Kawain te Berita ae Tabu ae Kakukurei

Iroun Unimwaane Patrick Kearon

Man te Kooram n Abotoro n te Tengaun ma Uoman

Kamimiin ma kakannatoia kaain te utu a bane ni kabaeaki imatan te Tama ao te Nati e uota te rau ae kamiimi ma te kimwareirei nakon tamneiu ao ni kaonai ma tamnein te kakaitau.

Unimwaane Patrici Kearon ao kainnabana, ae Jennifer

Ngke Israel ao Elizabeth a kitana Nauvoo, Illinois, nako Salt Lake Valley n 1848, e a tiku i mwiia natiia te mmwaane ae uarereke ae e taunaki ni nneia maate i Nauvoo. Te teei ae Nathaniel Barlow, aia moan nati, e mate n te tai ae waekoa i mwiin bungiakina ni Meei 1841.

Ma mwanangaia n nako Salt Lake Valley, a aki kantaningaia Israel ma Elizabeth ae a na manga kona n noora ruanmaten natiia te mmwaane. Ma ngke e a weteaki Israel ibukin te mwakuri ni mitinare nako Engiran tabeua te ririki i mwiina, e rinanon Nauvoo ngke e mwananga nako mainiku. N ana bubuti Elizabeth, e tei bwa e na kakaea ruanmaten natiia ao ni kamwainga nikiran mannangin rabwatana nakon te moan tabo n taunimate, i mainikun te kaawa.

I mwiin teuana te bong ni kakae ae matebuaka karaoana, e ukora buokana Israel mairouia taan tararua n te tabo. N te bong are i mwiina, a kunea te ruanimate, ae mena irarikin ai mmwaanen James ae arana Mary. N te aro ae kananokawaki, a mka ao n uruaki taian bwaoki ni mate. N ana reta nakon kainnabana, e koroboki Israel, “Mangaia are I a rairaki nako ao ni kainna bwa N na katikuia ikekei ni karokoa taai aika a na roko.”

E tuai n raroanako man te ruanimate ngke e ongo te bwanaa. Ni kauringa aron te taneiai aei, e koreia, “Bon te bwai ae ko aki kona n ongo, ma e rianako n au iango bwa I aki kona n taekinna ni kaitara: ‘Tamau, tai kitanai ni katukai ikai.’” E oki Israel nakon te ruanimate, ni kainna bwa e nang kamwainga natina te mmwaane ae uarereke n te kabane. “I namakina te raunnano ae onoti are I tuai namakinna mai imwaaina. … N te mwaiti aei N na kangai: ae N na bon aki kona n ataia bwa iai mai ibuakon au beku ae I a tia ni karaoia inanon maiu.”

N Tebetembwa 2, 1853, Israel Barlow ao te tia tararua a kamwainga rabwatan James ao Mary nakon te moan tabo ni taunimate i Nauvoo, ni kanikinaea te tabo ma “taian atiibu ni nnen te atuu ao te wae n te ruanimate.”

Israel e tuanga Elizabeth bwa ngke e tiku ni maan n te ruanimate, “I namakinna bwa iai nanou ni kan katabuai ao bwaai ni kabane ake I aranna bwa au bwai nako nanon bain te Uea, bwa N na kona ni warekaki bwa I tau ni kaoti ma [James] n ingabongin te Moan Mangauti.”

Ana kakaonimaki Israel nakon ana euangkerio Iesu Kristo, n raonaki ma karinean berita aika tabu, e butimwaea Kristo ni kakoroa bukin te maiu are akea tokina —are e kakannato ibuakon kakabwaia ni kabane—ae kona n reke nakoina, ana bakatibu, ao kanoana.

Ti te arona naba anne nakoira ni kabane.

Rawetamnei iroun Jerry Garns, e kona ni kaobiaki ibukin kabonganakina n te Ekaretia

Berita aika Tabu

Tamara are i Karawa ao Natina, ae Iesu Kristo, a tangiriira n tatabemaniira nako n ae riaon riki bwaai nako ake ti iangoi. Akea te tabo ae kona ni kaotaki iai Aia tangira nakon ae tii rinanon kakabwaia aika a beritanaki n ikotaki ma berita aika tabu ake ti anganaki n tain te bwabetito ao inanon ana auti te Uea.

“Teuana te kabanea ni kakawaki n iango ibukin kaokan te aro bwa ibukin te berita ae tabun,” e reirei Beretitenti Russell M. Nelson (1924–2025). “N te taetae ae kabonganaaki n te tua, te berita ae tabu e kaota te booraraoi i marenan uoua bootaki ke a mwaiti riki. Ma te taetae n te aro, e rangi ni kakawaki riki te berita ae tabu. Bon te berita ae tabu ma te Atua.”

Te berita ae tabu n tatabeua nako ake ti karaoi ao ni kawakin a kakabwaiaira. Tamara are i Karawa ao ara Tia Kamaiu ae Iesu Kristo a tangiria ni kaanira riki ma Ngaiia A tangiria ni kan buokiira bwa ti na reirei ao n rikirake inanon te onimaki ao te atatai. A tangiria ni bwaintangiraira ma mwaakan karawa. A tangiria bwa ti na karekea te kamaiuaki ao te rau n te aonaaba are aeka ni kakabwaia aikai a kangaanga iai rekeia. A tangiria bwa ti namakina te kimwareirei n te maiu aio ao n te maiu are e na roko. N reitinako man te tangira ae kororaoi aio, A anganiira ara tai n rin inanon te berita ni kabaeaki ma Ngaiia. Ti karekea te kakabwaia ni manga motinnanoi berita aika tabu akanne n tain te bootaki n toa.

Ti butimwaea te toa n tamnein te kakaitau ibukina ngkai ti karekea te kakabwaia ae kakukurei ni katokaa i aora aran Iesu Kristo, n ururingnga ao Ana tangira ibukira are e kaotaki rinanon te bwaintangira n Ana Mwakuri ni Kamaiu—are E korakai, wawaanako raraana, ao ni mate ibukira. Te toa e kakabwaiaira naba ma te tai ae katoa wiiki ni kaota nanora ae tauraoi ni kawakin Ana tu, kabooua ara berita aika tabu, ao ni karaoa te berita ae boou (taraa Reirei ao Berita aika Tabu 20:77, 79).

N tainako, I ongo te taeka ae ti ana te toa ni kabooui ara berita are ti karaoi n te bwabetito. Ngkai e bon koaua anne, e bon nano riki nakon anne,” e taku Beretitenti Nelson. “I a tia ni karaoa te berita ae boou. Ko a tia ni karaoa te berita ae boou. … Ngkai ni bonimwiina iroun [te Uea] are e taekina anne bwa e na memena Tamneina iroura n taainako. Ai kakabwaiara ngaira!”

Ngkana ti raira nanora ao ni kana te toa ma te nano ae itiaki, ti na karekea te Tamnei ae Raoiroi ao ni “kaitiakaki man te bure n aron are ngkana ti a manga bwabetitoaki riki. Aio ana kantaninga ao ana akoi Iesu Kristo ae anganiira n tatabemaniira nako.”

E kakukurei ngkana ko raira nanom ao ni kabwaraki am bure rinanon ana tangira ni kaboomwi Kristo!

Tamnein te Nauvoo Illinois Tembora iroun Jennifer Rose Maddy

Ana Auti ae Kakukurei

I mwiin rikina bwa te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira, e aki toki n taetae Beretitenti Nelson ibukin kawain te berita ae tabu, ni moanna ma ana moan rongorongo ibukin te botanaomata ngke e riki bwa te Beretitenti n te Ekaretia. Ti rin n te kawai anne rinanon “te rairannano ma te bwabetito n te ran” (2 Nibwaai 31:17), e taku n te tai ae onoti i mwiina, ao “ngkanne ti rin inanona n ae bwanin riki inanon te tembora.”

N aron kanakin te toa e kauringiira ibukin ara berita aika tabu ao n irianaki ma aia kakabwaia, ao ai aron naba karaoan mwakuri n tei ibukiia tabeman inanon te tembora. Ngkai ti karaoi otenanti n tei ibukiia tabeman ibukiia naake a tia ni mate, ti uring berita aika tabu ake ti karaoi ao kakabwaia ake a beritanaki ake ti na karekei.

Rinanon kawain te berita, ti riki bwa taan bwaibwai nakon kakabwaia ni kabane ake a tia ni beritanaki nakon Aberaam, Itaaka, ao kanoaia. N aki ongei kakabwaia ake a beritanaki akanne, Aberaam, Itaaka, ao Iakobwa e aki bebete kairan ao waakin maiuia, ao ai arona naba ma ngaira. N aroia nakanne, ti kaitara ma taian kakatai, te kaetaki, ao te bua ngkai ti “kataaki ni bwaai ni kabane” (Reirei ao Berita aika Tabu 136:31; taraa naba 101:4–5). Ma n aroia burabeti, ao Aomata aika Itiaki aika a raoiroi ake ngkoa, ti ataia bwa antai ae ti na kona n onimakinna (taraa 2 Nibwaai 4:19).

Maiura ae mamate bon ara tai ni maiu ae ti rinanona, ma n te tai anne—n tabetai e bon rangi ni kangaanga—ma e kakawaki ibukin te maiu ae akea tokina. Eng, e tangiria Tamara are i Karawa bwa ti na reirei ao n rikirake. Ao eng, te rikirake anne e irianaki ma te nanokawaki ao te korakai n te tai teuana ma teuana. Ma E tangiria bwa a na nakoraoi maiura ao n iai te kantaninga. Ni bukina anne, ao ni kabebetea mwanangara n oki Nakoina, E a tia ni katauraoa te Tia Kamaiu, are boni ngaia “te tia kakoroa” bukin ara berita aika tabu ma Tamana. Rinanon ana Mwakuri ni Kamaiu Iesu Kristo, te Tama e kakoroi bukin berita akea a karaoaki nakoia Natina inanon te tembora.

Rinanon Ana tangira ao ana anga karea ni kabooan maiura, e a tia te Tia Kamaiu n rinanon ao ni kamaiura man bwaai nako ake ti na rinanona inanon maiura. Ao ibukin Ana auti ae tabu—Ana auti ae kakukurei—a na nakoraoi bwaai ni kabane n aki tabe ma te kakaitara. Te bwaam ni kawakinan berita aika tabu e kanakoa te nanokawaki, maraki, rawawata, ao te aki kukurei. Ti aki riai n raraoma ke ni maaku. Ma, ti kona ni kukurei bwa e a tia ni karaoaki te kaboomwi ibukin maiura (taraa 1 I Korinto 6:20) ao bwa kawain te berita nakon te maiu are akea tokina e a kaman tauraoi.

Kawain te berita bon te kawai ae koaua ibukin te tangira ni kaboomwi Ngkai ti karinei ara berita aika tabu ake ti karaoi inanon te tembora, ti na karekei kakabwaia n te mwaaka ae korakora, te tangira ae korakora, te nanoanga ae korakora, te atatai ae korakora, ao te kantaninga ae korakora. Kamimiin ao kakannaton te kababae n te tembora—ibukiia kaain te utu ake a kabaeaki ni kabane n te tangira ibukin te maiu ae akea tokina—e uota te namakin ae rau ao te kimwareirei nakon tamneiu ao ni kaonai ma tamnein te kakaitau.

“Ngkana iai kangaanga aika a kuba ni kaoti inanon maiumi, te kabanea n tabo ae mano n te maiu n tamnei bon te maeka inanon am berita aika tabu n te tembora!” E anga taeka n reirei Beretitenti Nelson. I ataia man oin au taneiai n te maiu ae mamate ae karewe ao n taai tabetai e mao koauan taeka akanne.

James Nathaniel Barlow, moan natiia Israel ao Elizabeth Barlow, e mate teutana te tai i mwiin bungiakina ni Meei 1841. Ririki ake i mwiina, e kabaeaki nakoia ana karo man te mwakuri n onomwi n te Logan Utah Tembora.

Kamataata n te korotamnei iroun Allen Garns

Ikotiia Nakon te Mweenga

I mwiin tian Barlow n anga ana kabanea ni kaboo nakon natina te mmwaane ae uarereke e koroboki nakon kainnabana, “Iangoan kararoaau n te tabo ae raroa, akea riki au tai inanon maiu ni manga oki nakon ruanimaten [James], n anga kabanean au namakin n tangira are I kaotia ni karokoa are I a rootaki ao ni waanako ranin matau i aon ruanimatena.”

I tabe ni katamneia bwa angiin raninmatau—rannimata ni kukurei n te tai aio—a waanako n Ritembwa 4, 1889. N te bong anne, natiu ae uarereke ae James Nathaniel Barlow e kabaeaki nakoia ana karo n te Logan Utah Tembora. Man te tai anne, e a tia ni mate, ngaia are tabeman a tei bwa taan tei ibukina ao James.

Ngai ma Titita Kearon iai ara namakin ae onoti ao ara nanoanga ae korakora ibukin Israel ao Elizabeth. Moan natira, te mmwaane ae arana Sean, e mate ngke e koreaki buroona ngke ai tibwa teniua ana wiiki ni maiu. Aio bon te bua ae rangi ni kauruakinano n te aonaaba aio nakoira. N te tai anne, ti raraoma ngkana ti na kona ni maiu. Ti taunna n te ruanimate ae karika te maraki ao te nanokawaki i aon Engiran. Te bwi ma nimaua te ririki i mwiina, ti tuangaki ma ara utu bwa ti na mwaing man mweengara nakon te United Kingdom ni karaoa ara mwakuri ni mitinare ae bwanin taina n te Ekaretia, ao ti kitana te ruanimate ae uarereke i mwiira.

Ti aki kabuaa natira inanon mwanangara nako maeao, ao ti aki rootaki n aia kangaanga te utu ae Barlow are kangaanga aron kabwarawaraana, ma ti moantaai ni karekea te atatai n aron te bwai are a rinanona. Ruanmaten natira te mmwaane ae uarereke e rangi n raroa nako, ma n aroia te utu ae Barlow, iai ara onimaki ae matoa ni Mangautin Iesu Kristo ao aron ara reitaki n ara utu akea tokina rinanon te kabaebae ae tabu rinanon te berita.

A bane ni iai ara bakatibu ao ara utu aika a tangiraki iroura ake a tia ni motirawa ake a kangai nakoira, “Tai kitaniira ni katikuira ikai.” Ibukin berita aika tabu n te tembora, akea temanna ae na kitanaki. Te wewete nakoira bwa ti na tangiriia, ni beku ibukiia, ao ni bootiia nakon te mweenga.

Tamara are i Karawa e tangiriira, ngai ma ngkoe. E a tia n anganiira te tembora, n te aro bwa “ane [ti] kabaea iai i aon te aba ao e na kabaeaki i karawa” (Reirei ao Berita aika Tabu 128:8; taraa naba Mataio 18:18) E kanakomaia Natina bwa e na urua ana kabaebae te mate, ni kabebetea te kawai ibukin kabaebae aika akea tokinia ao ana reitaki te utu ae akea tokina.

Anne bukina ngkai ti karekei otenanti. Anne bukina ngkai ti karaoi berita aika tabu. Anne bukina ngkai ti katei taian tembora. Anne bukina ngkai ti katabuira nakon ana mwakuri te Atua ao mimitongina (taraa Mote 1:39). Ao anne bukina ngkai a waanako raninmatara ni kukurei, n ataia bwa ara reitaki ae akea tokina ma ara utu aika a tangiria iroura ae tataningaira ni mweengan te Tama ao Natina

Ti bia kunea te kimwareirei ao te rau ngkai ti kawakin ara berita aika tabu ao n raona te Uea inanon karaoan ana mwakuri ni kamaiu ae mimitong.

© 2026 by Intellectual Reserve, Inc. All rights reserved. Boretiaki i USA. Kariaiakaki te Ingiriti: 6/19. Kariaiakaki rairana: 6/19. Rairan Rongorongon te Riaona ni Katoa Namwakaina, Beberuare 2026. 19933 859Kiribati19933 859