Kumitaka iti Dios ken Agbiag

Idi naglabas a Hunio, napasamak ti nakaam-ames nga aksidente iti pagilian ti Lesotho iti makin-abagatan nga Africa. Maysa a bassit a bus nga adda sakayna a 20 nga agtutubo a babbai ti Maputsoe Branch ti Simbaan ken pito kadagiti liderda ti agbiahe nga agturong iti kabisera ti siudad, ti Maseru, para iti panagtitipon dagiti agtutubo a babbai manipud iti distritoda. Bayat ti panagbiaheda iti highway nga addaan dua a linia iti oras ti agsapa, adda maysa a kotse a sumabat kadakuada iti kasupadi a direksion, a mangpadpadas nga ag-overtake iti sabali pay a lugan, a simrek iti linia a pagtartarayan ti bus. Awanen ti panawen wenno oras tapno makaliklik iti pannakadungpar, ken iti uneg ti sumagmamano a segundo laeng, nagdidinnungpar dagiti lugan, nagtulidtulid iti kalsada, ket bimtak a gimmil-ayab.

Iti kadagupan, 15 a tattao ti natay iti aksidente, maibilang ditoy ti innem nga agtutubo a babbai, dua a lider ti Young Women, ken ti branch president ken ti asawana. Dagiti nakalasat, kapamilia, ken gagayyem ket nangipeksada iti nadumaduma nga emosion, karaman ditoy ti pananggura, depresion, ken uray pay pammabasol. Iti laksid dagitoy a rikna ken di masungbatan a saludsod, liniwliwada ti tunggal maysa ken immasidegda iti Dios babaen ti sagrado a musika, nasantuan a kasuratan, ken kararag, a nakasarakanda iti pannakaliwliwa. Nagpaneknek ti nakalasat nga agtawen iti sangapulo-ket-pito a ni Setso’ana Selebeli, “Ay-ayatennatayo ni Jesucristo ken kaduanatayo, uray pay nasaktan dagiti puspusotayo.”

Ladawan ni Jeffrey D. Allred, Deseret News

Maysa nga agtutubo a babai ken maysa a lider a naospital tapno maagasan ti pannakauramna ket nagkaduada a nagadal iti Libro ni Mormon. Kinuna ti maysa, “Iti nabiit pay a basbasaenmi iti Moroni, ket kuna ni Moroni ti eksakto a marikriknak. … No agsao, kasla kunkunana, ‘Masapul nga adalem dagitoy a balikas ta naisuratda para kenka tapno matulongannaka a lumasat iti daytoy.’”

Iti maysa a nagtitipon a serbisio ti pumpon para kadagiti natay, imbalakad ti Area Seventy a ni Elder Siyabonga Mkhize, “Nasken nga umasidegtayo amin iti Apo iti daytoy a panawen ket dawatentayo Kenkuana a liwliwaenna dagiti pusotayo ken … tapno lumag-an ti saem a mariknatayo.” Indagadag ti presidente ti Young Women manipud iti kabangibang a Leribe Branch, ni Mampho Makura: “Umasidegkayo iti Apo, ket sapulenyo ti pigsa nga umawat iti pagayatanna. Ni Jesucristo isu ‘ti pangulo ken mangpunno iti pammatitayo’ [Hebreo 12:2]. Saan a kumita iti adayo, ngem kumita Kenkuana.”

Kumita Kenkuana. Dagiti balikasna ti mangyallingag iti balakad ni Alma iti anakna a ni Helaman: “Kitaem a kumitaka iti Dios ket agbiagka.” Dinakamat ni Alma ti padas ni Lehi ken dagiti taona iti panangusar iti Liahona kas panangitulad: “Kas iti kalaka a mangikaso iti balikas ni Cristo, a mangitudo kenka iti nalinteg a dalan nga agturong iti agnanayon a kinaragsak, a kas iti panangikaso dagiti ammatayo itoy a kompas, a nangitudo kadakuada iti nalinteg a dalan nga agturong iti naikari a daga.” Kinuna ni Alma: “No kumitada mabalinda ti agbiag. … Ken no kumitatayo … mabalin nga agbiagtayo iti agnanayon.”

Iti sabali pay a gundaway, dinakamat ni Alma ti pagarigan ti gambang nga uleg nga intag-ay ni Moises idi nakagat dagiti nagkauna nga Israelita kadagiti nagita nga uleg. Imbaga ti Apo ken ni Moises nga agaramid iti pigura ti uleg ket ipangatona iti poste, nga addaan iti kari “a tunggal maysa a makagat, no kumita iti daytoy, agbiagto.” Inlawlawag ni Alma a ti gambang a pigura ket maitulad wenno mangisimbolo ken ni Cristo, a maipangato iti krus. Adu ti kimmita ken nagbiagda, ngem dagiti dadduma, kadagiti balikas ni Alma, “natangkenda unay” isu a dida kumita ket napukawda.

Dinamag ni Alma:

“No maimbagankayo babaen ti ikikitayo laeng tapno maimbagankayo, diyo kadi makita uray apagbiit, wenno patangkenenyo kadi ketdi ti puspusoyo a di mamati, ket agbalinkayo a sadut, ket diyo ikita dagiti matayo, tapno mapukawkayo?

“… Kumitakayo ngarud ket mangrugikayo a mamati iti Anak ti Dios, nga umayto a mangsubbot kadagiti taona, ken agrigatto ken matay a mangsubbot iti basbasolda; ken agungarto manen kadagiti natay, a mangipatungpal iti panagungar, a sumaklangto amin a tao kenkuana, tapno maukom iti maudi ken aldaw a panangukom, a maibatay kadagiti aramidda.”

Siempre, ti balakad a “kumita iti Dios ket agbiag” ket saan laeng nga addaan kaipapanan para kadatayo iti agnanayon no di ket aramidenna pay ti amin a nagdumaan ti kababalin ken kalidad ti mortal a biagtayo. Laglagipenyo dagiti balikas ni agtutubo a Sister Selebeli idiay Lesotho a nadakamaten—“Ay-ayatennatayo ni Jesucristo ken kaduanatayo, uray pay nasaktan dagiti puspusotayo.”

Iti kasasaad ti natnag a lubong—a sadiay agpungtot ti sairo ken sadiay imperpekto ti amin—nga addanto dagiti pannakaupay ken pannakasair, panagsagaba ken panagleddaang, pannakapaay ken pannakapukaw, pannakaidadanes ken kinaawan hustisia. Babaen laeng ti panagkita iti Dios a makapagrang-ay dagiti indibidual, pamilia, ken uray dagiti nasion. Insuro ni Presidente Russell M. Nelson, “Gapu ta ti Mangisalakan, babaen ti awan patinggana a Pannubbotna, sinubbotna ti tunggal maysa kadatayo manipud iti kinakapuy, biddut, ken basol, ken gapu ta napadasanna ti tunggal saem, danag, ken dagensen a napadasanyo, [kitaen iti Alma 7:11–13], kalpasanna bayat ti sipupudno a panagbabawiyo ken panagkiddawyo iti tulongna, maparmekyo daytoy agdama a saan a natalged a lubong.”

Awan ti kari a masansan a maulit-ulit iti nasantuan a kasuratan ti Libro ni Mormon ngem daytoy: “No tungpalenyo dagiti bilinko agrang-aykayo iti daga; ngem no saanyo a tungpalen dagiti bilinko, maipusingkayo iti sangok.” Ti nabiag a padas dagiti tao iti Libro ni Mormon iti las-ud ti adu a siglo ipakitana ti kinapudno dagitoy a balikas. Ti “panagrang-ay” kaipapananna ti panangtagiragsak iti panangiwanwan ken bendision ti langit iti biagda. Ti “panagrang-ay” kaipapananna ti pananggun-od kadagiti lebel ti pagimbagan ti ekonomia a namagbalin kadakuada a makikallaysa, mangpatanor kadagiti pamilia, ken agserbi kadagiti kasapulan dagiti dadduma. “Ti panagrang-ay” iramanna ti kabaelan a dumur-as iti labes ti rigat ken pannubok. Babaen iti parabur ni Cristo, “agtitinnulong ti amin a bambanag maipaay iti pagimbagan[da], .” pinatarnawna ida, ken pinaunegna ti relasionda Kenkuana.

Inlawlawag ni Alma a ti kumita iti Dios ket agtungpal kadagiti bilinna, agtultuloy nga umawag Kenkuana para iti suportana, makiuman Kenkuana iti amin nga aramidmo, ken bay-am a mapno ti pusom iti panagyaman Kenkuana iti aldaw ken rabii. Masarakan dagiti bilin ken balakad ti Dios kadagiti nasantuan a kasuratan ken balikas dagiti katulonganna. Dagiti prinsipio ken tarigagay a nadakamat iti “Ti Kaamaan Maysa a Waragawag iti Lubong” ket kapintasan a pagarigan. Sabali pay ket ti pangiwanwan a masarakan iti buklet a Para iti Pigsa dagiti Agtutubo. Ti tema ti Young Men ken Young Women para iti daytoy a tawen ket “Kumita ken Cristo,” a naadaw manipud iti makaliwliwa a panangiturong ti Apo kada Joseph Smith ken Oliver Cowdery: “Kitaendak iti tunggal panunot; dikayo agduadua, dikayo agbuteng.” Nadakamat itiPara iti Pigsa dagiti Agtutubo ti sumagmamano kadagiti kapatgan unay a bilin ken pagalagadan ti Dios ken mangisuro daytoy no kasano ti kumita iti Apo iti panagaramid kadagiti nasayaat a pangngeddeng. Daytoy ti maysa a pangiwanwan saan laeng a para kadagiti agtutubo ngem para iti amin kadatayo.

Kas maysa a napateg unay a pagarigan, addaan ti Para iti Pigsa dagiti Agtutubo iti napateg a panangiwanwan iti kapitulo a napauluan iti “Sagrado ti Bagiyo.” Isurona: “Tratuenyo ti bagiyo—ken dagiti bagi ti dadduma—nga addaan panagraem. No mangngeddengkayo maipapan iti panagkawes, estilo ti buok, ken panaglanglangayo, damagenyo iti bagiyo, “Daydayawek kadi ti bagik kas maysa a sagrado a sagut manipud iti Dios?”

ItiPara iti Pigsa dagiti Agtutubo dakamatenna pay: “Pagtalinaeden a sagrado ti seks ken dagiti panagrikna a mainaig iti seks. Nasken a saan a pagang-angawan wenno paglinglingayan dagitoy. Iti ruar ti kallaysa iti nagbaetan ti maysa a lalaki ken maysa a babai, dakes ti mangsagid kadagiti pribado, sagrado a paset ti bagi ti sabali a tao uray no sikakawes. Kadagiti panagpiliyo maipapan iti no ania ti aramiden, kitaen, basaen, denggen, panunoten, ipaskil, wenno iteksyo, liklikanyo ti ania man a naigagara a mangpataud iti nagartem a karirikna iti dadduma wenno iti bagiyo.”

Daytoy ti mangipalagip iti nabiit pay a balakad ni Presidente Nelson:

“Manmano a banag ti naparpartak a mangparikutto iti biagmo ngem iti panangsalungasing iti daytoy nadiosan a linteg ti [kinadalus ti dayaw]. Para kadagiti nakitulagen iti Dios, ti imoralidad ket maysa kadagiti kapartakan a wagas tapno mapukaw ti pammaneknekyo.

“…Ti bileg a mangpartuat iti biag ket maysa a pribilehio ti kinadiosan a pangipalugodan ti Nailangitan nga Ama nga aramaten dagiti mortal nga annakna. Gapuna, nangipasdek ti Dios kadagiti nalawag a pagannurotan iti pannakausar daytoy sibibiag, nadiosan a bileg. Ti pisikal nga intimasia ket para laeng iti maysa a lalaki ken maysa a babai a nakikallaysa iti tunggal maysa.

“Kaaduan iti lubong ti saan a mamati iti daytoy, ngem ti opinion ti publiko ket saan nga isu ti mangeddeng iti kinapudno. Impakdaar ti Apo nga awan ti narugit a tao a makagun-odto iti celestial a pagarian. No nagbalinkayo a narugit, ipakaasik kadakayo nga agbabawikayo. Umasidegkayo ken ni Cristo ket awatenyo ti karina iti naan-anay a pannakapakawan no naan-anay nga agbabawikayo kadagiti basolyo.[kitaen iti Isaias 1:16–18; Doktrina ken Katulagan 58:42–43].”

Laglagipenyo nga iti kari ti Libro ni Mormon, ti kasupadi ti kinarang-ay ket saan a kinapanglaw—naputeden daytoy manipud iti imatang ti Apo. Ti presensiana ket tumukoy iti impluensia ti Espirituna iti biag ti maysa a tao. Maaddan ti amin iti Lawag ni Cristo bayat ti yaayda ditoy lubong. Mainayon pay, adda dagiti mabuniagan ken umawat iti sagut ken mainayon a lawag ti Espiritu Santo. Isu ti mangisangbay iti inspirasion ken panangiwanwan, mangpasayaat ken mangpatarnaw kadagiti katutubo a sagut ken kabaelan ti maysa a tao, ken tumulong a mangliklik kadagiti dakes nga impluensia, nakapuy a pangngeddeng, ken pannagna kadagiti dalan nga awan pagtungpalanna.

Kas kadakayo, adda dagiti am-ammok a naminsan a nangtagiragsak iti sagut ti Espiritu Santo ngem gapu iti pannakapaayda a mangtungpal kadagiti bilin ti Dios napukawda dayta a bendision. Adda maysa a tao a malagipko a naibabawi ti panagbalinna a miembro iti Simbaan gapu iti panaglabsing. Kinunana a ti damo a reaksionna ket ti pannakariknana iti pannakasair. Nariknana a kinedngan isuna dagiti saan a perpekto a lider. Ammona a madi ti ugalina, ngem inrasonanna daytoy babaen ti panangitudona kadagiti biddut ken kinakapuy dagiti dadduma. Idi agangay, nangrugin a nakarikna iti nagin-awa nga estilo ti panagbiag iti ruar ti Simbaan nga awan ti obligasionna kadagiti calling ken namnamaen nga idadar-ay kadagiti serbisio ti panagdaydayaw ken panagserbi kadagiti dadduma.

Nagtultuloy daytoy iti sumagmamano a panawen, ngem nangrugi a nakarikna iti napalaus iti kinaawan ti Espiritu Santo—ti kaadda ti Dios—iti biagna. Gapu iti padas, ammona no kasano ti maaddaan iti gin-awa, pannarabay, ken panagtalek nga isangbay iti Espiritu iti inaldaw, ket iniliwna daytoy. Kamaudiananna, inaramidna ti kasapulan tapno agbabawi ken maikari manen iti pannakabuniag iti danum ken iti Espiritu.

Kasla awan patinggana ti panagsapsapul dagiti tao iti nadumaduma a pamataudan iti kaipapanan ti biag, ragsak, ken tulong. Kaaduan ti “kumitkita iti labes ti marka.” Ngem ditayo a nasken nga agbalin nga “ubbing, a maisabsabuag iti dalluyon, ken maipalpallatok iti tunggal angin ti doktrina [wenno uso].” Iti panangkitatayo iti Dios, makasaraktayo iti talna iti rigat, ken makapagtultuloytayo a dumur-as uray kadagiti panawen ti panagduadua ken naespirituan a karit. Makaawattayo iti pigsa iti panangsango iti oposision ken pannakaisina. Mabalintayo nga itunos ti pagdumaan ti idealismo iti agdama a realidad. Pudno, awanen ti sabali pay a wagas no di ti inordenan ti Dios a Mismo: “Kitaendak, ket maisalakankayo, amin nga ungto ti daga: ta siak ti Dios, ket awanen ti sabali.”

Ti panangkita iti Dios kaipapananna nga Isu ket saan laeng a maysa kadagiti prayoridadtayo; kaipapananna ketdi, nga Isu ti maysa a kangatuan a prayoridadtayo. Malagipko manen dayta nakaam-amak a panagdinnungpar idiay Lesotho idi napalabas a Hunio. Manipud iti pagiddaanna iti ospital, kinuna ti maysa kadagiti lider ti Young Women a nakalasat, a saan a mamati iti Dios sakbay a kimmappeng iti Simbaan, a ti panggepna ita ti mangtakuat no apay a naispal ti biagna. “Ti kanayon a panagserbi iti Dios ket no kasano a maaddaanakto iti sungbat, no addaanak iti sungbat,” kinunana. “Impagarupko idi nga ay-ayatek ti Dios, ngem ita a talaga, talaga, talaga, talaga, talaga nga ay-ayatek Isuna. Ita Isu ti [umuna] nga ipangpangrunak iti biagko.”

Paneknekak ti Ama, Anak, ken Espiritu Santo, nga iti naan-anay a panagkaykaysa ti balikas, kapanunotan, panggep, ken aramid ket isuda ti maymaysa a Dios, . a mabalintayo a sapulen ti amin a naimbag a banag. Paneknekak ti Pannubbot ni Jesucristo, a naggapuan ti bileg a mangtungpal iti daytoy nakaskasdaaw a kari: “Kitaendak, ken agituredkayo agingga iti panungpalan, ket agbiagkayto; ta itedko ti agnanayon a biag iti agitured agingga iti panungpalan.” Iti nagan ni Jesucristo, amen.