Nsakyeree Nye hɛn Botae

Asɛmpa no nsuae na nkyerɛkyerɛ nyina no botae nye dɛ ɔbɛma hɛn nsakyeree no mu adɔ, na ɔaboa hɛn ma yɛabɛyɛ tse dɛ Jesus Christ yie. Ɔnam siantsir yi ntsi, sɛ yerusũa asɛmpa no a, nnyɛ asɛm fofor bi ara na yɛrohwehwɛ, yɛpɛ dɛ yɛbɛyɛ “abɔdze fofor” (2 Corinthfo 5:17). Iyi kyerɛ dɛ yɛrotwer Ɔsor Egya na Jesus Christ ma Wɔaboa hɛn ma yɛasesã hɛn akoma, mbrɛ yesi hu adze, hɛn ndzeyɛɛ, na hɛn su ankasa.

Mbom asɛmpa adzesũa no a ɔtse dɛm a ɔhyɛ hɛn gyedzi dzen na ɔdze nsakyer anwanwadze ba no, nnsi prɛko pɛr. Ɔtserɛw fi adzesũa dan mu dze hɛn ankorankor no n’akoma mu na fie mu. Ohia daa daa nwɔwdo, mbɔdzembɔ dze atse asɛmpa no ase na yɛdze abɔ bra. Nsakyeree nokwar mu no hia Sunsum Krɔnkrɔn no ne nhyɛdo.

Sunsum Krɔnkrɔn no ma hɛn kwankyerɛ kɔ nokwar no ho na Ɔgye dɛm nokwar no ho dase (hwɛ John 16:13). Ɔma hɛn adwen mu yɛ kan, Okenyan hɛn ntseasee, na Ɔdze nyikyerɛ a ofi Nyankopɔn, nokwar nyina farbaa no, hɔ no kã hɛn akoma. Sunsum Krɔnkrɔn no tsew hɛn akoma mu. Okenyan pɛ wɔ hɛn mu dɛ yɛbɔbɔ bra dɛ mbrɛ nokwar no tse, na Ɔwasa kyerɛ hɛn kwan a yɛbɛfa do ayɛ no. Nokwar ara “Sunsum Krɔnkrɔn no … bɛkyerɛkyerɛ [hɛn] ndzɛmba nyina” (John 14:26).

Ɔnam siantsir yinom ntsi, hɛn mbɔdzembɔ dɛ yɛdze asɛmpa no bɔbɔ bra, yebosũa, na yɛakyerɛkyerɛ no, ɔsɛ dɛ yedzi kan na tsitsir ara , yɛhwehwɛ Sunsum no n’anyɛnkoyɛ. Dɛm botae yi wɔ dɛ odzi hɛn nsanmuyi horow do na ɔma hɛn adwendwen na hɛn ndzeyɛɛ ho kwankyerɛ. Adze biara a ɔma Sunsum ne nhyɛdo no ba na ɔsɛ dɛ yɛhwehwɛ na yɛpow adze biara a ɔpam dɛm nhyɛdo no fi hɔ—osiandɛ yenyim dɛ sɛ yebotum afata dɛ Sunsum Krɔnkrɔn no nye hɛn bɛtsena a, yebotum so afata dɛ yɛbɛtsena Ɔsor Egya na Ne Ba, Jesus Christ hɔn enyim.