“Kavenan Rod we i Fulap long Glad,” Liahona, Feb. 2026. 2026.
Mesej blong Liahona blong Evri Manis, Febwari 2026
Kavenan Rod ia we i Fulap long Glad
Ol bigfala [samting olsem], ol memba blong famli we oli joen tugeta bakegen long fored blong Papa mo Pikinini i givim wan bigfala filing blong hapines long sol blong mi mo i fulumap hat blong mi wetem tangkyu.
Elda Patrick Kearon mo waef blong hem, Jennifer
Taem Israel mo Elizabeth Haven Barlow i lego Nauvu, Ilinoa, blong go long Sol Lek Vale long 1848, tufala i lego biaen wan bebi boe we oli berem long wan smol Nauvu gref. Smol James Nathaniel Barlow, fas bon blong tufala, i ded sot taem nomo afta we i bon long Mei1841.
Taem we tufala i go long Sol Lek Vale, Israel mo Elizabeth i neva ting se bae tufala i luk gref blong boe blong tufala bakegen. Be taem oli singaotem Israel blong go long wan misin long Inglan sam yia afta, hem i pas tru long Nauvu taem hem i stap travel i go long Is. Folem rikwes blong Elizabeth, hem i stop blong lukaotem gref blong boe blong tufala mo muvum ol hafhaf bodi blong hem i go long mein simetri long Is blong taon.
Afta long plante hadtaem blong faenem gref blong boe blong tufala, Israel i askem help blong wan lokol we i stap lukaotem gref. Long nekis dei, tufala i faenem gref ia, we i stap narasaed long gref blong kasen blong James, Mary. Sore nomo se, kofin i bin roten mo i brokbrok. Long wan leta we Israel i raetem i go long waef blong hem, hem i talem, “Mo mi tanem mi i go longwe mo kam long tingting ia blong lego tufala long ples ia kasem long fiuja.”
Hem i no wokbaot i go longwe tumas long gref taem hem i harem wan voes. Hem i tingbaot eksperiens ia taem hem i raetem, “Mi no save harem i klia, be i klia long maen blong mi mo mi no save gat daot long hem: ‘Papa, yu no lego mi long ples ia.’” Israel i gobak long gref, [mo] i kam long tingting ia blong muvum aot smol boe blong hem. “Mi kasem wan kwaet filing ia we i defren mo pis long maen we mi no bin filim bifo. … Hemia i hamas we mi save talem: se mi neva kam blong luksave wan kaen wok olsem long laef blong mi.”
Long Septemba 2, 1853, Israel Barlow mo man blong lukaot long gref i muvum bodi blong James mo Mary i go long mein simetri blong Nauvu, [mo] makem ples ia wetem “ol ston long hed mo leg blong tufala gref ia.”
Israel i talem long Elizabeth se taem hem i bin stap longtaem smol long gref, “Mi filim wan strong tingting blong wantem blong givim evri samting we mi singaotem se i blong mi i go long ol han blong Lod, blong kam klin mo blong girap wetem [James] long moning blong Fas Laef Bakegen long Ded.”1
Komitmen blong Israel long gospel blong Jisas Kraes, wetem fasin blong hem blong onarem ol tabu kavenan, i letem Kraes blong mekem laef we i no save finis— blesing ia we i bigwan bitim evri blesing—i posibol blong hem [Israel], ol bubu blong hem, mo ol fiuja jeneresen blong hem.
Hemia i tru blong yumi evriwan.
Pikja i kam long Jerry Garns, mo oli save yusum blong Jos nomo
Ol Tabu Promes
Papa blong yumi long Heven mo Pikinini Boe blong Hem, Jisas Kraes, i lavem yumi bitim evri samting we yumi save tingbaot. Tufala i soem lav blong Tufala moa tru long ol promes blesing we i joen wetem ol kavenan we yumi kasem long taem we yumi baptaes mo insaed long haos blong Lod.
“Wan long ol impoten tingting long saed blong relijin i hemia blong ol tabu kavenan,” Presiden Russell M. Nelson (1924–2025) i tijim. “Long lanwis blong loa ,wan kavenan i saen blong wan agrimen bitwin tu o moa pati. Be long saed blong relijin, wan kavenan i gat moa mining. Hem i wan tabu promes wetem God.”2
Evri tabu promes yumi mekem mo kipim oli blesem yumi. Papa long Heven mo Sevya blong yumi Jisas Kraes Tufala i wantem yumi blong kam moa kolosap long Tufala. Tufala i wantem helpem yumi blong lan mo gro long saed blong fet mo andastaning. Tufala i wantem mekem yumi endao wetem paoa blong heven. Tufala i wantem yumi blong faenem hiling mo pis insaed long wan wol we ol kaen blesing olsem i had blong faenem. Tufala i wantem yumi blong filim hapines long laef ia mo long laef afta long laef long wol ia. Wetem lav ia we i stret evriwan, Tufala i givim janis ia blong mekem wan kavenan rilesensip ia wetem Tufala. Yumi gat blesing ia blong komitim yumi bakegen long ol kavenan ia evri wik long taem blong sakramen miting.
Yumi tekpat long sakramen wetem wan spirit blong tangkyu from se yumi glad long blesing ia blong tekem long yumi nem blong Jisas Kraes, taem yumi tingbaot Hem mo lav blo Hem we i soem tru long presen ia blong Atonmen blong Hem—se Hem i safa, blad i ron, mo i ded from yumi.3 Sakramen i blesem yumi tu evri wik wetem janis ia blong soem tru fasin blong wantem kipim ol komanmen blong Hem, riniu kavenan blong yumi, mo mekem wan niu kavenan (luk long Doktrin mo Ol Kavenan 20:77, 79).
“Plante taem, mi harem toktok ia se yumi tekem sakramen blong riniu ol kavenan we yumi bin mekem long taem blong baptaes. Hemia i tru, be i moa bitim hemia,” Presiden Nelson i talem. “Mi bin mekem wan niu kavenan. Yufala i bin mekem ol niu kavenan. Naoia, blong blesem yumi, [Lod] i talem se bae yumi oltaem gat spirit blong Hem i stap wetem yumi. !Hem i wan blesing!”4
Taem yumi sakem sin mo tekpat long sakramen wetem wan klin hat, yumi kasem Tabu Spirit mo yumi kam “klin aot long ol sin blong yumi semmak olsem we yumi baptaes bakegen. Hemia i hop mo sore we Jisas i givim long wanwan long yumi.”5
!Hemia i wan glad blong save sakem sin mo kasem fogivnes tru long lav blong Kraes we i pemaot yumi!
Pikja blong Nauvu Ilinoa Tempol i kam long Jennifer Rose Maddy
Haos blong Hem we i Fulap long Glad
Afta we hem i kam Presiden blong Jos blong Jisas Kraes blong Ol Lata-dei Sent, Presiden Nelson i oltaem tokbaot kavenan rod ia,i statem wetem fas pablik mesej blong hem olsem Presiden blong Jos.6 Yumi folem rod ia tru long “fasin blong sakem sin mo baptaes long wota” (2 Nifae 31:17), hem i talem long sam taem afta, mo “afta yumi folem rod ia moa insaed long tempol.”7
Semmak olsem we sakramen i rimaenem yumi long ol kavenan blong yumi mo ol blesing blong hem, ol wok insaed long tempol tu oli rimaenem yumi long ol kavenan blong yumi. Taem yumi mekem ol odinens long bihaf blong olgeta we i ded finis, yumi tingbaot ol tabu promes ia we yumi bin mekem mo olgeta promes blesing we bae yumi kasem.
Tru long kavenan rod ia, yumi kam nekis wan long laen blong kasem ol blesing blong Ebraham, Aesak, Jekob, mo laen blong olgeta afta long olgeta .”8 Nomata long ol promes blesing ia, Ebraham, Aesak, mo Jekob oli nogat wan isi laef mo semmak olsem yumitu. Semmak olsem olgeta, yumi fesem jalenj, koreksen, mo fasin blong lus taem yumi “traem evri samting” (Doktrin mo Ol Kavenan 136:31; luk tu long 101:4–5). Be olsem ol profet mo Sent blong bifo we oli gat klin fasin, yumi save huia nao blong trastem (luk 2 Nifae 4:19).
Laef blong yumi long wol i wan smol pat nomo blong laef blong yumi, be taem ia—we samtaem i had tumas— i impoten blong taem we no save finis. Yes, Papa blong yumi long Heven i wantem yumi blong lan mo gro. Mo, yes, blong gro, samtaem i fulap long harem nogud mo safaring. Be Hem i wantem laef blong yumi i naes mo i fulap wetem hop. Blong kasem en, mo blong mekem rod i isi blong yumi gobak stap wetem Hem, Hem i givim yumi wan Sevya, we hem i “man we i mekem” ol kavenan blong yumi wetem blong Papa blong Hem.9 Tru long Atonmen blong Jisas Kraes, Papa [long Heven] i fulfilim ol promes we i mekem wetem ol pikinini blong Hem insaed long tempol.10
Tru long lav mo atonmen sakrifaes blong Hem, Sevya blong yumi i handelem mo hilim evri samting we bae yumi stap gotru long hem long laef. Mo from tabu haos blong Hem—haos blong Hem we i fulap long glad—evri ting bae i oraet nomata long ol jalenj. Taem yumi kipim ol kavenan blong yumi, hemia i karemaot ol harem nogud, ol so [long saed blong bodi], wari mo rigret. Yumi no nid blong wari o fraet. Be, yumi mas glad from se Kraes i pemaot yumi finis (luk 1 Korin 6:20) mo Hem i givim kavenan rod ia we i lid i go long laef we i no save finis.
I tru se kavenan rod ia i wan rod blong lav ia we i pemaot man. Taem yumi stap onarem ol kavenan we yumi mekem insaed long tempol, yumi kasem ol blesing blong bigfala paoa, bigfala lav, bigfala sore, bigfala andastaning, mo bigfala hop. Ol bigfala [samting olsem], ol tempol siling—blong ol memba blong we oli joen tugeta bakegen long lav blong taem we i no save finis—i givim wan bigfala filing blong hapines long sol blong mi mo i fulumap hat blong mi wetem tangkyu.
“Semmak, taem eni kaen samting i hapen insaed long laef blong yu, !sef ples blong stap long hem long saed blong spirit i blong stap laef insaed long tempol kavenan blong yu! Presiden Nelson i kaonsel.11 Mi save tru long ol gudfala mo samtaem ol had eksperiens blong mi long wol ia se ol toktok ia oli tru.
James Nathaniel Barlow, fasbon pikinini blong Israel mo Elizabeth Barlow, i ded sot taem nomo afta we i bon long Mei 1841. Sam yia i pas oli sil long bihaf blong hem wetem papa mo mama blong hem insaed long Logan Yuta Tempol.
Pikja i kam long Allen Garns
Karem Olgeta i Kam Tugeta long Hom
Afta we Israel Barlow i talem las tata blong hem long smol boe blong hem, hem i raet i go long waef blong hem, “Tingting ia blong mi go longwe mo neva kambak long gref blong James, i brekem gud hat blong mi wetem wota blong ae long gref blong hem.”12
Mi pikjarem se i gat moa krae—be ol krae blong glad—we i bin hapen long Disemba 4, 1889. Long dei ia, smol James Nathaniel Barlow i bin sil wetem ol paren blong hem long Logan Yuta Temple. Long taem ia, Israel i bin ded, mekem se ol narafala man i mekem long bihaf blong hem mo James.13
Sista Kearon mo mi i gat bigfala sori from Israel mo Elizabeth. Fasbon blong mitufala, wan boe we nem blong hem Sean, i ded long taem blong wan hat operesen taem hem i gat 3 wik nomo. Hemia i bin wan bigfala had taem blong mitufala. Long taem ia mitufala i stap askem sapos bae mitufala save winim harem nogud ia. Mitufala i berem hem wetem hevi hat long wan smol gref long Inglan. Afta long 15 yia, oli askem famli blong mifala blong muvum aot long hom blong mifala i go long Yunaeted Kingdom blong givim wan ful taem seves long Jos mo mifala i lego smol gref ia biaen.
Mifala i no bin lusum pikinini blong mitufala long wokbaot blong mifala i go Wes, mo mitufala i no safa olsem ol Barlow, be mitufala i stat blong kasem wan andastaning long wanem we tufala i bin gotru long hem. Gref blong bebi boe blong mifala i stap longwe, be yet olsem ol Barlow, mifala i bin gat fet long Laef Bakegen long Ded blong Jisas Kraes mo long tabu siling kavenan blong famli blong mifala blong taem we i no save finis .
Yumi evriwan i gat ol bubu we oli ded finis mo ol narawan we yumi lavem, oli stap long gref mo oli stap talem long yumi “Yu no lego mi long ples ia.” Tru long ol tempol kavenan, i no gat wan bae oli lego hem biaen. Yumi gat koling ia blong lavem olgeta, givim seves long olgeta, mo helpem blong tekem olgeta i kambak hom.
Papa blong yumi long Heven i lavem yumi, yu mo mi. Hem i givim yumi ol tempol blong mekem se “wanem [yumi] silim long wol ia, bae oli silim long heven,” (Doktrin mo Ol Kavenan 128:8; luk tu long Matiu 18:18). Hem i sendem Boe blong Hem blong brekem ol rop blong ded, mekem rod blong ol rilesensip we i no save finis mo ol kam tugeta famli blong taem we i no save finis.
Hemia nao from wanem yumi gat ol odinens. Hemia nao from wanem yumi g mekem ol odinens. Hemia nao from wanem yumi bildim ol tempol. Hemia i from wanem yumi givim yumiwan long wok mo glori blong God (luk long Moses 1:39). Mo hemia i from wanem yumi krae wetem glad, wetem save ia se bae yumi kam tugeta blong taem we i no save finis wetem olgeta we yumi lavem long ples we Papa mo Pikinini Tufala i stap long hem.
Letem yumi faenem hapines mo pis taem yumi stap kipim ol kavenan blong yumi mo joenem Lod long bigfala wok blong Hem blong sevem man we i fulap long glori
© 2026 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Mesej blong Liahona blong Evri Manis, Febwari 2026. Bislama. 19933 852