“ວັນທີ 17–23 ເດືອນກຸມພາ: ‘ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ’: ຄຳສອນ ແລະ ພັນທະສັນຍາ 12–17; ໂຈເຊັບ ສະມິດ—ປະຫວັດ 1:66–75,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 12–17; ໂຈເຊັບ ສະມິດ—ປະຫວັດ 1:66–75,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ແມ່ນ້ຳຊັສຄູຮັນນາ ໃກ້ກັບເມືອງຮາມໂມນີ, ລັດເພັນໂຊເວເນຍ

ວັນທີ 17–23 ເດືອນກຸມພາ: “ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ”

ຄຳສອນ ແລະ ພັນທະສັນຍາ 12–17; ໂຈເຊັບ ສະມິດ—ປະຫວັດ 1:66–75

ຜູ້ຄົນສ່ວນຫລາຍຕະຫລອດທົ່ວໂລກອາດບໍ່ເຄີຍໄດ້ຍິນກ່ຽວກັບເມືອງຮາມໂມນີ, ລັດເພັນໂຊເວເນຍ. ພຣະຜູ້ເປັນເຈົ້າມັກເລືອກສະຖານທີ່ ທີ່ຕ່ຳຕ້ອຍສຳລັບເຫດການທີ່ສຳຄັນທີ່ສຸດ ໃນອານາຈັກຂອງພຣະອົງ. ຢູ່ໃນປ່າແຫ່ງໜຶ່ງ ໃກ້ເມືອງຮາມໂມນີ ໃນວັນທີ 15 ເດືອນພຶດສະພາ, 1829, ໂຢຮັນບັບຕິສະໂຕໄດ້ມາປະກົດຕໍ່ໂຈເຊັບ ສະມິດ ແລະ ອໍລີເວີ ຄາວເດີຣີ. ເພິ່ນໄດ້ວາງມືໃສ່ເທິງຫົວຂອງພວກເພິ່ນ ແລະ ໄດ້ມອບຖານະປະໂລຫິດແຫ່ງອາໂຣນໃຫ້ພວກເພິ່ນ, ໂດຍການເອີ້ນພວກເພິ່ນວ່າເປັນ “ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ” (ຄຳສອນ ແລະ ພັນທະສັນຍາ 13:1).

ໂຢຮັນບັບຕິສະໂຕຄືຜູ້ຮັບໃຊ້ທີ່ໄວ້ວາງໃຈໄດ້ຂອງພຣະເຈົ້າ ຜູ້ທີ່ໄດ້ໃຫ້ບັບຕິສະມາແກ່ພຣະຜູ້ຊ່ວຍໃຫ້ລອດ ແລະ ໄດ້ຕຽມທາງສຳລັບການສະເດັດມາຂອງພຣະອົງ (ເບິ່ງ ມັດທາຍ 3:1–6, 13–17). ສຳລັບຊາຍໜຸ່ມສອງຄົນທີ່ຢູ່ໃນໄວຊາວປີ, ມັນກໍຕ້ອງເປັນສິ່ງທີ່ໜ້າຖ່ອມໃຈ, ຫລື ບາງທີອາດຈະເຖິງຂັ້ນກົດດັນຫລາຍ, ທີ່ຈະຖືກເອີ້ນວ່າເປັນຜູ້ຮັບໃຊ້ຮ່ວມກັບໂຢຮັນ. ໃນເວລານັ້ນ, ໂຈເຊັບ ແລະ ອໍລີເວີເປັນບຸກຄົນທີ່ຜູ້ຄົນສ່ວນຫລາຍບໍ່ຮູ້ຈັກ, ຄືກັນກັບເມືອງຮາມໂມນີ ທີ່ບໍ່ມີຫລາຍຄົນຮູ້ຈັກ. ແຕ່ການຮັບໃຊ້ໃນວຽກງານຂອງພຣະເຈົ້າ ແມ່ນກ່ຽວກັບ ວິທີ ທີ່ເຮົາຮັບໃຊ້ສະເໝີມາ, ບໍ່ແມ່ນກ່ຽວກັບວ່າ ຢາກໃຫ້ຜູ້ຄົນເຫັນເຮົາເຮັດ. ເຖິງແມ່ນວ່າການມີສ່ວນຮ່ວມຂອງທ່ານບາງເທື່ອອາດເບິ່ງຄືວ່າເລັກນ້ອຍ ຫລື ບໍ່ມີໃຜເຫັນກໍຕາມ, ແຕ່ທ່ານກໍເປັນເພື່ອນຜູ້ຮັບໃຊ້ໃນ “ວຽກງານອັນຍິ່ງໃຫຍ່ ແລະ ໜ້າອັດສະຈັນ” ຂອງພຣະຜູ້ເປັນເຈົ້າຄືກັນ (ຄຳສອນ ແລະ ພັນທະສັນຍາ 14:1).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 12; 14

ເຮົາສາມາດມີພາກສ່ວນໃນ “ວຽກງານອັນຍິ່ງໃຫຍ່ ແລະ ໜ້າອັດສະຈັນ” ຂອງພຣະເຈົ້າໄດ້.

ໂຈເຊັບ ໄນ້ ແລະ ເດວິດ ວິດເມີ ທັງສອງຢາກຮູ້ວ່າ ພວກເພິ່ນຈະຊ່ວຍຫຍັງໄດ້ແດ່ ໃນວຽກງານຂອງພຣະຜູ້ເປັນເຈົ້າ. ຂະນະທີ່ທ່ານອ່ານຄຳຕອບຂອງພຣະຜູ້ເປັນເຈົ້າທີ່ມີໃຫ້ກັບພວກເພິ່ນໃນ (ຄຳສອນ ແລະ ພັນທະສັນຍາ 12; 14), ໃຫ້ຄິດກ່ຽວກັບວ່າການ “ສະແຫວງຫາ ແລະ ສະຖາປະນາອຸດົມການຂອງຊີໂອນ” ມີຄວາມໝາຍຫຍັງແດ່ຕໍ່ທ່ານ (12:6; ເບິ່ງ 14:6 ນຳອີກ). ມີຫລັກທຳ ແລະ ຄຸນລັກສະນະຢ່າງພຣະຄຣິດຫຍັງແດ່ທີ່ທ່ານພົບເຫັນຢູ່ໃນພາກພຣະຄຳພີເຫລົ່ານີ້ ທີ່ສາມາດຊ່ວຍທ່ານໃຫ້ເຮັດສິ່ງນີ້?

ເບິ່ງ “The Knight and Whitmer Families,” ໃນ Revelations in Context, 20–24 ນຳອີກ.

ຄຳສອນ ແລະ ພັນທະສັນຍາ 13

ພຣະເຢຊູຄຣິດໄດ້ສົ່ງໂຢຮັນບັບຕິສະໂຕມາເພື່ອຟື້ນຟູຖານະປະໂລຫິດແຫ່ງອາໂຣນ.

ໂຢຮັນບັບຕິສະໂຕໄດ້ເອີ້ນໂຈເຊັບ ສະມິດ ແລະ ອໍລີເວີ ຄາວເດີຣີ ວ່າເປັນ “ເພື່ອນຜູ້ຮັບໃຊ້ຮ່ວມກັບເພີ່ນ.” ທ່ານຄິດວ່າ ການເປັນເພື່ອນຜູ້ຮັບໃຊ້ຮ່ວມກັບໂຢຮັນບັບຕິສະໂຕນັ້ນ ໝາຍຄວາມວ່າແນວໃດ? (ເບິ່ງ ມັດທາຍ 3:13–17; ລູກາ 1:13–17; 3:2–20).

ຂະນະທີ່ທ່ານອ່ານສິ່ງທີ່ໂຢຮັນບັບຕິສະໂຕໄດ້ກ່າວກ່ຽວກັບຖານະປະໂລຫິດແຫ່ງອາໂຣນໃນ ພາກທີ 13, ຈົ່ງໄຕ່ຕອງເບິ່ງວ່າຂໍກະແຈແຫ່ງຖານະປະໂລຫິດນີ້ໄດ້ຊ່ວຍໃຫ້ພາລະກິດຂອງໂຢຮັນໃນການຕຽມທາງໃຫ້ກັບພຣະຜູ້ເປັນເຈົ້າສຳເລັດແນວໃດ. ຍົກຕົວຢ່າງ:

“ການປະຕິບັດສາດສະໜາກິດຂອງເຫລົ່າທູດ” ແມ່ນຫຍັງ? (ເບິ່ງ 2 ນີໄຟ 32:2–3; ໂມໂຣໄນ 7:29–32; ຄູ່ມືພຣະຄຳພີ, “ທູດ,” ຫ້ອງສະໝຸດພຣະກິດຕິຄຸນ).
“ພຣະກິດຕິຄຸນແຫ່ງການກັບໃຈ” ແມ່ນຫຍັງ? (ເບິ່ງ ຄຳສອນ ແລະ ພັນທະສັນຍາ 84:26–27; Dale G. Renlund, “The Priesthood and the Savior’s Atoning Power,” Liahona, Nov. 2017, 64–67).

ພິທີການຕ່າງໆຂອງຖານະປະໂລຫິດແຫ່ງອາໂຣນ (ເຊັ່ນ ພິທີການບັບຕິສະມາ ແລະ ສິນລະລຶກ) ຊ່ວຍກຽມທາງໃຫ້ເຮົາ ເພື່ອຮັບເອົາພຣະຜູ້ຊ່ວຍໃຫ້ລອດເຂົ້າມາໃນຊີວິດຂອງເຮົາແນວໃດ?

ຂໍກະແຈຂອງຖານະປະໂລຫິດຄືຫຍັງ?

ແອວເດີ ແດວ ຈີ ເຣັນລັນ ແລະ ຣຸດ, ພັນລະຍາຂອງເພິ່ນ, ໄດ້ສະເໜີຄຳອະທິບາຍກ່ຽວກັບຂໍກະແຈຂອງຖານະປະໂລຫິດນີ້ວ່າ:

“ຄຳວ່າ ຂໍກະແຈ ຂອງຖານະປະໂລຫິດ ໄດ້ຖືກນຳໃຊ້ຢູ່ສອງວິທີທີ່ແຕກຕ່າງກັນ. ວິທີທຳອິດໝາຍເຖິງສິດ ຫລື ສິດທິພິເສດທີ່ມອບໃຫ້ທຸກຄົນຜູ້ທີ່ໄດ້ຮັບຖານະປະໂລຫິດແຫ່ງອາໂຣນ ຫລື ເມນຄີເສເດັກ. … ຕົວຢ່າງເຊັ່ນ, ຜູ້ດຳລົງຖານະປະໂລຫິດແຫ່ງອາໂຣນຊຶ່ງໄດ້ຮັບຂໍກະແຈແຫ່ງການປະຕິບັດຂອງເຫລົ່າທູດ ແລະ ຂໍກະແຈຂອງການກຽມພຣະກິດຕິຄຸນແຫ່ງການກັບໃຈ ແລະ ຂອງການບັບຕິສະມາໂດຍການລົງໄປໃນນ້ຳໝົດທັງຕົວເພື່ອການປົດບາບ (ເບິ່ງ ຄຳສອນ ແລະ ພັນທະສັນຍາ 13:1; 84:26–27). ຜູ້ດຳລົງຖານະປະໂລຫິດເມນຄີເສເດັກຊຶ່ງໄດ້ຮັບຂໍກະແຈແຫ່ງຄວາມລຶກລັບຂອງອານາຈັກ, ຂໍກະແຈແຫ່ງຄວາມຮູ້ຂອງພຣະເຈົ້າ, ແລະ ຂໍກະແຈຂອງພອນທາງວິນຍານທັງໝົດຂອງສາດສະໜາຈັກ (ເບິ່ງ ຄຳສອນ ແລະ ພັນທະສັນຍາ 84:19; 107:18. …

“ວິທີທີສອງຂອງຄຳວ່າ ຂໍກະແຈຂອງຖານະປະໂລຫິດ ໄດ້ຖືກນຳໃຊ້ສຳລັບການເປັນຜູ້ນຳ. ຜູ້ນຳຖານະປະໂລຫິດໄດ້ຮັບຂໍກະແຈແຫ່ງຖານະປະໂລຫິດເພີ່ມເຕີມ, ຄືສິດໃນການເປັນຜູ້ຄວບຄຸມໂຄງຮ່າງການຈັດຕັ້ງຂອງສາດສະໜາຈັກ ຫລື ກຸ່ມ. ກ່ຽວກັບເລື່ອງນີ້, ຂໍກະແຈຂອງຖານະປະໂລຫິດຄືສິດອຳນາດ ແລະ ອຳນາດໃນການຊີ້ນຳ, ນຳພາ, ແລະ ປົກຄອງໃນສາດສະໜາຈັກ” (ຖານະປະໂລຫິດແຫ່ງເມນຄີເສເດັກ: ການເຂົ້າໃຈຄຳສອນ, ການດຳລົງຊີວິດຕາມຫລັກທຳ [2018], 26).

ໂຈເຊັບ ສະມິດ ໃຫ້ບັບຕິສະມາແກ່ອໍລີເວີ ຄາວເດີຣີ, ໂດຍ ແດວ ພາສັນ

ໂຈເຊັບ ສະມິດ—ປະຫວັດ 1:66–75

ພິທີການຕ່າງໆຊ່ວຍເຮົາໃຫ້ເຂົ້າເຖິງອຳນາດຂອງພຣະເຈົ້າ.

ທ່ານເຄິຍສົງໄສບໍວ່າມັນຈະເປັນແນວໃດຖ້າທ່ານໄດ້ຢູ່ກັບໂຈເຊັບ ສະມິດ ແລະ ອໍລີເວີ ຄາວເດີຣີ ໃນເຫດການສຳຄັນຂອງການຟື້ນຟູ? ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ 1:66–75, ລວມທັງໝາຍເຫດຢູ່ໃນທ້າຍຂອງ ຂໍ້ທີ 71, ຢ່າງນ້ອຍທ່ານອາດຈະໄດ້ເຂົ້າໃຈໃນບາງສິ່ງທີ່ພວກເພິ່ນຮູ້ສຶກ. ແມ່ນຫຍັງທີ່ປະທັບໃຈທ່ານ ກ່ຽວກັບຄຳເວົ້າຂອງພວກເພິ່ນ? ຈົ່ງສັງເກດ, ໂດຍສະເພາະແມ່ນ, ພອນຕ່າງໆທີ່ພວກເພິ່ນໄດ້ຮັບຍ້ອນພວກເພິ່ນໄດ້ຮັບຖານະປະໂລຫິດ ແລະ ໄດ້ຮັບບັບຕິສະມາ. ພອນຢ່າງໃດແດ່ທີ່ພຣະຜູ້ຊ່ວຍໃຫ້ລອດໄດ້ມອບໃຫ້ກັບທ່ານໂດຍຜ່ານທາງພິທີການຂອງຖານະປະໂລຫິດ?

ເພື່ອຮຽນຮູ້ເພີ່ມເຕີມ, ໃຫ້ພິຈາລະນາສ້າງຕາຕະລາງໂດຍມີຫົວຂໍ້ ພິທີການ ແລະ ພອນຕ່າງໆ. ຈາກນັ້ນທ່ານສາມາດຄົ້ນຄວ້າພຣະຄຳພີຕ່າງໆເຫລົ່ານີ້ ເພື່ອຈົດລາຍການພິທີການ ແລະ ພອນຕ່າງໆ ທີ່ມາຈາກພຣະຄຳພີດັ່ງກ່າວ: ໂຢຮັນ 14:26; ກິດຈະການ 2:38; ຄຳສອນ ແລະ ພັນທະສັນຍາ 84:19–22; 131:1–4; ໂຈເຊັບ ສະມິດ—ປະຫວັດ 1:73–74. ມີພອນຢ່າງໃດອີກແດ່ ທີ່ທ່ານຢາກເອົາມາຕື່ມໃສ່ໃນລາຍການ? ພິທີການຕ່າງໆທີ່ທ່ານໄດ້ຮັບ ໄດ້ນຳອຳນາດຂອງພຣະຜູ້ຊ່ວຍໃຫ້ລອດມາສູ່ຊີວິດຂອງທ່ານແນວໃດ?

ເບິ່ງ David A. Bednar, “With the Power of God in Great Glory,” Liahona, Nov. 2021, 28–30; Saints, 1:65–68; “God of Power, God of Right,” Hymns, no. 20; Topics and Questions, “Covenants and Ordinances,” ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 15–16

ການນຳຜູ້ຄົນມາຫາພຣະຄຣິດເປັນສິ່ງທີ່ມີຄຸນຄ່າຫລາຍທີ່ສຸດ.

ທ່ານເຄີຍສົງໄສບໍວ່າ, ຂະນະທີ່ ຈອນ ແລະ ພີເຕີ ວິດເມີ ໄດ້ກະທຳ, “ສິ່ງທີ່ມີຄຸນຄ່າທີ່ສຸດ” ໃນຊີວິດຂອງທ່ານນັ້ນແມ່ນຫຍັງ? (ຄຳສອນ ແລະ ພັນທະສັນຍາ 15:4; 16:4). ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 15–16, ໃຫ້ໄຕ່ຕອງວ່າ ການນຳຜູ້ຄົນມາຫາພຣະຄຣິດ ເປັນສິ່ງທີ່ມີຄຸນຄ່າຫລາຍທີ່ສຸດແນວໃດ? ທ່ານກຳລັງເຮັດຫຍັງເພື່ອ “ນຳເອົາຜູ້ຄົນ” ມາຫາພຣະຄຣິດ?

ເບິ່ງ Saints, 1:68–71 ນຳອີກ.

ຄຳສອນ ແລະ ພັນທະສັນຍາ 17

ພຣະຜູ້ເປັນເຈົ້າໃຊ້ພະຍານເພື່ອພິສູດພຣະຄຳຂອງພຣະອົງ.

ພະຍານຄືຫຍັງ? ເປັນຫຍັງພຣະຜູ້ເປັນເຈົ້າຈຶ່ງໃຊ້ພະຍານໃນວຽກງານຂອງພຣະອົງ? (ເບິ່ງ 2 ໂກຣິນໂທ 13:1). ໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານອ່ານພຣະຄຳຂອງພຣະເຈົ້າ ຕໍ່ພະຍານສາມຄົນ ຢູ່ໃນ ຄຳສອນ ແລະ ພັນທະສັນຍາ 17. (ເບິ່ງ “ປະຈັກພະຍານຂອງພະຍານສາມຄົນ” ໃນພຣະຄຳພີມໍມອນ ນຳອີກ.) ພະຍານຊ່ວຍນຳ “ຈຸດປະສົງທີ່ຊອບທຳ” ຂອງພຣະເຈົ້າມາແນວໃດ? (ຂໍ້ທີ 4).

ທ່ານສາມາດສະແດງປະຈັກພະຍານເຖິງຫຍັງ?

ເບິ່ງ Saints, 1:73–75; “A Day for the Eternities” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 13; ໂຈເຊັບ ສະມິດ—ປະຫວັດ 1:68–74

ໂຢຮັນບັບຕິສະໂຕໄດ້ຟື້ນຟູຖານະປະໂລຫິດແຫ່ງອາໂຣນ.

ງານສິລະປະໃນໂຄງຮ່າງນີ້ ສາມາດຊ່ວຍລູກໆຂອງທ່ານໃຫ້ເຫັນພາບການຟື້ນຟູຖານະປະໂລຫິດແຫ່ງອາໂຣນໄດ້ (ເບິ່ງ “ບົດທີ 6: ໂຈເຊັບ ແລະ ອໍລີເວີ ໄດ້ຮັບຖານະປະໂລຫິດ,” ໃນ ເລື່ອງຄຳສອນ ແລະ ພັນທະສັນຍາ, 26–27, ຫລື ວີດີໂອທີ່ກ່ຽວຂ້ອງໃນຫ້ອງສະໝຸດພຣະກິດຕິຄຸນ). ພວກເຂົາຢາກແຕ້ມຮູບກ່ຽວກັບເຫດການນັ້ນບໍ່ ໂດຍອີງຕາມສິ່ງທີ່ທ່ານໄດ້ອ່ານກັບພວກເຂົາ ຢູ່ໃນ ໂຈເຊັບ ສະມິດ—ປະຫວັດ 1:68–74?

2:12
Angels Restore the Priesthood: Power to do God's work
ທ່ານກໍສາມາດສະແດງຮູບໂຢຮັນບັບຕິສະໂຕ ໃນຂະນະທີ່ທ່ານອ່ານນຳກັນໃນ ມັດທາຍ 3:13–17; ໂຈເຊັບ ສະມິດ—ປະຫວັດ 1:68–70. ເປັນຫຍັງມັນຈຶ່ງສຳຄັນທີ່ພຣະຜູ້ເປັນເຈົ້າໄດ້ສົ່ງໂຢຮັນ ບັບຕິສະໂຕມາມອບສິດອຳນາດຖານະປະໂລຫິດໃຫ້ແກ່ໂຈເຊັບ ສະມິດ ເພື່ອບັບຕິສະມາ?

ການກະກຽມລູກໆຂອງທ່ານໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ. ສຳລັບແນວຄິດເພີ່ມເຕີມເພື່ອຊ່ວຍເຫລືອລູກໆຂອງທ່ານຮຽນຮູ້ກ່ຽວກັບອຳນາດ, ສິດອຳນາດ, ແລະ ຂໍກະແຈຂອງຖານະປະໂລຫິດ, ໃຫ້ເບິ່ງ ພາກຫ້ອຍທ້າຍ ກ ຫລື ພາກຫ້ອຍທ້າຍ ຂ.

ໂຢຮັນບັບຕິສະໂຕກຳລັງໃຫ້ບັບຕິສະມາແກ່ພຣະເຢຊູຄຣິດ — ຮູບພາບພຣະເຢຊູຄຣິດກຳລັງຮັບບັບຕິສະມາ, ໂດຍ ແດນ ເບີ

ຄຳສອນ ແລະ ພັນທະສັນຍາ 13

ພຣະບິດາເທິງສະຫວັນໃຫ້ພອນແກ່ເຮົາຜ່ານທາງຖານະປະໂລຫິດແຫ່ງອາໂຣນ.

ເພື່ອກະຕຸ້ນໃຫ້ເກີດການສົນທະນາກ່ຽວກັບຂໍກະແຈທີ່ໄດ້ກ່າວມາໃນ ຄຳສອນ ແລະ ພັນທະສັນຍາ 13, ທ່ານ ແລະ ລູກໆຂອງທ່ານສາມາດນຳເອົາພວງກະແຈມາເບິ່ງ ແລະ ເວົ້າລົມກັນກ່ຽວກັບວ່າກະແຈສາມາດຊ່ວຍເຮົາໃຫ້ເຮັດຫຍັງໄດ້ແດ່. ບາງທີທ່ານອາດຊ່ວຍເຫລືອພວກເຂົາຊອກຫາຄຳວ່າ ຂໍກະແຈ ໃນພາກທີ 13. ມີຖ້ອຍຄຳ ຫລື ວະລີອື່ນໆອີກບໍໃນ ຄຳສອນ ແລະ ພັນທະສັນຍາ 13 ທີ່ອະທິບາຍກ່ຽວກັບພອນຕ່າງໆຂອງຖານະປະໂລຫິດແຫ່ງອາໂຣນ? ລູກໆຂອງທ່ານຍັງສາມາດລະບຸວິທີທີ່ພຣະບິດາເທິງສະຫວັນໄດ້ໃຫ້ພອນແກ່ເຮົາຜ່ານທາງຖານະປະໂລຫິດຈາກວິດີໂອ “Blessings of the Priesthood” (ຫ້ອງສະໝຸດພຣະກິດຕິຄຸນ) ນຳອີກ.

ຄຳສອນ ແລະ ພັນທະສັນຍາ 15:4–6; 16:4–6

ການຊ່ວຍຄົນອື່ນໃຫ້ມາຫາພຣະເຢຊູຄຣິດຄື “ສິ່ງທີ່ມີຄຸນຄ່າທີ່ສຸດ.”

ຈອນ ແລະ ພີເຕີ ວິດເມີ ຢາກຮູ້ຈັກສິ່ງທີ່ມີຄຸນຄ່າທີ່ສຸດສຳລັບເຂົາເຈົ້າ (ເບິ່ງ ຄຳສອນ ແລະ ພັນທະສັນຍາ 15:4; 16:4). ບາງທີທ່ານ ແລະ ລູກໆຂອງທ່ານສາມາດເວົ້າລົມກ່ຽວກັບສິ່ງທີ່ມີຄຸນຄ່າຫລາຍສຳລັບພວກທ່ານ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 15:6 ຫລື 16:6, ບອກໃຫ້ລູກໆຂອງທ່ານຍົກມືຂຶ້ນ ເມື່ອພວກເຂົາໄດ້ຍິນສິ່ງໃດທີ່ພຣະຜູ້ເປັນເຈົ້າໄດ້ກ່າວຊຶ່ງ “ມີຄຸນຄ່າທີ່ສຸດ.”
ການ “ນຳເອົາຜູ້ຄົນມາຫາ [ພຣະເຢຊູຄຣິດ]” ໝາຍຄວາມວ່າແນວໃດ? ຊ່ວຍລູກໆຂອງທ່ານເຮັດລາຍການແນວຄິດ, ເຊັ່ນ ການເປັນເພື່ອນກັບຄົນອື່ນ, ການແບ່ງປັນພຣະຄຳພີກັບໝູ່ເພື່ອນ, ຫລື ການອະທິຖານໃຫ້ກັບຄົນຍາກຈົນ. ລູກໆຂອງທ່ານສາມາດຊອກຫາຮູບພາບກ່ຽວກັບສິ່ງເຫລົ່ານີ້ໄດ້ໃນວາລະສານຂອງສາດສະໜາຈັກ ຫລື ໃນ ປຶ້ມຮູບພຣະກິດຕິຄຸນ. ຫລື ພວກເຂົາສາມາດແຕ້ມຮູບດ້ວຍຕົວເອງກໍໄດ້. ເຊື້ອເຊີນພວກເຂົາໃຫ້ເລືອກເອົາຢ່າງໃດຢ່າງໜຶ່ງຈາກລາຍການຂອງພວກເຂົາທີ່ພວກເຂົາຈະເຮັດ. ພວກທ່ານກໍສາມາດຮ້ອງເພງນຳກັນໃນວັກທີສີ່ຂອງເພງ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27).

ຄຳສອນ ແລະ ພັນທະສັນຍາ 17

ເຮົາສາມາດເປັນພະຍານເຖິງພຣະຄຳພີມໍມອນ.

“ບົດທີ 7: ພະຍານທັງຫລາຍເຫັນແຜ່ນຈາລຶກຄຳ” (ໃນ ເລື່ອງຄຳສອນ ແລະ ພັນທະສັນຍາ, 31–33, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ) ສາມາດຊ່ວຍລູກໆຂອງທ່ານໃຫ້ຮຽນຮູ້ກ່ຽວກັບປະຈັກພະຍານທັງສາມ. ຫລັງຈາກທີ່ອ່ານ ຄຳສອນ ແລະ ພັນທະສັນຍາ 17:5–6, ຈົ່ງເລົ່າໃຫ້ລູກໆຂອງທ່ານຟັງວ່າ ທ່ານຮູ້ວ່າພຣະຄຳພີມໍມອນຈິງແທ້ແນວໃດ. ເຮົາຈະສາມາດເປັນພະຍານເຖິງພຣະຄຳພີມໍມອນໄດ້ແນວໃດ?

4:58
Witnessess See the Book of Mormon Plates: Bearing testimony to the world

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໂຈເຊັບ ແລະ ອໍລິເວີໄດ້ຮັບຖານະປະໂລຫິດແຫ່ງອາໂຣນຈາກໂຢຮັນບັບຕິສະໂຕ — Upon You My Fellow Servants [ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ], ໂດຍ ລິນດາ ເຄີລີ ຄຣິສເຕັນເຊັນ