“30 diciembre–5 enero: “Li k’ojob’ank wi’chik naxik chi uub’ej”: Lix K’ojob’ankil Wi’chik lix Tz’aqalil lix Evangelio li Jesukristot,” Kim, Taaqehin—Choq’ re li ochoch ut li iglees: Li Tzolʼlebʼ ut Sumwank 2025 (2025)
“Lix K’ojob’ankil Wi’chik lix Tz’aqalil lix Evangelio li Jesukristo,” Kim, Taaqehin—Choq’ re li ochoch ut li iglees:: 2025
30 diciembre–5 enero: “Li k’ojob’ank wi’chik naxik chi uub’ej”
Lix K’ojob’ankil Wi’chik lix Tz’aqalil lix Evangelio li Jesukristo
Chan ru naninq’ehiman ru wiib’ cient chihab’ xk’ulb’al jun na’leb’ li kixjal li ruchich’och’? A’an li patz’om li ke’xtz’il rix li Xb’eenil Awa’b’ejil ut lix Molameb’ li Kab’laju chi Apostol naq yoo chaq chi nach’ok li po abril re 2020, naq kixket wiib’ cient chihab’ chalen chaq li Xb’een K’utb’esink li kiril laj Jose Smith. “Xqak’oxla ma us raj xxaqab’ankil jun nimla eetalil,” chan li Awa’b’ej Russell M. Nelson. “A’b’an sa’ xk’oxlankil xnimal ru li xb’een k’utb’esink sa’ li resilal li Iglees ut sa’ chixjunil li ruchich’och’, xoomusiq’aak chixyiib’ankil jun eetalil moko rik’in ta pek, rik’in b’an aatin … , tz’iib’anb’il moko chiru ta perpookil pek, chiru b’an “tib’elej,” sa’ li qach’ool [2 Korintios 3:3]” (“Chawabʼi aʼan,” Jolomil ch’utub’aj-ib’ re abril 2020).
Li nimla eetalil ke’xyiib’ rik’in aatin nanawman ru jo’ “Lix K’ojob’ankil Wi’chik lix Tz’aqalil lix Evangelio li Jesukristo: Jun jek’inb’il aatin re wiib’ cient chihab’ choq’ re li ruchich’och’.” A’an jun nimla eetalil moko ka’ajwi’ ta chirix li Xb’een K’utb’esink chirix b’an ajwi’ chixjunil li naxb’aanu—ut li toj yoo chixb’aanunkil—li Kristo chalen chaq a’an. Lix k’ojob’ankil wi’chik li evangelio kitikla naq jun li kristiaan kixsik’ li Dios ut kirab’i a’an. Toj jo’kan nak’ulman anajwan: jun aamej, jun loq’laj numsihom—jo’ ajwi’ laa we laa’at.
Li na’leb’ re tzolok sa’ li ochoch ut sa’ li iglees
“Li Dios naxraheb’ li ralal xk’ajol sa’ chixjunileb’ li tenamit re li ruchich’och’.”
Jo’ laa k’a’uxl laa’at, k’a’ut naq jun jek’inb’il aatin chirix li k’ojob’ank wi’chik xtikla rik’in jun na’leb’ chirix lix rahom li Dios? Naq taatzol li jek’inb’il aatin, sik’ chan ru nak’utun lix rahom li Dios choq’ reheb’ “li ralal xk’ajol sa’ chixjunileb’ li tenamit re li ruchich’och’.” Chan ru naq lix k’ojob’ankil wi’chik li evangelio nakatxtenq’a chireek’ankil lix rahom a’an?
Chi’ilmanq ajwi’ Gerrit W. Gong, “Chixjunileb’ li tenamit, junkab’al, ut aatinob’aal,” Jolomil ch’utub’aj-ib’ re octubre 2020.
Li k’ojob’ank wi’chik kitikla jo’ xsumenkil jun patz’om.
Naru nayeeman naq li Kolonel kixtikib’ xk’ojob’ankil wi’chik lix evangelio rik’in xsumenkil jun patz’om. K’a’ru li na’leb’ wan sa’ li jek’inb’il aatin chirix lix k’ojob’ankil wi’chik li evangelio choq’ re junaq kristiaan li wan xpatz’om chirix li Dios, li evangelio, malaj “li xkolb’al li raam”? Naru ajwi’ nakatzol Jose Smith—Resilal 1:5–20 re rilb’al k’a’ru naru nakatzol rik’in laj Jose Smith chirix xtawb’al xsumenkileb’ li patz’om chirix li evangelio.
Chi’ilmanq ajwi’ Temas y preguntas, “Buscar respuestas,” Biblioteca del Evangelio.
Jalam-uuch re Li rajom inch’ool, xb’aan laj Walter Rane
Li Jesukristo xk’ojob’ wi’chik lix Iglees.
K’a’ru nakanaw chirix lix “Iglees li Kristo re li Ak’ Chaq’rab’,” li kixk’ojob’ wi’chik li Kristo rik’in xtenq’ laj Jose Smith? Naru nakatzoleb’ li raqal a’in sa’ li loq’laj hu ut taatz’iib’aheb’ junjunq na’leb’ chirix lix Iglees a’an:
-
Mateo 16:15–19
-
Markos 16:15–18
-
Lukas 6:12–13
-
Hechos 4:34–35
-
1 Korintios 15:29
-
Efesios 4:11–15
Chirix a’an, naru nakajunaji xtzolb’aleb’ li raqal ak xe’yeeman rik’ineb’ chik a’in, li neke’xch’olob’ chan ru naq li Jesukristo kixk’ojob’ lix Iglees rik’in xtenq’ laj Jose Smith:
K’a’ut naq nakatb’antioxin chirix lix k’ojob’ankil wi’chik lix evangelio li Jesukristo?
Li Elder Jeffrey R. Holland ut li rixaqil ke’xyal jun sut xk’oxlankil k’a’ raj ru ke’reek’a wi’ ke’wan raj chaq rub’elaj naq kik’ojob’aman wi’chik li Iglees. “K’a’ru li na’leb’ toj naqasik’?” ke’xpatz’ rib’. Il lix na’leb’eb’ sa’ “Tz’aqal xlemtz’unkil li yo’onink” (Jolomil ch’utub’aj-ib’ re abril 2020). Chan ru naq li k’ojob’ank wi’chik nakatxtenq’a chixtawb’al li musiq’ejil nakawaj?
Chi’ilmanq ajwi’ Temas y preguntas, “Apostasía,” Biblioteca del Evangelio.
“Li k’ojob’ank wi’chik yeechi’inb’il yoo chi xik chi uub’ej.”
Ma aak’oxlahom jun sutaq naq laa’at xcha’al lix k’ojob’ankil wi’chik li evangelio? K’oxlan chirixeb’ li aatin a’in kixwotz li Awa’b’ej Dieter F. Uchtdorf: “Wan naq naqil lix k’ojob’ankil wi’chik li evangelio jo’ k’a’ruhaq ak xtz’aqlok ru. … Relik chi yaal, li k’ojob’ank wi’chik a’an jun k’anjel nab’aanuman rajlal li yoo chi nimank; ut yooko chirilb’al anajwan” (“Ma yookex chi wark sa’ li k’ojob’ank wi’chik?,” Jolomil ch’utub’aj-ib’ re abril 2014).
Naq taakawresi aawib’ re xtzolb’al chan ru naq kik’ojob’aman wi’chik li evangelio sa’ li kutankil 1800, naru nakatikib’ rik’in xtz’ilb’al rix chan ru naq xk’ojob’aman wi’chik a’an sa’ laa yu’am. Il li jek’inb’il aatin chirix lix k’ojob’ankil wi’chik li evangelio rik’ineb’ patz’om jo’ a’in sa’ laa k’a’uxl: Chan ru naq ninnaw naq yaal a’in? Chan ru nikintz’aqon anajwan sa’ li k’ojob’ank wi’chik?
“Teeto li choxa.”
Kʼaʼru naraj naxye “teeto li choxa” choq’ aawe? K’a’ru li eetalil nakawil laa’at—sa’ li jek’inb’il aatin chirix lix k’ojob’ankil wi’chik li evangelio, sa’ li Iglees anajwan, sa’eb’ li loq’laj hu, ut sa’ laa yu’am— chirix naq teeto li choxa?
Naru ajwi’ nakawoksi “Xnumeʼ qʼojyin, kutan nachal” (Eb’ li B’ich, 1) jo’ xcha’al li nakatzol. K’a’ru nakataw sa’ li b’ich a’an li nakatxtenq’a chixtawb’al ru li ch’ol aatin “teeto li choxa”?
Chi’ilmanq ajwi’ Quentin L. Cook “Li osob’tesiik xb’aan li na’leb’ li neke’xk’ul li profeet, ut li na’leb’ li naqak’ul laa’o re xb’eresinkil qayu’am,” Jolomil ch’utub’aj-ib’ re abril 2020.
Tzolok sa’ komonil. Li Awa’b’ej Nelson kooxb’oq “chixtzolb’al li [jek’inb’il aatin chirix lix k’ojob’ankil wi’chik li evangelio] qajunes ut rik’in li qajunkab’al ut eb’ li qamiiw” (“Chawab’i a’an”). K’oxla chan ru naru nakak’eheb’ chi tz’aqonk jalan chik kristiaan naq nakattzolok.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
“Naqach’olob’ rik’in tiik ruhil aatin.”
-
Naq yooqat chirilb’al xcha’al li jek’inb’il aatin chirix lix k’ojob’ankil wi’chik li evangelio rik’ineb’ laa kok’al (malaj li video na’aatinak wi’ li Awa’b’ej Nelson), tenq’aheb’ chixtawb’aleb’ li ch’ol aatin neke’tikla rik’in “naqach’olob’,” malaj “naqach’olob’ xyaalal.” K’a’ruheb’ li yaal yookeb’ chixch’olob’ankil li profeet ut eb’ li apostol? Laa’at ut eb’ laa kok’al naru nekewotz lix nawom eech’ool chirix junjunq reheb’ li yaal a’an.
6:0The Restoration of the Fulness of the Gospel of Jesus Christ
“Laj Jose Smith … kiwan xpatz’om.”
-
Naru nawulak chiruheb’ laa kok’al xnawb’al junjunq reheb’ lix patz’om laj Jose Smith li kik’amok re a’an sa’ lix k’ojob’ankil wi’chik lix evangelio li Jesukristo. Tenq’aheb’ chixtawb’aleb’ a’an sa’ Jose Smith—Resilal 1:10, 29, 68. Chan ru noko’osob’tesiik anajwan xb’aan naq li Dios kixsume lix patz’om laj Jose?
-
Naru ajwi’ nakak’e xhoonaleb’ laa kok’al re naq te’aatinaq chirix lix patz’omeb’ a’an. K’a’ru naqatzol rik’in laj Jose Smith chirix xtawb’aleb’ qasumenkil? (chi’ilmanq Jose Smith—Resilal 1:8–17; che’ilmanq ajwi’ li ch’ol aatin 3 ut 4 sa’ “Li Walal raaro inbʼaan,” B’ichleb’aal choq’ reheb’ li kok’al, 140).
“Eb’ li choxahil aj k’amol esil ke’chal re xk’eeb’al xna’leb’ laj Jose.”
-
Aniheb’ laj “k’amol esil ke’chal re xk’eeb’al xna’leb’ laj Jose”? Eb’ laa kok’al maare taawulaq chiruheb’ xsik’b’al xjalam-uucheb’ a’an sa’ li Hu reheb’ li Jalam-uuch re li Evangelio (che’ilmanq 91, 93, 94, 95). Chan ru naq kitenq’an li junjunq aj k’amol esil “re xxaqab’ankil wi’chik lix Iglees li Jesukristo”? Eb’ li raqal sa’ li loq’laj hu sa’ li perel re kok’ k’anjel re li xamaan a’in naru naxtenq’aheb’ laa kok’al chixsumenkil li patz’om a’an.
Li Jesukristo xk’ojob’ wi’chik lix Iglees.
-
Chan ru naru nakatenq’aheb’ laa kok’al chixtawb’al ru k’a’ru naraj naxye naq lix Iglees li Kolonel k’ojob’anb’il wi’chik? Maare naru neke’xyiib’ junaq najt xteramil kab’l rik’in kok’ kaaxukuut malaj sek’ ut “te’xk’ojob’ wi’chik,” malaj te’xyiib’ wi’chik. Malaj, wi eb’ laa kok’al tento xe’xsutq’isi junaq k’a’aq re ru xb’aan naq kisach malaj kipo’e’, naru neke’xjuntaq’eeta li na’leb’ a’an rik’in li Kolonel naq kixk’ojob’ wi’chik lix Iglees. Tenq’aheb’ chixtawb’aleb’ sa’ li jek’inb’il aatin chirix lix k’ojob’ankil wi’chik li evangelio k’a’ru li kixk’ojob’ wi’chik li Kolonel.
“Teeto li choxa.”
-
Re xk’utb’esinkil k’a’ru naraj naxye “teeto li choxa,” naru nakawotz junaq na’leb’ rik’ineb’ laa kok’al, xb’een wa chirix chaq jun okeb’aal ut chirix a’an chiru jun okeb’aal teeto. K’eheb’ xhoonal re naq te’xwotz ajwi’ junaq na’leb’. K’a’ru li na’leb’ naxk’e li Jesukristo choq’ qe? K’a’ru qak’ulum li nokoxtenq’a chixnawb’al naq teeto li choxa choq’ qe?
Re xtawb’al xkomon chik li na’leb’, chi’ilmanq li hu Amigos re li po a’in.