“Jisas Kraes I bin Askem Yumi blong Tekem Sakramen,” Liahona, Maj 2021
Liahona Mesej blong Manis, Maj 2021
Jisas Kraes I bin Askem Yumi blong Tekem Sakramen
Yumi kam klin mo yumi kasem hiling taem yumi stap tingbaot Sevya blong yumi evri wik.
Las Sapa, i kam long Carl Heinrich Bloch
Bifo Hem i ded, Jisas Kraes i bin kakae wan las kaekae we oli singaotem Las Kaekae o Las Sapa. Long en blong kaekae ia, Hem i presentem sakramen long olgeta we oli bin stap folem Hem. Hem i brekem bred, mo i blesem. “Hemia bodi blong mi, we bambae mi givim from yufala. Oltaem yufala i mas mekem samting ya blong tingbaot mi bakegen,” Hem i talem (Luk 22:19). Afta long hemia, Hem i blesem mo serem wan kap waen.
Pat blong Wosip Evri Wik
Taem we Lod i putumbak Jos Ia blong Jisas Kraes blong Ol Lata-dei Sent long wol ia, sakramen i kam pat blong wosip blong evri wik. Long taem blong jos, olgeta we oli kasem prishud oli blesem mo pasem sakramen. Oli stap prea mo oli yusum ol toktok we oli kamaot long ol skripja (luk long Moronae 4; 5). Afta, wanwan insaed long kongregesen i kakae bred mo i dring wota blong tingbaot Jisas Kraes mo sakrifaes we Hem i bin mekem from yumi, long wei ia we Hem i bin askem yumi blong mekem.
Foto i kam long Angela Suitter
Stap Rere blong Tekem mo Kakae
Blong stap rere blong tekem sakramen, yumi mas tingbaot laef blong yumi mo ol joes blong yumi long fasin we i ones. Yumi mas sakem ol mistek mo ol sin we yumi bin mekem long wik we i jes pas, mo tu, yumi mas askem fogivnes long God. Yumi no nid blong yumi mas stret gud evriwan blong tekem sakramen, be hat blong yumi i mas stap daon.
Prea long Getsemane, i kam long Del Parson
I Moa Bitim Bred mo Wota
Blong stap tekem sakramen, hem i wan tabu taem we i tabu, wan taem blong bigfala respek. Ol prea blong sakramen oli mekem yumi tingbaot se, taem yumi stap tekem bred mo wota, yumi stap tingbaot bodi mo blad we Jisas Kraes i bin givim long yumi. Yumi promes blong folem Hem, mo laef folem wan laef we i folem Kristin fasin. Yumi promes blong traem blong obei ol komanmen blong God. Hem, Hem i givim long yumi Tabu Spirit we bambae i givim kamfot, i soem rod, mo i hilim yumi.
Stap Mekembak o Riniu Ol Kavenan
Taem we, olgeta long yumi we yumi bin kasem baptaes finis, i tekem sakramen wetem wan hat we i klin gud, yumi stap riniu o mekembak kavenan ia we yumi bin mekem long taem we yumi kasem baptaes. Hemia i tekem tu blong kasem Tabu Spirit, mo blong kam klin long ol sin, semmak olsem we yumi stap kasem baptaes bakegen. Hemia i hop mo sore we Jisas i givim long wanwan long yumi. Hem i neva let tumas blong sakem sin mo kasem fogivnes.
Blong Yufala I Tingbaot Mi Oltaem, i kam long Gary L. Kapp, oli no save kopi
?Wanem Nao Ol Skripja Oli Stap Talem Abaot Sakramen?
Yumi mas luklukgud insaed long yumi long saed blong spirit; we yumi ones blong lukbak long fasin blong yumiwan, bifo yumi tekem sakramen (luk long 1 Korin 11:28).
Afta we Hem i bin laef bakegen long ded, Jisas i bin soem long ol pipol blong Hem long Ol Amerika olsem wanem blong tekem sakramen (luk long 3 Nifae 18).
Ol profet blong tedei, oli bin talem long yumi blong yumi yusum bred mo wota olsem sakramen, be wanem we yumi kakae mo dring, i no impoten tumas (luk long Doktrin mo Ol Kavenan 27:2). Samtaem, olgeta we oli nogud long samfala kaekae, oli nid blong oli yusum wan nara kaen bred.
© 2021 i kam long Intellectual Reserve, Inc. All rights reserved. Oli printim long YSA. Oli letem long Inglis: 6/19. Oli letem translesen: 6 /19. Translesen blong Monthly Liahona Message, March 2021. Bislama. 17464 852
Las Sapa, i kam long Carl Heinrich Bloch; foto blong wan yang woman we i stap prea i kam long Angela Suitter; Prea long Getsemane, i kam long Del Parson; Blong Yufala I Tingbaot Mi Oltaem, i kam long Gary L. Kapp, oli no save kopi