Pagpangita sa Akong Bili

Pahibalo: Kini usa ka tinuod nga kasinatian nga gipakigbahin sa usa nga naluwas gikan sa pag-abuso. Ang mga ngalan ug ang makapaila nga impormasyon giusab.

Kini nga sulat orihinal nga gisulat alang sa usa ka pagbansay sa stake aron sa pagtabang sa mga bishop sa pakigtambayayong uban sa mga naluwas sa sekswal nga pag-abuso. Kini gipakigbahin dinhi nga adunay pagtugot.

Minahal nga mga Bishop,

Gusto kong motabang kaninyo nga makasabot kon unsa kini sama sa usa ka tawo kinsa nagpas-an ug ngil-ad nga sekreto—usa ka sekreto nga nagpabilin sukad sa pagkabata.

Matag usa kaninyo nakakita kanako, ug daghan kaninyo ang nakaila kon kinsa ako. Daghan kaninyo nakatrabaho uban kanako. Gisultihan ako nga sa inyong mga panghunahuna ako usa ka maayo nga pagkapahimutang nga batan-ong babaye. Nakaserbisyo ako og misyon ug nakahupot og mahinungdanong mga calling sa pagpangulo. Bisan pa niana, adunay kabahin kanako, nakagamot gikan sa akong kagahapon, nga dili makita sa gawas nga mga panagway—bisan og usahay gibati ko nga ang mga tawo nahibalo sa akong kagahapon. Ang mga tawo sama kanako kasagaran mibati nga sa bisan unsa nga higayon nga kami “madiskobrehan,” ug dayon ang resulta mahimong usa ka ngil-ad nga dungog ug pagsalikway.

Wala ako kahibalo pilay akong edad sa dihang nagsugod kini—ug tingali dili gayod ako makahibalo—apan ako sekswal nga giabuso isip usa ka bata, una sa pipila ka mga lalaki sa kasilinganan ug sa wala madugay sa usa ka magulang nga ig-agaw. Sa matag higayon gibati ko ang pagkawalay bili ug naningkamot sa paghikalimot. Maingon og nagmalamposon ako sa pagtago niadto nga mga panumdoman ngadto sa mangitngit nga suok sa akong hunahuna hangtod sa akong senior nga tuig sa high school nga diha ako sa sitwasyon nga nakapahinumdom kanako sa pag-abuso.

Human niana, nahinumdoman nako ang pipila ka mga butang gikan sa kagahapon ug gipakigbahin kon unsa ang nahitabo kanako ngadto sa akong labing suod nga higala. Siya ang una ug ang bugtong nga tawo nga akong gisaligan sa akong sekreto sa katuigan, tungod kay kon ikaw sekswal nga giabuso, sa kanunay imong gihunahuna ang imong kaugalingon nga ngil-ad, hugaw, may sala. Bation nimo ang lawom nga pagdumot sa kaugalingon. Nagtuo ka nga kon ang mga tawo mahibalo mahitungod niini, makita nila ang kangil-ad ug lain og tinan-awan kanimo.

Sa high school, ug sa daghang mga higayon sukad, miagi ako og mga panahon nga dili ganahan mokaon [anorexia]—usa ka kahimtang nga, akong nahibaloan, komon kaayo sa mga biktima sa sekswal nga pag-abuso. Ang sekswal nga pag-abuso nagrepresentar og pagkawagtang sa kontrol sa usa ka butang nga sagrado ug personal. Gibati ko ang usa ka lawom nga panginahanglan sa pagkontrol sa usa ka butang. Ang pagkontrol sa akong gana sa pagkaon, ako naghunahuna, motabang kanako sa pagbuntog sa akong mga pagbati sa pagdumot sa kaugalingon. Sa tinuod, kana wala moepekto, ug ang sitwasyon nahimo lamang nga mas migrabe tungod kay ang pagpagutom misangpot sa dili kapugngan nga mga kapakyasan. Ako dihay lain nga mga katarongan sa pagsagop niining dili husto nga kinaiya sa pagkaon. Atol sa ikaduhang panahon sa pag-abuso, ang akong tig-abuso misulti og mga butang mahitungod sa akong lawas nga dili kini mao ang iyang gusto. Kini nakapaanad kanako sa pagbati og kangil-ad mahitungod sa akong hitsura.

Nahadlok usab ako nga ang mga tawo makaila kon unsa ang nahitabo kanako. Busa ang pakig-date malisod alang kanako. Sa mga relasyon ako adunay kalagmitan nga mahimong sama sa usa ka chameleon ug mipahiangay ngadto sa mga gusto ug dili gusto ni bisan kinsa nga akong gika-date. Ang positibo nga pagpatigbabaw malisod alang kanako sa paghimo. Komon kini sa mga biktima.

Sa akong tibuok nga kinabuhi ako nakigbisog sa akong ngil-ad nga sekreto. Lisod ang pag-ila sa akong pagkawalay sala diha sa atubangan sa Dios ug sa pagbulag niana gikan sa unsa gayod ang sayop—ang paglugos kanako sa akong tig-abuso. Kini mihimo sa tanan nga mas malisod tungod sa kamatuoran nga sa dihang ako gihilabtan, inosente ako nga bata ug wala makasabot nga ako dili makahimo sa paghatag og pagtugot sa gibuhat. Nganong wala nako hunonga ang pag-abuso? Nganong akong gitugotan kini sa pagpadayon? Nganong kini kinahanglan nga mahitabo? Samtang ako nagkadako, akong gihulagway ang akong nagtubo nga ang-ang sa pagsabot sa akong kaugalingon isip usa ka gamay nga batang babaye. Gibati ko ang nagkadako nga pagbati nga sad-an samtang masalaypon kong gihulagway ang akong miaging kapasidad sa pagpili ingon nga nagkadako ug nagkadako sa matag nanglabay nga tuig. Ang ingon nga paghunahuna komon. Kini wala gayod makatabang nga kadaghanan kanamo, tungod kay ngil-ad kaayo ang among gibati mahitungod sa among mga kaugalingon, madani ngadto sa mga lalaki kinsa molig-on sa among negatibo nga mga paghulagway pinaagi sa pagtagad kanamo isip mga butang ug dili isip mga anak nga babaye sa Dios. Kadaghanan sa among pagdumot sa kaugalingon naggikan niini nga sundanan sa panghunahuna ug panglihok.

Ang akong sekswal nga pag-abuso nakahimo usab og makalilisang nga mga damgo. Sulod sa katuigan dihay mga yugto sa panahon nga kining ngil-ad nga mga damgo misamok kanako. Nakakat-on ako sa pagmatngon mahitungod sa unsay isulod nako sa akong hunahuna aron si Satanas walay daghang materyal nga makuha sa pagmugna niining ngil-ad nga mga damgo.

Kining ngil-ad nga mga damgo migiya kanako sa pakighisgot sa akong sekswal nga pag-abuso ngadto sa akong bishop. Ang mga panaghisgot nakatabang. Kini migiya sa akong bishop sa pagdapit kanako sa pag-apil sa usa ka grupo sa LDS Family Services. Ang katukma sa panahon ug palibot mao gayod ang unsay akong gikinahanglan.

Mapasalamaton ako nga ang akong Langitnong Amahan mitudlo kanako sa akong bili ug mapailobon kanako sa mga panahon nga ako wala mohilak ngadto Kaniya sa akong labing nag-inusara nga mga adlaw. Ang pag-ampo sa kasagaran malisod alang sa mga biktima sa sekswal nga pag-abuso. Ang pagsalig moabot uban sa dakong kalisod—bisan ang pagsaslig diha sa Dios, ug usahay ilabi na ang pagsalig diha sa Dios.

Sa panahon nga ako gihilabtan isip usa ka bata, kini mipasipala sa akong kinahiladman nga pagbati og kahilwasan ug sa akong pagtuo diha sa mapanalipdanong kamot sa Dios. Ang proseso sa pag-ampo uban sa paningkamot ug katuyoan gidasig sa usa ka desisyon sa pamasin ug pagsalig, usa ka paningkamot sa pag-ugmad og pagpaubos, ug sa usa ka nagtubo nga pagsabot nga ang Dios nahigugma kanako ug gusto kanako nga malipay. Ang mga panglantaw nga akong naangkon gikan sa akong misyon, diin nakakat-on ako sa pag-ampo uban sa hugot nga pagtuo, importante sa akong pagkaayo. Ang pag-apil sa LDS Family Services nga grupo nga pagtambag importante usab sa akong proseso sa pagkaayo.

Gikinahanglan nakong makakat-on nga ang Ginoo makatabang kanako nga mamaayo. Ang mga samad sa sekswal nga abuso lawom. Ang pagtrabaho uban sa akong bishop ug sa grupo sa LDS Family Services nakatabang kanako sa pag-abli, paglimpyo, ug sa pagtambal sa akong mga samad. Ako nag-anam og kaayo. Tan-aw nako nga adunay magpadayon nga mga higayon nga ang akong mga samad mosakit, apan mas maayo na gayod kini kay sa unsa kini sauna. Mapasalamaton ako.

Mga bishop, hibaloi nga kamo mga ehemplo kon giunsa ninyo pagtagad niadtong naglibot kaninyo ug ang lebel sa respeto nga inyong gipakita sa mga babaye. Ang pagkakita og matarong nga mga lalaki diha sa ebanghelyo naghatag kanamo og paglaom nga adunay mga lalaki niini nga kalibotan kinsa masaligan. Usa sa labing dako nga mga tabang alang kanato mao ang pagdasig sa pagpangita sa atong indibidwal nga bili. Tanan kita adunay gasa sa pagkahimong mga anak sa Dios ug mga indibidwal nga may kaugalingon nga bili. Kini usa ka bahandi kon atong mahibaloan nga kita adunay bili ug kon atong makaplagan ang usa ka dalan paingon ngadto sa Manluluwas, kinsa nanghimatuod sa atong bili pinaagi sa Iyang sakripisyo. Magsugod kita sa pagsabot kon giunsa Niya pagdala ang atong mga kagul-anan ug mga kasakit.

Nakakaplag ako og dakong kalig-on diha sa Manluluwas. Nahibalo ako nga Siya nahigugma kanako ug nagpakabana kanako. Nahibaloan usab nako kon sa unsang paagi Siya makatabang kanako kon dawaton nako Siya sulod sa akong kasingkasing. Mas lig-on ako nga tawo tungod niini nga kahibalo. Ako aduna pay daghang buhaton nga mga paningkamot.

Uban kaninyo ang akong mga pag-ampo buotan nga mga bishop. Nagpas-an kamo og bug-at nga dala, apan nahibalo ako nga ang Ginoo nag-uban kaninyo ug naglig-on kaninyo. Salamat sa pagkaana sa posisyon diin ang Ginoo makakuha sa inyong tabang. Hinaot nga ang Ginoo mopanalangin kaninyo sa tanan ninyong gibuhat.

Kaninyo matinud-anon,

Inyong sister

Kon ikaw o usa ka tawo nga imong nailhan giabuso, pangayo dayon og tabang gikan sa sibil nga mga awtoridad, mga serbisyo sa pagpanalipod sa bata, o mga serbisyo sa pagpanalipod sa hamtong. Mahimo usab ka nga mangayo og tabang gikan sa usa ka tigsuporta sa biktima o magpakitambag o sa medikal nga propesyonal. Kini nga mga serbisyo makatabang sa pagpanalipod kanimo ug pagpugong sa dugang nga pag-abuso. Tan-awa ang “In Crisis” nga pahina alang sa dugang nga impormasyon.