पादरित्वको अधिकार र शक्तिद्वारा आशिषित

येशू ख्रीष्ट चर्चको प्रमुख हुनुहुन्छ । चर्च त्यो माध्यम हो जुन उहाँ पृथ्वीमा हुनुहुँदाको युगमा जस्तै सुसमाचारको यस अन्तिम युगमा मानवजातिलाई मुक्ति दिनका लागि आवश्यक कार्य पूरा गर्न उहाँले सिर्जना गर्नुभएको छ । चर्चका माध्यमद्वारा:

• उहाँले संसारभरि आफ्नो सुसमाचार घोषणा गर्न सक्नुहुन्छ ।

• उहाँको सेलेस्टियल अधिराज्यको करार मार्ग सहित—उहाँले बप्तिस्मा र अन्य सबै करारहरू प्रदान गर्न सक्नुहुन्छ ।

• उहाँले अनन्तकालका लागि परिवारहरूलाई एकताबद्ध गर्न सक्नुहुन्छ ।

• उहाँले मुक्तिका उपहारहरू यी बिना नै मृत्यु भएकाहरूलाई पनि प्रदान गर्न सक्नुहुन्छ ।

• उहाँले वर्तमानमा परमेश्वरका सन्ततिहरूको भौतिक आवश्यकताहरू पूरा गर्न सक्नुहुन्छ ।

यी महान् उद्देश्यहरू पूरा गर्न र मुक्तिदाताको पुनरागमनका लागि तयारी गर्न, चर्चलाई परमेश्वरको निरन्तर निर्देशन, अधिकार र शक्तिको आवश्यक छ । यस चर्च “सत्य र जीवित चर्च” हो (सिद्धान्त र करार १:३०) किनभने ख्रीष्टले आफ्नो पादरित्व, “परमेश्वरका पुत्रको रीतअनुसार पवित्र पादरित्व” (सिद्धान्त र करार १०७:३) का माध्यमबाट आफ्नो नेतृत्व र शक्ति प्रदान गर्नुहुन्छ ।

परन्तु यस पवित्र पादरित्वका लागि चर्च अनिवार्य रूपमा एक धर्मनिरपेक्ष सङ्गठन हुने छ जसले संसारमा राम्रो कार्य गर्ने छ तर उहाँको उपस्थितिमा अनन्त जीवनको प्रसन्नताका लागि परमेश्वरका छोरा र छोरीहरूलाई तयार पार्ने आधारभूत उद्देश्य प्राप्त गर्न शक्तिहीन हुने छ । यो पादरित्व र यस पादरित्वको कार्यलाई निर्देशन गर्ने साँचाहरू सहित चर्चमा अधिकार र रीत दुबै छ ।

“चर्चमा, सबै पादरित्वको अधिकार पादरित्वका साँचाहरू धारण गर्नेहरूको मार्गदर्शनमा प्रयोग गरिन्छ ।

“चर्चका योग्य पुरुष सदस्यहरूले पादरित्वको नियुक्ति र पादरित्वको विभागमा नियुक्तिद्वारापादरित्वको अधिकार प्राप्त गर्नुहुन्छ । चर्चका सबै सदस्यहरूले परमेश्वरको कार्य पूरा गर्नका लागि सहयोग गर्न उहाँहरूलाई दिइएको वा तोकिएको पदीय जिम्मेवारी प्रयोग गर्न सक्नुहुन्छ ।”

पादरित्वका साँचाहरूद्वारा परमप्रभुका प्राथमिकताहरू सदैव अनुग्रहित हुने छन् । उहाँको निर्देशनसँग मेल नखाने व्यक्तिगत विचारहरूलाई कसैले पनि अनुसरण गर्न सक्दैन । व्यक्तिगत लाभ र स्वार्थ खोज्ने पाखण्डीपनमा कोही पनि सफल हुन सक्दैन ।

चर्चका सदस्यहरूको घरमा पनि पादरित्वले महत्त्वपूर्ण भूमिका निर्वाह गर्छ । प्रथम अध्यक्षताका प्रथम सल्लाहकार, अध्यक्ष ड्यालिन एच. ओक्सले सिकाउनुभयो, “चर्चमा पादरित्वको अधिकार केवल उहाँको मार्गनिर्देशनमा प्रयोग गर्न सकिन्छ जसले कुनै कार्यका लागि ती साँचाहरू धारण गर्नुहुन्छ भन्ने सिद्धान्तमा आधारित छ तर यो परिवारमा लागू हुँदैन ।” बुबाहरूले पादरित्वका साँचाहरू धारण गर्ने कसैको निर्देशन वा अधिकार बिना—आफ्नो परिवारमा पादरित्वको अध्यक्षता र अभ्यास —परामर्श दिने, पारिवारिक सभाहरू आयोजना गर्ने, परिवारका सदस्यहरू वा अरुहरूलाई पादरित्व वा चङ्गाइका आशीर्वादहरू दिने, आदि गर्नुहुन्छ ।

“बुबा अनुपस्थित हुँदा र आमा परिवारको अगुवा हुँदा पनि यही सिद्धान्त लागू हुन्छ । उहाँले आफ्नो घरमा अध्यक्षता गर्नुहुन्छ र मन्दिरमा गरिएको इन्डावमेन्ट र बन्धनको कार्यद्वारा आफ्नो परिवारमा पादरित्वका शक्ति र आशीर्वादहरू ल्याउन महत्त्वपूर्ण भूमिका खेल्नुहुन्छ ।”

पादरित्व: आशीर्वाद दिने शक्ति

एक शब्दमा भन्नुपर्दा, येशू ख्रीष्टले पुनर्स्थापना गर्नुभएको पादरित्वको अधिकार र शक्तिको उद्देश्य आशीर्वाद दिनु हो । यसले चर्चका सदस्यहरूलाई चर्चमा, घरमा र विश्वभरि अरुहरूको सेवा गर्न र उनीहरूलाई आशीर्वाद दिनका लागि परमेश्वरको शक्ति प्रयोग गर्न सक्षम बनाउँछ । उहाँको मुक्ति र उत्कर्षको कार्य पूरा गर्न सदस्यहरू सहभागी हुनुहुन्छ, पृथ्वीमा परमेश्वरको अधिराज्यलाई अभिवृद्धि गर्नका लागि मुक्तिदातासँगै आफूमा निहित भन्दा धेरै परको दैवी उपहार र शक्ति प्रयोग गर्नुहुन्छ (हेर्नुहोस् सिद्धान्त र करार ६५:२, ५-६) ।

परमप्रभुले व्याख्या गर्नुभएको छ “यो ठूलो [मल्कीसेदेक] पादरित्वले सुसमाचारको प्रशासन गर्छ र अधिराज्यका रहस्यहरूका साँचा, परमेश्वरको ज्ञानका साँचा समेत धारण गर्छ ।

“त्यसकारण, यसका विधिहरूमा, ईश्वरीयपनको शक्ति प्रकट हुन्छ ।

“अनि यसका विधिहरू र पादरित्वका अधिकार बिना, ईश्वरीयपनको शक्ति मानिसहरूसामु शरीरमा प्रकट हुँदैन” (सिद्धान्त र करार ८४:१९-२१) ।

निश्चय नै, पादरित्वद्वारा प्रशासित समारोहहरू वा प्रभुभोजहरू विधिहरू हुन् जसद्वारा हामी परमेश्वरसँग बप्तिस्माबाट सुरु हुने र परमप्रभुको गृहमा प्राप्त गरिने करारहरूका माध्यमद्वारा निरन्तर रहने करार गर्छौँ । यी करारहरू पालना गर्दा हामी ख्रीष्टको प्रायश्चितको अनुग्रहद्वारा “प्राकृतिक” पुरुष र महिलाबाट सन्तहरूमा रूपान्तरित हुन्छौँ (हेर्नुहोस् मोसीयाह ३:१९) र परमेश्वरको सामु धर्मी र पवित्र बन्छौँ—निर्दोष र निस्कलङ्क—हुन्छौँ (हेर्नुहोस्सिद्धान्त र करार २०:२९-३१; ३ नफी २७:१६-२० ) ।

“येशू ख्रीष्टको सुसमाचारको पूर्णताको पुनर्स्थापना: संसारका लागि द्विशतवार्षिक घोषणा,”बाट प्रथम अध्यक्षता र बाह्र प्रेरितहरूको परिषद् द्वारा दिइएको यो उद्धरणले उपयुक्त सारांश व्यक्त गर्छ:

“हामी घोषणा गर्छौँ कि १८३० अप्रिल ६ मा सङ्गठित गरिएको पछिल्ला दिनका सन्तहरूको येशू ख्रीष्टको चर्च ख्रीष्टको नयाँ करारको चर्चको पुनर्स्थापना हो । यसको प्रमुख आधारशीला येशू ख्रीष्टको सिद्ध जीवन, उहाँको अनन्त प्रायश्चित्त र शाब्दिक पुनरुत्थानमा यो चर्च आधारित छ। येशू ख्रीष्टले पुनः एक पटक प्रेरितहरूलाई बोलाउनुभएको छ र उहाँहरूलाई पादरित्वको अधिकार दिनुभएको छ । उहाँले हामी सबैलाई उहाँमा र उहाँको चर्चमा आउन, पवित्र आत्मा, मुक्तिका विधिहरू प्राप्त गर्न र सदैव रहने प्रसन्नता प्राप्त गर्न आमन्त्रण गर्नुहुन्छ ।”