“Mamona 7: ‘I Se Tulaga o le Fiafia E Leai Se Gataaga, ’” Tusi Lesona a le Faiaoga o le Tusi a Mamona (2024)

“Mamona 7,” Tusi Lesona a le Faiaoga o le Tusi a Mamona

Mamona 7

“I Se Tulaga o le Fiafia E Leai Se Gataaga”

Vaai faalemafaufau i lagona sa ono maua e Mamona a o ia molimauina le faanoanoa ma le faatafunaga na mafua mai i taua faaiu i le va o sa Nifae ma sa Lamana. A o lei aveesea e nei taua lona lava ola, sa faaiuina e Mamona ana tusitusiga e ala i le aoao atu o Iesu Keriso ma le fiafia e faavavau o loo faatalitali mai mo i latou o e mulimuli ia te Ia. O lenei lesona e mafai ona fesoasoani ia te oe e mulimuli ai ia Iesu Keriso ma saunia ai e mau faatasi ma le Atua i le fiafia e faavavau.

Uunaia se uiga masani o le suesue i tusitusiga paia i aso taitasi. Atiinaa’eina o se aga masani o le suesue i tusitusiga paia i aso taitasi e mafai ona faamanuiaina ai tagata aoga mo aso uma o totoe o o latou olaga. Vaavaai mo ni auala e aoao ai tagata aoga e uiga i faamanuiaga o le suesueina o tusitusiga paia i aso taitasi.

Sauniuniga a le tagata aoga: E mafai ona e valaaulia tagata aoga e o mai saunia i le vasega e faasoa mai mea e faafiafiaina ai i latou. E mafai foi e tagata aoga ona talanoa i se tagata o le aiga e uiga i le mea o faafiafiaina ai lena tagata o le aiga.

Gaoioiga e Ono Mafai Ona Aoao Ai

Ina ia fesoasoani i tagata aoga e toe manatunatu i mea latou te iloa e uiga ia Mamona, e mafai ona e faaaogaina le suega puupuu lenei. E mafai e tagata aoga ona tali faaeletonika pe sii o latou lima pe a faitauina le tali sao. Nai lo le tuuina atu o se suega puupuu, e mafai ona e faaali atu se ata o Mamona ma fai atu i tagata aoga e faasoa mai mea latou te iloa e uiga ia te ia. Ona o tusitusiga a Mamona (o ana lava upu ma se otootoga o le talafaasolopito o sa Nifae) e aofia ai mea uma mai Upu a Mamona i le Mamona e 7, e mafai ona e valaaulia tagata aoga o i ai ni pepa mau e susue i nei mataupu e vaai faalemafaufau ai pe fia itulau i totonu o le Tusi a Mamona sa ia otootoina ma tusia.

Tali i le suega: 1) i; 2) a; 3) e (Upu a Mamona–Mamona 7 ma le Moronae 7–9)

O le soifuaga o Mamona

Fai le suega puupuu lenei e vaai ai i mea e te manatua e uiga i le perofeta o Mamona.

Na faapefea ona faamatalaina Mamona i lona talavou? (Tagai Mamona 1:2.)
1. Sa avea o ia o se taitai i le vaegaau a Sa Nifae
2. Sa fefe o ia
3. Sa vave tele o lana maitau
O le a se aafiaga o Mamona i le 15 o ona tausaga? (Tagai Mamona 1:15.)
1. Sa asiasia o ia e le Alii
2. O lana talaiga na liua ai le faitau selau [o tagata]
3. Sa manu’a o ia i le taua
Pe tusa o le a le tele o le Tusi a Mamona na tusia pe otootoina e Mamona?
1. 1/2
2. 2/3
3. 3/4

Na i ai ia Mamona le tiutetauave e otooto, tusitusi, ma faasaoina tusitusiga paia ua tatou iloa nei o le Tusi a Mamona. I le taufaaiuiuga o lona soifua, sa molimauina ma auai Mamona i se taua tele i le va o sa Nifae ma sa Lamana. O lenei taua na iu lava ina faaumatia ai le ola o Mamona ( tagai Mamona 8:3). A o lei tuuina atu talafaamaumau paia i lona atalii o Moronae, sa tusia e Mamona lana savali mulimuli i le aufaitau o le Tusi a Mamona i le lumanai.

Valaaulia tagata aoga e mafaufau loloto ma talanoaina le fesili lenei i ni vaega toalaiti. O lenei mea o le a mafai ai e le toatele o tagata aoga ona faasoa mai o latou manatu.

A o e tomanatu i le olaga o Mamona, aafiaga, ma lana molimau, o le a sou manatu o le a se mea e mafai ona ia tusia i lana savali faaiu i le aufaitau o le Tusi a Mamona i le lumanai? Aisea?

A o e suesue i le Mamona 7, vaavaai pe faapefea ona anoa le savali a Mamona e le gata i tagata i le lotolotoi o se taua ae i tagata i so o se tulaga o le olaga.

O le mea e manao Mamona ia tatou iloa

A o suesueina e tagata aoga le Mamona 7, e mafai ona latou faatusatusaina aoaoga a Mamona i upumoni sa latou faamoemoe o le a ia aoao atu.

Faitau le Mamona 7:2–7. Faailoga i au tusitusiga paia pe lisi i lau api talaaga mea na manao Mamona ia iloa e le au faitau. Ia taulai faapitoa atu i mea na aoao mai e Mamona e uiga ia Iesu Keriso i fuaiupu 5–7.

Aisea e te manatu ai atonu na lagona e Mamona o ni upumoni taua nei mo i tatou ia iloa?
O le fea o nei upumoni e sili ona anoa ia te oe lava ia? Aisea?
Aisea e taua ai le iloa “o outou o le aiga o Isaraelu” (Mamona 7:2)?

Afai e te lagona e mafai ona manuia tagata aoga mai se suesuega loloto atu o fuaiupu 2–7, mafaufau e valaaulia i latou e faaaoga punaoa e suesue ai e pei o le Potutusi o le Talalelei, vaefaamatalaga, po o lauga o konafesi aoao. O na punaoa e mafai ona fesoasoani ia i latou e malamalama atili ai i le taua o le mea na valaaulia i tatou e Mamona ia iloa. Mo se faataitaiga, e mafai e nisi ona suesue i le taua o le iloaina “o outou o le aiga o Isaraelu” (fuaiupu 2). O isi e mafai ona saili ia malamalama i le tāua o le “tuu[ina] i lalo a outou auupega o taua” (fuaiupu 4).

Atonu na e maitauina a o siomia Mamona e le amioleaga ma taua, sa ia vaai atu i le Toetu ma le togiola a Iesu Keriso. Sa ia aoao mai e faapea ona o Iesu Keriso, ua mafai ai ona faamagaloina a tatou agasala ma faapea ona saunia ai e nonofo faatasi ma le Atua i se tulaga o le fiafia (tagai Mamona 7:7).

O a nisi o luitau po o tosinaga le lelei o loo siomia ai oe?
E faapefea e se malamalama i le Togiola a Iesu Keriso ma le gafatia mo le fiafia e faavavau ona avea o se punavai o le faamoemoe ma le malosi i lou olaga i le taimi nei?

Liliuina o le malamalama i faatinoga

O le iloaina e mafai ona tatou mau faatasi ma le Atua i le fiafia e faavavau e mafai ona aumaia ai ia i tatou le faamoemoe tele. Ina ia fesoasoani ia i tatou ia ausia lenei fiafia, na uunaia ai i tatou e Mamona ina ia liliu atu le malamalama i faatinoga. Ua faailoa mai lenei mea i lona faaaogaina o le upu “o lea” i le fuaiupu 8.

Mafaufau e tusi le mataupu faavae lē uma lenei i luga o le laupapa. E mafai e tagata aoga ona tusi ni auala eseese e mafai ona latou faaaogaina ai upu a Mamona i fuaiupu 8–10 e faauma ai le faamatalaga.

I lau api talaaga mo suesuega, tusi ai le faamatalaga le uma lenei: “E mafai ona ou mau faatasi ma le Atua i se tulaga o le fiafia a o ou …”

Faitau le Mamona 7:8–10 ma faauma le faamatalaga e ala i le tusia ia le itiiti ifo ma le tolu ni faatinoga ua valaaulia i tatou e Mamona e fai. Maitau i le fuaiupu 9, o “lenei” e faasino i le Tusi a Mamona ma o “lena” o loo faasino i le Tusi Paia.

Afai e manaomia, fesoasoani i tagata aoga e faailoa faatinoga e pei o nei:

“… salamo, ma ia papatiso [a’u] i le suafa o Iesu” (Mamona 7:8).
“… opogi le talalelei a Keriso [i tusitusiga paia]” (Mamona 7:8).
“… [mulimuli] i le faataitaiga a lo tatou Faaola” (Mamona 7:10).

E mafai ona vaevae tagata aoga i ni vaega toalaiti ma atofa atu i ai se tasi o faatinoga e tolu. E mafai ona latou talanoaina faatasi fesili nei.

O a nisi o auala e mafai ai ona tatou faia nei faatinoga?
E mafai faapefea e nei faatinoga ona saunia i tatou ia maua le fiafia folafolaina o loo avanoa e ala mai ia Iesu Keriso?

Afai e mafai, tuuina atu i tagata aoga ia le fuafaatatau lenei. Pe faitau leotele ia filifiliga ina ia mafai e tagata aoga ona mafaufau loloto i a latou tali.

Mafaufau po o le a le lelei o lou faatinoina o le fautuaga a Mamona. Vaai i le fuafaatatau lenei ma faatulaga oe lava i vaega taitasi (1 = leai lava; 5 = toetoe lava o taimi uma).

fuafaatatau 1 i le 5 mo faamatalaga taitasi

E mafai ona e faasoa atu se tala patino po o se molimau e faapupula ai le filemu lea e mafai ona maua mai le salamo, suesueina o tusitusiga paia, mulimuli i le faataitaiga a Iesu Keriso, ma tulimatai atu i le fiafia e faavavau faatasi ma le Atua. E mafai ona faamae’a e tagata aoga le gaoioiga lenei i totonu o a latou api faamaumau o suesuega.

Filifili se tasi o valaaulia a Mamona e te lagona e mafai ona fesoasoani ia te oe e saili ai le fiafia o loo avanoa e ala ia Iesu Keriso. Filifili po o le a se mea e mafai ona e faia e faatino ai lena valaaulia ma pe mafai faapefea ona fesoasoani ia te oe e taulai atu ai i le Faaola.

Manatu ma Talaaga o Faamatalaga

Mamona 7:2. E mafai faapefea e le iloaina o a’u o sē o le aiga o Isaraelu ona faia se eseesega i lo’u olaga?

Na aoao mai Peresitene Russell M. Nelson:

O se tasi o uiga FaaEperu o le upu Isaraelu o le “ia faamuamua le Atua.” O lea o le igoa moni o Isaraelu e faasino i se tagata o loo loto e faamuamua le Atua i lona olaga. O lena manatu faavae ua gaepuina lo’u agaga! …

Afai o lou mana’o silisili o le faamuamua o le Atua, avea ai ma se vaega o Isaraelu, e tele faai’uga o le a faigofie atu ona fai. E tele na’ua faafitauli o le a lē avea ma ni fafitauli! E te iloa le auala sili e teuteu ai oe lava ia. E te iloa po o a mea e matamata ma faitau ai, po o fea e faaalu ai lou taimi, ma po o ai tou te fegalegaleai. E te iloa le mea e te manao e ausia. E te iloa le ituaiga o tagata e te manao moni lava e avea ai oe. (Russell M. Nelson, “Ia Faamuamua le Atua,” Liahona, Nov. 2020, 92, 94)

Mamona 7:2. “O le a le uiga o le avea ma aiga o Isaraelu?

O le uiga o le avea ai o se vaega o le aiga o Isaraelu e faapea o loo i ai sou sootaga faale-feagaiga ma le Tama Faalelagi ma Iesu Keriso. O lona uiga o oe, e pei foi o Aperaamo, na fuafuaina lava e avea “o se faamanuiaga” i le fanau a le Atua (Kenese 12:2; Aperaamo 2:9–11). O lona uiga, i upu a Peteru, o “outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai e le Atua; ina ia outou ta’uta’u atu ana galuega lelei o le na valaau ia te outou nai le pouliuli e oo i lona lava malamalama e matua ofo ai” (1 Peteru 2:9). O lona uiga o oe o se tasi na “finau ma le Atua” a o e faamamaluina au feagaiga ma Ia. (Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022, 41)

Mamona 7:9. E mafai faapefea e le Tusi a Mamona ona faateleina lo’u faatuatua i le Tusi Paia?

Na aoao mai Peresitene Russell M. Nelson:

O le fiafia i le Tusi a Mamona e faateleina ai le fiafia o se tasi i le Tusi Paia, e faapena foi i le isi ona itu. O tusitusiga paia o le Toefuataiga e le faatautava i le Tusi Paia; ae latou te lagolagoina le Tusi Paia. O loo tatou nofo aitalafu i e na maliliu faamaturo o e na foaiina atu o latou ola ina ia mafai ona tatou maua le Tusi Paia. O loo faavae mai ai le natura e faavavau o le talalelei ma le fuafuaga o le fiafia. O le Tusi a Mamona na toe fuataiina ma faamamafa mai ai aoaoga faavae faatusi paia e pei o le sefuluai, o le malumalu, o le aso Sapati, ma le perisitua. (Russell M. Nelson, “Molimau Faatusi Paia,” Liahona, Nov. 2007, 43)

Gaoioiga Faaopoopo e Aoao Ai

Aoao mai mea uma e ao ona ou fai

E mafai ona manuia tagata aoga mai le iloaina o le mamanu a Mamona o le aoao atu o mea e tatau ona tatou iloa (Mamona 7:2–7), sosoo ai ma le aoaoina o i tatou i mea e tatau ona tatou faia (Mamona 7:8–10).

A uma ona suesue i mea na valaaulia i tatou e Mamona ia iloa i fuaiupu 2–7, mafaufau e faasoa atu faamatalaga nei e uiga i le viiga “O Au o se Atalii o le Atua.”

Ina ua faatoa tusia le “I O Au o se Atalii o le Atua” i le gagana Peretania, sa faitauina se tasi o laina, “Aoao mai ia te au mea uma e tatau ona ou iloa e mau ai faatasi ma Ia i se aso.” Ina ua faalogo Peresitene Spencer W. Kimball i le viiga, sa ia fesili pe mafai ona suia lena laina, “Aoao mai mea e ao na ou fai” (tagai Aoaoga a Peresitene o le Ekalesia: Spencer W. Kimball [2006], 1).

Talanoaina mea e mafai ona tatou aoao mai le suiga o le upu “iloa” i le “fai.”

Faatonu tagata aoga e vaavaai mo mea na valaaulia i tatou e Mamona e fai i le Mamona 7:8–10. Talanoaina pe mafai faapefea e le faia o nei mea ona fesoasoani ia i tatou e toe foi atu ai e mau faatasi ma lo tatou Tama Faalelagi.

Mamona 7:9. “Ua tusia lenei talafaamaumau mo le faamoemoe ia outou talitonu i lena”

Ina ia fesoasoani i tagata aoga ia malamalama pe faapefea ona galulue faatasi le Tusi Paia ma le Tusi a Mamona, faaali atu se kopi o le Tusi a Mamona ua tusia ai le “lenei.” Ona faaali atu lea o se kopi o le Tusi Paia ua tusia ai le “lena.” Valaaulia tagata aoga e faitau le leoa le Mamona 7:8–9 ma vaai po o le a le mea na fai atu ai Mamona i le va o le “lenei” (le Tusi a Mamona) ma le “lena” (le Tusi Paia). Valaaulia tagata aoga e fefaasinoai le Mamona 7:9 ma le 2 Nifae 3:12 ma le Mataupu Faavae ma Feagaiga 10:52. Fai atu fesili e pei o fesili nei:

Ua faapefea e lau suesuega o le Tusi a Mamona ona faamalosia lau molimau o upumoni o loo i le Tusi Paia?
Ua faapefea e lau suesuega o le Tusi Paia ona faamalosia lau molimau o le Tusi a Mamona?
Mata o le a se mea e manaomia ona fai e se tagata e i ai le faatuatua i le Tusi Paia e faataga ai le Agaga e molimau atu ia te ia i le moni o le Tusi a Mamona?