Tin nib Riyul’ ni Mornga’agen e Yafos Rodaed

Gayed e tin nib Riyul’

Biney e yangar ni gadaed bay riy, bo’or e llowaen’ nibay nrayag ni ngan fil mornga’agen so somm’on. Somm’on riy, fa’anra gaba’adag ni ngam fil mornga’agen ban’en, mab tu’uf ni ngam man ngalan e library ngam sap nag mornga’agen. Ma chiney bay fare internet nge fon nrayag ni nge dag ngodaed mornga’agen gubin ban’en ni demuturug.

Somoel e ba’adag ni ngad fanayed e ayuw ko tin nib gonop ban’en nibay rodaed, machane ki yoeg ngodaed e bin ba’aray e mulwol: “Mu gayed u fithik’ e gonop magmed fil ngomed e thin ko gonop; arrogon, mu gayed mornga’agen ulan fapi babyor nib sug e thin riy ko gonop; mu gay mornga’agen ni ngam fil, ni ngam fil u fithik’ e mich” (Doctrine and Covenants 88:118). Mak ku be pi’ e athamgil ngodaed ni ngad filed mornga’gaen e fayleng nib liyegdaed (muguy ko Doctrine and Covenants 88:79; 93:53), machane ngiyal’ ni gadaed be gay mornga’agen e tin nib riyul’ ban’en, ma thingar da sap gaed ngak Got, ni’ir e “manang fan gubin ban’en, ni gubin ban’en ma bay nga mm’on rok’, … ma ir e bay nib tolang ko gubin ban’en, … ma gubin ban’en ma be pi’, nibe yib rok’” (Doctrine and Covenants 88:41).

Ko urngin mit e tin nib riyul’ nike pi’ Got ngodaed, reb ni’ir e def ko yafos rodaed u roy u fayleng e Ir e Chitamangdaed nu Tharmiy. Gadad e pifak ni gubin ni pumo’on nge bpin. Manangdad ma gadad bt’uf rok’ nib polo’. Ma gadaed ni pifak, e bay fal’ngindaed nib thothup nge fan nikad bad ngaray. Ran nangfan e pin’ey nib riyul’ ni dariy bi’id manemus e rayag ni nge pi’ e athamgil ngodaed, ngad nanged rogon daed, nge fandaed nike tawa’ath make powi’iydaed ulan fare bin somm’on e yafos ma kura ul’ul’ nge powi’iydaed e chiney i yaen nga mm’on.

Ud Moyed Rok’ e Chitamangiy ko Somm’on Riy

Napan ni bayda gayed e tin nib riyul’ ban’en “ko rogon ni’i moey,” ma bay da pir’egned fapi thin rok’ fare Tathapeg, ni’ir Yesus Kristus: “Ma arame chiney, e ngog ngomed, ka ug moy rok’ e Chitamangiy ko somm’on riy, ni gag e Somm’on nin Gargeleg,” nge “ni kagmed e ku’um moyed rok’ e Chitamangiy” (Doctrine and Covenants 93:21, 23).

U mm’on e yafos rodaed nga fayleng, kad uned ngareb e mo’olung u tharmiy ni weliy e Chitamangindaed nu Tharmiy e tafney Rok’ nge rogon nike tafney nag ni wo’en fare falfalaen’. Profet Joseph Smith e machib nag ni tafney rok’ Got nifan e wo’en nike duugliy e nge ayuwegdaed ni “ngad boded Ir [nge] … n’uf ngalang ko bin th’abi ga’ e falfalaen’ ni wod ir.” Fare muruwel rok’ e nge “mugu’uluy e yafos ni manemus mug machalbog nag e gidii’” (Moses 1:39).

Gadaed ma gay rogon i puf mat’awoy i dugliy ni ngan mel’eg wo’en e Chitamangiy nu Tharmiy. Kan tawa’ath nagdaed nikan gargeleg daed ngalan e biney e yafos, ni gadaed be ul’ul’ ko tin ni gadaed ba’adag ni ngad mel’egned ulan e biney e yafos, ni gadaed be fil rogon, ni gadaed be mon’og i yean ko fare yafos ni manechubog.

Napan e yafos rodaed u fayleng, ma ra yib e gafgow nge momaw’ ngalan e yafos rodaed. Machane dani tu’uf nikemus ni yigo gadaed ngak mo’oniyan’. Joseph Smith e machib nag ni Chitamangiy nu Tharmiy, “fare Galibthir ni Th’abi Fel’ u fayleng[,] e ma sap ko ga’angin e gidii’ ni’ir e ba matam nib gel e murnguy nge t’ufeg rok’.”

Chitamangdaed nu Tharmiy e, “ir e Chitamangiy nrib tarunguy e girdi’, ni ir fa’anem i Got ni urngin mit e ayuw me ir e be yib rok ngodad,” e ra tawa’ath nagdaed, me chubiy daed ngalang, me pi’ e gapas ngodaed ko “urngin e gafgow nge kireban’ nma yib ngodad, ni fan e nge yag nda ayuweged e pi’in ke yib urngin mit e gafgow nge kireban’ ngorad, ni gadad be maruwel ko fare ayuw ni yib ngodad rok Got” (2 Corinthians 1:3–4). Ni kabang ko fare wo’en e tonom rok’, ke ngongliy kanawo’en nrayag ni ngad suled Ngak.

Fare Kanawo’ Ngak e Chitamangdaed

Fare riyul’ ko “morngaʼagen bogi banʼen ni rogon ni bay” (Jacob 4:13) e ba tomilang: dabiyag ni ngad thapaged ga’angin fal’ngin daed ni gadaed pifak e Chitamangiy nu Tharmiy nikemus ni yigo gadaed rodaed. Yesus Kristus, ni’ir fare bin Somm’on i Fak e Chitamangiy ko ya’el, e m’ag nag ni nge mang fare Tathapeg rodaed nge Tabiyul rodaed.

Yesus Kristus, “fare Fak ni Ma’agirag Rok’ e en Chitamangiy, ni basug ko murnguy nge riyul’, ko wurengaen’ nge riyul’… e yib ni nge thapeg e dowef, ma par u fithik’ daed” (Doctrine and Covenants 93:11). Ke yib kabi dag ngodaed rogon ni ngad pir’egned e falfalaen’, nge kanawo’ ulan e biney e yafos nge yafos ni manemus.

“Ya Got e rib t’uf e girdi’ nu fayleng rok, ma aram me pi’ fak ni kari maagirag rok nge yib, ni fan e nge urngin e pi’in ni michan’ rad ngak e aram e dab kurm’ad, ya keyag e yafos ndariy n’umngin nap’an ngorad.

“Ya Got e de pi’ Fak nge yib ngaray nga fayleng ni nge turguy e gechig ko girdi’, machane ir e nge thapeg e girdi’ ngak Got” (John 3:16–17).

Fare yafos rok’ fare Tathapeg ko ngiyal’ ni’i moy u fayleng e rib ga’fan. “Dani thapeg ni ga’angin ko somm’on, machane ul’ul’ ko murnguy ko murnguy, nge mada’ ko ngiyal’ ni thapeg ni ga’angin yang” (Doctrine and Covenants 93:12). Il’aal nge mada’ ko ngiyal’ ni “fek gubin gelngin e rir rok fare Chitamangiy” nge “urngin gelngin, nibay u tharmiy nge fayleng, nge fare rir ko fare Chitamangin nibay rok’, ya ke par rok’ (Doctrine and Covenants 93:16–17). Fare Tathapeg e machib nag:

“Ku pi’ ngom e pi thin ney ni ngeyag ni ngam nangfan mag nang rogon ni ngam tayfan, mag nang ko mang e gabe tayfan, ni ngeyag ni ngamub ngak e Chitamangiy u dakean fithingag, ni bayi taw ko ngiyal’ riy mag thapeg ni ga’angin.

“Fa’an gara ayuweg fapi motochiyel rog ma gara thapeg ga’angin, ma yira yibliyem u dakeaneg ya Gag e gubay rok’ e Chitamangiy; ere, gube yog ngom, gara thapeg e garathia u dakean reb e garathia” (Doctrine and Covenants 93:19–20).

U dakean fare milay’ u Gethsemane nge dakean e kuruth, Yesus Kristus e fek nga dakean fapi denen ko fayleng me “gafgow ko pi amith nge kirbaenʼ nge pi lumel ni gubin mit” (Alma 7:11). Biney “e amith ni ta’ [Yesus] ’ni amith ni rib gel, ma ii yib ea racha’ ko gubin yang u doew” (Doctrine and Covenants 19:18). Makemus ni u dakean Yesus Kristus nge fare Bayul Rok’ nge fare Foskoyam’ e rayag fare Foskoyam’ riy nge n’uf ngalang ko bin ni th’abi tolang ko falfalaen’.

U dakean fare murunguy nge fare maligach rok’ fare Tathapeg, e rayag ni ngad mon’og gaed riy nge mada’ ko ngiyal’ fare rran ni ngad thapaged e polo’. Fa’anra gadaedra laek wo’en fare Tathapeg ma gadaed fol ko fapi motochiyel Rok’, ma rayag ni nge powi’iy daed ko fare wo’ nira fek daed nga gul’il’ungun e Chitamangiy nu Tharmiy.

Kristus u Dakean Fare pi’i Kanawo’ nga Jerusalem, Michael Coleman e ke fal’ag ya’an, dabiyag ni ngan fek ya’an

Gara Thapeg fare Tawa’athRok’?

U fithik’ gubin “morngaʼagen bogi banʼen ni rogon ni bay yib;” (Jacob 4:13), kad filed ni tin nra buch rodaed ko yafos ni manemus e be yaen u rogon e pin’en ni gadaedra mel’eg ni ngad laked Yesus Kristus nge thapeg fapi tawa’ath nike pi’. Fapi chep nib thothup e ke fil ngodaed ni gadaedra “falfalaen’ ko tin ni [gadaedra] adag ni ngad thapagned.” Kirbaen’uy ngay, ni bay boch e gidii’ ni dabi falfalaen’ ko tin ni adag ni ngar thapagned.” (Doctrine and Covenants 88:32).

Mission president rog, Elder Marion D. Hanks (1921–2011), ni’ir e pigpig ni reb fare General Authority ko fare Medlip i Ragag, e machib nag ngak fapi missionaries ni fith e tin ni gadaed ba’adag ni ngad thapegned e rayag ni nge pufthin nag e gin ni gadaed be sor ngay ko milekag rodaed nib thothup. “Dani mangil ni kan pi’ e tawa’ath ngak bee’, ma dabi fek fare tawa’ath?” Napan ni bay da thapagned fapi tawa’ath rok’ fare Tathapeg ni gadaed be gay rogon ni ngad laked Ir, mara falfalaen’daed ko fare athap ko yafos ni manechubog nge “ngak ni’ir e facha’ nibe pi’ [fare] tawa’ath” (Doctrine and Covenants 88:33). Biney e tawa’ath nikan pi’ ko tu’ufeg e “ire thʼabi felʼ ko gubin e pi tawaʼath rokʼ Got” (Doctrine and Covenants 14:7).

Got ir e Chitamangdaed nu Tharmiy. Manangem ma gadaed btu’uf rok’. Napan ni bay da sapgaed ngak ni gadaed be gay mornga’agen e tin nib riyul’, ma rayag ni ngad chichi’iyed pa’dad ko gonop, gonop nikan thapeg, nge tin nib riyul’, tu’ufeg, nge tomilang nibe yib Rok (muguy ko Doctrine and Covenants 88:40). Ma aram ma gadaed ul’ul’ ulan e yafos rodaed nge mada’ ko “fare ngiyal’ nra yib ni [gadaedra] nangfran gubin ban’en rok Got, ni wod rogon ir” (Doctrine and Covenants 88:49).

Binem e rran e ra mang ba rran ni rib fel’ ma ra falflalaen’uy ngay.