Tokāteline mo e Ngaahi Fuakava 41–44

ʻI he konga kimuʻa ʻo e 1831, naʻe kamata ke fakataha ʻa e Kāingalotú ki ʻOhaiō. Naʻa nau vēkeveke ke maʻu ʻa e fono naʻe talaʻofa ʻe he ʻOtuá ke fakahā aí (vakai, Tokāteline mo e Ngaahi Fuakava 38:32). Ka naʻá Ne tomuʻa akoʻi ʻa e founga ʻoku totonu ke teuteu ai ʻEne kau ākongá ke maʻu ʻEne fonó. Ko e hā ha ngaahi tefitoʻi moʻoni ʻokú ke ʻiloʻi ʻi he Tokāteline mo e Ngaahi Fuakava 41:1–6 naʻe mei tokoni ki he Kāingalotú ke nau maʻu ʻa e fono ʻa e ʻOtuá? ʻE tokoni fēfē atu nai ʻa e ngaahi tefitoʻi moʻoni ko ʻení ke ke maʻu ha fakahinohino meiate Ia?

Vakai foki, “A Bishop unto the Church (Ko Ha Pīsope ki he Siasí),” ʻi he Revelations in Context, 77–83.

Naʻe lau ʻe he Kāingalotú ʻa e fakahā ʻi he Tokāteline mo e Ngaahi Fuakava 42:1–72 ko e taha ia ʻo e ngaahi fakahā mahuʻinga taha kuo maʻu ʻe he Palōfitá. Naʻe kau ia ʻi he ngaahi fuofua fakahā ke pulusí. Naʻe ui ia ʻe he Kāingalotú ʻi ha ngaahi taʻu lahi “ko e fonó.” Neongo ʻoku ʻikai kau ʻi he vahé ʻa e ngaahi fekau pe ngaahi fono kotoa ʻa e ʻEikí, ka ʻoku mahuʻinga ke fakalaulauloto ki he ʻuhinga naʻe mahuʻinga ai ʻa e ngaahi tefitoʻi moʻoni ko ʻení ki he Siasi naʻe toki fakafoki maí. Ko e hā ‘oku nau mahuʻinga ai kiate kitautolu ʻi he ʻaho ní?

Koeʻuhí ʻoku fuʻu lōloa ʻa e vahe 42, mahalo te ke fakakaukau ke ako ia ʻi ha fanga kiʻi konga iiki ange, hangē ko ʻení. Fakamahinoʻi ʻa e ngaahi tefitoʻi moʻoni ʻoku akoʻi ʻi he konga takitaha, pea fakakaukau ki he founga ʻoku hoko ai ʻa e ngaahi fono ko ʻení ko ha fakaʻilonga ʻo e ʻofa ʻa e ʻEikí ki Hono kakaí.

• Veesi 4–9, 11–17, 56–58

• Veesi 18–29

• Veesi 30–31

• Veesi 40–42

• Veesi 43–52

Ko e hā ʻoku ʻomi ai ʻe he ʻOtuá kiate kitautolu ha ngaahi fono mo ha ngaahi fekaú? Ko e hā ha ngaahi founga kuo faitāpuekina ai koe ʻi hoʻo ʻilo mo muimui ki he ngaahi fekaú?

4:20

Ko ha konga ʻo e fono naʻe fakahā ʻi he vahe 42, naʻe akoʻi ai ʻe he ʻEikí ki Hono Kāingalotú ʻa e founga te nau lava ʻo “taha ʻaki ʻenau ngaahi meʻa kotoa pē” (Ngāue 2:44; 4 Nīfai 1:3) pea “ʻikai ha kakai masiva ʻiate kinautolu” (Mōsese 7:18), ʻo hangē ko e kau muimui ʻo Kalaisi ʻi he kuonga muʻá, Ko e hā ʻokú ke ako mei he Tokāteline mo e Ngaahi Fuakava 42:30–42 fekauʻaki mo e founga naʻe moʻui ʻaki ai ʻe he Kāingalotú ʻa e fono ʻo e fakatapuí? (ʻOku ʻuhinga ʻa e fakatapuí ke tuku mavahe ha meʻa ki ha taumuʻa toputapu.)

Neongo ʻoku ʻikai ke tau “taha ʻaki [ʻetau] ngaahi meʻa kotoa pē” ʻi he ʻahó ni, ka ʻi he ngaahi temipalé, ʻoku fuakava ai ʻa e Kāingalotu ʻo e Siasí ke nau moʻui ʻaki ʻa e fono ʻo e fakatapuí. Te ke fakatapui fēfē ʻa e meʻa kuo foaki atu ʻe he ʻOtuá ke faitāpuekina ʻaki ʻa e kakai faingataʻaʻiá? Mahalo ʻe lava hono hivaʻi ha foʻi hiva hangē ko e “Kuo Lahi Hoku Tāpuakí” (Ngaahi Himí, fika 126) ʻo ʻoatu ha ngaahi fakakaukau.

Vakai foki, Sharon Eubank, “ʻOku ou Lotua Te Ne Ngāue ʻaki Kitautolu,” Liahona, Nōvema 2021, 53–56; “The Law (Ko e Fonó),” ʻi he Revelations in Context, 93–95.

Fakakaukau ʻoku fai haʻo pōtalanoa mo ha mēmipa foʻou ʻo e Siasí ʻa ia ʻoku fiefia ke ne ʻilo ʻoku tataki ʻa e Siasí ʻaki ʻa e fakahā. Te ke fakaʻaongaʻi fēfē ʻa e Tokāteline mo e Ngaahi Fuakava 43:1–16 ke tokoniʻi ia ke ako fekauʻaki mo e sīpinga ʻa e ʻEikí ʻi hono tataki Hono Siasí ʻo fakafou ʻi Heʻene palōfitá? Te ke lava fēfē ʻo fakaʻaongaʻi ʻa e Tokāteline mo e Ngaahi Fuakava 42:61, 65–68 ke akoʻi fekauʻaki mo hono maʻu ʻo e fakahā fakatāutahá?

Ko e hā ha niʻihi ʻo e “ngaahi meʻa fakamelino” mo e ngaahi meʻa fakafiefia kuó ke maʻu mei he ʻEikí ʻo fakafou ʻi Hono Laumālié?

Ke ako fekauʻaki mo e founga kuo fanongo ai ʻa e kau taki ʻo e Siasí ki he leʻo ʻo e ʻEikí, te ke lava ʻo mamata ʻi ha taha ʻo e ngaahi vitiō “Fanongo kiate Iá” ʻi he Gospel Library. Fakakaukau ke faʻu haʻo foʻi vitiō pē ʻaʻau, ʻo fakamatalaʻi ʻa e founga ʻokú ke fetuʻutaki ai mo e ʻEikí.

Vakai foki, Russell M. Nelson, “Fakahā maʻá e Siasí, Fakahā ki Heʻetau ʻEtau Moʻuí,” Liahona, Mē 2018, 93–96; “All Things Must Be Done in Order (Kuo Pau ke Fakahoko ʻa e Meʻa Kotoa pē ʻo Maau),” ʻi he Revelations in Context, 50–53.

• Ke tokoni ke ʻiloʻi ʻe hoʻo fānaú ʻa e ʻuhinga ʻo e hoko ko ha ākonga ʻa Sīsū Kalaisí, te ke lava ʻo tohiʻi ʻa e Tokāteline mo e Ngaahi Fuakava 41:5 ʻi ha laʻipepa, pea fakaʻatā ʻa e ngaahi feituʻu ʻoku totonu ke ʻi ai ʻa e foʻi lea ākongá. Te nau lava leva ʻo kumi ʻi he veesi 5 ʻa e foʻi lea ʻoku puliá. Fakatatau ki he veesi ko ʻení, ʻoku ʻuhinga nai ki he hā ke hoko ko ha ākonga ʻo Sīsū Kalaisí? ʻOku tau feinga fēfē ke hoko ko ha kau ākonga lelei ange ʻo Kalaisí?

• Mahalo ʻe fiefia hoʻo fānaú ke vaʻinga ʻi ha foʻi vaʻinga ʻe fiemaʻu ai ke nau fakafanongo lelei mo muimui ki he ngaahi fakahinohinó. Te ke lava ʻo fakaʻaongaʻi ʻa e vaʻinga ko ʻení ke talanoa fekauʻaki mo e ʻuhinga ʻo e “tokanga pea fanongo mo talangofua” ki he ʻEikí (Tokāteline mo e Ngaahi Fuakava 42:2). Ko e hā ha ngaahi fakahinohino kuó Ne tuku mai kiate kitautolu? ʻOku tāpuekina fēfē kitautolu ʻi heʻetau talangofua ki Heʻene ngaahi fonó mo e ngaahi fekaú?

• ʻE lava ke ke fakakakato ʻa e peesi ʻekitivitī ʻo e uike ní mo hoʻo fānaú. ʻE lava foki ke mou hivaʻi ha foʻi hiva fekauʻaki mo e talangofua ki he ngaahi fono ʻa e ʻOtuá, hangē ko e “Te u Moʻui ʻaki e Kosipelí” (Tohi Hiva ʻa e Fānaú, 72). Fakakaukau ke fevahevaheʻaki ʻa e founga kuo ʻomi ai ʻe he talangofua ki he ngaahi fono ʻa e ʻOtuá ʻa e fiefiá kiate koé.

  

• Hili hoʻomou lau fakataha ʻa e Tokāteline mo e Ngaahi Fuakava 42:38, tokoni ki hoʻo fānaú ke fakakaukau ki ha ngaahi founga te nau lava ai ʻo tokoni kia Sīsū ʻaki hono tokoniʻi ʻa e niʻihi kehé. Te nau lava ʻo maʻu ha ngaahi fakakaukau mei he vitiō “Pass It On [Fai ia ki ha Niʻihi Kehe]” (ChurchofJesusChrist.org). Te nau lava foki ʻo sio ki ha ngaahi fakatātā ʻo hono tokoniʻi ʻe he Fakamoʻuí ʻa e niʻihi kehé, fakamoʻui ʻo e mahakí, pe angaʻofa ki he fānaú (vakai, Tohi Fakatātā ʻo e Ongoongoleleí, fika 42, 47).

  

  2:18

  

• Te ke lava ʻo fakaʻaliʻali ki hoʻo fānaú ha laʻipepa Vahehongofulu mo e Ngaahi Foaki Kehé pea talanoa ki he founga ke fakaʻaongaʻi ai ia ke foaki ʻa e meʻa ʻoku tau maʻú ke faitāpuekina ai ʻa e niʻihi kehé.

• Fakaafeʻi hoʻo fānaú ke nau fakakaukauloto ʻoku tuʻu ha taha ʻi he houa fakamoʻoní ʻo tala ki he uōtí kuó ne maʻu ha fakahā ki he Siasí fakakātoa (hangē ko ʻení, ko ha fakahā ʻoku ʻikai totonu ke tau toe kai ʻa e kālotí pe ʻoku totonu ke tau fufulu ʻaki hotau nimá ʻa e huʻakaú kae ʻikai ko e vaí.) ʻOkú ne pehē mai ʻoku totonu ke tau fanongo ki he meʻa ʻokú ne lea ʻakí kae ʻikai ko e palōfitá. Ko e hā nai ha meʻa ʻoku fehalaaki heni? Hili iá, ʻe lava ke mou ako fakataha ʻa e Tokāteline mo e Ngaahi Fuakava 43:1–7 ke ʻiloʻi ʻa e founga ʻoku ʻomi ai ʻe he ʻEikí ʻa e ngaahi fekaú ki Hono Siasí.

• ʻE lava ke ke fakaʻaliʻali ha tā ʻo e palōfita moʻuí pea fakaafeʻi hoʻo fānaú ke nau vahevahe ha meʻa naʻá ne toki akonaki ʻaki kimuí ni. Kapau te nau fiemaʻu tokoni, vahevahe ha foʻi vitiō pe lea mei he konifelenisi lahi fakamuimui tahá. Ko e hā ʻoku hoko ai ko ha tāpuaki ʻa hono maʻu ha palōfita moʻui ʻi he ʻaho ní?