“Kabonganaakin Nakomai, Iriirai—Ibukin te Mweenga ao te Taromauri,,“ Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
“Kabonganaakin Nakomai, Iriirai,” Nakomai, Iriirai—Ibukin te Mweenga ao te Taromauri: 2025
Kabonganaakin Nakomai, Iriirai—Ibukin te Mweenga ao te Taromauri
Antai ae E Katauaki Ibukin te Boki Aei?
Te boki ni ibuobuoki aei bon ibukiia ake a tangiria ni kamatebwaia Reirei ao Berita aika Tabu—n tatabemaniia, n te utu, ao i nanon kiraati n te Taromauri. Ngkana ko tuai ni kamatebwaia koroboki aika tabu n taai aika a nako, e kona ni buokiko te boki n ibuobuoki aei ni waakina am kamatebwai. Ngkana ko a kaman karekea te anua ae tamaroa ni kamatebwaian koroboki aika tabu, e kona te boki n ibuobuoki aei ni buokiko ni karekei am atatai aika a na rangi ni uaana riki.
Aomata n Tatabemaniia ao Utu n te Mweenga
Te tabo ae nakoraoi ibukin reiakinan te euangkerio bon n te mweenga. A kona am tia reirei n te taromauri ni boutokaiko, ao ni kona ni karekea te kaungaaki mairouia kaain te uoote ake tabeman. Ma ni kamaiuaki n te maiu n tamnei, ngaira n tatabemaniira ti kainanoa kamwarakeara man ana “taeka te Atua ae raoiroi” (Moronaai 6:4, taraa naba Russell M. Nelson, “Taeka ni Kaukuki,” Riaona, Nobembwa 2018, 6–8).
Kabongana te boki n ibuobuoki aei ni kawai aika a na ibuobuoki nakoim. Ni kabwarabwaraana a katerei tabeua koaua aika akea tokiia ake a kuneaki n Reirei ao Berita aika Tabu. A anga naba iango ao waaki ni kakukurei ni buokiko ni kamatebwai ni koroboki aika tabu ibon iroum, ma kaain am utu, ke ma raraom. Ngkana ko kamatebwai, ira ana kairi te Tamnei ni ukori koaua aika akea tokiia aika a uaana nakoim. Tarai ana rongorongo te Atua ibukim, ao irii taian kairi mairoun te tamnei aika ko karekei.
Taan Reirei ao Taan Reiakinaki n te Taromauri
Ngkana ko reireiniia kaain te Moanrinan, kairake ke te kiraati n te Reirei n Tabati ibukiia ikawai, te kooram n te Nakoanibonga ae te Aaron, ke aia kiraati Ataeinnaine, ko kaungaaki bwa ko na kabonganai kabwarabwara ake a kaotaki n te boki aei n am tai ni katauraoi n anga reirei. Nakomai, Iriirai—Ibukin te Mweenga ao te Taromauri bon te karikiram ibukin am kiraati n te Taromauri. Iango ibukin reirei n te bwai n reirei aei a karaoaki ibukin te kamatebwai n te mweenga ao te taromauri. N am tai ni katauraoi n anga reirei, moanna man karekean oin am taneiai man koroboki aika tabu. Te kabanea ni kakawaki ni katauraoakim e na roko ngkana ko ukeuke inanon koroboki aika tabu ao ni karekea ana kairi te Tamnei ae Raoiroi. Ko kona naba ni kamatebwai ma ataakin kainanoia aomata ake ko reireiniia. Kakaei koaua ake akea tokiia. Nakomai, Iriirai e kona ni buokiko n atai tabeua koaua aikai ao n reiakinna bwa a kanga koroboki aika tabu ni kona ni kamwakuraki inanon maium.
Katikua n am iango bwa reiakinan te euangkerio, nakon te kabanea n tamaroa, e boboto iaon te mweenga ao ni boutokaaki n te Taromauri. N taekana teuana, tabem ni koaua bon boutokakiia aomata aika ko reirieniia n aia tai ni kekeiaki ao ni maiuakina te euangkerio ni mweengaia. Tai raraomaeakina karekean reirei aika onoti inanon te boki ae ko na katauraoia ibukiia n te kiraati. Ma, anganiia aia tai n tibwauai aia taneiai, aia iango, ao aia titiraki iaon reirei man booki aika tabu ake a wareki ni mweengaia. Kaoiia bwa a na tibwauai koaua aika akea tokiia aika a tia ni kunei. E rangi ni kakawaki riki aei nakon karaoan bwaai n reirei riki tabeua.
Aia Kiraati Kairake ao te Reirei n Tabati ibukiia Ikawai
Teuana oin bukin ae ti ikotaki n te kiraati n te Reirei n Tabati bwa ti na boutokaira ao ni kaungaira n te tatabemaniira nako ngkai ti kekeiaki ni kinaa ao n ira Iesu Kristo. Te kawai ae bebete ni karaoan aei bon tabekan te titiraki n aron “Tera ae e a tia n reireiniko te Tamnei ae Raoiroi n te wiiki aei ngkai ko kamatebwai ni koroboki aika tabu ma Nakomai, Iriirai?” Kaeka nakon te titiraki aei e kona ni kairiko nakon marooro aika uaana ae e na karekea te onimaki iroun Iesu Kristo ao Ana euangkerio.
Imwiina ko kona ni kaoiia bwa a na marooro ni kaineti ma ake a kaotaki bwa iango ni marooro inanon Nakomai, Iriiria. Te katooto, te iango ni kamatebwai e kona n taekinaki bwa ukoran Reirei ao Berita aika Tabu 19:15–20, ni kakaea bwa e kanga te Tia Kamaiu ni kabwarabwara korakaina. Tao ko na tuangiia kaain te kiraati bwa a na tibwaia bwa tera aia namakin ngkai a wareka are e anga n Ana kabwarabwa ao ni marooro bwa e kanga te waaki aei n rotii aron aia iango iaon Iesu. Ke ko kona n anaa teutana te tai n uaia ni kamatebwai kiibu aikai n te kiraati.
Te Kooram n te Nakoanibonga ae te Aaron ao aia Kiraati Ataeinnaine
Ngkana a bootaki kaain te kooram n te Nakoanibonga ae te Aaron ao aia kiraati Ataeinnaine ni katoa Tabati, n tabetai ao e kaokoro bukin karaoakiia ma te kiraati n te Reirei n Tabati. Irarikin ara ibuobuoki i marenara n reiakina ana euangkerio Iesu Kristo, a bootaki naba kurubu aikai n reirei iaon taekan kakoroan nanon te mwakuri ni kamaiu ao te karietataaki (taraa Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 1.2), ngkai a kairaki mairouia aia kiraati ke kooram beretitentii.
Ibukin aei, ao a riai bootakin te kooram ke te kiraati ni kairaki iroun temanna kaain te kooram ke te beretitentii n te kiraati ni kaira te marooro iaon aia kekeiaki. Te katooto, a kona n uaia ni marooro i aon aia kekeiaki ni maiuakina te euangkerio, ibuobuoki nakoia kainnano, tibwaa te euangkerio, ke n irii mwakuri n te tembora ao n rongorongon te utu.
I mwiin te bootaki n reirei aei, e na kaira te kiraati te tia reirei ke te kooram ni bootaki n reiakina te euangkerio. Taan kairiiri aika ikawai ke kaain te kiraati ke te kooram a kona n anganaki aia tai n anga reirei. Te beretitentii n te kiraati ke te kooram, n reitakina ma taan kairiiri aika ikawai, a karaoi mwioko aikai.
Aomata ake a mwiokoaki bwa a na anga reirei a riai ni katauraoia man kabonganakin bwaai n anga reirei inanon te kamataata n te wiiki n Nakomai, Iriirai. Inanon taian kabwarabwara nako, te kanikina aei e kaotii waaki ni kakukurei aika a bon kaineti nakoia kairake ao ni kainetiia ma are a reiakinna n te tieminari. E ngae n anne, iango riki tabeua iaon te kamataata a kona ni kabonganaki bwa bwaai ni kamatebwai ibukiia kairake.
Ibukin te katooto n te akenta ibukin bootaki n te kooram ao te kiraati, taraa abentekiti D.
Moanrinan
Am katauraoi n reireiniia kaain te Moanrinan e moanaki ngkai ko kamatebwai booki aika tabu bon iroum ao ma am utu. Ngkai ko karaoia, tauraoi nakon namakin n tamnei ao nonori mairoun te Tamnei ae Raoiroi i aoia ataei n am kiraati n te Moanrinan. Bwaina te Tataromwaaka. E kona te Tamnei ni kairiko ma iango ni buokiia n reiakina ana euangkerio Iesu Kristo.
N am tai ni katauraoi n anga reirei, ko na bae ni karekea te iango ae raka riki kairam mairoun te tamnei man rinanoan waaki n anga reirei n te bwai n ibuobuoki aei. Kamataata n tatabeua nako inanon Nakomai, Iriirai—Ibukin te Mweenga ao te Taromauri iai inanona te tiekition ae atunaki “Iango ibukin Reiakinaia Ataei.” Iangoi iango aikai bwa iango aika a na kona ni buokiko ni moana namakinan te kairi mai ieta. Ko kinaia ataein am kiraati n am Moanrinan—ao ko na kinaia riki ngkana ko reitaki ma ngaiia n te kiraati. Te Atua e kinaiia naba, ao E na anganiko kawai aika tamaroa ibukin reiakinaia ao ni kakabwaiaia.
Tao a na kaman tia ataei n am kiraati ni karaoi tabeua waaki ni kakukurei i nanon Nakomai, Iriirai ma aia utu. E Tamaroa Anne. E tamaroa kaokiokan bwaai. Iangoia ni kaoiia ataei n tibwaia i marenaia te bwai ae a reiakinna ni mweengaia. Ko riai naba ni bairei kawai ibukiia ataei bwa a na tibwatibwa e ngae ngke aki reiakinna ni mweengaia. Ataei a reiakinii riki koaua n te euangkerio ngkana a kaokiokaki koaua aikai rinanon waaki ni kakukurei aika a kakaokoro. Ngkana ko nooria bwa te mwakuri ni kauring e raoiroi ibukiia ataei, iangoia bwa ko na kaokiokia, riki ngkana ko reireiniia ataei aika a uarereke riki.
N namwakaina ake nimaua Tabati i nanona, a kaungaaki taan reirei bwa a na onea te reirei n Nakomai, Iriirai are e kaotaki n te kanimaua n Tabati ma teuana ke e mwaiti riki man waaki n angareirei i nanon “Abentekiti B: Ibukin te Moanrinan—Katauraoaia Ataei nakon Maiuakinan ana Kawai ni Berita te Atua