Makipagnakayo Kaniak

Naidawat kadin kadakayo nga agaramid iti maysa a banag a panagkunayo ket saanyo a kabaelan? Nalabit a dikayo nakarikna iti pigsa wenno sirib, wenno madanagankayo a katawaan wenno dillawennakayo dagiti dadduma. No nariknayon ti kastoy, saankayo nga agmaymaysa.

Rinibu a tawenen ti napalabas, adda lalaki nga agnagan Enoc. Kiniddaw ti Dios ken ni Enoc nga ikasabana ti panagbabawi kadagiti tao—sumagmamano kadagiti kadadaksan a nakita pay laeng ti daga.

Saan nga impagarup ni Enoc a kabaelanna nga aramiden daytoy. Imbagana iti Dios nga ubing pay unay, awan ti nanggusto kenkuana, ken “nabuntog nga agsasao” (kitaen iti Moises 6:31).

Ngem nangted ti Dios ken ni Enoc iti maysa a kari. Imbagana iti nagbuteng a lalaki, “Mapanka ket aramidem ti kas iti imbilinko kenka” ket umadayo dagiti bantay kadakayo, ken agbaliw ti ayus dagiti karayan; ket agtungpalkayo kaniak, ken siak kadakayo; ngarud surotendak” (Moises 6:32, 34).

“Makipagnakayo kaniak.” Anian a maysa a simple, napintas nga awis.

Inkari ti Dios ken ni Enoc a no natured a mangrugi, kaduana ngarud ti Dios iti tunggal addang ti dalan. Aramiden ti Dios a napigsa ni Enoc ken pabilgenna nga agaramid iti ad-adu pay ken tulonganna nga agbalin nga ad-adda pay ngem iti mapanunotna.

Maysa kadagiti adu a nagan ti Mangisalakan ket ni Emmanuel, wenno “Dios a kaduatayo” (Mateo 1:23). Adda iti nagan ken kinatao ti Apo a makipagna kadatayo. Datayo ti agpili—makipagnatayo kadi met Kenkuana?

Kadagitoy nga aldaw, kitaentayo ni Enoc kas maysa a tao nga addaan pammati ken maysa a naindaklan a propeta ken lider. Ngem sakbay ni Enoc a propeta, adda ub-ubing nga Enoc a nagduadua iti bagina ngem pinilina latta ti makipagna iti Dios.

No narigat ti biag, no mariknayo a kasla saankayo nga umdas, laglagipenyo ti kari ti Apo ken ni Enoc, ken kadakayo. Makipagna Isuna kadakayo. “Dinakayto baybay-an nga agmaymaysa, saan iti maysa nga addang.

Emmanuel. Adda kadatayo ti Dios. Adda kadakayo ti Dios!

Kas kadakayo nga agtutubo a lallaki, kiniddaw ti Apo ken ni Enoc a tungpalenna dagiti napateg a pagrebbengan iti priesthood. Trabahona ti mangikasaba iti panagbabawi iti maysa a nadangkes a tattao. Impeksa ni Enoc dagiti panagduaduana. “[Maysaak] laeng nga agtutubo,” kinunana. “Kaguradak amin dagiti tao … nabuntogak nga agsasao; gapuna siak kadi ti katulongam?” (Moises 6:31).

Simmungbat ti Apo nga addaan bileg ken pammatalged. “Mapanka ket aramidem ti kas iti imbilinko kenka. … Luktam dayta ngiwatmo ket mapnonto … . Adda kadakayo ti Espirituk … ; umadayo dagiti bantay kadakayo … ; ngarud surotendak” (Moises 6:32, 34).

Nasursuro ni Enoc a no ikkannatayo ti Apo iti maysa a trabaho, saantayo nga agmaymaysa a sanguen daytoy. No agaramid ken agtungpaltayo kadagiti katulagan ken ni Cristo, makipagnatayo Kenkuana ken makiramantayo iti pannakabalinna—agbalintayo a ramit kadagiti imana.

Kas ken ni Enoc, addaankayo iti napateg nga akem: ministering, panagserbi iti templo, panangannong iti sakramento, panagadal kadagiti nasantuan a kasuratan, panagbiag kadagiti pagrukodan ti ebanghelio, panagbabawi, panagsagana para kadagiti mision, ken dadduma pay. Mabalin a marikna a makatalipupos daytoy. Mabalin a mariknayo a saankayo nga umdas. OK dayta. Saan a maipapan daytoy iti panagaramid a dakdakayo. Maipapan daytoy iti panagpili ita—ita nga aldaw ken inaldaw—a makipagna iti Dios.

Addaan iti tulongna, maaramidtayo ti amin a banag. Papigsaen, pakawanen, ken pagbalinennakayo a makabael iti labes ti gagangay a kabaelanyo. Ay-ayatennakayo! Kas Sapasap a Panguluen ti Young Men, ay-ayatendakayo ken a makaduadakayo iti panangsukisok iti makaparegta a tema ti 2026: “Makipagnakayo Kaniak.”