Ti Plano ti Dios para iti Agnanayon a Pamilia

Maysa kadagiti banag a naginteresan idi damo dagiti nagannakko iti naisubli nga ebanghelio ni Jesucristo ket ti kinapateg nga ipapaay ti Simbaan iti pamilia ken ti pannursuro a “maipatunggpal ti kaaduan nga aramid ti pannakaisalakan ken pannakaitan-ok babaen iti pamilia.” Sakbay a nabuniaganda, naallukoy unay dagiti dadakkelko iti maad-adalda isu nga inawisda dagiti kaarrubada a makikadua kadakuada kadagiti adalen iti misionario.

Bayat ti pannakipagkitada kadagiti misionario, ken panagtultuloyda nga agadal iti ebanghelio kalpasan ti panagbuniagda, nasursuro dagiti nagannakko dagiti wagas “a patanoren dagiti annak[da] iti silaw ken kinapudno” ken no kasano ti naespirituan nga “urnosendanto ti balay[da]” (Doktrina ken Katulagan 93:40, 43).

Nasursuroda a “ti pamilia ti sentro iti plano ti Namarsua para iti agnanayon a pagtungpalan dagiti annakna” ken “kaaduan a magun-od ti ragsak ti biag ti pamilia no nabangon daytoy kadagiti pannursuro ni Apo Jesucristo.”

Nasursuroda a “naipasdek ken napagtalinaed dagiti naballigian a kallaysa ken kaamaan kadagiti pagbatayan ti pammati, kararag, panagbabawi, pammakawan, respeto, ayat, panangngaasi, aramid, ken makaay-ayo nga aramiden iti panagaliwaksay.”

Nasursuroda a dagiti pamilia ket mabalin nga agnanayon ken “dayta met laeng a pannakipulapol nga adda kadatayo sadiay, makaduaanto laeng iti agnanayon a gloria, a kinadayag” (Doktrina ken Katulagan 130:2).

Ket nasursuroda a “ti ultimo a panggep ti tunggal sursuro, tunggal aktibidad iti Simbaan ket naragsak dagiti nagannak ken dagiti annakda iti pagtaengan, nailantip iti agnanayon a panagasawa, ken naisinggalut kadagiti kaputotanda.”

Babaen iti dayta a pannakaammo, tinarigagayanda ti mailantip kas agnanayon a pamilia.

Kalpasan ti panagbuniag dagiti nagannakko, inaramidda no ania ti nasursuroda, manipud iti panagakar iti lubong nga agturong iti pagarian ti ebanghelio. Nagtrabahoda a mamagkaykaysa iti pamiliami babaen ti home evening ken panagadal iti nasantuan a kasuratan ti pamilia, simamatalek a panagdar-ay kadagiti miting ti Simbaan, ken panagaramid iti trabaho iti family history. Babaen kadagita a panagregget iti panagkaykaysa, ninamnamada ti mangparnuay iti pamilia a naisentro iti plano ti pannakaisalakan nga addaan iti panangipamaysa nga agturong iti agnanayon.

Idi 1965, ti tawen a pannakabuniag dagiti nagannakko, ti kaasitgan a templo iti São Paulo, Brazil, ket iti Mesa, Arizona, dandani 6,000 miles (9,650 km) ti kaadayona. Nangina unay ti panagbiahe para iti pamiliami, isu a nasken nga aguray dagiti nagannakko agingga iti pannakaidedikar ti Templo ti São Paulo Brazil idi 1978 sakbay a maawatda dagiti ordinansada iti templo ken mailantipda. Iti dayta a tiempo, agserserbiak iti mision idiay Rio de Janeiro.

Agarup dua a bulan sakbay a naileppasko ti misionko idi Pebrero 1980, pinalubosannakami ken ti companion-ko ti mission president-mi nga agbiahe iti maysa a rabii a kaduami dagiti miembro ti stake manipud Rio de Janeiro nga agturong iti templo iti São Paulo tapno ma-endowed-nak ken mailantipnak iti nagannakko. Kas kadagiti nagannakko, adun a tawen nga inur-urayko dagiti naikari a bendision dagiti ordinansa ken katulagan iti templo.

Dayta a padas ti nangbalbaliw iti parmatak iti masakbayan ken nangted kaniak iti umuna a pannakakitak iti kinapudno kadagiti nabiit pay a sasao ni Presidente Russell M. Nelson: “Ti oras iti templo ti mangtulong kadakayo nga agpanunot iti celestial ken mangsirmata iti no asinokayo a talaga, asino ti pakapagbalinanyo, ken ti kita ti biag a maaddaantayunto iti kinaagnanayon.”

Ti ababa a panawenko iti templo iti dayta nga okasion inimpluensiaanna unay ti nabati a panagserbik kas misionario. Iti dayta baro a parmata, ti panangpaneknek iti templo ken ti kinapateg ti plano ti Dios para kadagiti pamilia ket addaan met iti manayon nga epekto iti biagko.

Idi nagkasarkami ken baketko a Rosana, dua a tawen kalpasan ti misionko, nailantipkami iti templo nga addaan iti panggep a mangpadakkel iti bukodmi nga agnanayon a pamilia. Tapno maaramid daytoy, nagtinnulongkami a nangparnuay kadagiti tradision ti pamilia a kas kadagiti insuro kadakami dagiti nagannakmi, nga amin ket naipamaysa iti Mangisalakan, kadagiti pannursurona, ken dagiti pannursuro dagiti propetana iti agdama a panawen.

Ita, padpadakkelen dagiti annakmi dagiti annakda babaen kadagiti isu met laeng a prinsipio ti ebanghelio ti kinaragsak. Para kadatayo, ti pamilia ti kapatgan a banag iti lubong gapu ta maawatantayo a ti pamilia ti kangrunaan iti plano ti Dios.

Kas maysa a General Authority, nabendisionannak a nangilantip kadagiti tallo nga annakko kadagiti assawada iti templo. Napintas a padas ti panangkitak kadagiti matada iti kanito a nagparintumengda iti altar iti templo. Makitak a mabendisionan dagiti kaputotak babaen kadagiti isu met laeng a prinsipio ti ebanghelio nga insuro kaniak dagiti nagannakko ken insuromi ken Rosana kadakuada. Makitak nga agtultuloy dagita a bendision kadagiti masanguanan a henerasion. Ket naipalagip kaniak no siasino ti mamagbalin a posible amin dagita.

Maysa a Palagip iti Krismas

Ti pamilia ti kangrunaan iti plano ti Dios iti kinaragsak, ngem no awan ti Mangisalakan a ni Jesucristo, saan a posible dayta a plano. Ti Pannubbotna ken dagiti ordinansa ken katulagan a masarakan iti ebangheliona ti mamagbalin a posible iti kari ti pannakaitan-ok.

Imbaga ni Presidente Nelson: “Ti pannakaitan-ok ket maysa nga aramid ti sangapamiliaan. Babaen laeng kadagiti pangisalakan nga ordinansa ti ebanghelio ni Jesucristo a maitan-ok dagiti pamilia. Ti ultimo a panungpalan nga ikagkagumaantayo ket agbalintayo a naragsak kas maysa a pamilia—na-endowed, nailantip, ken naisagana para iti agnanayon a biag iti sanguanan ti Dios.”

No sumarungkarak kadagiti lugar a diak pay pulos nakita, ikagumaak ti agsapul iti bassit nga eksena ti Nativity a mangipalagip kadakami ken Rosana iti Mangisalakan. Mangbangbangonak iti koleksionko.

Bayat ti panangpampanunotmi kadagidiay a nanumo a buya ti Nativity, inut-utobmi iti naminsan ken baketko, no “Ania ti pudno a kapatgan iti biagmi?” Ti sungbat, siempre, ket ti Mangisalakan, ti ebangheliona, ken ti pamiliami. Tapno maipalagip kadakami ti ayat ti Nailangitan nga Amatayo kadatayo ken babaen ti Mangisalakan nga agbalin a posible ti kari dagiti agnanayon a pamilia, sakbay ti Krismas sumagmamano a tawenen ti napalabas inkabilmi ti amin a Nativities-mi iti dua a dadakkel nga estante iti pagtaenganmi—ket binaybay-anmi ida imbes nga idulin dagitoy kalpasan ti panawen ti Krismas. Tulongannakami dayta a tradision a mangtaginayon iti espiritu ti Krismas iti pagtaenganmi iti intero a tawen.

Iti inaldaw a panangkitatayo kadagita nga eksena ti Nativity, ipalagipda kadatayo ti kangrunaan nga akem ti Mangisalakan iti biagtayo. Ipalagipda kadatayo a ti talna ditoy daga ita (kitaen iti Lucas 2:14) ken ti agnanayon a ragsak iti sumaruno a lubong ket agpannuray iti Mangisalakan ken iti panangdayaw kadagiti katulagan nga inaramidtayo Kenkuana. Ket ipalagipda kadatayo “nga immay iti lubong, nga isu ni Jesus, a mailansanto para iti lubong, ken mangimet kadagiti basol ti lubong, ken mangpasanto iti lubong, ken mangugas itoy manipud iti amin a kinadakes;

“A babaen kenkuana mabalin a maisalakan ti amin nga impan ti Ama iti babaen ti bilegna ken inaramidna” (Doktrina ken Katulagan 76:41–42).

No kasano a naammuanmi dagitoy a kinapudno manipud kadagiti nagannakmi, nagtrabahokami ken Rosana tapno maipasa dagitoy kadagiti annakmi. Ita, isursuro dagiti annakmi dagitoy met laeng a kinapudno kadagiti annakda. Dagiti bukel a naimula iti puso dagiti nagannakko 60 a tawenen ti napalabas iti bassit a pagtaenganmi idiay Brazil ket nagsabong ken nagbunga “nga isu ti kapatgan, nga isu ti kasam-itan iti amin a nasam-it, ken isu ti kapurawan iti amin a puraw, wen, ken puro iti amin a puro” (Alma 32:42).

Paneknekak a dagiti mangawat iti plano ti Dios para kadagiti pamilia, agayat a kas iti panagayat ti Mangisalakan, ken mangdayaw kadagiti katulaganda ket tawidendanto inton agangay “dagiti bendision ti agnanayon a biag ken ti naan-anay a rag-o” a kaduada dagiti ay-ayatenda ken ti Ama ken ti Anak.