Nagkat-on Matag Adlaw

Pahibalo: Kini usa ka tinuod nga kasinatian nga gipakigbahin sa usa nga nakalingkawas na gikan sa pang-abuso. Mga ngalan ug impormasyon nga mailhan giusab.

33 anyos ang akong panuigon, bag-ohay nga nagdiborsyo, ug mihukom sa pakig-date og balik. Sa duha ka lain nga mga okasyon, gilugos ako og mga lalaki nga akong nahimamat sa sosyal nga mga kalihokan. Ang pagkaamgo sa unsay nahitabo kanako hilabihan sa kalisod. Mikabat og dugay nga panahon alang kanako sa pagdawat sa unsay nahitabo. Ang akong lawas hilabihan sa pagpangurog sa kakuyaw ug gibati ko ang paminhod; miagi ko og mga panahon nga gibati ko nga ako wala nay kapuslanan, walay bili, ug naulaw.

Dihay mga panahon nga mura og nawad-an ko og paglaom tungod kay ang pagsulay makaugtas. Ako nahibalo nga dili ko makabuntog niini nga gubat nga ako ra. Nangayo ako og tabang gikan sa usa ka propesyonal nga tigtambag, ug mitabang ug migiya siya kanako sa tibuok proseso sa pagbangutan.

Nagpakitambag usab ako sa akong bishop sa kanunay. Nag-uban, migiya ug miawhag sila kanako sa pagpadayon, ug miawhag sila kanako sa pagtukod sa akong relasyon ngadto sa Langitnong Amahan ug ni Jesukristo. Nahibalo ko nga diha sa mga higayon nga ako miluhod nangamuyo alang sa tabang, ang Langitnong Amahan naghashas kanako, naghatag kanako og kalig-on, sa hinay-hinay, sa pagbuntog niini. Ang paglaom ug pagkaayo posible. Daghan ako og nakat-onan mahitungod sa akong kaugalingon, sa akong Langitnong Amahan, ug sa akong Manluluwas, sa tibuok niini nga panaw.

Nakat-onan ko ang pagsalig diha sa Langitnong Amahan. Nahibalo siya unsa ang labing maayo. Nakakat-on ko sa pagluhod kon nagkinahanglan ko og tabang, tambag, o direksyon.

Nahibaloan nako kon kinsa ang akong mga higala, ug nakakat-on ako kon unsa ang tinuod nga higala. Nakakat-on usab ko kon unsaon pagbutang og mga utlanan.

Nakakat-on ko og mas daghang gugma, kaluoy, ug pailob.

Nakakat-on ko nga mahimong mas maluluy-on sa akong kaugalingon, sa dili pagbasol sa akong kaugalingon, ilabi na kon ang usa ka butang dili akong sayop. Nakakat-on ko sa dili paghukom o sa pagkawalay kaluoy sa kaugalingon. Nagkat-on ko sa paghigugma pa sa akong kaugalingon sa matag adlaw nga molabay.

Mapasalamaton ko sa hilom nga kaisog nga nagtabang kanako nga mahimong kinsa ako. Nagtubo pa ako ug nagkat-on matag adlaw, apan mapasalamaton kaayo ako alang sa dalan nga akong gisubay ug sa tanan nga akong nabuntog.

Tingali kini usa ka mahilom nga panaw—dili daghan ang nahibalo kon unsa ang akong giagian—apan akong nahunahuna nga kasagaran ang labing mahilom nga mga lihok sa kaisog mahimong mao ang kinakusgan.

Nakasabot ko sa gahom sa pagkaayo nga nakahimo ni Kristo sa paghatag tungod sa Iyang Pag-ula. Nakasabot ko og gamay pa kon giunsa Niya sa paglahutay ang akong sakit ug panghingotas didto sa tanaman ug didto sa krus. Nagtuo ko diha sa gahom sa mga anghel ug sa panalipod nga ilang gihatag. Nahibalo ko nga ako wala mag-inusara atol niini nga panaw, ug kini nakapalig-on sa akong pagpamatuod nga ang pagkaila sa Dios tinuod nga naglangkob sa matag aspeto sa atong mga kinabuhi. Wala lamang Siya nagtan-aw matag karon ug unya; kanunay Siya nga nag-uban kanato, ug nagbantay Siya kanato.

Ang akong pagpamatuod nagtubo nga mas malig-on. Nakat-unan ko kon unsa ka tinuod ang kalibotan sa espiritu. Nahibaloan ko nga ako nakiggubat sa kaaway sa matag adlaw. Usahay gihunahuna ko ang akong kaugalingon nga nagsul-ob og espiritwal nga taming; kini nagtabang kanako sa paghatag og kalig-on. Nahibalo ko nga kinahanglang panalipdan nako ang akong kaugalingon sa espiritwal nga paagi gikan sa kabug-at ug kahanap nga kinahanglan akong agian aron maila ug madawat ang akong mga kasinatian. Ang akong sakit lawom kaayo ug tinuod nga kini mihimo sa akong kasingkasing ug tibuok lawas sa tinuoray nga pagsakit. Usahay, bation sa akong lawas ingon og nagdaot.

Bisan pa niini, kini nga kasinatian nagdala usab og kalig-on sa kinahiladman—usa ka kalig-on nga wala gyod ako mahibalo nga anaa diha. Usa ka kalig-on nga maluluy-on, makapadasig ug makapabayaw. Usa ka kalig-on nga nagsulti kanako nga ako makahimo og lisod nga mga butang. Usa ka kalig-on nga ako nahibalo nga moduso kanako latas sa malisod ug mahagiton nga mga panahon. Usa ka kalig-on nga nakaila kanako labaw kay sa ako nakaila sa akong kaugalingon. Gibati ko ang pagkapukaw sa akong espiritu, sa akong kalag, sa akong mahangtoron nga pagkatawo kinsa kaniadto mipuyo uban sa Langitnong Amahan, ang akong espiritu kinsa nahibalo unsa ang akong sarang nga mahimo.

Ang atong mga kalag dako kaayo og bili labaw kay sa atong mahunahuna! Samtang kita nagsalig diha sa tabang ug gahom ni Jesukristo, kita sa kataposan makalupig, makabuntog, makadaog ug makalampos! Kita mga anak nga babaye ug lalaki sa usa ka Langitnong Hari, ug kana usa ka butang nga ikalipay! Gihimo kita alang sa mahinungdanon ug nindot nga mga butang—mga butang nga dili nato mahunahuna o mabati. Maglipay kita kon kinsa kita, matahom ug halangdon kita diha sa mga mata sa atong Langitnong Amahan. Dako kaayo kita og bili! Nagtuo ko nga ang atong mga kalag nangandoy nga mopauli sa panimalay uban sa atong Langitnong Amahan ug maanaa pag-usab sa Iyang presensya. Naghatag ako Kaniya sa akong mga pagdayeg, akong Amahan, akong Hari.

Kon ikaw o usa ka tawo nga imong nailhan nga giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o mga serbisyo sa pagpanalipod sa hamtong. Mahimo usab ka nga mangayo og tabang gikan sa usa ka tigsuporta sa biktima o magpakitambag o sa medikal nga propesyonal. Kini nga mga serbisyo makatabang sa pagpanalipod kanimo ug pagpugong sa dugang nga pag-abuso. Tan-awa ang “Anaa sa Krisis [In Crisis]” nga pahina alang sa dugang nga impormasyon.