Dikesed er a Klengar ra Dios

2 Petrus 1:4)

Mla ra Elder David A. Bednar

Er a Chelechad er a Teruich me a Terung el Apostol

A klaodengei el kirel a uldasu er a olsobel a meskid a kesiokel el osenged, osiich a deurreng er kid, e smisichid el mo mesisiich er a ongarem me a re cherarou.

zunga ra Kristo lomekedong ra terung el mesiungel

Ngkel Apostol Petrus a milkeltkid el kmo a re mesiungel a Jesus Kristo, Ngii el “chedaol klisiich el blal beskid a rokuiel tekoi el kirel a klengar me a chedolel, lokiu ra klaudengei el kirel ngii el mla omekedong er kid el mora klebkellel me a keldung:

“El lokiu a ikel bla beskid lengelakl el meklou e kesiokel telbiil : meng ngokiu a ikang e kom mo sebechemiu el dikesed er a klengar ra Dios ” (2 Petrus 1:3–4; dmolech lomsodel lobengkel).

Uldesuel a Demad ra Babeluades a olecholt ersel lengelakl el klou e kesiokel el klemerang ma telbiil el meketeklii sel diak a ulebengelel el kmo kede techang ma moktek er kid.

El lomsodel el ngara “A Telungalk: Chais el mora Beluulechad”:

“A rokui el chad—el sechal me a redil—a ulebeob el di uai a teletelel a Dios. A dersta er tir a mekreos el ngalek er a reng el sechal me a redil el ngelekel a chedam me a chedil er a babeluades el ngarngii a chedaol teletelir ma osiolir. …

“Chelsel a klengar ruchei er a beluulechad ea rengalek er a reng el sechal me a redil a milengull er a Dios el ngii a Diak a Ulebengelel Chedam e kilengei er a Uldesuel el ngii a Rengelekel a mo nguu a bedengir er a tech e mo kiei er tial beluulechad el mo melchesuar ra klechad e merael el mo klikiid e bo lolchesiu ra chedaol osiolir el blingelir ra diak a ulebengelel el klengar.”

Demad ra Babeluades a yaksok ra Rengelekel el kmo alsekum me toltirakl a ikel llach er a Uldesuel me a okesiul a Betik er a Rengul Ngelekel, mengeluolou a llach, e outekangel ngara klaumerang el mora ulebongel, e tir a nguu a diak a ulebengelel klengar, el ngii el sengk sel kot el ngarbab er a rokui el sengk er a Dios (mesa Doctrine and Covenants 14:7).

A urellel a Dios a melutk el kirel a ngesecheklel me a ngarbab el klebkellir a Rengelekel. Bek el telengtengil a Uldesuel a keltmokl lomekngeltengat ra Rengelekel sechal ma redil le sel klungiolel a delbengir a kesiokl er a Osengel (mesa Doctrine and Covenants 18:10).

Sel Uldesuel a Chedam

Sel ongdibel el mla rengii ruchei er tial beluulechad, ea Demad ra Babeluades a ulechotii el mora Rengelekel ra reng a Uldesuel el kirel a lolngesechekl el diak a ulebengelel me a deurreng er tir.

“Kede mo rullii a beluulechad el tirkaikid a mo kiei er ngii;

“E kede mo melasem er tir el mo medengei el kmo te meruul a ikel rokui el tekoi el Rubak el Dios a kmu er tir;

“E a lsekum e te otireklii sel kot el blingelir eng mo chachisois el kirir, e a lskeum eng diak el lotireklii sel kot el blingelir eng diak a klebkellir er a osisiu el renged lobengterir tirkel tir a ultireklii a kot el blingelir, e tirkel lotireklii ongeru el blingelir, a mo ngmai a chachisois el klebkall el mora diak a ulebengelel.

“A Chedam er sera loker: Ng techang a kudureklii? Ea tang a ulenger el ua ngkel Ngelekel a Chad: Ngak tiang, modureklak. Ea kuk tang onger e melekoi: Ngak tiang, modureklak. Me a Rubak a melekoi: A kuderklii ngkel kot.

“E ngkel longerung a ngosecha rengul, e oridii a kot el blingelel; e, seikid el sils, e te betok a mlo oltirakl er ngii” (mesa Abraham 3:24–28).

Momtab el kmo ngdi mle imol luldasu a mlodars er sel chelchad er ruchei er tial beluulechad—a Uldesuel a Chedam. A Demad ra Babeluades a dimlak a tal loker el kmo, “Meng ngungil dokerang?” Ngii a dimlak losiik a uldasu, ngolengit a ngeseu, malechub e luldars a uldasu el bol lomes. Ngbai, Ngii a uldersii sel rengul a ikel ngara Uldesuel e uleker, “Ng techang a kudureklii?” A Keril a bliochel el lomtutk el kmong techang a modurokl el mo oltaut a ikel llechul ma otireklel a Uldesuel.

A ikel lomrellel a ultekengel a cherareu meng dirrek el lulcholt er a chedaol lechukl.

“Meng uaisei, leng Diablong lulemtok er ngak, e ulsiik el melmall er a llemeltel a chad , el ngak … a mla nguu el msang, e dirrek, el sebechek el msang a klisichek … , meng nguchul mak dilebeklii;

E ngii a mlo Satan, … ngkel diablong, ng demal a rokui el cheleblad, el mo mulak e mengeuid er a rechad, e mo olkebai er tir el mo sibil a ikel soal, molmuut er tirkel lobdois el diak lorenges er ngak (mesa Moses 4:3–4; smisichii a belkul).

A Lucifer a dimlak el lodersii a uldaseu el blol le kengei er ngii a rubdois er tirkel mlara uchelel ruchei ra beluulechad. Ngii a diak el ubechubechad e chad el mlo mechitechut er a omelilt. Ngii a ulemtok! Di ngii el chemat er ngii, kedidai a rengul, el diak a ngodech ngdi ngii a uremelii meng mlo omtok er a uldesuel a Chedam.

A Uldesuel a Chedam me a Ebangkelio er a Osobel.

A uldaseu a olecholt er a urellel a Chedam me a Ngalk el rullii meng ngarngii el mora re bekl el chad a ikel klengeltengat er a diak a ulebengelel klengar.

A ebangkelio ra Jesus Kristo a oterkeklii a rael el ngii a sebeched el ngmai a ikel klengeltengat el miltib er sel uldesuel a Dios, mo lmuut er a suobel, osisechakl, chedaol ruol, me a telbiil el re sechal ma redil a kirir loumerang e oltirakl. Ngdiak a ngodech el ngakl mlodars el mlara babeluades ngdi tal Jesus Kristo … el chad a sebechel el mo suobel (mesa2 Nephi 25:20). Klemerang, a Rubak el Jesus Kristo a “rael, e klemerang, e klengar: meng diak a chad el mo er a Chedam, a lak lokiu [Ngii]” (Johanes 14:6; smisichii a belkul).

President Russell M. Nelson a smodii:

“A uldasu a kirel morngii a Omeob, e okiu seikid eng kuk kirel morngii sel Rebet me a Tngakireng. A ikaikid a ikel kldei el terebel er sel luchetemel sel luldasu. Ng blebelel a klebokel el beluulechad el mlara Dios. Klengar ma kodall a mlei el mera beluulechad el lokiu ersel Rebetel a Adam [mesa 2 Nephi 2:25; Moses 6:48]. Di ngar el mo cherechar me a techall ra diak a ulebengelel klengar a mlo rengii lokiu ers el Tngakireng ra Jesus Kristo [mesa 2 Nephi 2:21–28]. …

“… Kede mei ra beluulechad el di telkib el taem, otekangel a skeng ma ongarem, e mengetmokl el merael bedul luchei el ngoriakl el mora klebokel el blid [mesa Psalm 116:15; Alma 42:8]. A uldesued me a omroled sel de [ngara tial klechad] a ultebechel el lmuut elmo klebechel alsekum me kede medengelii a uldesuel a Dios mereng a saul e oltirakl a Lechul [mesa Doctrine and Covenants 59:20–21].

Lechukl er sel Luldasu el ngara Babier er a Mormon

Kede mesuub a meklou el klemerang sel dosiik e dosuub a betok el kakerous el lechukl el kirel a uldesuel a Chedam ers el Babier ra Mormon: Tara Ouchais er a Jesus Kristo. Ua tial lokesiu, momdasu a ikakid el mla mengilt el bebil er a tekoi:

“Sel chubechub el luldesuel a klou el Lulmeob” (2 Nephi 9:6).

“Sel luldesuel a Dios er kid” (2 Nephi 9:13).

“A uldasu el lolsobel” ( Jarom 1:2; Alma 24:14).

“A uldasu ra okisel a kodall” ( Alma 12:25, 26, 30, 32, 33; 42:11, 13).

“A uldasu er a olutel a ebangkelio” ( Alma 41:2).

“A uldasu er a deurreng” ( Alma 42:16).

“A klou luldasu el kirel a klubechub” ( Alma 42:31).

A derta ra ikal lechukl a ngosukid el mo ungil medengei a ikel kesiokel el telbiil el kirel uldesuel a Chedam e smisiich osenged el kirel a moktek me a belkul a klengar er kid er tial klechad.

Ng klou a ututelel, sel blechoel mekedekudem el lousbech er ngii el lechukl el kirel a uldesuel a Dios er a Babier ra Mormon a melutk er sel okisel a kodall el mlo sebechel lokiu er a Tngakireng ra Jesus Kristo.

A Alma a milketeklii, “Alsekum eng mlo diak a rolel e kid a mo suobel, eldi mla mekedmokl er a uchelel a beluulechad, eng mlo diak le bor ngii okiis er a kodall er a re mla mad; engdi mla rengii a uldasu ra okisel a kodall el keltmokl, el ngii a mo uchul okiis er a kodall ra re mla mad” ( Alma 12:25).

A Alma millekoi el kmo el kmo momuchel el mo oumera er a Ngelekel a Dios, el kmo ng mei el me olsobel er a rechedal, e mo chemau a ringel e mo er a kodall el tngakireng er a kengterir; e dirrek el mo mekiis er a kodall, el mo uchul okisel a kodall, me a rokui el chad bol dechor medal, e le mukerkeriil er sel klou el kerkeriil loltirakl a urerir (Alma 33:22).

A Rael a Keltmokl.

A delbenged a kirel mo mui er a omereng el saul sel domtab er a uldesuel a Dios lolsobel, okisel a kodall, olutel ebangekelio, klubechub, ma deurreng. Klemedengei ra Uldesuel a odars a kesiokel el luldasu, smisiich a deurreng er kid, smisichid el ngoriakl er a ongarem me a re cherarou.

Demad er a Babeluades oureng me deluut el mo remei el mo re Ngii. Ngii a siotai e yaksok a klengeltengat, ngdi Ngii a diak el sebechel lorrimel, lolsarech, malechub el lorob er kid el louedikel er sel lemelted ra klechad el Ngii a mileskid. Ng kired louedikel e melilt el lemuut el mo re Ngii sel doltirakl er sel lokesiul a Betik ra Rengul Ngelekel.

sunga ra chimal a ngalk loldars er ngii el mora chimal a Jesus Kristo

“ A rael a keltmokl, ea lsekum e kede omes eng sebeched el ngar el mo ra ulebongel” ( Alma 37:46; smisichii a belkul).

Ak dmeu a renguk el sioning el kmo Demad ra Babeluades ea milchelii sel chedaol luldasu el kirel a Rengelekel. A Jesus Kristo a Okised ra Kodall e Osobeled. Me ngak el tara Apostol ra Rubak er tial uriul-klebesei, e ak sioning el kmo Ngii “a rael, e klemerang, e klengar” ( Johanes 14:6; smisichii a belkul).