Ngenyi bua Kulengeja Dilonga ku Nzubu ne ku Ekelezia

Mifundu idi dîyi dia Nzambi, nanku umulomba diambuluisha bua kuyumvua.

Malu onsu adi ajadika bua Yezu Kilisto (tangila 2 Nefi 11:4; Mose 6:63), nanku ela meji bua kufunda ne kutentekela tunungu tudi tujadika bua Mupandishi, lepesha dinanga dia dilonga buenda, ne bua kulonga mushindu wa kumulonda. Misangu mikuabu malelela pa Mupandishi ne lumu luimpa mmaleja buludi, ne imua misangu mmabueja mu tshilejilu anyi mu muyuki. Udikonka, “Malelela kayi a tshiendelela adi malongesha mu tunungu etu? Malelela â adi andongesha tshinyi pa Mupandishi?”

Teya ntema ku ngenyi ne ngumvuilu bieba, nansha yoyi kayiyi ne dipetangana ne biudi ubala. Ngumvuilu eyi idi mua kuikala tshidi Tatu wa mu Diûlu musua bua ulonga.

Kudi mishindu ya bungi ya kuandika ngumvuilu idi ikuluila pawudi ulonga. Tshilejilu, udi mua kupeta miaku anyi biambilu kampanda mu mifundu bikala bikusankisha, udi mua kutentekela ne kuandika ngenyi yeba bienza bu kafundu mu mifundu yeba. Udi mua kuikala ne kakanda keba ka ngenyi, ngumvu ne ngumvuilu biudi upeta.

Diyukilangana pa ngenyi ya dilonga dia nkaya tshidi mushindu muimpa bua kulongesha bakuabu, ne tshidi kabidi tshiambuluisha bua kukankamika lumvu lua binuvua babala. Abanyangana tshiudi mulonga ne bidimba bia dîku ne balunda (pamua kubuntu anyi mu butatanda), ne babikila bua benza bia momumua.

Ela meji ku mushindu udi miyuki ne malonga audi ubala bienzeka mu moyo weba. Tshilejilu udi mua kudikonka ne, “Malu kayi adi mangenzekela adi mafuanangana ne andi mbala?”

Pawudi ulonga mifundu, nkonku idi mua kulua ku meji. Nkonku eyi idi mua kupetangana ne biudi ubala anyi nsombelu weba mu kabujima. Nana meji pa nkonku eyi ne keba mandamuna pawudi utungunuka ne kulonga mifundu.

Bua kupeta ngenyi ya nsakidilu ku tunungu tuwudi ubala, enzela tufundu tudi kuinshi kua dibeji Topical Guide, the Bible Dictionary, Buludiki bua mu Mifundu, ne mambuluisha makuabu a dilonga.

Udi mua kupeta ngenyi mimpa pa bitupa bia mifundu wewa muela meji pa muenenu yayi, biangata bikondu ne miaba idiyi ifumina. Tshilejilu, dimanya dia malu a kala ne mitabuija a bantu bavua Nzambi muakula nabu bidi mua kukuambuluisha bua kumvua bimpa ngumvuilu wa mêyi enda. Udi mua kulonga pa bobu mu Saints, Revelations in Context, tshifulu tshia tshitupa mu Dilongesha ne Bipungidi ne biambuluishi bikuabu.

Bala tshidi bambi ne bapostolo ba matuku a ndekelu balongesha pa nshindamenu iwudi upeta mu mifundu.

Dilonga dia mifundu kadiena amu ditupesha meji kadi didi kabidi ditulombola bua kushintulula nsombelu wetu. Teleja tshidi Nyuma ukusaka bua kuenza pawudi ubala, ne pashisha teka mu tshienzedi biudi mumvua.

Misambu mifila ne misambu ya bana idi isanganyibua munda mua Luaku, Undonde. Enzela musambu wa tshijila bua kubikila Nyuma ne kulepesha ditabuija ne bujadiki bieba bia bulelela bua lumu luimpa.

Sungula tshitupa tshia mufundu tshidi ne mushinga kuwudi, kudi dîku dieba, anyi kudi kalasa keba ne ukuata ku moyo ku diwambulula dituku dionsu ne ku dinaya dia dikuata ku moyo.

Peta bintu bidi bikumbanangana ku shapita ne kanungu biwudi ubala. Ela meji pa mushindu udi tshintu tshionsu tshipetangana ku dilongesha mu mifundu.

Bala tunungu tukesa, ne pashisha zola tshintu kampanda tshidi tshipetangana ne tshiudi ubala. Anyi udi mua kukeba bimfuanyi mu Gospel Art Book [Mukanda wa Bimfuanyi bia Lumu Luimpa] anyi muaba mukuabu mu Tshisangi tshia Lumu Luimpa. Udi kabidi mua kuangata tshimfuanyi tshidi tshileja tshiuvua ulonga.

Panyima pa dibala muyuki, bikila dîku dieba anyi bidimba bia kalasa bua bawenzela. Pashisha, akula pa mushindu udi muyuki ewu upetangana ne bintu bitudi bamanya.

Pawudi ne bidimba bia dîku bidi kabiyi bitaba bua kubuela mu dilonga dia mifundu mu dîku, keba mushindu wa kudituangaja nabu. Tshilejilu, udi mua kuabanyangana nabu malelela a tshiendelela mu buimpa mu miyuki yeba anyi kuabanyangana mufundu udi ne mushinga mu mushindu wa ne kabiyi bimueneka ne udi uyisha anyi wenzeja? Dilonga dia mifundu kadiena mua kuikala mushindu wa momumua mu mêku onsu. Bana bakuabu badi mua kulonga bimpa mifundu umua ne umua nkayabu. Ikala musambidi ne londa disaka dia Nyuma.