Dagiti Makiranud iti Nadiosan a Kababalin

Iti konseho sakbay ti pannakaiyanak, indatag ti Nailangitan nga Ama kadagiti espiritu nga annakna ti planona para iti agnanayon a panagdur-as ken ragsakda.

“Mangaramidta iti daga a mabalin a pagnaedan dagitoy;

“Subokentayo ida iti daytoy,” kinuna ti Apo, “ta kitaentayo no aramidenda amin a banag nga ibilin kadakuada ti Apo a Diosda.”

“Ket dagiti agtalinaed iti immuna a kasasaadda manayonandanto; ket dagiti saan nga agtalinaed iti immuna a kasasaadda awanto ti gloriada iti isu met la a pagarian dagiti agtalinaed iti immuna a kasasaadda; ket dagiti agtalinaed iti maikadua a kasasaadda addanto gloria a mainayon iti uloda iti agnanayon nga awan inggana.

“Ket kinuna ti Apo: Asino ti ibaonko? Ket adda maysa a simmungbat a kasla Anak ti Tao: Adtoyak, ibaonnak. Ket sabali pay ti simmungbat a nagkuna: Adtoyak, ibaonnak. Ket kinuna ti Apo: Ibaonko ti immun-una.

“Ket nakapungtot ti maikadua, ket saanna a pinagtalinaed ti immuna a kasasaadna; ket iti dayta nga aldaw, adu ti simmurot kenkuana” (Abraham 3:24–28).

Kitaen a maysa laeng a plano ti naidatag iti konseho sakbay ti ipapatay—ti plano ti Ama. Saan nga indatag ti Nailangitan nga Amatayo ti saludsod, “Ania ti aramidentayo?” Saan a nagkalikagum iti input, nagkiddaw kadagiti rekomendasion, wenno nagkiddaw kadagiti singasing. Ngem ketdi, indatagna dagiti kangrunaan nga elemento ti planona ket nagsaludsod, “Siasino ti ibaonko?” Ti kaipapanan ti saludsodna ket naipamaysa no siasino ti rumbeng a maibaon a mangipatungpal kadagiti termino ken kondision ti planona.

Nailadawan met kadagiti nasantuan a kasuratan dagiti pagbanagan ti panagalsa ti kabusor.

Gapuna, gapu ta immalsa kaniak ni Satanas, ket pinanggepna a dadaelen ti kinawaya ti tao nga agpili, nga intedko … kenkuana, siak, ti Apo a Dios, ken kasta met nga itedko kenkuana ti bilegko … , imbilinko a nasken a mapapanaw;

“Ket nagbalin a Satanas, … ti sairo, ti ama ti amin a kinaulbod, a mangallilaw ken mangbulsek kadagiti tao, ken mangitunda kadakuada a balud iti pagayatanna, a kas iti kaadu dagiti saan a dumngeg iti timekko” (Moises 4:3–4; nainayon ti panangyunay-unay).

Saan nga indatag ni Lucifer ti maysa a plano a binutosan ti kaaduan kadagiti nakiraman iti konseho sakbay daytoy a biag. Saan isuna a mannakipagrikna a pigura a naabak iti maysa nga eleksion. Nagalsa isuna! Ti kinatangsit, kinapannakkel, ken kinamanagimbubukod ti nangtignay iti panagalsana a maibusor iti plano ti Ama.

Iladawan ti plano dagiti aramid ti Ama ken ti Anak a mamangbalin a sidadaan a magun-odan iti amin a sangkataw-an dagiti bendision ti agnanayon a biag.

Ti ebanghelio ni Jesucristo ti mangbukel iti wagas a pakaawatantayo kadagiti bendision a naikari iti plano ti Dios, uray dagiti doktrina, prinsipio, ordinansa, ken katulagan a nasken a patien ken suroten dagiti lallaki ken babbai. “Awan ti sabali a nagan a naited iti baba ti langit no saan a daytoy Jesucristo … a pakaisalakanan ti tao” (2 Nephi 25:20). Pudno ni Apo Jesucristo isu, “ti dalan, ti kinapudno, ken ti biag: awan ti umay iti Ama, no di babaen [Kenkuana]” (Juan 14:6; nainayon ti panangyunay-unay).

Inlawlawag ni Presidente Russell M. Nelson:

“Kinasapulan iti plano ti Panagparsua, ket dayta met ti kinasapulan agpadpada ti Pannakatnag ken ti Pannubbot. Dagitoy ti tallo a kangrunaan a paset ti plano. Naggapu iti Dios ti pannakaparsua ti paraiso a planeta. Immay ti mortalidad ken ipapatay ditoy lubong babaen ti Pannakatnag ni Adan [kitaen iti 2 Nephi 2:25; Moises 6:48]. Ti imortalidad ken ti posibilidad ti biag nga agnanayon ket impaay ti Pannubbot ni Jesucristo [kitaen iti 2 Nephi 2:21–28]. …

“… Umaytayo ditoy daga iti apagbiit a panawen, ibturantayo dagiti pannakasuot ken pannuboktayo, ken agsaganatayo nga agtignay nga agpasango ken agpangato iti nadayag a panagawid [kitaen iti Salmo 116:15; Alma 42:8]. Awan duadua a napangpanggepan dagiti pampanunot ken aramidtayo kabayatan [iti mortalidad] no maawatantayo ti plano ti Dios ken managyaman ken managtulnogtayo kadagiti bilinna [kitaen iti Doktrina ken Katulagan 59:20–21].”

Masursurotayo dagiti napateg a kinapudno babaen ti panangilasin ken panangadal kadagiti adu a nagduduma a paulo para iti plano ti Ama iti Libro ni Mormon: Maysa Pay a Pammaneknek ken ni Jesucristo. Kas pagarigan, ibilangyo dagiti sumaganad a napili a pagarigan dagiti paulo:

“Ti plano ti naindaklan a Namarsua” (2 Nephi 9:6).

“Ti plano ti Diostayo” (2 Nephi 9:13).

“Ti plano ti pannakaisalakan” (Jarom 1:2; Alma 24:14).

“Ti plano ti pannakasubbot” (Alma 12:25, 26, 30, 32, 33; 42:11, 13).

“Ti plano ti pannakaisubli” (Alma 41:2).

“Ti plano ti ragsak”(Alma 42:16).

“Ti naindaklan a plano ti asi” (Alma 42:31).

Tunggal maysa kadagitoy a paulo tulongannatayo a makaawat a nalawag kadagiti napateg a kari ti plano ti Ama ken mangpabaknang iti pannirigantayo maipapan kadagiti panggep ken kaipapanan ti mortal a biagtayo.

Ti nakapatpateg, ti masansan a maus-usar a paulo para iti plano ti Dios iti Libro ni Mormon ket naipamaysa iti pannakasubbot a naaramid a posible babaen ti Pannubbot ni Jesucristo.

Impakdaar ni Alma, “No saan a gapu iti plano ti pannakasubbot, a naisaad manipud iti punganay ti lubong, awan koma ti panagungar ti natay; ngem adda naisaad a plano ti pannakasubbot, a mangipatungpal iti nasaon a panagungar dagiti natay” (Alma 12:25).

Imbalakadna pay, “Mangrugikayo a mamati iti Anak ti Dios, nga umayto a mangsubbot kadagiti taona, ken agrigatto ken matay a mangsubbot iti basbasolda; ken agungarto manen kadagiti natay, a mangipatungpal iti panagungar, a sumaklangto amin a tao kenkuana, tapno maukom iti maudi ken aldaw a panangukom, a maibatay kadagiti aramidda” (Alma 33:22).

Nasken a dumakkel dagiti kararuatayo iti panagyaman bayat ti panangibilangtayo iti naindaklan a plano ti Dios iti pannakaisalakan, pannakasubbot, pannakaisubli, asi, ken ragsak. Ti pannakaammo iti planona ket mangipaay iti napateg a panirigan, mangpabaknang kadagiti rag-otayo, ken mangpapigsa kadatayo a mangparmek kadagiti karit ken rigattayo.

Tarigagayan ti Nailangitan nga Ama nga agawidtayo Kenkuana. Yawis ken ikarina dagiti bendision, ngem iti kaano man a dinanto ipilit, yobliga, wenno lapdan ti panangaramattayo iti kapabilidad ti moral a karbengan nga agpili nga intedna kadatayo. Nasken nga agtignay ken pilientayo ti agsubli Kenkuana babaen ti panangsurot iti pagwadan ti Ay-ayatenna nga Anak.

Nakaunnat Latta ti Imana, ni Elizabeth Thayer

“Ti dalan ket maisagana, no kumitatayo mabalintayo ti agbiag iti agnanayon (Alma 37:46; nainayon ti panangyunay-unay).

Sirarag-o a masaksiak a ti Nailangitan nga Ama ti akin-aramid iti nadiosan a plano para kadagiti annakna. Ni Jesucristo ti Mangisalakan ken Mannubbottayo. Ket kas maysa kadagiti Apostol ti Apo iti ud-udina nga aldaw, masaksiak nga Isu ket pudno a “ti dalan, ti kinapudno, ken ti biag” (Juan 14:6; nainayon ti panangyunay-unay).