Gathi Ir Mornga’agen Got

Ir e Chitamangindaed, nrib fel’ ko bin nu fayleng e chitamangim. Dariy fan ni dakud nanged e yafos rodaed u m’on ko biney e yafos u fayleng ni ud moyed Rok’, ya Ir e manang daed ni rib polo’. Bay e dogur rok’ nib polo’ nibay e yiil’ riy, ni gadaed boed ya’an.

Fa’anra momaw’ ngom ni ngam tafney nag ya’an Got, ma ba’aray reb nrayag ni ngam tafney nag: Fare Fak, ni kanoeg Yesus Kristus ngak. Ga’ar Yesus Kristus, “I gag e kanawo’, me gag e tin riyul’, me gag e yafos: dariy be’ nrayag ni nge yan ngak e en ni Chitamangiy ya kemus ni gag e ra yan rog ngak. Kam nanged gag e chiney, ere bay kum nanged e Chitamag” (John 14:6–7). Biney e be yipfan, ni fa’anra gadaed ba’adag ni ngad nanged mornga’agen e Chitamangiy nu Tharmiy, ma rayag ni ngad sap gaed nga mornga’agen Yesus Kristus! Yow ba polo’ ni ta’areb fan row.

Ya Ir, era yuwegnem ngam sul ngak fare yafos ni manechubog nge fla’ab rok. I gur e gabay ni #1 nibe sap ngom! I Ir e dariy bangiyal’ memus rok’ ni woed gadaed. Mu non ngak u dakean e meybil ni demutrug ko ngiyal’. Nge mu’ mag motoyil ko rogon nima fulweg taban e meybil nib thilthil rogon.

Woed rogon Elder Dale G. Renlund ko fare Ulung ko fare Ragag nge L’agruwi Apostle ni michib nag, “Goal ko Chitamangindaed nu Tharmiy ni nge fanow nagdaed e gathi ke pag pifak ni ngar rrin’ed e tin nib mat’aw; ya pifak e ngar mel’eged ni ngar rrin’ed e tin nib mat’aw ni ngeyag ni ngar boded Ir” (“Choose You This Day,” Liahona, Nov. 2018, 104). Ra piningem, mara motochiyel nag ngom, mara fil ngom e tin nib riyul’, machane dariy bi’id nra chuweg fare puf mat’awoy ni ngam duugliy ni ngam laek.

Ya ir, e woed rogon ni yoeg Elder Patrick Kearon ko fare Ulung ko fare Ragag nge L’agruwi Apostle, “Got e gubin ngiyal’ ma be gayem,” biney e be yipfan ni dariy bi’id nra tal ko pi’ e ayuw ngom ni ngam sul Ngak. Manang ni gadaed gubin mab momaw’ e tin nira yib ngalan e yafos rodaed ma gadaedra mul. Arram fan nike pi’ kanawo’ ngodaed ni ngan be’ech nagdaed u tomuren nikad denen gaed ma gadaed pir’eg gelngin daed u dakean fare Bayul nibe yib u dakean Fak.

Tu’ufeg rok’ ngom e dariy bi’id manemus. Gab tu’uf rok’ e chiney, ndariy fan ni gabe rrin’ e denen! President Jeffrey R. Holland, ni’r e fare President ko fare Ulung ko fare Ragag nge L’agruwi Apostle e yoeg ban’en ni mornga’agen e biney nib riyul’ nib tomilang rogon: “Mub ni demuturug rogom,’ nike yoeg e Chitamangiy ngodaed, machane me uneg ngay, ‘Dam mub ni ngam par ni damu thilyegnem.’ Gadad ba falfalan ma gadaed tay u wun’dad ni Got e be athamgil ni nge thileydad ni ngad manged ni tha’bi mangil.” U fithik’ e tu’ufeg nge athamgil nibe pi’, Chitamangiy nu Tharmiy e be gay rogon ni nge ayueg daed ni ngad boded Ir ni ngeyag ni ngad thapaged gubin ban’en nibay Rok’.

Bin kanawo’en ni th’abi fel’ ni ngan nang ko mornga’agen e Chitamangiy nu Tharmiy e ngan ul’ul’ nang boech mornga’agen. Uw rogon? Mu fil mornga’agen nge fare Fak ulan fapi chep nib thothup nge fapi thin ko fapi profet nib fos. Meybil Ngak. Cha’ariy fapi motochiyel Rok’. Mu tay biyang ni nga’um, liyor ngak u galasia, fa ulan e temple, nge yuyang nib thothup. Fal’agin mag ngongliy fapi m’ag rom ngak Got. Ra ayuwegnem ngam nang mornga’agen nge rogon nibe tafney nigem.