Morael Lobengkek

Ngarngii a tal bla lolengit er kau el mo meruul ra kmung ngerang el momdasu eng diak el sebechem el rulii? Altang dimlak ke molchesuar el mui a klisichem malechub ngdiak ke mungil medengei, malechub e ke bekikl el kmo a rebebil a mo ocherchur er kau e mengeremrum er kau. Alsekum meke mlo molchesiu el uaisei, ng diak el dil kau el tang.

Tela el rak er a memong, eng mla rengii a chad el ngklel a Enoch. A Dios a ulengit er a Enoch el molsisechakl a kle uchel reng el mora rechad—bebil er tirkel limis el dengerengel er tial beluulechad el mla meues.

A Enoch a omelchesiu er ngii el diak el sebechel rulii. Ng diluu er a Dios el kmo ngii a kmal ngeasek, ng diak a soal ngii, e ngii a “diak el lungil mengedecheduch” (mesa Moses 6:31).

Ngdi Dios a uldersii el mora Enoch a telbiil. Ngii a diluu er ngikal medakt el chad, “Morael mong e mketmeklii a blak duu er kau” ea “ ikel rois a mo chemiis er kau, me a reua omeuachel a modiak lomdid omerolel; e kau a di obengkek, e ngak a obengkem; meng uaisei me morael lobengkek” ( Moses 6:32, 34).

“Morael el Lobengkek.” Ng meral beot el klebokel el mengemedaol.

A Dios a yaksok er a Enoch el kmo alsekum eng ngobang a duchelreng el lomuchel, e seikid a Dios a mo bengkel ra bekl el lomrolel. A Dios a mo kutmeklii a Enoch meng mesisiich e smisichii meng mo kutmokl a lmuut el betok e ngosuir el lmuut el lengelakl er sel diak el bedesuii.

A tara ngklel a Osobel a Emmanuel, malechub a “Dios el obengked” ( Mateus 1:23). Ngara ngklel a Rubak me a blekerdelel meng merael lobengked. Tia di ior er kid—kede merael Lobengkel, el dirrek?

Chelechal taem, e ke domes el mora Enoch el chad ra klaumerang e mesisiich el profet e merredel. Ngdi nguchei ra Enoch ra bol profet, eng mla rengii a ngeasek el Enoch el lulmededenger er ngii ngdi millemolm el melilt el merael lobengkel a Dios.

Sel sekum ma klengar a meringel, sel kau a omelchesiu el kmo ke ngesonges, molatk er sel telbilel a Rubak el mora Enoch, ma e ko er kau. Ngii a mo merael lobengkem. Ngii a diak el bol chitau mel dil kau, ra bekl el blekeklem.

Emmanuel. A Dios obengked. A Dios obengkem!

Eldi uai kemiu a rengeasek el sechal, a Rubak a olengit er a Enoch el mo melketek a meklou a belkul ngerachel er a priesthood. A ngerchelel a mlo olsisechakl a ouchul reng el mora re dengerengel el chad. A Enoch a milketeklii el lou mdedenger. “Ngdi [Ngak] a direke ngeasek,” ng melekoi. “A rokui el chad a chetirir ngak … diak kungil mengedecheduch; e mekerang ak mesiungem?” ( Moses 6:31).

A Rubak a ulenger loba klisiich ma delmedemk. “Morael mong e moltirakl el ua ikal blak kulekoi er kau. … Bekengii a ngerem, e ngii a di mo mui … . A Reng er Ngak a obengkem … ; a ikel rois a mo chemiis er kau … ; Ng uaisei morael lobengkek” ( Moses 6:32, 34).

A Enoch a mlo medengei el kmo sel sekum a Rubak a meskid a ngercheled, eng diak el dil kid el tang el loltekau er ngii. Sel de ketmokl e dongeluoleu a telbiled el obengkel a Kristo, e kede merael Lobengkel e kede kaiseseuul a Klisichel—me kede mo chimal er a Urellel.

Di ua Enoch, kau a ngarngii a klou el ngerechelem: oldingel, mesiou ra templo, mengetmokl er a chedaol belsoil, mesuub ra chedaol llechukl, oltirakl a llechul a ebangkelio, ouchul, mengetmokl el kirel a mission, ma lmuut el betok. Kede omelchesiu er ngii el oberaod. Kemo melchesaur el diak el sebechem. Ngdi Ungil. Ngdiak el belkul a meruul er ngii el di kau el tang. Ng belkul a kmo ke melilt er chelechal sils—tial sils ma bekl el sils—el merael lobengkel a Dios.

Lobengkel a Ulengesuil, eng sebechem el kutmokl a rokui el tekoi. Ngii a smisichau, ousubes, e meskau a klisichem el chengelakl er a ikel ngarngii er kau. Ngii a betik a rengul er kau! Maki ngar tial Cherrengelel a re Merredel er a Rengeasek el Sechal, aki betik a rengmam er kemiu e omes el kirel sel bo dedak el mesuub er sel lulekrael el 2026 el moktek: “Morael Lobengkek.”