb’ li sumwank a’an, ut li neke’tz’aqon chi k’ulub’ej sa’eb’ li k’ojob’anb’il k’anjel re li tijonelil, naru te’xk’ul lix wankil li Dios” (“Li musiq’ejil b’ihomal,” Jolomil ch’utub’aj-ib’ re octubre 2019). Naru taatzol li raatin li Awa’b’ej Nelson ut taasik’ chan ru naru “taawoksi lix wankil li Kolonel sa’ laa yu’am.”

Chi’ilmanq ajwi’ Tzol’leb’ ut Sumwank 25:10, 13, 15; 121:34–37, 41–46; Temas y Preguntas, “Sacerdocio,” “Enseñanzas de Jose Smith sobre el sacerdocio, el templo y las mujeres,” Biblioteca del Evangelio; Jolomil K’anjenel Hu, 3.6, Biblioteca del Evangelio.

Li xaqab’anb’il aatin ut li sumwank re li tijonelil (chi’ilmanq Tzol’leb’ ut Sumwank 84:31–44) nak’anjelak choq’ reheb’ li ralal xk’ajol li qaChoxahil Yuwa’ li k’ojob’anb’ileb’ sa’ jun opiis sa’ li tijonelil, a’b’an naab’al reheb’ li rosob’tesihom yeechi’inb’il sa’eb’ li raqal a’an wankeb’ choq’ reheb’ chixjunil li ralal xk’ajol li Dios. B’ar wankeb’ li yeechi’ih’om a’an ut k’a’ru naxpatz’ qe li Dios naq taqab’aanu re naq te’qak’ul?

Li Elder Paul B. Pieper kixk’ut: “Naqak’e reetal naq sa’ li xaqab’anb’il aatin ut sumwank re li tijonelil [chi’ilmanq Tzol’leb’ ut Sumwank 84:31–42], li Qaawa’ naroksi li aatin k’uluk. Moko naroksi ta li aatin k’ojob’ank. Sa’ li santil ochoch eb’ li winq ut eb’ li ixq—sa’ komonil—neke’xk’uleb’ li osob’tesink ut li wankilal re li Tijonelil re Aaron ut li Tijonelil re Melkisedek” (“Las realidades reveladas de la vida terrenal,” Liahona, enero 2016, 47).

Naq yooqat chixtzolb’al Tzol’leb’ ut Sumwank 84:31–44, tz’il rix k’a’ru naraj naxye “xk’ulb’al” ut “kixk’ul” li tijonelil. Chan ru naq jalan a’an chiru li k’ojob’aak sa’ jun li opiis sa’ li tijonelil? K’a’ chik ru nakatxb’oq li Qaawa’ chixk’ulb’al sa’eb’ li raqal a’an? Chan ru naq yookat chixb’aanunkil a’an?

K’a’ru nakataw li nakatxmusiq’a chi wank chi tiik chik laa paab’aal chixk’ulb’al li Kolonel, li Yuwa’b’ej, eb’ lix moos, ut lix wankilal lix tijonelil?

Chi’ilmanq ajwi’ Tzol’leb’ ut Sumwank 121:36–46.

K’a’ruheb’ li yaal nakataw sa’ Tzol’leb’ ut Sumwank 84:43–58 li nakate’xtenq’a chixtawb’al ru k’a’ut naq tento taatzol rajlal li raatin li Dios? K’e reetal chan ru naq jalan li saqen rik’in li q’ojyin sa’eb’ li raqal a’in; chan ru naq “lix yalb’al aaq’e chiru li aatin re li junelik yu’am” naxk’am chaq li saqen, li yaal, ut “lix Musiq’ li Jesukristo” sa’ laa yu’am? (eb’ li raqal 43, 45).

Chi’ilmanq ajwi’ 2 Nefi 32:3.

Naq yooqat chirilb’aleb’ li raqal a’in, naru taak’e reetal k’a’ru kixye li Qaawa’ naq tixb’aanu re xtenq’ankileb’ lix moos. Chan raj ru te’kanjelaq li yeechi’ihom a’in sa’ li k’anjel naxpatz’ aawe naq taab’aanu? Qayehaq, chan ru naq tz’aqob’resinb’ileb’ ru sa’ laa yu’am li yeechi’ihom wankeb’ sa’ li raqal 88?

K’a’ru nakatzol sa’eb’ li raqal a’an chirix chan ru naq li Qaawa’ naxk’e chi uxmank lix k’anjel? K’a’ru li na’leb’ ut osob’tesihom nakataw? Naru ajwi’ nakak’oxla chan ru naq “nawaklesiik laa waam sa’ anchal li tuulanil” xb’aan naq xatk’anjelak chiru junaq komon li “nim xmetz’ew sa’ li Musiq’ej,” li maare komon ajwi’ sa’ laa junkab’al.

• Re xtenq’ankileb’ laa kok’al chixtawb’al ru k’a’ru li k’ojob’anb’il k’anjel, naru taawileb’ xjalam-uuch junjunq li k’ojob’anb’il k’anjel re li tijonelil, jo’ li Hu reheb’ li Jalam-uuch re li Evangelio, 103–108, malaj li perel re kok’ k’anjel re li xamaan a’in. Patz’ reheb’ naq te’xch’olob’ k’a’ru yoo chi k’ulmank sa’eb’ li jalam-uuch. Chirix a’an naru nekeril Tzol’leb’ ut Sumwank 84:19–22. K’a’ut naq li qaChoxahil Yuwa’ naraj naq te’qak’ul li k’ojob’anb’il k’anjel a’an? Ye reheb’ laa kok’al chan ru naq nakaweek’a lix wankil li Dios sa’eb’ li k’ojob’anb’il k’anjel xak’uleb’ ut eb’ li sumwank okenaqat wi’. (Chi’ilmanq ajwi’ “Li wankilal, ut lix laawil li tijonelil” sa’ xtiqb’al li aatin A malaj xtiqb’al li aatin B.)

• Chirix rilb’al Tzol’leb’ ut Sumwank 84:77 sa’ komonil, patz’ reheb’ laa kok’al k’a’ru naraj naxye li wank choq’ amiiw. Naru nakat-aatinak chirixeb’ laa chaab’il wamiiw. Chan ru naq li Jesus naxk’ut naq naraj wank choq’ qamiiw? Chan ru naru naqak’ut naq naqaj ajwi’ a’an laa’o? Jun bʼich joʼ “Chinwanq raj jo’ li Jesus” (B’ichleb’aal choq’ reheb’ li Kok’al, 40–41) naru naxkʼe eenaʼlebʼ.

• Maare taawulaq chiruheb’ laa kok’al rab’inkil chan ru naq eb’ li misioneer kate’xtenq’a laa’at, laa junkab’al, malaj eb’ laa xe’ aatoon chixk’ulb’al li evangelio. Chirix a’an naru nekeril li yeechi’ihom kixk’e li Qaawa’ reheb’ li misioneer sa’ Tzol’leb’ ut Sumwank 84:88. Eb’ laa kok’al naru neke’xk’oxla k’a’ru li k’anjel naxk’am chaq li raqal a’in. Wotz resil junaq hoonal b’ar wi’ xatk’anjelak chiru li Qaawa’ ut xaweek’a naq a’an wan aawik’in, jo’ ch’olob’anb’il sa’ li raqal 88. Naru ajwi’ nakatenq’aheb’ laa kok’al chixk’oxlankil chan ru naru neke’wan jo’ misioneer anajwan. Ch’olob’ xyaalal naq li qaChoxahil Yuwa’ nokoxtenq’a chixnawb’al k’a’ru tento taqaye naq noko’aatinak rik’ineb’ li kristiaan chirix li Jesukristo.