Amas 30–31

Nyob hauv Amas 30, lawv hu Khaulihos ua ib tug neeg “Tawm Tsam Khetos” (nqe 6). Ib tug neeg uas tawm tsam Khetos yog ib tug neeg uas ua ntsiag to los sis zais lawv tej kev tawm tsam Yexus Khetos thiab Nws txoj moo zoo. Tej nqe twg nyob hauv Amas 30:6–31 qhia tias Khaulihos yog ib tug neeg zoo li no? Kawm txog Khaulihos tej lus qhia cuav yuav pab koj paub thiab xyeej tej lus qhia uas zoo ib yam. Tej zaum tej yam ntxim saib ntxim ua yuav pab koj txoj kev kawm vaj lug kub:

• Koj xav txog zaj lus qhia twg uas yuav pab koj to taub zoo dua seb tus Cawm Seej tej lus qhia thiab Dab Ntxwg Nyoog tej lus qhia cuav sib txawv li cas? Ib cov piv txwv yog ib qhov ntxias thaum nuv ntses, nyiaj cuav, thiab tej tshaj tawm cuav. Koj yuav ua li cas kom paub seb ib yam dab tsi cuav los sis tsis cuav? Koj yuav ua li cas kom paub qhov tseeb?

• Xav seb koj puas sau ntawv txog tej lus qhuab qhia cuav uas Khaulihos qhia nyob hauv Amas 30:6–31. Nws tej lus qhia twg yog tej uas ntxim nyiam hnub no? (saib Amas 30:12–18, 23–28. Tau muaj tej yam dab tsi cuam tshuam los ntawm kev lees txais tej tswv yim ntawd? Tus yeeb ncuab siv tej lus qhia cuav twg sim ntxias koj hnub no?

• Amas ua li cas kom tawm tsam Khaulihos tej lus qhia nrog qhov tseeb? (saib Amas 30:31–54). Koj yuav ua li cas siv tej ntsiab cai no hauv koj lub neej?

Zoo li Amas, cov yaj saub thiab cov thwj tim pab peb paub tej qhov txawv ntawm qhov tseeb thiab Dab Ntxwg Nyoog tej lus dag. Koj nrhiav tej lus ntuas dab tsi hauv cov lus no: Gary E. Stevenson, “Tsis Txhob Dag Ntxias Kuv,” Liyahaunas, Kaum Ib Hlis Ntuj 2019, 00–00); Dallin H. Oaks “Be Not Deceived” (Liyahaunas, Nov. 2004, 00).

Kuj saib Txoj Moo Zoo tej Ntsiab Lus, “Nrhiav Qhov Tseeb thiab Zam Kev Dag Ntxias,” Txoj Moo Zoo cov Ntawv; “Oh Say, What Is Truth?,” Hymns, no. 272.

Neeg feem coob niaj hnub ntseeg tias tsis muaj Vajtswv. Koj kawm dab tsi nyob hauv Amas 30:39–46 uas pab koj paub tias Vajtswv muaj tiag? Dab tsi tiv thaiv peb kom peb tsis paub Nws? Vajtswv tau muab lwm zaj lus tim khawv twg rau koj paub tias Nws muaj txoj sia nyob?

Peb kawm dab tsi los ntawm Amas 30:56–60 txob qhov uas tus dab phem ua li cas rau cov uas coj raws li nws? Koj muaj peev xwm ua dab tsi kom pov hwm koj lub tsev thiaj li tsis raug nws tej kev ntxias?

Kuj saib Amas 36:3.

Qhov teeb meem ntawm cov Neeg Xaulas txoj kev ncaim cov Neeg Nifais tej zaum ua rau ib txhia xav tias yuav tsum muaj lub tsoom fwv los sis pawg tub rog pab kho teeb meem ntawd (saib Amas 31:1–4). Tiam sis Amas twb kawm tias nws tso siab tau rau “lub hwj chim ntawm Vajtswv txoj lus” (Amas 31:5). Koj kawm dab tsi los ntawm Amas 31:5 txog lub hwj chim ntawm Vajtswv txoj lus? (kuj saib Henplais 4:12; 1 Nifais 15:23–24; 2 Nifais 31:20; Yakhauj 2:8; Hilamas 3:29–30).

Thaum koj kawm Amas 31, kom nrhiav txoj moo zoo tej qhov tseeb twg uas ua rau koj xav txog koj txoj kev ua neej? Piv txwv hais tias:

• Koj tau pom Vajtswv txoj lus ua li cas thiaj coj tau cov neeg mus ua tej yam uas zoo? (saib nqe 5).

• Piv Amas kev xav thiab kev ua rau lwm tus (saib nqe 34–35) nrog cov neeg Xaulas (saib nqe 17–28). Koj yuav ua li cas kom ua neeg zoo li Amas?

• Koj kawm dab tsis nyob hauv Amas 31:30–38 uas pab cov neeg uas tu siab rau lwm tus tej kev txhaum?

Xav seb Amas tau coj leej twg nrog nws mus thaum nws mus qhia txoj moo zoo rau cov Neeg Xaulas (saib Amas 31:6). Koj kawm dab tsi txog cov neeg lub neej nyob hauv Mauxiyas 27:8–37; 28:4; Amas 10:1–6; 11:21–25; 15:3–12. Koj kawm dab tsi los ntawm lawv lub neej?

• Tej zaum muab tej yam khoom tso saib (ib yam li nyiaj los sis mov) thiab tej yam me me uas qog cov khoom no. Tej zaum qhov no yuav pab nej sib tham txog kev paub seb tej qhov tseeb thiab tej qhov cuav txawv li cas. Ces koj pab koj cov me nyuam nyeem Amas 30:12–18 thiab nrhiav cov lus dag los sis cov lus qhia cuav uas Khaulihos qhia txog Vajtswv. Nyob hauv Amas 30:32–35, Amas teb tej lus dag ntawd li cas? Peb kawm dab tsi los ntawm lawv tus yam ntxwv?

• Amas piav txog tej yam nyob saum ntuj thiab hauv ntiaj teb ua tim khawv tias Vajtswv muaj txoj sia nyob. Yog ua tau, taug kev nraum zoo nrog koj cov me nyuam los sis sawv ntawm ib lub qhov rais thaum koj nyeem Amas 30:44. Hais kom lawv taw tes rau tej yam lawv pom uas pab lawv paub tias muaj Vajtswv tiag thiab Nws hlub lawv. Lawv kuj kos duab txog tej yam uas lawv kawm los tau (saib phab ntawv ntxim ua rau lub lim tiam no)

• Thaum koj thiab koj cov me nyuam hu “My Heavenly Father Loves Me” (Children’s Songbook, 228–29), tuav ib lub pob los sis lwm yam khoom. Ces qee zaum tsum tsis hu nkauj lawm thiab hais kom tus me nyuam uas tuav lub pob qhia ib yam uas Leej Txiv Saum Ntuj Ceeb Tsheej tau tsim ua uas rau nws zoo siab.

• Koj yuav ua li cas pab koj cov me nyuam to taub tias Vajtswv txoj lus muaj hwj chim “dua lwm yam”? (Amas 31:5). Xav seb koj puas thov kom lawv xav txog ib yam dab tsi los sis ib tug neeg muaj hwj chim, los sis qhia cov duab uas muaj hwj chim. Tej yam dab tsi ua rau lawv muaj hwj chim? Nyeem Alma 31:5 ua ke, thiab nug koj cov me nyuam seb lawv xav tias nqe no txhais li cas. Hais txog ib lub sij hawm thaum Vajtswv txoj lus muaj hwj chim loj rau koj.

• Cia li hais ntsiab lus ntawm zaj dab neeg txog Amas thiab cov Neeg Xaulas, siv tej nqe los ntawm Amas 31:8–35 (kuj saib “Tshooj 28: Cov Neeg Xaulas thiab lub Lamiyatoos,” Cov Dab Neeg hauv Phau Ntawv Maumoos, 78–80). Pab koj cov me nyuam nrhiav tej yam cov neeg Xaulas hais thaum lawv thov Vajtswv (saib Amas 31:15–18) thaum lawv pab koj tsim ib tug pej thuam Lamiyatoos nrog pob zeb. Qhia tias peb tsis thov Vajtswv li no. Thaum koj thiab koj cov me nyuam sib tham txog kev thov Vajtswv, cia lawv tshem cov pob zeb. Tej zaum lawv khaws tau ib lub pob zeb los ntawm lawv lub txaj kom pab lawv nco qab thov Vajtswv txhua sawv ntxov thiab thaum hmo ntuj. Tej zaum lawv yuav xav kho lawv lub pob zeb kom zoo nkauj.