Sapwelimen Koht Koasoandi ohng Peneinei Soutuk

Ehu mehkot me kihong en ahi pahpa oh nohno ara inangih esehla rongamwahu en Sises krais kopwurpwurdohu iei duwen Mwomwohdisoht ah kesempwalki peneinei kan oh padahngki “me tohto duwen Sapwelimen Koht doadoahk en komourla oh lapalapala ohng peneinei kan.” Mwohn ara pepdaislahu, ira inenen kaseleliki dahme ira esiesehla ko kahrehda ara kin lukehiong mehn mpara kan en iang patehng kasukuhl rehn misineri kan.

Ni ara kin tuhtuhong misineri kan, oh pil doulahte onohnopki rongamwahu wet mwurin ara pepdaisehr, ira esehla mwomwen ara kak “kakairada [neira] nan marain oh me pwung” oh mwomwen ara kak “kasoanehdi nan [imwara] ohng pali ngehn” (Doctrine and Covenants 93:40, 43).

Irail esehla me “peneinei iei inoandehn Sapwelimen Sounkepikipiko koasoandi ohng komourpen Sapwelime seri kan” oh me “peren en nan peneinei kak mie ansou me irail kin momourki padahk kan en Kauno Sises Krais.”

Irail esehla me “pwopwoud kan oh peneinei kan me kin pweida kin kokouda oh kin wie epwehpwel sang ni padahk kan en pwoson, kapakap, koluhla, mahk, waun, limpoak, tetehk mehteikan, doadoahk, oh kemwekid kemweit mwahu kan.”

Irail esehla me peneinei kan kak soutuk oh me “mwomwen nanpwungatail sampah ihte pil pahn mwomwetail palio, ahpw ihte e pahn patehngehr lingan soutuk” (Doctrine and Covenants 130:2).

Oh irail pil esehla “kahrepen kasukuhl koaros, oh kemwekid koaros nan Mwomwohdisoht iei pwe pahpa nohno oh seri kan en kak peren ni imwarail kan, katengtengpene, oh kadokepene kadaudokerail kan.”

Pwehki marain wet, irail kin pilada en katengteng pene ni duwen peneinei ehu.

Mwurin ara pepdaislahr, ira kin kapwaiada dahme ira esehlahr, sang ni ara kohkohsang mour en sampah oh pidelong nan wein rongamwahuo. Ira kin nantihong ehupenehn nan aht peneinei sang ni aht kin wia soutik en peneinei oh onopiki pwuhk sarawi kan, loaloapwoat en patehng kemwekid en Mwomwohdisoht kan, oh kin wia doadoahk en kadaudok en aht peneinei kan. Pwehki mepwukat koaros me ira wiahier pwehn kahrehda ehupene mie, ira kasik irahn wiahda peneinei ehu me doadoahngki koasoandi en mour soutuk oh kin kilkilenglahngete mour soutuk.

Nan 1965, pahr me ira pepdaislahu, tehnpas sarawi me keieu karanih São Paulo, Brazil, mihmi nan Mesa, Arizona, kerenieng mwail 6,000 (9,650 km) dohki. E inenen pweilaud ohng aht peneinei en seiloak ansouo, eri ahi pahpa nohno awih lau ehu tehnpas sarawi kokouda nan São Paulo Brazil nan pahr 1978 ira ahpw kak wiahda ara tiahk sarawi kan oh katengtengpene. Ansouo i wiewia ahi misin nan Rio de Janeiro.

Sounpwong riau mwohn ahi pahn kaimwsekla ahi misin nan pepweri pahr 1980, ahi presiden en misino mweidada ngehi oh iengeio en iangih ekei tohn stake o oh seiloakkihla pwohng ehu pwon manda sang Rio de Janeiro kohla nan tehnpas sarawi nan São Paulo pwe ien kak katengtengehng ahi pahpa nohno. I pil duehte ahi pahpa nohno, me awiawihki pahr tohto pwe ien kak alehdi kapai en tiahk sarawi oh inou sarawi kan en tehnpas sarawi.

Mweikid wet wekidala mwomwen ahi medewe duwen ansou kohkohdo kan oh kahrehda ahi tepda wehwehkihla kaweid en Presiden Russell M. Nelson: “Ahmw ansou nan tehnpas sarawi pahn seweseiuk en madamadau mwakelekel oh en esehla udahn ihs kowe, isime ke kak wiahla, oh soangen mour da ke pah ahneki kohkohlahte.”

Uwen ansou mwotomwot mei ahneki nan tehnpas sarawio rahno kamwakid mehlel ahi mour nan keimwseklahn ahi misino. Pwehki madamadau kapw wet, kadehdehki tehnpas sarawi oh kesempwalpen Sapwelimen Koht koasoandio wia mehkot laud nan ei mour.

Ansou me ngehi, oh ahi pwoud, Rosana kopwopwoudla pahr riau mwurin ahi misino, se katengtengpene nan tehnpas sarawi oh ahneki madamadau ehu me se men pein kairada aht peneinei soutuk. Pwehn wia met, se kin ehupene pwehn wia soahng kan me aht pahpa nohno padahkihong kihtehr, soahng koaros kin ulahngete Sounkomouro, Sapwelime padahk kan, oh padahk kan en Sapwelime soukohp en rahn-pwukat.

Rahnpwukat, nait seri kan kin kakairada pein neirail seri kan ki saongen koasoandi en perenohte. Ohng kiht, peneinei me wia soahng koaros pwehki se wehwehki kesempwalpen peneinei nan koasoandi en Koht.

Nin duwen ei wia emen Lapalap en Mwomwohdisoht, I ahneki ansou mwahu en katengepene nei seri silimen ohng arail pwoud kan nan tehnpas sarawi. Ansou mei kilang nan mesarail kan ansou me irail kelepwidi ni pehi sarawio wia mehkot lingan ehu ohngie. I kak kilang kadaudokei kan ahr kapaikihda koasoandi en rongamwahu me ahi pahpa nohno padahkihongie oh me ngehi Rosana padahkihong irail. I pil kak kilang kapai pwukat ah doudoulahte nan dien mwuhr kan. Oh iahpw tamanda isime kahrehda mepwukat koaros ah kak wiawi.

Mehn Kataman Krismas

Peneinei iei inoandehn Sapwelimen Koht pilahn en pereno, ahpw ma sohte Sounkomour Sises Krais, pilahn wet sohte pahn pweida. Sapwelime Tomwo oh inou sarawi oh tiahk sarawi kan me dierek nan Sapwelimen rongamwahuo kahrehda inou en mour soutuk pahn pweida.

Presedin Nelson kaweidkiher: “Moursoutuk wia kemwekid en peneinei ehu. Sangete ni tiahk sarawi kan en komour nan rongamwahu en Sises Krais me peneinei kan kak komourkihla. Ihme kitail koaros kin nanantihong iei me atail peneinei kan en ahneki peren—wiahda inou, katengtengpene, oh kaunopehng mour soutuk rehn Koht.”

Ansou kan me i kin pwarek wasa mei saik kilang, i kin song kilangada ksin mehn kasansal ehu me kin katamanki ngehi Rosana duwen Sounkomouro. I kihpenehr me tohto.

Sang ni aht kin kilkilang mehn kasansal kesempwal pwukat, ngehi ahi pwoud kin medmedewe, “Dahme keieu kesempwal nan aht mour?” Pasapengo, iei, Sounkomouro, Sapwelime rongamwahuo, oh aht peneinei. Pwehn kataman kin kiht duwen limpoak en Sahm Nanleng ohng kiht oh pwehki sounkomouro me kahrehda inou en peneinei soutuk ah pahn pweida, mwohn krismas pahr kei samwalahro se kihdiong kisin mehn kasansal koa pohn dana laud riau nan imwato—oh kin mihmihte mwo oh se sohte kin kihdihsang mwurin krismas. Tiahk wet seweseikiht en kak kolokol ngenen Krismas nan imwato pahro-pwon.

Rahn koaros me se kin kilang mehn kasansal pwukat, irail kin kataman kin kiht duwen Sapwelimen Sounkomouro pwukoah nan aht mour. Irail kin kataman kin kiht me meleilei pohn sampah ansouet (kilang Luk 2:14) oh peren soutuk nan mour mwurin mour wet pahn pweida sangenet ni wauneki inou sarawi kan me se wiadahr ohng Ih. Oh irail kataman kin kiht me “e ketdo sampah, iei Sises, pwehn kalohpwuhkihla sampah, oh lokolongki dipen sampah kan, oh kasarawiala sampah, oh pwehn kamwakelehsang me suwed koaros;

“Pwehki ih soahng koaros pahn komourla sang Sahmo me kihongehr manaman oh kapikadahr” (Doctrine and Covenants 76:41–42).

Ni soangen mwohmwohte me aht pahpa nohno padahkihong kihter mepwukat, ngehi Rosana pil nantihong en pil padahkihong nait seri kan. Met nait seri kan pil padpadahkihong neirail seri kan mepwukat. Weren tuhke pwukat me poadidier nan mohngiong en ahi pahpa nohno sounpar 60 samwalahro nan imwat kisin ihmw nan Brazil lalaudlahr oh wahier “me keieu kesempwal, me keieu iou sang me iou koaros, oh me pwetepwetsang me pwetepwet koaros, ei, oh mwakelekelsang me mwakelekel koaros” (Alma 32:42).

I kadehdehki me koaros me kin kolokol Sapwelimen Koht koasoandi ohng peneinei kan, poakohng duehte Sounkomouro, oh wauneki arail inou sarawi kan, pahn sohsohki “kapai kan en mour soutuk oh peren unsek” iangih arail peneinei kan rehn Sahmo oh Sapwelime Ieroso.