Ta eo jejeļā kōn Seperd ro ilo Kūrijm̧ōj eo m̧oktata?

Seperd ro, jān Brian Call

Jejeļā jejjo men ko kōn seperd ro ilo Kūrijm̧ōj eo m̧oktata.

Raar pād epaake Betleem. Seperd ro raar pād “ilo āne eo” ijo ekar ļotak Kraist ie (Luk 2:8). Im raar maron̄ in tōparļo̧k Betleem ilo aer etal laļļo̧k ke E ekar pād wōt ijōņ (lale Luk 2:15–16).

Raar kōm̧m̧ane jerbal eo aer. Seperd rein raar “pād ilo jikin wūjooj, im lale bwijin sip ko aer ilo bon̄” (Luk 2:8). Raar seperd ro rem̧m̧an im tiljek, āinwōt Rilo̧mo̧o̧r—Seperd eo Em̧m̧an (lale Jon 10:11, 14).

Raar jeļā kōn kanaan ko kōn Messaia eo. Ekar alikkar aer jeļā ta eo enjeļ eo ekar kōnono kake ke ekar kōjjeļā kōn ļotak eo an “Kraist Irooj” (Luk 2:11), Messaia eo kar kanaan kake jān etto.

Ekar wōr aer kijejeto eļap. Ke enjeļ eo ekar jiron̄ er kōn “nin̄nin̄ eo … ej babu ilo menjer” (Luk 2:12), raar ilo̧k “jarōbtok” n̄an lo E(Luk 2:16).

Raar kwaļo̧k naan eo em̧m̧an. Raar “kabun̄bun̄ļo̧k” ta eo raar ron̄ im loe ikkijien ennaan eo an enjeļ eo kōn ļotak eo an Kraist (Luk 2:17).

Raar kam̧m̧oolol im kar nebar Anij. Ālkin aolepān menin, raar “jepļaak, im wūjtak im nōbar Anij kōn men ko otemjej raar ron̄jake im loi” (Luk 2:20).