Mme Ediomi, Odudu, ye mme Eŋwɔŋɔ

Enyene-ubɔŋ Uŋwana—Kirtland Temple, otode Glen S. Hopkinson, idiwetke isio

Nsidi-ntak Emi Ediwak Temple Odude?

“Mme ebe-iso nnyin eketiŋ prɔfesi ete ke mme temple eyeyɔhɔ ofuri isɔŋ Edere ye Usuk America, mme isuɔ eke Pacific, Europe, ye ebiet ekededi,” President Eza Taft Benson (1899–1994) eketiŋ ke mme ediwak isua emi ekebede. “Edieke edinamde utom erifak oro ke ndaha emi anade nte enam, eyeyom ata ediwak temple.”

President Russell M. Nelson ete ke nnyin ibɔp mme temple ke usɔp-usɔp usuŋ mfin “koro Abasi eteme ete nnyin inam ntre. Mme edidiɔŋ temple aŋwam nnyin ndiook Israel ke ikpehe mbiba. Mme edidiɔŋ emi aŋwam ndibeŋe mbonowo emi ediŋwamde edibeŋe ererimbot idem nnɔ Edidi Ɔbɔŋ Ɔyɔhɔ Ikaba!”

Ke akam ndiberede Temple Kirtland, Joseph Smith ekebeŋe “ete kpukpru owo emi edidukde ito enyin-usuŋ okure Jehovah ekpekop odudu esie. …

“Ndien nnyin ibup fi, Edisana Ete, ete mme isuŋutom fo ekeme ediwɔrɔ ke ufɔk fo emi eyɔhɔde ye odudu fo, ndien yak enyiŋ fo odoro mmɔ ke idem, ndien yak ubɔŋ fo akanare mmɔ okuk, ndien mme angel fo eda ukara ke idem mmɔ” (Doctrine and Covenants 109:13, 22; edian ɔsɔŋɔ-ikɔ; se ŋko ufaŋ 23).

Ke ini ami ŋkekotde mme ufaŋ-ŋwed emi, ami ndikere mbaŋa ŋkukut Nephi eke mme ukperedem usen. Se ukem-ukem ikɔ oro ete: “Ndien edikem ete ami, Nephi, nkut odudu Eyenerɔŋ Abasi, ke enye osuhɔre odoro mme ndisana owo ufɔk Abasi Eyenerɔŋ, ye ke mbio ediomi Jehovah, emi eke esuande ke ofuri iso isɔŋ; ndien mmɔ ekeyɔhɔ ye ndinen ido ye odudu Abasi ke akwa ubɔŋ” (1 Nephi 14:14; edian ɔsɔŋɔ-ikɔ).

Ami mmenim ke ke mme temple ukperedem usen anam akpan utom ke ndinam prɔfesi Nephi ɔwɔrɔ-osu onyuŋ edi akpan-ŋkpɔ ɔnɔ ukpeme ye odudu emi ekeŋwɔŋɔde enɔ mme andinim ke akpanikɔ mbemiso Edidi Ɔyɔhɔ Ikaba.

Ediwak mme isua emi ekebede, kini ami ŋkenamde utom nte bishop eke ward ufɔkŋwed ntaifiɔk kiet, ami mma nehene ŋkop inemesit nto ŋkaiferi kiet ke ward mi. Enye osuk ɔnɔnɔ mi inemesit. Afo ɔmɔdiɔŋɔ enye nte President Emily Belle Freeman, Akwa Adaibuot Ŋkaiferi Iban. Ke etop akwa mbono eke mmi-mmi-emi, enye edikpep ete ke otode temple, Jesus Christ emenere nnyin ekesim nkoŋkoŋ ndaha ŋkpɔ Abasi.

“Ini ekededi eke ami mbede nduk enyiŋ-usuŋ ufɔk Esie, ami mmokop ntɔtuŋɔ ebuana ediomi ye Enye,” President Freeman eketiŋ. “Enam mi nsana ye Spirit Esie, nyɔhɔ ye odudu Esie, enyuŋ esio enim man mbɔp obio-ubɔŋ Esie.”

President Nelson esitiɔ ediwak ini abaŋa odudu Jesus Christ emi odude oto mme ediomi temple. “Ndibɔp idem fo ndian ye Andinyaŋa ɔwɔrɔ ke afo eyebɔ nsɔŋɔ Esie ye odudu erifak ” enye ama etiŋ. President Nelson ama ekpep ŋko ete:

“Nte nnyin inimde ediomi temple nnyin, nnyin imenyene akwa ufaŋ ndibɔ odudu Andinyaŋa ndisɔŋɔ-nda Jehovah. Ke temple, nnyin imɔbɔ ukpeme akpande mme mfiomo ererimbot.”

“Mme akpan edinam [Andinyaŋa] adian nnyin ye Enye oto ndisana ediomi itie-oku. Ndien, nte nnyin inimde ediomi nnyin, Enye ediyɔhɔ nnyin ye odudu Esie.ndikɔk nnyuŋ nnɔ nsɔŋɔ Didie ndien, ke nnyin idiyom odudu Esie ke mme usen ke iso.”

“Odudu ndisana-uwem emi mbon nnyin eyomde ke emi ye ke mme usen iso edi odudu Abasi Ete ye eke Eyen Esie, Jesus Christ. Nnyin ibɔ odudu Mmɔ ke ndinam nnyuŋ nnim ediomi ye Mmɔ.”

Imiyom odudu Heaven, iren ye iban, koro nnyin iduŋde ke ata idiɔk ererimbot. Ke odudu oro miduhe, nnyin idikemeke “ndiyɔ usen edidi esie” mme “ndida ke ini enye edibiɔŋɔde” (Malachi 3:2). Nnyin ifiɔk-ke ini emi usen oro edidide, edi ema ebebem iso edɔŋ isuŋutom Esie man “eketim usuŋ” ɔnɔ edidi Esie (Malachi 3:1). Edi, ererimbot isaŋake ke emem ibine usen oro

Nnyin iyom odudu ekeŋwɔŋɔde ndinɔ mme anam akpanikɔ ada aŋwam nnyin:

• Yak Abasi akan ke uwem nnyin.

• Ekabare-esit enyuŋ esaŋa ekpere Abasi.

• Ɔdiɔŋ, ɔdɔŋ-esit, ebe-iso, onyuŋ aŋwam.

• “ Ɔyɔ afanikɔŋ ye idomo, ye ubiak-esit nnyin nte ɔfɔnde”

• Iyekut emem ye idara ke Christ nte isaŋade usuŋ ediomi.

• Ebeŋe-idem “ebet usen nta-ikaŋ” ye “unɔmɔ-nsobo eke andidiɔk” (Doctrine ye Covenants 109:46).

• Enam utom Abasi ekure mbemiso Edidi Ɔyɔhɔ Ikaba Esie.

Ndise eke etiŋe Tucson Arizona Temple otode James Whitney Young

Mme Andikpeme eke Eriŋyaŋa

Utom ye ubɔŋ eke Ete eke Heaven edi “ndinam owo akan mkpa ikpɔkidem onyuŋ enyene nsinsi uwem” (Moses 1:39). Temple kiet-kiet ada nte ukpeme eke isɔŋ ke uduak erinyaŋa Abasi, owutde akpan ubiɔŋ-utom Andinyaŋa ke utom ye ubɔŋ oro.

Eyɔhɔde ye odudu Esie, ofuri erenowo ye iban emi enimde-ediomi--edɔde ndɔ mme idɔhɔ-- emi enehede enim ediomi temple eyebɔ eridiɔŋ ke uwem emi ye ke uwem eke edidide.

Pesident Nelson ɔkɔŋwɔŋɔ ke: Akpatre ŋkpɔ emi owo nnyin kiet-kiet idinamde edi ndidomo mbɔ odudu edidiɔŋ ke Ufɔk Jehovah, edian kiet nte mme ufɔkemana, inim ediomo emi ikanamde ke temple emi edinamde nnyin idot ndibɔ mkpon-nkan enɔ Abasi—enɔ eke nsinsi uwem. Mme edinam temple ye ediomo emi mbufo enamde do edi akpan-ŋkpɔ edinɔde uwem mbufo, ndɔ ye ekpuk mbufo nsɔŋɔ, ye ukeme mbufo ndikpan eŋwan andidiɔk. Ntuakibuot mbufo ke temple ye utom enamde do enɔ mbon ntɔŋɔ-ubon mbufo eyenɔ mbufo nka-iso ediyarare ye emem, onyuŋ ɔnɔ mbufo nsin-ifik ndisaŋa ke usuŋ ediom.”

Nte Apostle Ɔbɔŋ Jesus Christ, ami ntiŋ ikɔ-ntiense nte ke mme ŋkpɔ emi edi akpanikɔ.