Tokāteline mo e Ngaahi Fuakava 45

ʻI he taimi ʻoku tau ongoʻi taʻefeʻunga pe taʻetaau ai ʻi he ʻao ʻo e ʻOtuá, te tau lava ʻo maʻu ha fakafiemālie mei he ngaahi folofola ʻa e Fakamoʻuí ʻi he Tokāteline mo e Ngaahi Fuakava 45:1–5. ʻI hoʻo fekumi ʻi he ngaahi veesi ko ʻení, fakakaukau ki ha ngaahi fehuʻi hangē ko ʻení:

• Ko e hā ha ngaahi lea pe kupuʻi lea ʻi he ngaahi veesi ko ʻení ʻoku ʻuhingamālie taha kiate koé?

• Ko e taukapó ko ha tokotaha ʻokú ne poupouʻi pe fakaongoongoleleiʻi ha taha pe taumuʻa ngāue ki he kakaí. Fakatatau ki he ngaahi veesi ko ʻení, ʻoku fakahoko fēfē ʻeni ʻe Sīsū Kalaisi maʻaú? Ko e hā ʻokú ne fakafeʻungaʻi Ia ke ne fakahoko iá?

• Ko e hā ʻoku mahuʻinga kiate koe ʻi he folofola ʻa e Fakamoʻuí ki he Tamaí? (veesi 4–5).

Te ke lava foki ʻo ako e meʻa naʻe akoʻi ʻe ʻEletā Teili G. Lenilani fekauʻaki mo Sīsū Kalaisi, ko hotau Taukapó ʻi he “Mou Fili he ʻAhó Ni” (Liahona, Nōvema 2018, 104–5). Fakatatau kia ʻEletā Lenilani, ʻoku fakafehoanaki fēfē ʻa e taumuʻa ʻa e Fakamoʻuí mo e taumuʻa ʻa Lusifaá?

ʻE lava ke fakalahi ʻe he ngaahi potufolofola ko ʻení hoʻo mahino ki he fatongia ʻo e Fakamoʻuí ko e Taukapó. ʻI hoʻo ako iá, fakakaukau ke tohi ha ngaahi kupuʻi lea pe ngaahi moʻoni te ke lava ʻo vahevahe mo e niʻihi kehé: 2 Nīfai 2:8–9; Mōsaia 15:7–9; Molonai 7:27–28; Tokāteline mo e Ngaahi Fuakava 29:5; 62:1. Ko e hā ʻoku mahuʻingamālie ai e ngaahi kupuʻi lea ko ʻení kiate koé?

Vakai foki, “ʻOku Fakaofo,” Ngaahi Himí, fika 102; Ngaahi Tefitó mo e Ngaahi Fehuʻí, “Fakalelei ʻa Sīsū Kalaisí,” Gospel Library; “The Mediator” (vitiō), Gospel Library.

10:47

ʻI he kuonga muʻá, naʻe toʻo ha fuka ki he taú ke tānaki mo fakatahatahaʻi ʻaki e kau sōtiá. Ko e fuká ko ha sīpinga foki ia pe lao ʻe lava ke fuatautau ki ai e meʻa kotoa pē. ʻI hoʻo lau e Tokāteline mo e Ngaahi Fuakava 45:9–10, fakalaulauloto ki he founga kuo hoko ai hoʻo ngaahi fuakava mo e ʻEikí ko ha fuka kiate koe.

Kuo fakamatalaʻi e Hāʻele ʻAnga Ua Mai ʻa e ʻEikí ʻoku fakatou “lahi” mo “fakamanavahē” (Malakai 4:5). ʻI he Tokāteline mo e Ngaahi Fuakava 45, ʻoku ngali feʻunga pē ʻa e ongo fakamatalá. ʻOku fakatou kau ʻi he fakahā ko ʻení ha ngaahi fakatokanga mamafa mo ha ngaahi talaʻofa fakatupu ʻamanaki lelei fekauʻaki mo e hāʻele mai ʻa e ʻEikí. ʻI hoʻo ako ʻa e veesi 11–75, fakalaulauloto ki he founga te ke lava ai ʻo teuteu ki he Hāʻele ʻAnga Ua Maí ʻi he tui kia Kalaisi kae ʻikai manavaheé. Lekooti ʻa e meʻa ʻokú ke maʻú ʻi ha tēpile hangē ko ʻení:

ʻI he vitiō “Men’s Hearts Shall Fail Them” (Gospel Library), ko e hā e faleʻi naʻe fakahoko ʻe Palesiteni Lāsolo M. Nalesoni ke tokoniʻi kitautolu ke tau fehangahangai mo e ngaahi tūkunga fakamanavaheé ʻi he nonga?

3:27

Ko e hā ʻokú ke ako ʻi he Tokāteline mo e Ngaahi Fuakava 45:31–32, 56–57 fekauʻaki mo e teuteu ki he hāʻele mai ʻa e ʻEikí? Ko e hā hoʻo “ngaahi potu toputapú”? ʻOku ʻuhinga ki he hā ke “ʻikai ueʻi”? Te ke lava fēfē ʻo ʻai ʻa e feituʻu ʻokú ke ʻi aí ke māʻoniʻoni angé?

Fakatokangaʻi ange naʻe ʻuhinga ʻa e ʻEikí ki he talanoa fakatātā ʻo e kau taaupoʻou ʻe toko hongofulú, ʻo fakafehoanaki ʻa e lolo ʻi he talanoa fakatātaá ki he moʻoní mo e Laumālie Māʻoniʻoní. Fakakaukau ke lau ʻa e talanoa fakatātā ʻi he Mātiu 25:1–13 mo e fakakaukau ko iá. Ko e hā ha ngaahi fakakaukau ʻokú ke maʻu?

David A. Bednar, “Ka Ne Mou ʻIlo Au,” Liahona, Nōvema 2016, 102–5.

Naʻe vēkeveke ʻa e Kāingalotu ʻi he kuonga ʻo Siosefa Sāmitá ke langa ʻa Saione, ko e Selusalema Foʻoú (vakai, ʻEta 13:2–9; Mōsese 7:18, 62–64). Ko e hā ʻokú ke ako fekauʻaki mo Saione—ʻa e kolo fakakuongamuʻa he kuonga ʻo ʻĪnoké mo e kolo ʻi he ʻaho kimui ní fakatouʻosi—mei he Tokāteline mo e Ngaahi Fuakava 45:11–15, 66–71? ʻOku ʻuhinga ʻa e fekau he ʻahó ni ke fokotuʻu ʻa Saioné ki hono fokotuʻu ʻo e puleʻanga ʻo e ʻOtuá ʻi ha feituʻu pē ʻoku tau nofo ai. Ko e hā te ke lava ʻo fai ke tokoni ke langa ʻa Saione ʻi he feituʻu ʻokú ke nofo aí?

• Mahalo te ke fie tokoni ke mahino ki hoʻo fānaú ko e taukapó ko ha taha ʻokú ne poupouʻi ha taha kehe. Hili ia te ke lava ʻo talanoa kau ki he ngaahi sīpinga ʻo e hoko ko ha taukapó ʻe lava ke nau maheni mo iá (hangē ko hono taukaveʻi ha kaungāmeʻá). ʻI hoʻomou lau fakataha ʻa e Tokāteline mo e Ngaahi Fuakava 45:3–5, tokoniʻi hoʻo fānaú ke nau ʻiloʻi ko hai hotau Taukapó pea mo e founga ʻokú Ne tokoniʻi ai kitautolú.

• Mahalo ʻe fakafiefia ke fakapipiki takai ʻi he lokí ha ʻū tā ʻo ha ʻapi, ko ha fale ʻo e Siasí, pea mo ha temipale. Te ke lava leva ʻo ʻoange ki hoʻo fānaú ha fanga kiʻi tokoni ke nau fakamatalaʻi ʻa e ngaahi feituʻu ko ʻení pea fakaafeʻi kinautolu ke nau tuʻu ʻo ofi ki he fakatātā ʻokú ke fakamatalaʻí. Kole ange ke nau tuʻu maʻu lolotonga hoʻo lau ʻa e laine ʻuluaki mei he Tokāteline mo e Ngaahi Fuakava 45:32. Ko e hā ha niʻihi ʻo e ngaahi potu toputapu ʻoku foaki mai ʻe he ʻOtuá? Tokoni ke mahino ki hoʻo fānaú ʻoku ʻuhinga ʻa e “tuʻu … ʻi he ngaahi potu toputapú, pea … ʻikai ueʻí” ke fili ki he totonú ʻi he taimi kotoa pē, neongo pe ko e hā ʻoku hokó. Te tau ngaohi fēfē hotau ʻapí ko ha feituʻu māʻoniʻoni angé?

• Te ke lava ʻo fakamatala ange ki hoʻo fānaú, ko e kuonga muʻá, naʻe toʻo ha fuka ki he taú. Naʻe tokoni ia ke ʻilo ʻe he kau sōtiá ʻa e feituʻu ke tānaki ki aí mo e meʻa ke faí. Lau fakataha ʻa e Tokāteline mo e Ngaahi Fuakava 45:9, pea aleaʻi e ngaahi founga ʻoku hangē ai ʻa e ongoongoleleí ko ha fuká. Mahalo ʻe fiefia hoʻo fānaú ke ngaohi haʻanau fuka pē ʻanautolu, kau ai ha ngaahi ʻīmisi pe ngaahi lea ʻokú ne fakahaaʻi ʻenau ongo fekauʻaki mo e Fakamoʻuí.

• ʻE lava ke manavahē ʻa e fānaú ʻi he fakaʻauha ʻe hoko kimuʻa ʻi he Hāʻele ʻAnga Ua Maí. ʻE lava ke tokoni hono fakahinohinoʻi kinautolu kia Sīsū Kalaisí ke nau hanganaki atu ʻi he tui! Fakakaukau ke fakaafeʻi kinautolu ke fakakaukau ki he ongo ʻoku nau maʻu ʻi he taimi ʻoku ʻaʻahi mai ai ha taha makehe, hangē ko ha kui pe kaungāmeʻá. Te nau teuteu fēfē ki he ʻaʻahí? Te ke lava leva ʻo fakaʻaliʻali ha tā ʻo e Fakamoʻuí pea lau ʻa e Tokāteline mo e Ngaahi Fuakava 45: 44–45. Fevahevaheʻaki ʻa e ongo ʻoku mou maʻu fekauʻaki mo e hāʻele mai ʻa e Fakamoʻuí.

• Ke tokoniʻi hoʻo fānaú ke nau ongoʻi fiefia fekauʻaki mo e Hāʻele ʻAnga Ua Mai ʻa e Fakamoʻuí, te ke lava ʻo hiki ʻi ha ngaahi laʻipepa ha niʻihi ʻo e ngaahi talaʻofa fakatupu ʻamanaki lelei mei he vahe 45 (hangē ko ʻení, vakai, veesi 44–45, 51–52, 55, 58–59, 66–71). ʻOange ki hoʻo fānaú ʻa e ʻū laʻipepá pea kole ange ke hiki honau nimá ʻi he taimi ʻoku ʻasi ai ʻa e talaʻofa ʻoku nau puké ʻi hoʻo lau ʻa e ngaahi vēsí. Aleaʻi ʻa e ʻuhinga ʻo e ngaahi talaʻofa ko ʻení. Te ke lava foki ʻo hivaʻi mo hoʻo fānaú ha foʻi hiva kau ki he Hāʻele ʻAnga Ua Mai ʻa e Fakamoʻuí, hangē ko e “ʻO Ka Ne Ka Toe Haʻú” (Tohi Hiva ʻa e Fānaú, 46–47).