Karōk eo an Anij n̄an juon Baam̧le Indeeo

Juon iaan men ko me im̧aan tata kar kaitok limo in ro jinō im jema ilo gospel eo an Jisōs Kraist kar kōjepļaaktok ej aroōk eo Kabun̄ in ej kwaļo̧ke kōn baam̧le im katak eo bwe “eļap wōt iaan jerbal in lo̧mo̧o̧r im mour ijo eutiej tata an Anij ej kadedeļo̧k kōn baam̧le.” M̧okta jān aer kar peptaij, jinō im jema raar kanooj m̧weiur kōn ta eo raar katak jon̄an raar karuwaineneik ro rūturier n̄an koba ippāer n̄an katak ko an mijenede ro.

Ilo aer kar iioon mijenede ro, im wōnm̧aanļo̧k wōt in ekkatak gospel eo ālkin aer peptaij, jinō im jeram raar katak kōn wāween ko “n̄an kōkaajririk ro [nejier] ilo meram im m̧ool” im wāween kile ilo jetōb“kakoņ m̧weo [m̧weer] make” (Katak im Bujen Ko 93:40, 43).

Raar katak bwe “baam̧le eo ej dilepen karōk eo an Rikōm̧anm̧an eo n̄an jipadpad eo n̄an mour indeeo an ajri ro Nejin” im bwe “M̧ōņōņō ilo mour in baam̧le ej maron̄ tōprak eļan̄n̄e ej pedped wōt ioon katak ko an Irooj Jisōs Kraist.”

Raar katak bwe “m̧are ko repen aer rub im baam̧le ko rej ejaak wōt ioon pedped ko an tōmak, jar, ukweļo̧k, jeorļok bōd, kautiej, io̧kwe, jeļā ņae doon, jerbal, im m̧akūtkūt ko rem̧m̧an n̄an kōkm̧anm̧anļok doon.”

Raar katak bwe baam̧le ko remaron̄ in indeeo im bwe “ejja iiaio eo ej pād ilubwilijid ijin enaaj pād ilubwilijid ijeņ, enaaj wōt koba ippān aiboojoj ejjeļo̧k jem̧ļo̧kin” (Katak im Bujej Ko 130:2).

Im raar katak bwe “jibadbad eo āliktata an aolep katakin, aolep m̧akūtkūt ilo Kabun̄ in ej bwe ro jinen im jemān im ajri ro rej m̧ōņōņō ilo m̧weo, liāp ilo juon m̧are indeeo, im ekkejel n̄an epepen ko aer.”

Kōn jeļā jab in, raar ikdeelel n̄an liāp āinwōt juon baam̧le n̄an indeeo.

Ālkin an jinō im jema kar peptaij, raar mour kōn ta eo raar katak, ilo̧k jān laļ in im n̄an aelōn̄ in kiin̄ an gospel eo. Raar jerbal n̄an kobaik baam̧le ao am kōn kōm̧m̧an nokon in jota an baam̧le im ekkatak jeje ko rekwojarjar, tiljek ilo etal n̄an kweilo̧k an Kabun̄ in, im kōm̧m̧an jerbal in menmenbwij an baam̧ļe. Ippān kijejeto kein n̄an bōro kuk, raar kōjatdikdik n̄an ejaake juon baam̧le ekar pedped ioon karōk in lo̧mo̧o̧r eo kōn juon kalimjōkļo̧k wōt indeeo.

Ilo 1965 eo, iiō eo jinō im jema raar peptaij, tampeļ eo epaak tata n̄an São Paulo, Brazil, ekar ilo Mesa, Arizona, enan̄in 6,000 m̧aiļ ko (9,650 km) ettoļo̧k. Ekkāke n̄an baam̧le eo ekar kanooj ļap wōņāān, kōn menin jinō im jema raar aikuj kōttar m̧ae iien aje eo an São Paulo Brazil Tampeļ eo ilo 1978 m̧okta jān aer maron̄ bōkI kain̄i ko aer ilo tampeļ im kar liāp. Ilo iien jab in, ikar jerbale juon mijen ilo Rio de Janeiro.

Enan̄in ruo allōn̄ ko m̧okta jān kar jem̧ļo̧k in mijen eo aō ilo Pāpode in 1980 eo, mijen būreejtōn eo aō ekar kōtļo̧k an mijenede eo m̧ōtta im n̄a kar ilo̧k ilo bon̄ ippān ro uwaan stake eo jān Rio de Janeiro n̄an tampeļ eo ilo São Paulo bwe in maron̄ bōk menin letok kwojarjar eo im im kar liāp n̄an ro jinō im jema. Āinwōt ro jinō im jema, ikar aikuj kōttar iiō ko n̄an kōjeraam̧m̧an ko kar kallim̧ur kaki an kain̄i ko im bujen ko an tampeļ.

En̄jake jab in ekar ukōt visōn eo aō an ilju im jekļaj im kar letok n̄an eō arromeļo̧k eo aō im̧aan tata kōn tarlep in m̧ool eo an naan kiiō an Būreejtōn Russell M. Nelson: “Iien eo ilo tampeļ enaaj jipan̄ eok n̄an ļōmņak kōn selestial im n̄an bōk juon visōn an wōn eo lukkuun kwe, wōn eo kwomaron̄ erom, im kain mour eo kwomaron̄ bōk n̄an indeeo.”

Iieo eo aō ekadu ilo tampeļ eo ilo iien jab eo ekar m̧wilaļ an kareel n̄an aolepān iien jerbal in mijenede eo aō. Ippān visōn jab eo ekāāl, kam̧ool kōn tampeļ im aorōk eo an karōk eo an Anij n̄an baam̧le ko ekar barāinwōt wōr juon kilaan aitok kitien ilo mour eo aō.

Ke lio pāleō, Rosana, im n̄an kar m̧are ruo iiō ko ālkin mijen eo aō, kōm kar liāp ilo tampeļ kōn juon visōn n̄an karūttoļo̧k baam̧le eo am make. N̄an kōm̧m̧ane āindein, kōm kar jerbal ippān doon n̄an ejaake imminene ko an baam̧le eo āinwōt ro jinem im jemām rekar katakin kōm̧, aolep kar pedped ioon Rilo̧mo̧o̧r eo, katak ko An, im katak ko an rikanaan ro An raan kein.

Rainin ajri ro nejim rej karūttoļo̧k ajri ro nejier kōn ejja pedped in katak ko gospel eo an m̧ōņōņō. N̄an kōm, baam̧le ej aolep men kōnke kōm meļeļe dilep eo an baam̧le ilo karōk eo an Anij.

Āinwōt juon Ritōl Utiej, ewōr ippa jeraam̧man eo an liāpe jilu iaan ajri ro nejim n̄an ro pāleer ilo tampeļ. Reilo̧k n̄an mejāer ilo iien eo raar bukwelōlō ilo lokatok eo ilo tampeļ eo ekar juon en̄jake aiboojoj. Imaron̄ lo ro ineeō aer jeraam̧man kōn ejja pedped in katak ko wōt ro jinō im jema raar katakin eō im ko me Rosana im n̄a kar katakin er kaki. Imaron̄ lo an kōjeraam̧m̧an ko wōnm̧aanļo̧k wōt ilo epepen ko ilju im jekļaj. Im ikar keememej kōn wōn ekar kōm̧m̧an bwe ren aolep pidodo.

Juon Kein Kakeememej an Kūrijm̧ōj

Baam̧le ej dilepān karōk in m̧ōņōņō eo an Anij, bōtaab ilo an jako Rilo̧mo̧o̧r Jisōs Kraist, karōk jab in eban kar pidodo. Pinmuur eo An im kain̄i ko im bujen ko loi ilo gospel eo An rej kapidodoik kallim̧ur eo an mour ijo eutiejtata.

Būreejtōn Nelson ekar kean̄: “Mour ijo eutiej tata ej jerbal an juon baam̧le. Jān wōt kain̄i in lo̧mo̧o̧r ko an gospel eo an Jisōs Kraist baam̧le ko remaron̄ mour ijo eutiejtata. Jem̧ļo̧k eo eļaptata n̄an kōj ro rej kajjieon̄ ej bwe jen m̧ōņōņō āinwōt juon baam̧le—em̧ōj an bōk menin letok kwojarjar eo, liāp ippān doon, im m̧aanjabpopo n̄an mour indeeo im̧aan mejān Anij.”

Ke ij loļo̧k jikin ko ikar jan̄in loi m̧okta, ij kajjion̄ pukot juon men kōn Iien Ļotak eo edik me ej kakeememej Rosana im n̄an kōn Rilo̧mo̧o̧r eo. Ij kōm̧m̧ane juon kein aee.

Ilo am etale jekjek ko rettā an Iien Ļotak eo, lio pāleō im n̄a kar juon iien kejekļo̧kjeņ, “Ta eo me ej lukkuun aorōk tata ilo mour ko am?” Uwaak eo, aaet, ej Rilo̧mo̧o̧r eo, gospel eo An, im baam̧le eo am. N̄an kakeememej kōm kōn iakwe eo an Jemādwōj Ilan̄ n̄an kōm im ej kōn Rilo̧mo̧o̧r eo bwe kallim̧ur eo an baam̧le ko indeeo ej erom pidodo, m̧okta jān Kūrijm̧ōj eo jejjo iiō ko remootļo̧k kōm kar door aolep men ko kōn Iien Ļotak eo ilo m̧weo m̧ōm̧—im lelōn̄ļo̧k er ijello̧kin kakuņi ālkin iien Kūrijm̧ōj ko. Imminene jab in ej jipan̄ kōm dāpij jitōn Kūrijm̧ōj eo ilo m̧weo m̧ōm̧ aolepān iiō eo.

Aolep raan ilo am reilo̧k n̄an wāween ko an Iien Ļotak eo, rej kakeememej kōm̧ kōn jerbal eo eļap an Rilo̧mo̧o̧r eo ilo mour ko am. Rej kakeememej kōm bwe aenōm̧m̧an ioon laļ kiiō ( lale Luk 2:14) im m̧ōņōņō eo indeeo ilo laļ eo ej itok pedped ioon Rilo̧mo̧o̧r eo im ilo kautiej bujen ko jaar kōm̧m̧ani Ippān. Im rej kakeememej kōm bwe ekar itok n̄an laļ, em̧ool Jisōs, n̄an en̄taan kōn laļ in, im n̄an ineek jerawiwi ko an laļ, im n̄an kōkkwojarjar laļ, im n̄an karreoiki jān aolep jabwānōk;

“Bwe kōn E aolep ren maron̄ mour ro Jemān eaar likūt ilo kajoor eo An im kar kōm̧anm̧an jān E” (Katak im Bujen Ko 76:41–42).

Ke kōm̧ kaar katak m̧ool kein jān ro jinem im jemām, Rosana im n̄a kar jerbali n̄an liļo̧ki n̄an ajri ro nejim. Kiiō ajri ro nejim rej katakin ejja m̧ool kein wōt n̄an ro nejier. Ine ko kar katūki ilo būruōn ro jinō im jema 60 iiō ko remootļo̧k ilo m̧weo m̧ōm̧ edik ilo Brazil em̧ōj aer kitōk maro im kalle neen ko “eo eaorōk otem aorōk, eo etōn̄al ilōn̄in men otemjeļo̧k eo etōn̄al, im eo emouj ilōn̄in men otemjeļo̧k emouj, aaet, im erreo ilōn̄in men otemjeļo̧k erreo” (Alma 32:42).

Ij kam̧ool bwe ro me rej kaorōk karōk eo an Anij n̄an baam̧le ko, iakwe āinwōt an Rilo̧mo̧o̧r ro kar iakwe, im kautiej bujen ko aer naaj juon raan jolete “kōjeraam̧m̧an ko an mour indeeo im juon lan̄lōn̄ in tarlep in” ippān ro rejitōnbōro ippāer im ippān Jemān im Nejin.