“ວັນທີ 20–26 ເດືອນມັງກອນ: ‘ຫົວໃຈຂອງລູກຫລານຈະຫັນໄປຫາບັນພະບຸລຸດຂອງຕົນ’: ຄຳສອນ ແລະ ພັນທະສັນຍາ 2; ໂຈເຊັບ ສະມິດ—ປະຫວັດ 1:27–65,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 2; ໂຈເຊັບ ສະມິດ—ປະຫວັດ 1:27–65,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ He Called Me by Name [ເພິ່ນໄດ້ເອີ້ນຊື່ຂ້າພະເຈົ້າ], ໂດຍ ໄມໂກ ມອມ

ວັນທີ 20–26 ເດືອນມັງກອນ: “ຫົວໃຈຂອງລູກຫລານຈະຫັນໄປຫາບັນພະບຸລຸດຂອງຕົນ”

ຄຳສອນ ແລະ ພັນທະສັນຍາ 2; ໂຈເຊັບ ສະມິດ—ປະຫວັດ 1:27–65

ມັນເປັນເວລາສາມປີຫລັງຈາກພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ໂຈເຊັບ ສະມິດ ຢູ່ໃນປ່າ, ແລະ ໂຈເຊັບຍັງບໍ່ໄດ້ຮັບການເປີດເຜີຍເພີ່ມເຕີມໃດໆ ນັບຕັ້ງແຕ່ນັ້ນມາ. ເພິ່ນໄດ້ເລີ່ມສົງໄສວ່າ ພຣະຜູ້ເປັນເຈົ້າບໍ່ພໍພຣະໄທຫຍັງນຳເພິ່ນບໍ. ເຊັ່ນດຽວກັນກັບເຮົາທຸກຄົນ, ເພິ່ນໄດ້ເຮັດຜິດພາດ, ແລະ ເພິ່ນຮູ້ສຶກຖືກລົງໂທດເພາະຄວາມຜິດພາດເຫລົ່ານັ້ນ. ແຕ່ພຣະເຈົ້າຍັງມີວຽກງານໃຫ້ເພິ່ນເຮັດຢູ່. ແລະ ວຽກງານທີ່ໂຈເຊັບໄດ້ຖືກເອີ້ນໃຫ້ເຮັດ ແມ່ນກ່ຽວພັນກັບສິ່ງທີ່ພຣະເຈົ້າໄດ້ຂໍໃຫ້ເຮົາເຮັດ. ໂຈເຊັບຈະຕ້ອງນຳພຣະຄຳພີມໍມອນອອກມາ; ເຮົາໄດ້ຖືກເຊື້ອເຊີນໃຫ້ແບ່ງປັນຂ່າວສານຂອງມັນ. ໂຈເຊັບຈະຕ້ອງໄດ້ຮັບຂໍກະແຈແຫ່ງຖານະປະໂລຫິດ ເພື່ອຫັນຫົວໃຈຂອງລູກໆໄປຫາບັນພະບຸລຸດຂອງຕົນ; ບັດນີ້ ເຮົາສາມາດຮັບພິທີການຕ່າງໆເພື່ອບັນພະບຸລຸດຂອງເຮົາໃນພຣະວິຫານ. ໂຈເຊັບໄດ້ຖືກບອກກ່ຽວກັບຄຳທຳນາຍ ທີ່ຈະສຳເລັດຄົບຖ້ວນໃນບໍ່ຊ້າ; ເຮົາໄດ້ຖືກເອີ້ນໃຫ້ຊ່ວຍເຮັດໃຫ້ຄຳທຳນາຍເຫລົ່ານີ້ສຳເລັດຄົບຖ້ວນ ເມື່ອເຮົາມີສ່ວນໃນວຽກງານຂອງພຣະເຈົ້າ, ເຮົາສາມາດຄາດຄະເນໄດ້ວ່າ ເຮົາຈະປະເຊີນກັບການຕໍ່ຕ້ານ ແລະ ແມ່ນແຕ່ການຂົ່ມເຫັງ, ເຊັ່ນດຽວກັບທີ່ສາດສະດາໄດ້ປະເຊີນ. ແຕ່ເຮົາສາມາດມີສັດທາເຊັ່ນກັນວ່າ ພຣະຜູ້ເປັນເຈົ້າຈະເຮັດໃຫ້ເຮົາເປັນເຄື່ອງມືໃນພຣະຫັດຂອງພຣະອົງ, ຄືກັນກັບໂຈເຊັບ.

ເບິ່ງ Saints, 1:20–48 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ໂຈເຊັບ ສະມິດ—ປະຫວັດ 1:27–33

ພຣະເຈົ້າມີວຽກງານໃຫ້ເຮົາເຮັດ.

ການເຊື່ອວ່າພຣະເຈົ້າມີວຽກງານໃຫ້ໂຈເຊັບ ສະມິດ ເຮັດແມ່ນອີກເລື່ອງໜຶ່ງ—ເຮົາສາມາດເບິ່ງຊີວິດຂອງເພິ່ນຄືນຫລັງ ແລະ ເຫັນສິ່ງທີ່ເພິ່ນໄດ້ສຳເລັດໄດ້ຢ່າງຊັດເຈນ. ແຕ່ທ່ານເຄີຍໄດ້ຄິດບໍ່ວ່າ ພຣະເຈົ້າກໍມີວຽກງານໃຫ້ທ່ານເຮັດເຊັ່ນກັນ? ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ 1:27–33, ໃຫ້ຄິດກ່ຽວກັບວ່າ ວຽກງານນັ້ນອາດແມ່ນຫຍັງ? ມັນມີສ່ວນຊ່ວຍໃນການຟື້ນຟູພຣະກິດຕິຄຸນຂອງພຣະຜູ້ຊ່ວຍໃຫ້ລອດທີ່ກຳລັງດຳເນີນການຢູ່ນີ້ແນວໃດ?

ແອວເດີ ແກຣີ ອີ ສະຕີບເວັນສັນ ໄດ້ສິດສອນວ່າ: “ເມື່ອເຮົາມາຫາພຣະຄຣິດ ແລະ ຊ່ວຍຄົນອື່ນໃຫ້ເຮັດຄືກັນ, ເຮົາໄດ້ມີພາກສ່ວນໃນວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ, ຊຶ່ງເຈາະຈົງໃສ່ໜ້າທີ່ຮັບຜິດຊອບທີ່ໄດ້ຮັບການແຕ່ງຕັ້ງຈາກສະຫວັນ. … ໜ້າທີ່ຮັບຜິດຊອບເຫລົ່ານີ້ແມ່ນລຽບງ່າຍ, ສ້າງແຮງບັນດານໃຈ, ສ້າງແຮງຈູງໃຈ, ແລະ ສາມາດເຮັດໄດ້. ມັນມີດັ່ງຕໍ່ໄປນີ້:

ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ
ການດູແລຄົນຂັດສົນ
ການເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ
ຮວບຮວມຄອບຄົວຊົ່ວນິລັນດອນ” (“Simply Beautiful—Beautifully Simple,” Liahona, Nov. 2021, 47).

ໄຕ່ຕອງປະສົບການຕ່າງໆທີ່ທ່ານເຄີຍມີ ເມື່ອເຂົ້າຮ່ວມໃນໜ້າທີ່ຮັບຜິດຊອບທີ່ໄດ້ຮັບການແຕ່ງຕັ້ງແຫ່ງສະຫວັນແຕ່ລະຢ່າງນີ້. ພຣະຜູ້ຊ່ວຍໃຫ້ລອດຈະໃຫ້ທ່ານເຮັດຫຍັງຕໍ່ໄປ? ມີໜ້າ Topics and Questions ສຳລັບແຕ່ລະໜ້າທີ່ຮັບຜິດຊອບເຫລົ່ານີ້ (ເບິ່ງ “Our Role in God’s Work of Salvation and Exaltation,” ຫ້ອງສະໝຸດພຣະກິດຕິຄຸນ). ທ່ານສາມາດສຳຫລວດໜ້າເຫລົ່ານີ້ ເພື່ອຊ່ວຍທ່ານຕອບຄຳຖາມນີ້ໄດ້.

ບາງເທື່ອ ທ່ານອາດຮູ້ສຶກວ່າ ພຣະຜູ້ເປັນເຈົ້າບໍ່ສາມາດໃຊ້ທ່ານໄດ້ ຍ້ອນຄວາມຜິດພາດທີ່ທ່ານໄດ້ເຮັດ. ທ່ານຮຽນຮູ້ຫຍັງແດ່ຈາກປະສົບການຂອງໂຈເຊັບ ສະມິດ ໃນ ໂຈເຊັບ ສະມິດ—ປະຫວັດ 1:28–29? ທ່ານຈະສາມາດຮູ້ “ຖານະຂອງ [ທ່ານ] ທີ່ມີຕໍ່ [ພຣະເຈົ້າ]” ໄດ້ຢ່າງໃດ?

ຖາມຄຳຖາມທີ່ຊຸກຍູ້ການສົນທະນາທີ່ມີຄວາມໝາຍ. ຄຳຖາມທີ່ມີຫລາຍກວ່າຄຳຕອບດຽວທີ່ຖືກຕ້ອງ ເຊື້ອເຊີນຜູ້ຮຽນໃຫ້ຕອບຕາມຄວາມຄິດ, ຄວາມຮູ້ສຶກ, ແລະ ປະສົບການສ່່ວນຕົວຂອງຕົນ. ຄຳຖາມໃນໂຄງຮ່າງນີ້ຄືຕົວຢ່າງຂອງເລື່ອງນີ້.

ເບິ່ງ “Youth Responsibility in the Work of Salvation” (ວິດີໂອ), ChurchofJesusChrist.org; “ວຽກງານແຫ່ງຄວາມລອດ ແລະ ຄວາມສູງສົ່ງ,” ຄູ່ມືທົ່ວໄປ, 1.2.

ໂຈເຊັບ ສະມິດ—ປະຫວັດ 1:34-47

ໂດຍການຟື້ນຟູພຣະກິດຕິຄຸນຂອງພຣະອົງ, ພຣະຜູ້ຊ່ວຍໃຫ້ລອດໄດ້ເຮັດໃຫ້ຄຳທຳນາຍບູຮານສຳເລັດຄົບຖ້ວນ.

ເມື່ອໂມໂຣໄນໄດ້ປະກົດຕົວຕໍ່ໂຈເຊັບ, ເພິ່ນໄດ້ອ້າງອີງເຖິງຫລາຍໆຄຳທຳນາຍໃນພຣະຄຳພີເດີມ ແລະ ພຣະຄຳພີໃໝ່, ເຊັ່ນ ເອຊາຢາ 11; ກິດຈະການ 3:22–23; ແລະ ໂຢເອນ 2:28–32. ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ—1:34–47, ໃຫ້ຄິດກ່ຽວກັບວ່າ ເປັນຫຍັງຄຳທຳນາຍເຫລົ່ານີ້ຈຶ່ງສຳຄັນສຳລັບໂຈເຊັບທີ່ຈະຮູ້. ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້?

ທ່ານຍັງສາມາດອ່ານສິ່ງທີ່ ແອວເດີ ເດວິດ ເອ ແບ໊ດນາ ໄດ້ສິດສອນກ່ຽວກັບການຢ້ຽມຢາມໂຈເຊັບ ສະມິດ ຄັ້ງທຳອິດຂອງໂມໂຣໄນ ໃນ “With the Power of God in Great Glory” (Liahona, Nov. 2021, 28).

ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່

ເບິ່ງ “An Angel from on High,” Hymns, no. 13 ນຳອີກ.

ໂຈເຊັບ ສະມິດ—ປະຫວັດ 1:48–60

ພຣະເຈົ້າຈະກຽມເຮົາໃຫ້ເຮັດວຽກໃນອານາຈັກຂອງພຣະອົງ.

ໂຈເຊັບມີອາຍຸພຽງແຕ່ 17 ປີ ເທົ່ານັ້ນ ເມື່ອເພິ່ນເຫັນແຜ່ນຈາລຶກຄຳເປັນເທື່ອທຳອິດ. ເຖິງຢ່າງໃດກໍຕາມ, ມັນບໍ່ໄດ້ຖືກມອບໃຫ້ເພິ່ນດູແລ, ຈົນກວ່າສີ່ປີຕໍ່ມາ. ອ່ານ ໂຈເຊັບ ສະມິດ—ປະຫວັດ 1:48–60, ໂດຍຊອກຫາສິ່ງທີ່ໄດ້ເກີດຂຶ້ນກັບຊີວິດຂອງໂຈເຊັບໃນຊ່ວງເວລານັ້ນ. ທ່ານຄິດວ່າ ເຫດການເຫລົ່ານີ້ໄດ້ກຽມເພິ່ນສຳລັບວຽກງານທີ່ພຣະເຈົ້າໄດ້ເອີ້ນເພິ່ນໃຫ້ເຮັດແນວໃດ? ປະສົບການໃດແດ່ທີ່ທ່ານເຄີຍມີ ທີ່ໄດ້ກຽມທ່ານໃຫ້ຮັບໃຊ້ພຣະເຈົ້າ ແລະ ຄົນອື່ນ? ທ່ານກຳລັງປະສົບກັບສິ່ງໃດໃນປະຈຸບັນນີ້ ທີ່ສາມາດຊ່ວຍທ່ານໃຫ້ກຽມພ້ອມສຳລັບການຮັບໃຊ້ໃນອະນາຄົດ?

ຮູບແຕ້ມຂອງເນີນພູຄູໂມຣາ, ໃກ້ເມືອງແມນເຈດສະເຕີ, ລັດນິວຢອກ. — Hill Cumorah [ເນີນພູຄູໂມຣາ], ໂດຍ ອາລ໌ ຣາວສ໌

ຄຳສອນ ແລະ ພັນທະສັນຍາ 2

ພຣະຜູ້ເປັນເຈົ້າໄດ້ສົ່ງເອລີຢາມາ ເພື່ອຫັນຫົວໃຈຂອງເຮົາໄປຫາບັນພະບຸລຸດຂອງເຮົາ.

ຄຳວ່າ “ປູກຝັງ,” “ຫົວໃຈ,” ແລະ “ຫັນ” ຢູ່ໃນພາກນີ້ ສິດສອນຫຍັງທ່ານແດ່ກ່ຽວກັບພາລະກິດຂອງເອລີຢາ ແລະ ພອນຂອງຂໍກະແຈຂອງຖານະປະໂລຫິດ ທີ່ເພິ່ນໄດ້ຟື້ນຟູ? ທ່ານຮູ້ສຶກແນວໃດວ່າຫົວໃຈຂອງທ່ານໄດ້ຫັນໄປຫາບັນພະບຸລຸດຂອງທ່ານ? ໃຫ້ຄິດຫາວິທີທາງທີ່ທ່ານຈະສາມາດປະສົບກັບຄວາມຮູ້ສຶກເຊັ່ນນັ້ນເລື້ອຍໆ. ສະແຫວງຫາບັນພະບຸລຸດຂອງທ່ານ ແລະ ປະກອບພິທີເພື່ອເຂົາເຈົ້າໃນພຣະວິຫານ ແມ່ນວິທີໜຶ່ງ (ເບິ່ງ FamilySearch.org). ມີຫຍັງອີກແດ່ທີ່ທ່ານຄິດອອກ?

ເບິ່ງ ຄຳສອນ ແລະ ພັນທະສັນຍາ 110:13–16; Gerrit W. Gong, “Happy and Forever,” Liahona, Nov. 2022, 83–86.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ໂຈເຊັບ ສະມິດ—ປະຫວັດ 1:28–29.

ເຮົາສາມາດກັບໃຈ ແລະ ຮັບການໃຫ້ອະໄພໄດ້.

ເຮົາທຸກຄົນບາງເທື່ອກໍຮູ້ສຶກ “ຜິດເນື່ອງຈາກຄວາມອ່ອນແອ ແລະ ຄວາມບົກພ່ອງຂອງ [ເຮົາ],” ດັ່ງທີ່ໂຈເຊັບ ສະມິດ ໄດ້ຮູ້ສຶກ. ທ່ານ ແລະ ລູກໆຂອງທ່ານສາມາດສຶກສາ ໂຈເຊັບ ສະມິດ—ປະຫວັດ 1:29 ນຳກັນ, ເພື່ອຊອກຫາສິ່ງທີ່ໂຈເຊັບໄດ້ເຮັດ ເມື່ອເພິ່ນຮູ້ສຶກແນວນັ້ນ. ເຮົາສາມາດຮຽນຮູ້ຫຍັງແດ່ຈາກຕົວຢ່າງຂອງເພິ່ນ ທີ່ສາມາດຊ່ວຍເຮົາເມື່ອເຮົາເຮັດຜິດພາດ? ເປັນຫຍັງມັນຈຶ່ງສຳຄັນຕໍ່ທ່ານທີ່ຈະຮູ້ວ່າໂຈເຊັບໄດ້ຖືກເອີ້ນໂດຍພຣະເຈົ້າ ເຖິງແມ່ນວ່າ ເພິ່ນບໍ່ໄດ້ດີພ້ອມກໍຕາມ?

ໂຈເຊັບ ສະມິດ—ປະຫວັດ 1:27–54

ພຣະບິດາເທິງສະຫວັນໄດ້ເອີ້ນໂຈເຊັບ ສະມິດ ໃຫ້ຊ່ວຍພຣະອົງເຮັດວຽກງານຂອງພຣະອົງ.

ລູກໆຂອງທ່ານອາດມ່ວນຊື່ນກັບການທຳທ່າເປັນໂຈເຊັບ ສະມິດ ຂະນະທີ່ທ່ານເລົ່າເລື່ອງລາວຂອງການມາຢ້ຽມຢາມຂອງໂມໂຣໄນ ໃນ ໂຈເຊັບ ສະມິດ—ປະຫວັດ 1:27–54 ຫລື “ບົດທີ 3: ທູດໂມໂຣໄນ ແລະ ແຜ່ນຈາລຶກຄຳ” (ໃນ ເລື່ອງຄຳສອນ ແລະ ພັນທະສັນຍາ, 13–17, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ). ຍົກຕົວຢ່າງ, ພວກເຂົາສາມາດເອົາມືຄັດເອິກຄືກັບວ່າພວກເຂົາກຳລັງອະທິຖານ ຫລື ທຳທ່າປີນຂຶ້ນເນີນພູຄູໂມຣາ, ແລະ ອື່ນໆ. ແລ້ວທ່ານສາມາດຖາມພວກເຂົາກ່ຽວກັບສິ່ງທີ່ພຣະເຈົ້າໄດ້ເອີ້ນໃຫ້ໂຈເຊັບ ສະມິດ ເຮັດ ແລະ ວ່າເຮົາໄດ້ຮັບພອນແນວໃດເປັນຜົນທີ່ຕາມມາ. ຍົກຕົວຢ່າງ, ເຮົາໄດ້ຮັບພອນຢ່າງໃດຍ້ອນໂຈເຊັບ ສະມິດ ໄດ້ແປພຣະຄຳພີມໍມອນ. ວຽກງານຂອງເພິ່ນໄດ້ຊ່ວຍເຮົາໃຫ້ເຂົ້າໃກ້ພຣະບິດາເທິງສະຫວັນ ແລະ ພຣະເຢຊູຄຣິດ ຫລາຍຂຶ້ນແນວໃດ?

2:29
The Angel Moroni Visits Joseph Smith: Learning about a sacred book

ຄຳສອນ ແລະ ພັນທະສັນຍາ 2

ພຣະບິດາເທິງສະຫວັນຕ້ອງການໃຫ້ຄອບຄົວຜະນຶກເຂົ້າກັນໃນພຣະວິຫານ.

ບາງທີ ທ່ານ ແລະ ລູກໆຂອງທ່ານອາດມ່ວນຊື່ນກັບການເບິ່ງຮູບຂອງຄອບຄົວຂອງທ່ານ, ຊຶ່ງອາດລວມທັງຮູບຂອງຄອບຄົວຂອງທ່ານຢູ່ພຣະວິຫານ (ຫລື ເບິ່ງ ປຶ້ມຮູບພຣະກິດຕິຄຸນ, ເລກທີ 120). ແລ້ວທ່ານສາມາດອ່ານ ຄຳສອນ ແລະ ພັນທະສັນຍາ 2 ແລະ ແບ່ງປັນຄວາມຄິດຂອງພວກທ່ານນຳກັນກ່ຽວກັບວ່າ ເປັນຫຍັງເຮົາຈຶ່ງມີພຣະວິຫານ ແລະ ເປັນຫຍັງພຣະບິດາເທິງສະຫວັນຕ້ອງການໃຫ້ຄອບຄົວຢູ່ນຳກັນຕະຫລອດໄປ. ໃຫ້ຄິດທີ່ຈະຮ້ອງເພງ “Families Can Be Together Forever” ນຳກັນ (Children’s Songbook, 188). ເພງນີ້ເວົ້າວ່າ ເຮົາສາມາດເຮັດຫຍັງໄດ້ ເພື່ອທີ່ຈະຢູ່ກັບຄອບຄົວຂອງເຮົາຕະຫລອດໄປ?

Young Couple Going to the Temple, English

ຄຳສອນ ແລະ ພັນທະສັນຍາ 2

ຮຽນຮູ້ກ່ຽວກັບບັນພະບຸລຸດຂອງເຮົາ ສາມາດນຳຄວາມຊື່ນຊົມມາໃຫ້ເຮົາ.

ເດັກນ້ອຍສາມາດຮູ້ສຶກຕື່ນເຕັ້ນ ແລະ ຊື່ນຊົມກ່ຽວກັບປະຫວັດຄອບຄົວ. ເພື່ອຊ່ວຍພວກເຂົາ, ທ່ານສາມາດແບ່ງປັນເລື່ອງລາວ ຫລື ຮູບຂອງບັນພະບຸລຸດຂອງທ່ານ. ເວົ້າລົມກັບລູກໆຂອງທ່ານກ່ຽວກັບວ່າ ຊີວິດເປັນແນວໃດສຳລັບບັນພະບຸລຸດຂອງທ່ານ ເມື່ອຕອນເຂົາເຈົ້າຍັງເປັນເດັກນ້ອຍ? ລູກໆຂອງທ່ານຍັງສາມາດມ່ວນຊື່ນກັບກິດຈະກຳປະຫວັດຄອບຄົວບາງຢ່າງໃນ FamilySearch.org/discovery ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ທູດໂມໂຣໄນກຳລັງສະແດງບ່ອນທີ່ແຜ່ນຈາລຶກຄຳໄດ້ຖືກເຊື່ອງໄວ້ ໃຫ້ໂຈເຊັບ ສະມິດ ເບິ່ງ — Joseph Receives the Plates [ໂຈເຊັບຮັບແຜ່ນຈາລຶກ], ໂດຍ ແກຣີ ອີ ສະມິດ