მღვდლობის უფლებამოსილებითა და ძალით დალოცვილნი

იესო ქრისტე ეკლესიის სათავეში დგას. ეკლესია არის იარაღი, რომელიც უფალმა შექმნა კაცობრიობის ხსნის აუცილებელი საქმის შესასრულებლად სახარების ამ ბოლო წყობაში, ზუსტად ისე, როგორც ეს იყო იმ წყობისას, როცა იგი თავად ცხოვრობდა დედამიწაზე. ეკლესიის მეშვეობით:

• მას შეუძლია გამოაცხადოს სახარება მთელ მსოფლიოში.

• მას შეუძლია შემოგვთავაზოს ნათლობა და ყოველი სხვა აღთქმა—მის ცელესტიალურ სასუფევლისკენ მიმავალი აღთქმის გზაც კი.

• მას შეუძლია სამარადისოდ გააერთაინოს ოჯახები.

• ის გვთავაზობს ხსნის ძღვენს, მათაც კი, ვინც მის გარეშე გარდაიცვალა.

• მას შეუძლია მზრუნველობა გაუწიოს ღვთის შვილების საჭიროებებს აწმყოში.

ამ დიადი მიზნების შესასრულებლად და მხსნელის დაბრუნებისთვის მოსამზადებლად ეკლესიას ესაჭიროება ღვთის მითითებები, უფლებამოსილება და ძალა. ეკლესია არის „ჭეშმარიტი და ცოცხალი ეკლესია“ (მოძღვრება და აღთქმები 1:30) რადგან ქრისტე, თავისი ხელმღვანელობითა და ძალით, მისი მღვდლობის მეშვეობით, ანიჭებს მას „ღვთის ძის წესის შესაბამი[ს] წმინდა მღვდლობა[ს] (მოძღვრება და აღთქები 107:3).

მაგრამ ამ წმინდა მღვდლობის გარეშე, ეკლესია არსებითად იქნებოდა საერო ორგანიზაცია, რომელიც სიკეთეს გააკეთებდა მსოფლიოში, მაგრამ უძლური იქნებოდა საბოლოო მიზნის მიღწევაში - მოამზადოს ღვთის ძენი და ასულნი მარადიული სიცოცხლის სიხარულისთვის ღვთის გარემოცვაში. ამ მღვდლობით და მღვდლობის საქმის წარმართვის გასაღებებით, ეკლესიაში უფლებამოსილებაც და წესრიგიც არსებობს.

„მღვდლობის უფლებამოსილება ეკლესიაში სრულად ხორციელდება მღვდლობის გასაღებების მფლობელთა მიერ.

„ეკლესიის ღირსი მამაკაცი წევრები იღებენ მღვდლობის უფლებამოსილებას მღვდლობის მინიჭებისა და მღვდლობის წოდებებზე ხელდასხმის გზით“. ეკლესიის ყველა წევრს შეუძლია გამოიყენოს მისთვის მინიჭებული უფლებამოსილება, თუკი ის ხელდასხმით არის დანიშნული ან დავალებული აქვს ღვთის საქმის შესრულებაში დახმარების გაწევა“.

მღვდლობის გასაღებების მეშვეობით უფლის პრიორიტეტები ყოველთვის გაიმარჯვებს. ვერავინ შეძლებს ისეთი პირადი დღის წესრიგის შენარჩუნებას, რომელიც არ შეესაბამება უფლის მითითებებს. ვერავინ მიაღწევს წარმატებას მღვდლობაში, პირადი სარგებლისა და მიმდევრების მოპოვების ძიებაში.

მღვდლობა მნიშვნელოვან როლს თამაშობს ეკლესიის წევრთა სახლებში. პირველი პრეზიდენტობის პირველი მრჩეველი, პრეზიდენტი დალინ ჰ. ოუქსი, წერდა: „პრინციპი, რომ მღვდლობის უფლებამოსილების განხორციელება შესაძლებელია მხოლოდ იმ პირის ხელმძღვანელობით, ვინც ამ ფუნქციის გასაღებს ფლობს, ფუნდამენტურია ეკლესიაში, თუმცა ეს ასე არ არის ოჯახში“. მამები თავმჯდომარეობენ და იყენებენ მღვდლობის გასაღებებს თავიანთ ოჯახებში— აძლევენ რჩევას, ატარებენ ოჯახურ შეკრებებს, ანიჭებენ მღვდლობას ან განკურნების დალოცვას ოჯახის წევრებს ან სხვა პირებს და ა.შ.—მღვდლობის გასაღებების მფლობელთა მითითების ან უფლებამოსილების გარეშე.

„იგივე პრინციპი ვრცელდება, როცა მამა არ არის, დედა კი ოჯახს უდგას სათავეში. ის თავმჯდომარეობს საკუთარ სახლში და მნიშვნელოვან როლს ასრულებს ოჯახში მღვდლობის ძალისა და დალოცვების შემოტანაში, ტაძარში მისი შემოსვისა და ჩაბეჭდვის მეშვეობით.“

მღვდლობა: დალოცვის ძალა

ერთი სიტყვით, იესო ქრისტეს მიერ აღდგენილი მღვდლობის უფლებამოსილებისა და ძალაუფლების მიზანი კურთხევაა. ეს ეკლესიის წევრებს საშუალებას აძლევს, გამოიყენონ ღვთის ძალა ეკლესიაში სხვებისთვის მსახურებისა და დალოცვის მიზნით, სახლში და მთელ მსოფლიოში. წევრები უერთდებიან მხსნელს ხსნისა და ამაღლების საქმეში, იყენებენ რა ღვთიურ ნიჭებსა და ძალას, რომლებიც გაცილებით აღემატება მათ საკუთარ ძალებს, რათა დაეხმარონ ღვთის სასუფევლის ზრდასა და დედამიწის ავსებაში (იხ. მოძღვრება და აღთქმები 65:2, 5-6).

უფალმა ახსნა, რომ „ეს უმაღლესი [მელქიცედეკის] მღვდლობა განაგებს სახარებას და ფლობს სამეფოს საიდუმლოებათა გასაღებს, თვით ღმერთის ცოდნის გასაღებებსაც.

„ამიტომ, მის წეს-ჩვეულებებში გამოვლინდება ღვთისმოსაობის ძალა“.

„მისი წეს-ჩვეულებებისა და მღვდლობის უფლებამოსილების გარეშე ღვთისმოსაობის ძალა არ გამოვლინდება ხორცში მყოფი ადამიანისთვის“ (მოძღვრება და აღთქმები 84:19–21).

რა თქმა უნდა, წეს-ჩვეულებები არის მღვდლობის მიერ აღსრულებული ცერემონიები ანუ საიდუმლოებანი, რომლების მეშვეობითაც ჩვენ ღმერთთან ვდებთ აღთქმებს, დაწყებული ნათლობით და დამთავრებული უფლის სახლში მიღებული აღთქმებით. ამ აღთქმების დაცვით ჩვენ გარდავიქმნებით „ხორციელი“ ადამიანებიდან წმინდანებად, (იხ. მოსე 3:19) ქრისტეს გამოსყიდვის მადლის მეშვეობით და ვხდებით გამართლებულნი და განწმენდილნი—უცოდველნი და სპეტაკნი ღვთის წინაშე (იხ. მოძღვრება და აღთქმები 20:29-31; 3 ნეფი 27:16-20).

პირველი პრეზიდენტობისა და თორმეტ მოციქულთა ქვორუმის მიერ შედგენილი დოკუმენტიდან ეს ციტატა არის მოკლე შეჯამება:

„ჩვენ ვაცხადებთ, რომ უკანასკნელ დღეთა წმინდანთა იესო ქრისტეს ეკლესია, რომელიც დაარსდა 1830 წ. 6 აპრილს, არის ქრისტეს ახალი აღთქმის აღდგენილი ეკლესია. ეკლესიამ მყარად დაისადგურა თავისი ქვაკუთხედის, იესო ქრისტეს, სრულყოფილ ცხოვრებაში, მის გამომსყიდველ ძალასა და მის აღდგენაში, ამ სიტყვის სრული მნიშვნელობით. იესო ქრისტემ კიდევ ერთხელ მოიხმო მოციქულები და უბოძა მათ მღვდლობის უფლებამოსილება. იგი გვიწვევს ყველას, მივიდეთ მასთან და მის ეკლესიასთან, რათა მივიღოთ სულიწმინდა, ხსნის წეს-ჩვეულებები და ხანგრძლივი სიხარული“.