Bakaboli ya Lolenge ya Bonzambe

Na likita yambo ya mbotama, Tata na Lola alakisaki na bana na Ye ya molimo mwango na Ye mpo na bokoli mpe esengo na bango ya seko.

“Tokosala mabele oyo bato oyo bakoki kofanda;

“Mpe tokomeka bango awa na yango, mpo na kotala soki bakosala makambo manso oyo Nkolo Nzambe na bango akotinda bango;

“Mpe boayo bakobomba lolenge na bango ya yambo bakobakisama likolo, mpe baoyo bakobomba lolenge na bango ya yambo te bakozwa nkembo na bokonzi na baoyo babombi lolenge na bango ya yambo te; mpe baoyo bakobomba lolenge na bango ya mibale bakobakisa nkembo likolo ya mito na bango seko na seko.

“Mpe Nkolo alobaki: “Nani nakotinda?” Mpe moko lokola Mwana na moto ayanolaki: Ngai oyo, tinda ngai Mpe mosusu azongisaki maloba mpe alobaki: Ngai oyo, tinda ngai. Mpe Nkolo alobaki: Nakotinda ya yambo.

“Mpe ya mibale azalaki na nkanda, mpe abatelaki te bozali na ye ya yambo; mpe, uta mokolo wana, mingi balandaki ye” (Abalayama 3:24–28).

Boyeba ete kaka mwango moko elakisamaki na likita yambo ya mbotama—mwango ya Tata Tata na biso na Lola atunaki motuna te, “Nini tokosala?” Alukaki te makanisi, asengaki batoli te, to alukaki mayele ya bato te. Na esika yango, alakisaki makambo ya motuya ya mwango na Ye mpe atunaki, “Nani nakotinda?” Mayele ya motuya na Ye efandi likolo ya nani asengi kotindama mpo na kokokisa mibeko mpe makambo ya mwango na Ye.

Bambano ya botomboki ya monguna elimbolami lisusu kati na makomi.

“Yango wana, mpo na ntina wana Satana atombokaki na ngai, mpe alukaki kobebisa nguya ya ya kosala ya moto, oyo ngai napesaki ye, mpe lisusu, ete nasengeli kopesa ye nguya ya ngai moko , natindaki ete asengeli kobwakama na nse;

“Mpe akomaki Satana, zabulu, tata ya lokuta nyonso, mpo na kokosa mpe kozipa bato miso, mpe komema bango bakangemi na bolingi na ye, kutu mingi lokola bakoyoka mongongo na ngai te” (Mose 4: 3– 4; nsete ebetami).

Lusifelo alakisaki mwango moko te oyo endimamaki na bayi likita yambo ya mbotama. Azali te elongi ya kosepela ya moto oyo akweyi na maponami. Atombokaki! Lolendo, yauli, mpe moyimi atindaki botomboki na ye kotelemela mwango ya Tata.

Mwango elimboli mosala ya Tata mpe Mwana oyo epesi na bato nyonso mapamboli ya bomoi ya seko.

Nsango Malamu ya Yesu Klisto ekokisi nzela wapi tokoki kozwa mapamboli elakama kati na mwango ya Nzambe, ezala malongi, mabongi, makuli, mpe mayokani mibali mpe basi basengeli kondimela mpe kolanda. “Nkombo mosusu ezali te oyo epesami na nse ya lola, longola se soki ezali Yesu Klisto … na oyo kani moto akoki kobikisama” (2 Nefi 25:20). Solo, Nkolo Yesu Klisto azali, “nzela, bosolo, mpe bomoi: moto moko te akoki kokende epai ya Tata soki na [Ye] te” (Yoane 14:6; nsete ebetami).

Mokambi Russell M. Nelson alimbolaki:

“Mwango esengi Bokeli, mpe ete na ngala na yango esengaki ezala Bokweisami mpe Bomikabi. Wana ezali makambo misato ya moboko ya mwango yango. Bokeli ya mokili ya lolenge ya paradiso ewutaki na Nzambe. Liwa mpe bokufi ewutaki na bokweisami ya Adama na Ewa [botala 2 Nefi 2:25; Mose 6:48]. Bozangi kufa mpe libaku ya bomoi ya seko epesamaki na Bomikabi ya Yesu Klisto [botala 2 Nefi 2:21–28]. …

“… Toyaki na mabele mpo na ntango ya mokuse, kolonga mimekano mpe minyoko, mpe tomilengela mpo na kokende liboso mpe likolo na bozongi ndako ya nkembo [botala Njembo 116:15; Alama 42:8]. Makanisi mpe misala na biso [na kufa] kati na bomoi na biso na mabele ekozala na ndimbola soki tososoli mwango ya Nzambe mpe soki tozali na botondi mpe limemya na mitindo na Ye [botala Malongi mpe Mayokani 59:20–21].”

Tososoli bosolo ya motuya na kobimisaka mpe koyekolaka bankombo mingi ekeseni mpo na mwango ya Tata kati na Buku ya Mormon: Kondimana mosusu ya Yesu Klisto. Mpo na ndakisa, botala bankombo elandi oyo eponami:

“Mwango etonda na boboto ya Mokeli monene” (2 Nefi 9:6).

“Mwango ya Nzambe na biso” (2 Nefi 9:13).

“Mwango ya lobiko” (Jarom 1:2; Alma 24:14).

“Mwango ya lisiiko” (Alma 12:25, 26, 30, 32, 33; 42:11, 13).

“Mwango ya bozongisi” (Alma 41:2).

“Mwango ya esengo” (Alma 42:16).

“Mwango monene ya boboto” (Alma 42:31).

Nkombo moko na moko oyo esalisaka biso tososola mingi koleka bilaka ya motuya ya mwango ya Tata mpe ezali kokolisa makanisi na biso na ntina na mikano mpe ntina ya bomoi na biso ya kufa.

Likambo ya ntina, nkombo oyo esalelamaka mingi mpo na mwango ya Nzambe na Buku ya Mormon etali mingi bosikoli oyo esalemaki na nzela ya Bomikabi ya Yesu Klisto.

Alma atatoli, “ Soki ezalaka te mwango ya bosikoli te, oyo etiamaki uta na bokelami ya mokili, elingaki kozala te bosekwi bwa bakufi. Kasi etiami mwango moko ya bosikoli, oyo ekomema esalema bosekwi ya bakufi” (Alma 12:25).

Apesaki lisusu toli “Bobanda kondima na Mwana ya Nzambe, ete akoya kosikola bato na ye, mpe ete akoyoka mpasi mpe akokufa mpo na komikaba mpo ya masumu na bango; mpe ete akolamuka lisusu uta na bakufi, oyo ekomema bosekwi esalema, ete bato nyonso bakotelema liboso na ye, mpo ya kosambisama na mokolo ya nsuka mpe ya bosambisi, engebene na misala na bango.” (Alama 33:22).

Milimo na biso esengeli etondisama na botondi ntango tozali kotalela mwango monene ya Nzambe ya lobiko, bosikoli, bozongisi, boboto, mpe esengo. Boyebi ya mwango na Ye epesaka makanisi ya motuya, epesaka esengo na bisengo na biso, mpe elendisaka biso mpo na kolonga mikakatano mpe mitungisi na biso.

Tata na Lola azali na mposa makasi ete biso tozonga na ndako epayi na Ye. Abengisi mpe alaki mapamboli, kasi akotinda na makasi ata moke te, akobundisa, to akopekisa te kosalela nguya ya ya kosala ya bomoto oyo Apesaki biso. Tosengeli kosala mpe kopona kozongela Ye na kolandaka ndakisa ya Mwana na Ye ya Bolingo.

His Hand Is Stretched Out Still [Loboko na Ye Ezali Ntango nyonso ya Kosembolama], na Elizabeth Thayer

“Nzela elengelami, mpe soki tokotala yango tokoki kozala na bomoi libela” (Alama 37:46; nsete ebetami).

Natatoli na esengo ete Tata na Lola azali kolo mwango ya bonzambe mpo na bana na Ye. Yesu Klisto azali Mosikoli mpe Mobikisi na biso. Mpe lokola moko ya Bapostolo ya Nkolo ya mikolo mya nsuka, natatoli ete Azali solo mpenza “ nzela, solo, mpe bomoi” (Yoane 14:6; nsete ebetami).