Nyame Su Adzedzifo

(2 Peter 1:4)

Elder David A. Bednar ne Kasaa

Ɔkã Asomafo Duebien no hɔn Quorum no ho

Nkwagye nhyehyɛɛ no ho nyimdzee ma hɛn nhumu a ɔsom bo, ɔma hɛn enyigye hyɛ mã, na ɔhyɛ hɛn dzen ma yedzi hɛn haw na abɛbrɛsɛ do.

Mfonyin a ɔda Christ a Ɔrefrɛ esũafo beenu edzi

Ɔsomafo Peter kaa hɛn dɛ Jesus Christ n’esuafo dze, dɛ mbrɛ Ne “Nyame ahoɔdzen dze ndzɛmba nyina a ɔfa nkwa na nyamesom,, ho ama hɛn, wɔ nyia ɔnam nankasa n’enyimnyam nye ne yieyɛ do afrɛ hɛn no, noho nyimdzee mu:

“Ɔnoara no do na ɔnam akyɛ hɛn n’anohoba a ɔsõso akɛse akɛse a ɔsõm bo: dɛ hom edua iyinom do enya Nyame suban no bi” (2 Peter 1:3–4; oetsim akã ho).

Ɔsor Egya Ne nhyehyɛɛ no kyerɛkyerɛ nokwarsɛm akɛse a ɔsom bo na bɔhyɛ ahorow a ɔkyerɛ hɛn onnyiewiei su na botae.

Dɛ mbrɛ wɔakyerɛ ase wɔ “Ebusua no: Dawubɔ ma Wiadze” mu no:

“Nyimpa nyinara—mbanyin na mbaa—wɔbɔɔ hɔn wɔ Nyankopɔn no su do. Kor biara yɛ sor awofo hɔn sunsum dɔba banyin anaa dɔba ɔbaa, na dɛm ntsi, kor biara wɔ Nyame suban na nkrabea. …

“Wɔ abrabɔ ansaana nyimpa reba asaase gyinabew mu no, nna sunsum mbabanyin na mbabaa nyim na wɔsoom Nyankopɔn dɛ hɔn Onnyiewiei Egya, na wɔgyee Ne nhyehyɛɛ a Ne mba botum edua do enya nyimpadua na woenya asaase do sũahu dze enya kan kɔ wɔ emudzi mu, na ewiei no, obiara enya no krɔnkrɔn nkrabea dɛ onnyiewiei adzedzinyi no, too mu.”

Nyame bɔ Ne mba anohoba dɛ sɛ wɔfa Ne nhyehyɛɛ kwan no na ɔnye No Dɔba ne fasusu no, dzi mbrasɛm no do, na wotsim wɔ gyedzi mu kodu ewiei no, a “wobenya onnyiewiei nkwa, akyɛdze a ɔsõ sen Nyame n’akyɛdze nyina.’’ (Nkyerɛkyerɛ na Ahyɛmudzi 14:7).

Nyankopɔn n’edwuma no tsim Ne mba hɔn kankɔ na nkwagye ntowdo do. Ne nhyehyɛɛ ne fa biara no wɔayɛ no dɛ obehyira Ne mbabanyin na mbabaa osiandɛ “akra som bo kɛse wɔ Nyame enyim” (Nkyerɛkyerɛ na Ahyɛmudzi 18:10).

Egya Ne Nhyehyɛɛ no

Ɔsor baguabɔ ansaana yɛreba asaase do mu no, Ɔsor Egya dze Ne nhyehyɛɛ ma hɔn onyiwiei kankɔ na enyigye too N’esunsum mba enyim.

“Yɛbɛyɛ asaase ama iyinom aatsena do;

“Na yɛbɔsɔ hɔn ahwɛ, sɛ wɔbɛyɛ ndzɛmba nyinara a Ewuradze hɔn Nyankopɔn bɛhyɛ hɔn ho mbra no;

“Na hɔn a wosie hɔn asetsena a odzi kan no wɔdze enyimnyam bi bɛkã hɔn ho, na hɔn a wonnsie hɔn asetsena a odzi kan no nnkenya enyimnyam wɔ dɛm ahenman kor noara mu dɛ hɔn a wosie hɔn asetsena a odzi kan no; na hɔn a wosie hɔn asetsena a otsĩa ebien no wɔdze enyimnyam bogu hɔn etsir do afebɔɔ kesi afebɔɔ.

”Na Ewuradze see dɛ: Woana na mobɔsoma no? Na kor bi a ɔtse dɛ Nyimpa Ba no yii ano dɛ: Emi nye yi, soma me. Na kor so yii ano na ɔsee dɛ: Emi nye yi soma me. Na Ewuradze see dɛ: Mobɔsoma dza odzi kan no.

“Na nyia otsĩa ebien no no bo fuwii, na oennsie n’asetsena a odzi kan no; na, dɛm da no, dodowara kãa no do” (Abraham 3:24–28).

Hyɛ no nsew dɛ nhyehyɛɛ kor pɛ na wɔda no edzi wɔ ɔsor baguabɔ ansaana yɛreba asaase no—Egya Ne Nhyehyɛɛ no. Hɛn Ɔsor Egya emmbisa asɛmbisa, “Ebɛnadze na yɛbɛyɛ?” Ɔannhwehwɛ adwenkyerɛ, nkamfo, anaa nsusui ahorow . Mbom, ɔdze ndzɛmba tsitsir a ɔwɔ Ne nhyehyɛɛ mu no too gua bisaa dɛ, “Woana na mobɔsoma no?” N’asɛmbisa no tsitsir no twee adwen sii nyia a ɔwɔ dɛ wɔsoma no ma ɔdze nhyehyɛɛ no ho mbra na nhyehyɛɛ dzi dwuma do.

Wɔakyerɛkyerɛ nsunsuando a ɔwɔ tamfo n’etuatsew ho wɔ kyerɛwsɛm no mu.

Dɛm ntsi, osiandɛ dɛm Satan no tseew etua wɔ mo do no, na ɔpɛɛ dɛ ɔsɛɛ nyimpa ne pɛ no, a Emi … dze ama no no, na dɛ, memfa mankasa mo tum so mma no no … , me maa wɔtoow no kyeen famu;

“Na ɔbɛyɛɛ Satan, … abɔnsam mpo, akohwi nyinara egya, dɛ ɔndaadaa na ɔmfura adasa hɔn enyi, na ongya hɔn nkɔ ndɔmmum mu dɛ mbrɛ ɔpɛ, dodowara a wonnketsie me ndze mpo” (Moses 4:3–4; woetsim aka ho).

Lucifer annyɛ nhyehyɛɛ a ɔdze too gua ma nyimpa dodowara a wɔwɔ ɔsor baguabɔ ansaana yɛreba asaase no tow amba tsiae. Ɔnnyɛ obi a oedzi abatow ho nkogu ma no ho ayɛ mbɔbɔr. Ɔtseew etua! Ahantanyɛ, ahomemado, na pɛsɛankonya na okenyan no ma ɔtseew etua tsiaa Egya Ne Nhyehyɛɛ no.

Egya Ne Nhyehyɛɛ no na Agyenkwa N’asɛmpa no

Nhyehyɛɛ no kyerɛkyerɛ Egya no na Ɔba no ndwuma a ɔma nyimpa nyinara onnyiewiei nkwa nhyira no.

Jesus Christ N’asɛmpa no kyerɛ kwan a yebotum enya nhyira a wɔahyɛ ho bɔ wɔ Nyankopɔn Ne nhyehyɛɛ mu, mpo nkyerɛkyerɛ, fapem horow, ayɛdze, na ahyɛmudzi horow a ɔwɔ dɛ mbanyin na mbaa gye dzi na wodzi do. “Dzin biara nnyi hɔ a wɔdze ama wiadzemba gye dɛ dɛm Jesus Christ yi … no do na wɔnam bɛgye adasa nkwa” (2 Nephi 25:20). Nokwar, Ewuradze Jesus Christ nye “ɔkwan no, nye nokwar no, nye nkwa no; obi mmba Egya no hɔ, gyedɛ ɔnam [No] do” (John 14:6; woetsim akã ho).

President Russell M. Nelson kyerɛkyerɛɛ mu dɛ:

“Nhyehyɛɛ no hia dɛ abɔdze no ba, na ɔno so hia Nhwe ase na Werdambɔ no nyinara. Iyinom nye fapem ebiasa a ɔkã nhyehyɛɛ no ho. Paradise wiadze no mbɔe fi Nyankopɔn hɔ. Ɔnam Adam N’asehwe do na ɔnnkyebo asetsena na owu baa wiadze [hwɛ 2 Nephi 2:25; Moses 6:48]. Jesus Christ No Werdambɔ no na ɔmaa ɔnnkyebo asetsena na onnyiewiei nkwa obotum aba no yɛɛ yie [hwɛ 2 Nephi 2:21–28]. …

“… Yɛba asaase do mber kakra ara, yɛsɔw hɛn nsɔhwɛ na ɔhaw horow, na yesiesie hɛn ho akɔ enyim na sor fie enyimnyam mu.[hwɛ Ndwom 116:15; Alma 42:8]. Hɛn adwendwen na ndzeyɛɛ ber a [yɛwɔ ɔnnkyebo asetsena mu] bɛyɛ adze a botae wɔ mu kɛse sɛ yɛtse Nyankopɔn Ne nhyehyɛɛ ase na hɛn enyisɔ na yɛyɛ setie ma Ne mbrasɛm a [hwɛ Nkyerɛkyerɛ na Ahyɛmudzi 59:20–21].”

Nhyehyɛ ne dzin ahorow a ɔwɔ Mormon Nwoma no mu

Yesũa nokwar a ho hia ber a yehu na yesũa Egya Ne Nhyehyɛɛ ne dzin ahorow a ɔwɔ Mormon Nwoma no mu: Jesus Christ N’Ahyɛmu Kor so. Mfatoho, dwendwen nhwɛdo ahorow a wɔapaw a odzi do yi:

“Bɔadze kokroko n’ehumbɔbɔr nhyehyɛɛ no” (2 Nephi 9:6).

“Hɛn Nyankopɔn ne nhyehyɛɛ no” (2 Nephi 9:13).

”Nkwagye ho nhyehyɛɛ no” (Jarom 1:2; Alma 24:14).

“Ɔpon ho nhyehyɛɛ no” (Alma 12:25, 26, 30, 32, 33; 42:11, 13).

“Nsanananmu ho nhyehyɛɛ no” (Alma 41:2).

“Enyigye ho nhyehyɛɛ no”” (Alma 42:16).

“Ehumbɔbɔr nhyehyɛɛ kɛse no” (Alma 42:).

Dɛm dzin ahorow yi mu biara boa hɛn ma yɛtse Egya Ne Nhyehyɛɛ ho bɔhyɛ a ɔsom bo ase yie na ɔhyɛ hɛn nhumu a ɔfã hɛn ɔnnkyebo asetsena no botae na n’asekyerɛ mã.

Nokwasɛm nye dɛ mpɛn pii wɔ Mormon Nwoma mu no dzin a wɔtaa dze ma Nyankopɔn Ne nhyehyɛ no tsim ɔpon a Jesus Christ No Werdambɔ dze bɔbɔɔ adze do.

Alma kaa dɛ, “sɛ nnyɛ ɔpon ho nhyehyɛɛ no a wɔahyehyɛ ato hɔ fitsi ber a wɔtoow wiadze ne fapem no a, nkyɛ owusoɛr nnyi hɔ; na mbom wɔayɛ ɔpon ho nhyehyɛɛ ato hɔ, dza ɔbɛma owusoɛr a yɛakã ho asɛm no aba.” (Alma 12:25).

Alma tuu fo dɛ, “Hom nhyɛ ase ngye Nyankopɔn ne Ba no ndzi, ama ɔaaba abɔpon no nkorɔfo, na ɔbɛba ebohu amandze na oewu dze noho abɔ werdam etua hɔn bɔn; na dɛ ɔbɔsoɛr bio efi owu mu a ɔbɛma owusoɛr aba, ama adasa nyina aaba ebegyina n’enyim, ma oebu hɔn atsɛn dɛ mbrɛ hɔn ndwuma tse wɔ atsɛmbu da a odzi ewiei no mu.” (Alma 33:22).

Woesiesie Kwan No

Ɔwɔ dɛ aseda hyɛ hɛn akra mã ber a yɛdwendwen Nyankopɔn no nkwagye , ɔpon nsanananmu, ehumbɔbɔr, na enyigye nhyehyɛɛ kɛse no ho. Nkwagye nhyehyɛɛ no ho nyimdzee ma hɛn nhumu a ɔsom bo, ɔma hɛn enyigye hyɛ mã, na ɔhyɛ hɛn dzen ma yedzi hɛn haw na abɛbrɛsɛ do.

Ɔsor Egya pɛ dɛ yɛsan ba No hɔ wɔ fie. Ɔto nsa frɛ hɛn na ɔhyɛ hɛn bɔ, naaso ɔnnhyɛ hɛn, anaa ɔmmpiapia hɛn ma yɛmfa pɛ a ɔdze maa hɛn no ndzi dwuma. Ɔwɔ dɛ yedzi dwuma na yɛsan mu yi dɛ yɛbɛsan aba Ne nkyɛn ber a yɛka No Dɔba ne fasusu do no.

mfonyin a ɔfa abofra bi ne nsa a ɔatsen dze rusuo Jesus Christ Ne nsa mu

“Woesiesiekwan no ato hɔ, na sɛ yɛhwɛ a yɛbɛtsena ase afebɔɔ.” (Alma 37:46; woetsim akã ho).

Medze enyigye gye dase dɛ Ɔsor Egya nye nhyehyɛɛ krɔnkrɔn ma Ne mba no ne farbaa. Jesus Christ nye hɛn Agyenkwa na Pomfo. Na dɛ meyɛ Ewuradze N’Asomafo kor wɔ nda odzi ekyir yi, me gye dase dɛ ampaara Ɔno nye, kwan no, nye nokwar no, nye nkwa no” (John 14:6; woetsim akã ho).

© 2025 by Intellectual Reserve, Inc. All rights reserved. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛasee ngye ntomu: 6/19. Monthly Liahona Message, January 2026. ne nkyerɛasee Fante. 19932 502