Ania ti ammotayo maipapan kadagiti pastor iti umuna a Krismas?

Dagiti Pastor, ni Brian Call

Sumagmamano a banag ti ammotayo maipapan kadagiti pastor iti umuna a Krismas.

Asidegda iti Betlehem. Adda dagiti pastor “iti isu met laeng a pagilian” a nakapasamakan ti pannakayanak ni Cristo (Lucas 2:8). Ket nakadanonda iti Betlehem a nagnagna bayat ti kaaddana pay laeng sadiay (kitaen iti Lucas 2:15–16).

Ar-aramidenda idi ti pagrebbenganda. Dagitoy a pastor “nga adda idi iti agbambantay kadagiti karneroda iti rabii” (Lucas 2:8). Naimbag ken napudnoda a pastor, kas iti Mangisalakan—ti Naimbag a Pastor (kitaen iti Juan 10:11, 14).

Ammoda dagiti padto maipapan iti Mesias. Ammoda no ania ti ibagbaga ti anghel idi impakaammona ti pannakayanak ni “Cristo nga Apo” (Lucas 2:11), ti naipadto a Mesias idi un-unana.

Dakkel ti regtada. Idi imbaga kadakuada ti anghel ti maipapan iti “maysa nga ubing … a nakaidda iti kulluong” (Lucas 2:12), “nagdardarasda ngarud a napan” tapno kitaenda Isuna (Lucas 2:16).

Impakaammoda ti naimbag a damag. Ket “impakaammoda” ti nangngeg ken nakitada maipapan iti mensahe ti anghel iti pannakayanak ni Cristo (Lucas 2:17).

Nagyaman ken indaydayawda ti Dios. Kalpasan amin dagitoy, “nagsublida, a mangikankanta kadagiti pagdaydayaw iti Dios gapu kadagiti amin a nangngeg ken nakitada” (Lucas 2:20).