Ti Pamilia a Naisentro iti Ebanghelio ni Jesucristo

Ti doktrina ti Ti Simbaan ni Jesucristo dagiti Santo iti Ud-udina nga Aldaw ket naisentro iti pamilia. Napateg iti doktrinatayo maipapan iti pamilia ti templo. Dagiti ordinansa a naawat sadiay ti mangpabalin kadatayo nga agsubli kas agnanayon a pamilia iti sidong ti Nailangitan nga Amatayo.

Manipud idi Abril 2025 a sapasap a komperensia, inwaragawag ni Presidente Russell M. Nelson ti pannakaibangon ti 200 a baro a templo. Pagay-ayatna nga ipakaammo dagiti baro a templo iti gibus ti tunggal sapasap a komperensia, ket nakipagrag-otayo amin kenkuana. Nupay kasta, gapu iti dakkel a bilang dagiti templo ita kadagiti kaunaan unay a paset ti panagplano ken panagbangon, maitutop a pabannayatentayo ti pannakaipakaammo dagiti baro a templo. Ngarud, babaen ti pananganamong ti Korum dagiti Sangapulo-ket-dua nga Apostol, saanmi nga ipakaammo dagiti aniaman a baro a templo iti daytoy a komperensia. Itultuloymi itan iti panangipaay kadagiti ordinansa ti templo kadagiti miembro ti Simbaan iti intero a lubong, agraman no kaano ken sadino ti pangipakaammuan iti pannakaibangon dagiti baro a templo.

Ti paset ti saritak a kait-itedko ket naisurat kalpasan ti ipapatay ti ay-ayatentayo a Presidente Russell M. Nelson. No ania ti sumaruno ita ket naisurat ken naanamongan sumagmamano a lawas kasakbayanna, ngem ibagina latta dagiti pannursurok, a pinaregta ti Apo.

Ti waragawag iti kaamaan, a naipakaammo iti eksakto a 30 a tawen ti naglabas, ipakdaarna nga “inordenan ti Dios ti kaamaan” ken “isu ti kangrunaan iti plano ti Namarsua para iti agnanayon a pagtungpalan dagiti annakna.” Ipakdaarna pay “a ti bilin ti Dios para kadagiti annakna nga agpaadu ken punnuenda ti daga ket sitatalinaed a bilin.” Ken “Ipakdaarmi pay nga imbilin ti Dios a dagiti sagrado a pannakabalin ti panagparsua ket maaramat laeng iti nagbaetan ti lalaki ken babai, mayannurot iti linteg a nagkallaysa kas agassawa.” Kas idi insuro ni Elder Russell M. Nelson kadagiti agbuybuya iti BYU a ti kaamaan ket “napateg iti plano ti Dios. … Kinapudnona, ti maysa a panggep ti plano ket ti mangitan-ok iti kaamaan.”

No dadduma maam-ammo a simbaan a nasentro iti pamilia ti Ti Simbaan ni Jesucristo. Wen! Nailawlawag ti relasiontayo iti Dios ken ti panggep ti mortal a biagtayo babaen ti pamilia. Ti ebanghelio ni Jesucristo ti plano ti Nailangitan nga Amatayo para iti pagimbagan dagiti espiritu nga annakna. Pudno a maisaotayo nga immuna a nasuruantayo iti plano ti ebanghelio iti konseho ti agnanayon a pamilia, maipatungpal daytoy babaen kadagiti mortal a pamiliatayo, ken nairanta a pagtungpalanna ti mangitan-ok iti annak ti Dios iti agnanayon a pamilia.

Iti baet dayta a konteksto ti doktrina, adda oposision. Iti Estados Unidos agsagsagabatayo iti panagkaro ti parikut iti panagasawa ken panagpasngay. Iti dumani sangagasut a tawen bimmaba ti porsiento dagiti sangakabbalayan nga idauluan dagiti agassawa, ket kasta met ti bilang dagiti naipasngay. Ad-adda nga amang a positibo ti panagkallaysa ken bilang ti pannakayanak dagiti miembro ti Simbaantayo, ngem dakkel met ti bimmabaanda. Napateg a saan a mapukaw dagiti Santo iti Ud-udina nga Aldaw ti pannakaawatda iti panggep ti panagkallaysa ken ti kinapateg dagiti annak. Dayta ti masakbayan a pagreggetantayo. “Aramid a pakaseknan ti pamilia ti pannakaitan-ok,” insuro kadatayo ni Presidente Nelson. “Babaen laeng kadagiti pangisalakan nga ordinansa ti ebanghelio ni Jesucristo a maitan-ok dagiti pamilia.”

Dagiti nailian a panagbaba ti panagkallaysa ken panagpasngay ket maawatan a gapu iti pakasaritaan, ngem mapadur-as koma dagiti ik-ikkan-pateg ken aramid dagiti Santo iti Ud-udina nga Aldaw—saanda a suroten—dagita nga uso.

Iti kinaubingko 80 a tawenen ti naglabas, nagnaedak iti bangkag da lolo ken lola iti kasasaad nga iwanwan ti pamilia ti dumani amin a mapaspasamak iti aldaw. Awan ti telebision wenno dadduma pay nga elektroniko a mangsinga kadagiti aktibidad ti pamilia. Iti kasupadina, iti agdama a kagimongan iti siudad manmano a miembro ti makapadas kadagiti agtultuloy nga aktibidad a naisentro iti pamilia. Ti panagbiag iti siudad ken moderno a transportasion, nabukel a pagliwliwaan, ken napartak a komunikasion ket nangpalaka kadagiti agtutubo a mangtrato iti pagtaenganda a kasla upaan a balay a pagturoganda ken sagpaminsan a pangananda ngem saan unay a maiwanwan dagiti nagannak dagiti aktibidadda.

Napakapuy met dagiti impluensia dagiti nagannak gapu iti wagas a panggedan ti kaaduan nga agdama a miembro ti Simbaan. Kadagiti naglabas a panawen, maysa kadagiti naindaklan nga impluensia a nagkaykaysa dagiti pamilia ket ti padas ti panagtitinnulong a mangragpat iti maymaysa a panggep a tun-oyen (goal)—kas iti pagbalinen ti let-ang a mausar a daga wenno panangged iti pagbiag. Ti pamilia ti organisado ken naisayangkat a yunit ti produksion ti ekonomia. Ita, kaaduan kadagiti pamilia ti yunit ti konsumpsion ti ekonomia, a saan nga agkasapulan iti nangato a tukad ti organisasion ken panatitinnulong ti pamilia.

Bayat ti ibabassit ti impluensia ti nagannak, agtalinaed latta ti pagrebbengan nga inted ti Dios kadagiti Santo iti Ud-udina nga Aldaw nga isuro dagiti annakda nga agsagana para iti kinaagnanayon a pagtungpalan ti pamiliatayo (kitaen iti Doktrina ken Katulagan 68:25). Aramiden koma ti adu kadatayo daytoy no saan a tradisional ti amin a pamiliatayo. Pudno dagiti diborsio, ipapatay, ket panagsina. Napadasak dayta iti pamilia a dimmakkelak.

Pimmusay ti amak idi agtawenak iti pito, isu a ti ading ko a lalaki ken babai ken siak ket pinadakkeldakami ti balo nga inami. Iti karirigatan kadagiti situasion, nagtultuloy isuna. Agmaymaysa ken naladingit, ngem ti nabileg a sursurona iti doktrina ti naisubli a Simbaan ti nangiwanwan kadakami. Nagkararag isuna iti tulong ti langit iti panangpatanorna kadagiti annakna, ket naparaburan! Napatanorkami iti naragsak a pagtaengan a pudno nga adda a kanayon ti pimmusay nga amami. Sinuruannakami nga adda amami ken adda asawana ken kanayon nga agbalinkami a pamilia gapu iti kallaysda iti templo. Temporario a pimmanaw laeng ti amami gapu ta inawagan ti Apo iti maysa a sabali a trabaho.

Ammok nga adu a dadduma pay a pamilia ti saan a naragsak, ngem makaisuro ti tunggal awanan-asawa nga ina iti ayat ti Nailangitan nga Ama ken dagiti umay a bendison ti kallaysa iti templo. Maaramidyo met daytoy! Ipanamnama ti plano ti Nailangitan nga Ama daytoy a posibilidad para iti amin. Agyamantayo amin iti kallaysa iti templo ken dagiti namnamaen a bendision ti pannakailantip kas agnanayon a pamilia. Kas iti inak, magustuanmi nga adawen ti kari ni Lehi iti anakna a ni Jacob a ti Dios “ikonsagrarna dagiti sagabaem nga agpaay a pagimbagam” (2 Nephi 2:2). Maaramat dayta iti tunggal pamilia a Santo iti Ud-udina nga aldaw, kumpleto wenno iti agdama di kumpleto. Datayo ket pamilia iti simbaan.

Ti doktrina ken panamatitayo iti agnanayon a pamilia ti mangpapigsa ken mangbegkes kadatayo. Diakto pulos malipatan ti kari ni Lelongko iti ina a Harris, idi ubbingkami nga agnanaed iti bangkagna nga asideg iti Payson, Utah. Intedna kaniak ti nakaam-ames a damag a natay ti amak iti adayo a Denver, Colorado. Nagtarayak iti siled ken nagkararagak iti abay ti katrek, a nagsangsangit. Sinurotnak ni lelong ket nagparintumeng iti abayko ket kinunana, “Siakon ti tatangmo.” Dayta a nadungngo a kari ti nabileg a pagwadan ti maaramid dagiti lelang/lelong a mangpunno iti giwang no mapukaw dagiti pamilia ti maysa a miembro.

Dagiti nagannak—awan pay asawana wenno naasawaan ken dadduma pay, kas kadagiti lelong/lelang, a mangpunno iti akem para kadagiti annak—isuda dagiti nangato a mannursuro. Ti kasamayan a panangisuroda ket babaen ti pagwadan. Ti sirkulo ti pamilia ti napintas a lugar a pangipakitaan ken pangisuruan iti agnanayon nga ik-ikkan pateg kas iti pateg ti kallaysa ken annak, ti panggep ti biag, ken ti pudno a pagtaudan ti rag-o. Daytoy pay ti kasayaatan a lugar a pagsursuruan iti napapateg nga adalen ti biag, kas iti kinaimbag, pammakawan, panangteppel iti bagi, ken ti pateg ti adal ken napudno nga aramid.

Siempre, addaan ti adu a miembro ti Simbaan iti patpatgenda a miembro ti pamilia a di umawat kadagiti ik-ikkan pateg ti ebanghelio ken namnamaen. Kasapulan dagiti kasta a miembro ti ayat ken anustayo. Iti panaglilinnangen, nasken a lagipentayo a ti kinaperpekto a kalikagumantayo saan a limitado iti makapa-stress a kasasaad ti mortalidad. Ipanamnama kadatayo ti naindaklan a sursuro iti Doktrina ken Katulagan 138:57–59 a makapagtultuloy ti panagbabawi ken naespirituan a panagdur-as iti lubong ti espiritu kalpasan ti mortalidad. Napatpateg, no agkaykaysa dagiti pamilia nga agpipinnapigsa, nasken a lagipentayo a dagiti basol ken di maliklikan a pagkurangan a mapasarantayo iti mortalidad ket mapakawan babaen ti nadayag ken pangisalakan a Pannubbot ni Jesucristo.

Ti Mangisalakantayo a ni Jesucristo ti kangrunaan a pagwadantayo. Mabendisionantayo no ipagwadantayo ti biagtayo kadagiti pannursuro ken sakripisiona. Ti panangsurot ken Cristo ken panangted iti bagitayo iti serbisio iti tunggal maysa ti kasayaatan a remedio iti panagimbubukod ken indibidualismo a kasla gagangay unayen.

Rebbengen pay dagiti nagannak a mangisuro iti annakda iti maaramat a pannakaammo malaksid kadagiti pagbatayan ti ebanghelio. Agkaykaysa dagiti pamilia no agtitinnulongda nga aramiden dagiti napateg a banag. Dagiti minuyongan ti pamilia ket mangbangon iti linnangen ti pamilia. Ti naragsak a padpadas ti pamilia ti mangpapigsa iti begkes ti pamilia. Ti kamping, aktibidad iti isports, ken panagaliwaksay ket nangnangruna a napateg a mangbegkes iti pamilia. Nasken ti pamilia a mangbukel iti panagtitipon ti pamilia tapno lagipen dagiti kapuonan, a mangitunda iti templo.

Suruan koma dagiti nagannak dagiti annak iti kangrunaan a paglaingan ti panagbiag, agraman ti panagobra iti arubayan ken balay. Ti panagsursuro kadagiti pagsasao ket maaramat a panagsagana para iti serbisio ti misionario ken moderno a biag. Dagiti mannursuro dagitoy a subject ket mabalin a nagannak wenno lelang/lelong ken miembro a kabagyan. Dumur-as dagiti pamilia no agsursuroda kas ragup ken agiinnumanda maipanggep ti amin a pakaseknan maipanggep iti pamilia ken miembrona.

Adda mabalin nga agkuna, “Ngem awan ti panawenmi para iti aniaman kadagita.” Tapno adda oras nga aramiden no ania ti pudno a napateg, masarakan dagiti nagannak a maiturongda ti pamiliada a nasamay no iddependati amin a teknolohiada. Nagannak, laglagipenyo a ti talaga a kayat dagita nga ubbing iti pangrabii ket oras a kaduadakayo.

Umay dagiti naindaklan a bendision iti pamilia no aggigiddanda nga agkararag, agparintumeng iti rabii ken bigat tapno agyaman kadagiti bendision ken ikararagan dagiti gagangay a pakaseknan. Mabendisionan dagiti pamilia no aggigiddanda nga agdaydayaw iti serbisio ti Simbaan ken dadduma pay a debosional a setting. Mapapigsa pay dagiti begkes ti pamilia babaen dagiti estoria ti pamila, a mangparnuay kadagiti tradision ken sagrado a padpadas. Impalagip kadatayo ni Presidente Spencer W. Kimball a “dagiti estoria ti inspirasion manipud iti biagtayo ken dagiti kapuonantayo … ket nabileg a ramit iti panangisuro.” Masansan nga isuda ti kasayaatan a paggapuan ti inspirasyon para kadatayo ken kadagiti an-annabotayo.

Paneknekak ni Apo Jesucristo, nga isu ti Bugbugtong nga Anak ti Dios, ti Agnanayon nga Amatayo. Awisennatayo a suroten ti dana ti katulagan nga agturong iti nailangitan a panagtitipon ti pamilia. Dagiti bileg a mangilantip ti priesthood, nga iturong dagiti tulbek a naisubli iti Templo ti Kirtland, ket mamagtitipon a sangkamaysa kadagiti pamilia iti agnanayon (kitaen iti Doktrina ken Katulagan 110:13–16). Agdama a maar-aramatda iti umad-adu a bilang dagiti templo ti Apo iti intero a lubong. Pudno daytoy. Agbalintayo kadi a paset daytoy, ikararagko, iti nagan ni Jesucristo, amen.