Dahme kitail ese me pid silepen sihpw kan ni tepin Krismaso?

Silepen Sihpw kan, sang Brian Call

Kitail ese ekei mehkot me pid irail silepen sihpw kan ni tepin Krismaso.

Irail karanih Bethlehem. Silepen Sihpw kan pil mihmihte “nan sahpwo” wasa ipwidi en Krais wiawi ie (Luk 2:8). Oh kahrehda arail kak aluhla Bethlehem erein Ah ketket wasahu (kilang Luk 2:15–16).

Irail wiewia arail pwukoah. Silepen Sihpw kan “mihmi nan sahpwo, oh apwiapwalih neirail sihpw akan nihpwongo” (Luk 2:8). Irail wia silepen sihpw mwahu oh loaloapwoat kei, duehte Sounkomouro—me Silepen Sihpw Mwahu (kilang Sohn 10:11, 14).

Irail esehier kokohp kan en Mesaiahu. Iraiol esehier dahme tohnlengo koskosoia ansou me e pakairki duwen ipwidi en “Kauno Krais” (Luk 2:11), Mesaiahu me miehier kokohpe mahso.

Irail ahneki kamehlele laud. Ansou me tohlengo koasoiahiong irail duwen “seripwelel … me wenohn nan dewen mahn” (Luk 2:12), irail kohla “ni karuaru” pwehn kilang Ih (Luk 2:16).

Irail kalohngki rohng mwahu. Irail “kosoia wasa koaros” dahme irail rongehr oh kilangehr me pid dahme tohnlengo kosoiahier me pid ipwidi en Krais (Luk 2:17).

Irail kepinga oh pwongih Koht. Mwurin soahng pwukat koaros, irail “pwurala, kepkepinga oh pwongpwongih Koht pwehki soahng kan koaros me re rongehr oh kilangehr” (Luk 2:20).