“Iloiloga o le Atamai i Aoaoga Faavae 23: Tauloto,” Tusi Lesona a le Faiaoga o le Tusi a Mamona (2024)

“Iloiloga o le Atamai i Aoaoga Faavae 23,” Tusi Lesona a le Faiaoga o le Tusi a Mamona

Iloiloga o le Atamai i Aoaoga Faavae 23

Tauloto

tamaitai talavou o loo suesue i tusitusiga paia

O le manatuaina o fuaitau o mau ma mea latou te aoao mai e mafai ona fesoasoani ia te oe i le tele o auala. O lenei lesona ua faamoemoe e fesoasoani ia te oe e tauloto ai mau e tele ma fasifuaitau autu o mau, po o se fuaitau atoa o le atamai i aoaoga faavae, mai le afa lona lua o le Tusi a Mamona.

Uunaia le taulotoina. Ia faaeteete ia aua nei faalotovaivaia tagata aoga o e atonu o loo tauivi ma le taulotoina. Fesoasoani i tagata aoga o e atonu e i ai ni manaoga faapitoa tau i le aoaoina e saili ni auala e tauloto ai atonu e fetaui lelei ma o latou manaoga.

Sauniuniga a le tagata aoga: Valaaulia tagata aoga e filifili se fuaitau autu o le mau o le atamai i aoaoga faavae ma le mau e tauloto ma o mai saunia i le vasega e faasoa mai.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe iloilo. Tagai i le faasologa faatulagaina o lesona ua saunia e le eria po o le faatonu o le eria po o le taitai faamaopoopo ina ia mautinoa ai o lesona taitasi o fuaitau o le atamai i aoaoga faavae o le a aoaoina a o faia vasega seminare.

O le taua o le faia soo

Fesoasoani i tagata aoga ia iloa le taua o le fai soo, ae aua le faaaluina le tele o le taimi iinei. Faamautinoa o le a lava se taimi o tagata aoga e tauloto ai fasifuaitau o le atamai i aoaoga faavae po o fuaitau i se taimi mulimuli ane o le lesona.

E tele faamanuiaga i le toe faia soo o se mea tatou te mananao e aoao pe manatuaina. Lisi nisi o gaoioiga e masani ona manaomia ai le faisoo faifai pea.

O a nisi o auala ua faamanuiaina ai oe mai le toe faia soo o se mea i le tele o taimi?

Afai e aoga, mafaufau e talanoa puupuu i le mea moni e faapea, e tele lava ina galo i tagata anomea fou faatoa aoaoina i vaiaso mulimuli ane, ae e mafai ona latou faaleleia le faatumauina e ala i le toe faia o anomea. E le gata i lea, nai lo le taulotoina o mea uma i le taimi e tasi, e mafai ona sili atu ona aoga le vaevaeina o anomea i ni vaega laiti.

Faaali atu se ata o Iosefa Samita o loo asia e Moronae.

Ina ua asiasi mai le perofeta o Moronae o le Tusi a Mamona, i le taimi nei o se avefeau faalelagi, ia Iosefa Samita sa ia faaaogaina le faisoo e fesoasoani ai ia Iosefa e 17 tausaga le matua ia manatua se savali taua.

O le a se mea e te manatuaina e uiga i nei asiasiga? (Tagai i le Iosefa Samita—Talafaasolopito 1:33–49.)
O le a le mea o loo ta’u mai ai e uiga i le Atua o le a faafa ona Ia auina mai Moronae e tuuina atu lea lava savali e tasi?

Na saunoa Elder David A. Bednar o le Korama a Aposetolo e Toasefululua e uiga i asiasiga faifai pea na faia e Moronae ia Iosefa Samita ona aoao mai ai lea:

O le faisoo o se auala lea e mafai ai e le Agaga Paia ona faamalamalamaina o tatou mafaufau, faatosinaina o tatou loto, ma faateleina lo tatou malamalama. (David A. Bednar, “Toe fai … o Mea Lava e Tasi e Pei o le Taimi Muamua” [Brigham Young University–Idaho devotional, Ian. 26, 2016], byui.edu)

O le a se mea ua fesoasoani lenei mea e te malamalama ai e uiga i faamanuiaga o le suesueina pea lava pea o fuaitau o le atamai i aoaoga faavae ma fasifuaitau autu o mau?
Mata o le a se mea o ta’u mai e lenei mea e uiga i mau patino na filifilia mo oe e toe fai ma taulai atu i ai?

Faaali atu pe tuu atu i tagata aoga se kopi o le siata lenei pe valaaulia i latou e sue le lisi o fuaitau o le atamai i aoaoga faavae i le Pepa Autu o le Atamai i Aoaoga Faavae (2022).

Valaaulia i latou e iloilo mau faasino ma fasifuaitau autu o mau sa latou taulotoina muamua ona filifili lea po o a fuaitau latou te mananao e taulai i ai i le taulotoina i le aso.

Atamai i Aoaoga Faavae o le Tusi a Mamona: Alema–Moronae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino Alema 7:11–13	Fasifuaitau Autu o le Mau “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.”
Mau Faasino Alema 34:9–10	Fasifuaitau Autu o le Mau “E ao ona iai se togiola, … o se taulaga e ao ina leai sona gataaga ma e faavavau.”
Mau Faasino Alema 39:9	Fasifuaitau Autu o le Mau “Aua e te toe saili atu i tuinanau o ou mata.”
Mau Faasino Alema 41:10	Fasifuaitau Autu o le Mau “E lei avea lava le amioleaga ma fiafia.”
Mau Faasino Helamana 5:12	Fasifuaitau Autu o le Mau “O luga lava o le papa o lo tatou Togiola … e ao ina oulua atiinaa’e ai lo oulua faavae.”
Mau Faasino 3 Nifae 11:10–11	Fasifuaitau Autu o le Mau “Na ou tuuina atu ai i le finagalo o le Tamā i mea uma mai le amataga.”
Mau Faasino 3 Nifae 12:48	Fasifuaitau Autu o le Mau “Ia outou atoatoa e pei lava o aʼu, po o lo outou Tamā o le o i le lagi e atoatoa.”
Mau Faasino 3 Nifae 27:20	Fasifuaitau Autu o le Mau “O mai ia te au ma ia papatiso … ina ia faapaiaina outou i le taliaina o le Agaga Paia.”
Mau Faasino Eteru 12:6	Fasifuaitau Autu o le Mau “Aua tou te le maua se molimau seia uma ona tofotofoina o lo outou faatuatua.”
Mau Faasino Eteru 12:27	Fasifuaitau Autu o le Mau “Afai e o mai tagata ia te au … ona ou faia lea o mea vaivai ia avea ma mea malolosi ia te i latou.”
Mau Faasino Moronae 7:45–48	Fasifuaitau Autu o le Mau “O le alofa mama o le alofa le pona lea o Keriso.”
Mau Faasino Moronae 10:4–5	Fasifuaitau Autu o le Mau “Ole atu ma le loto faamaoni, ma le manatu moni i ai, ma le faatuatua ia Keriso … [ma] o le mana o le Agaga Paia e mafai ona outou iloa ai le moni o mea uma lava.”

E mafai ona faaaoga e tagata aoga mea nei po o isi gaoioiga e tauloto ai le mau ma le fuaitau autu o le mau po o le fuaitau atoa. I le maea ai, e mafai e tagata aoga ona faaali atu mea faitino latou te fatuina i le filifiliga 2 ma faamatala pe faapefea e mea na latou faia ona fesoasoani ia i latou e faatumauina ai le mea na latou taulotoina. Afai e lava le taimi, e mafai e tagata aoga ona toe fai nei gaoioiga mo isi mau o le atamai i aoaoga faavae.

Amata ona tauloto

Mafaufau i se auala se tasi pe lua e mafai ona e valaaulia ai le Agaga Paia e faamalamalama lou mafaufau a o e faaaogaina le faisoo e fesoasoani ai ia te oe e taulotoina. Atonu e fesoasoani faataitaiga nei ia te oe:

Vaevae mea e te manao e tauloto i ni vaega laiti ma toe fai i latou taitasitasi.
Fatu se vaaiga faatino i upu uma po o nisi o upu e te manao e tauloto.
Faitau se vaega o le fuaitau e te manao e tauloto seia oo ina mafai ona e taulotoina e aunoa ma le tilotilo i ai. O le faaaogaina o mataitusi muamua o upu e mafai foi ona fesoasoani.

Fuafua e toe fai

Valaaulia tagata aoga e faaleleia lo latou faatumauina e ala i le faaauau pea ona tauloto i fafo atu o le taimi o le vasega. Fesoasoani i tagata aoga ia faamanuiaina e ala i le fatuina o se fuafuaga auiliili ma toe tulitatao lo latou alualu i luma i aso ma vaiaso e sosoo ai.

Mafaufau i ni auala e mafai ona faaauau ai ona e taulotoina i le aluga o ni nai aso po o vaiaso. Atonu e fesoasoani manatu nei ia te oe e filifili ai:

Tatalo i le Tama Faalelagi mo se fesoasoani e manatua ai mea e te taulotoina.
Filifili se taimi patino o le aso e tauloto atu ai le tele o mea e te mafaia mai lou mafaufau. Atonu e te setiina se faailo e faamanatu atu ai ia te oe i le taimi lava e tasi i aso taitasi.
Valaaulia se tasi e siaki lou alualu i luma ma le faatumauina e ala i le valaaulia o i latou e tilotilo i upu a o e taulotoina atu ia te ia.